Molar um málfar og miðla 317

 Fréttaþulur Stöðvar tvö las óhikað (31.05.2010) Landsmót hestamanna,.... hefur verið aflýst. Hér átti auðvitað að segja  að Landsmóti hestamanna hefði verið af lýst. En þetta var ekki eina beygingarvillan í þessum fréttatíma Stöðvar tvö. Þar var líka sagt: .. um er að ræða .. ( þrjá seðlabankastjóra) ..auk Jónas Fr. Jónsson.  Hér hefði  átt að segja:.. auk Jónasar Fr. Jónssonar.  Á þessum bæ ráða menn illa við réttar beygingar móðurmálsins.

Lögreglufrétt ársins er í Fréttablaðinu (31.05.2010). Hún er svona:  Enginn slasaðist í minniháttar líkamsárás sem átti sér stað í Keflavík  aðfaranótt sunnudags. Að sögn lögreglunnar á Suðurnesjum var árásin stöðvuð í fæðingu.   Það var og !

Úr mbl.is (31.05.2010): Einnig hefur borið á því að veski kvenfólks á skemmtistöðum í miðborginni hefur verið stolið að kvöld og næturlagi...  Ekki alveg skýr hugsunin í þessu.

Meira úr mbl.is (31.05.2010): ....Magnús Scheving hafi þurft að afsala sér höfundaréttinum af sköpun sinni gegn 40% hlut í félaginu. Við þetta setningarbrot má gera tvær athugasemdir. Talað er um höfundarrétt, ekki höfundarétt og um höfundarrétt að einhverju en ekki af einhverju. Upphaflega  stóð þarna:  .. gegn 40% hluts í félaginu,en það var leiðrétt.  Ennþá meira úr mbl.is : Um eitt leytið missti ung stúlka stjórn á bíl sínum í lausamöl í Miðdal og fór bílveltu. Stúlkuna sakaði ekki. Klukkustund síðar missti ökumaður lítillar vinnuvélar stjórn ávélinni á Gjábakkavegi og fór bílveltu.Má spyrja?  Hvað er að fara bílveltu ?  Viðvaningum er greinilega treyst til að skrifa  fyrir okkur fréttir á mbl.is

 

Nú eru innlendar fréttir úr  fréttum  RÚV  útvarps, endurfluttar með mynd í sjö fréttum RÚV  sjónvarps ( 31.05.2010)

Regnið sem fylgt hefur storminum hefur valdið því að á annan tug flóða hefur flætt yfir bakka sína í landinu.  Hér hefur eitthvað farið úrskeiðis hjá þeim sem skrifaði þessa frétt í mbl.is (30.05.2010)

Athugasemdir

[Gísli Sigurðsson, 1.6.2010 kl. 17:40]

Ég bara varð að senda þér þessa klausu:

,,Fyrir það fyrsta þá er ég náttúrulega ekki sáttur með að Lárus Orri sé hættur, ég persónulega hefði viljað hafa hann áfram. Víst það fór svona þá verður það að vera þannig, við vorum þrír með þetta en erum nú tveir og munum klára þetta," sagði Páll Gísli í samtali við Fótbolta.net í dag.

Þetta er tekið af www.fotbolti.net

Það hefur borið á því að fólk er farið að segja víst þetta er svona og svona, í stað fyrst þetta er svona. Ég reikna með að þú hafir séð þetta líka.

[Ben.Ax. (Benedikt Jóhannes Axelsson), 1.6.2010 kl. 19:08]

Sæll. Málið hefur breyst mikið frá landnámsmorgni til þessa dags. Sumt er vafalaust gott en annað slæmt. Menn hefur lengi greint á um hvernig þróunin skuli vera. Sumir aðhyllast svokallaða hreintungustefnu, aðrir fagna flestum breytingum og svo munu þeir til sem finnst allt nógu gott sem er skiljanlegt. Ég er í hópi þeirra sem vilja fara bil beggja (allra). Samt vil ég gera þá kröfu að opinberar stofnanir reyni af fremsta megni að fara eftir reglum um málfar sem settar hafa verið. .is hefur sett strik í reikninginn finnst mér hvað varðar beygingar. Þar virðist allt verða að vera í nf. og er það hugsanlega vegna þess að fólki er ekki lengur treyst til að beygja einföld orð. (Þú sérð það á vísir.is) Annars er ég yfirleitt sammála þér og hef gaman af athugasemdunum. (Manni finnst gaman að einhverju en hefur gaman af hinu og þessu. Svona er málið stundum flókið). Að lokum sendi ég vísu sem ort var forðum um lögreglufrétt. Sagt var frá því að lögreglan hefði handtekið mann með grunsamlega ávísun.

Mér finnst lögreglan okkar aldrei treg.
Ekki vil ég hana á nokkurn hátt lasta.
En úr því að ávísunin var grunsamleg,
af hverju tóku þeir hana þá ekki fasta?

[Eiður Svanberg Guðnason, 1.6.2010 kl. 20:12]

 Þakka ykkur kærlega, Gísli og Benedikt,  fyrir   þessar ágætu athugasemdir. Þeir eru of margir  sem  vilja láta reka á reiðanum um þróun tungunnar. Þeir hafa verið kallaðir  reiðareksmenn. Auðvitað breytist tungan en  meginreglur ber að hafa í heiðri.