Molar um málfar og miðla 314

 Það setur óhug að Molaskrifara við að hlusta á fréttir af vaxandi spennu á Kóreuskaga. Eftir að hafa heimsótt  Norður Kóreu  tvisvar og lesið sér sæmilega til um þróun mála þar, veit hann að þeir  norðanmenn eru  til alls vísir. Við hverju er að búast  af  landi þar sem  farsíminn er tekinn af þér við komuna  til landsins? Ekki það  að  hægt sé að nota hann  nema  allra nyrst í landinu í grennd við  landamærin að  Kína. Landi þar sem milljónir hafa  dáið úr hungri og deyja  enn.  Sem betur  fer á þetta  land sér engan líka í veröldinni.

Einkennilegt , að ekki sé meira sagt, var orðalag í texta  í fréttum Ríkissjónvarps  (26.05.2010). Þar var sagt: ... hver og einn hættir lífi sínu hver  fyrir  annan. Verið var að segja  frá hermönnum í Afghanistan,sem hætta lífi sínu hver fyrir annan.

 Í sama  fréttatíma sama miðils var sagt: Hún lýsti yfir  skilyrðislausum  stuðning við Suður Kóreu. Þarna hefði átt að vera  þágufall orðsins  stuðningur , en það er  stuðningi. Lýsti yfir skilyrðislausum stuðningi... Í sömu frétt um spennuna á Kóreuskaga var sagt að upphaf  deilunnar hefði verið þegar suður kóreskt herskip sprakk á hafsvæði undan  Kóreuskaga. Ekki  fellir Molaskrifari sig   við þetta orðalag.  Tundurskeyti var skotið að skipinu með þeim afleiðingum að það sökk. Tundurskeytið sprakk og sökkti skipinu.

 Það er sóun á  starfskröftum hjá Ríkissjónvarpinu að láta Sigmar Guðmundsson,ritstjóra Kastljóss,  dandalast í Ósló í meira en viku í kringum Evróvisjónvitleysuna.

 Eftirfarandi barst  frá Molavin:

"Það var unnið markvisst að því að fækka drukknunum..." sagði "forvarnafulltrúi" í kvöldfréttum RUV áðan. Ekki beinlínis rangt, en óþolandi nafnorðafíkn þegar hægt er að koma sömu merkingu til skila með betra máli. Unnið var markvisst að því að færri drukknuðu.

Í sama fréttatíma talaði fréttaritari í Bandaríkjunum um áform manns um að sprengja farþegaþotu "í loft upp" yfir Detroit borg. Þegar myndlíkingar af þessu tagi eru notaðar án undantekninga og í fullkomnu hugsunarleysi, hætta þær að hafa áhrif. Það nægir að segja "að sprengja farþegaþotu".

Takk fyrir þetta  Molavin.

Þotu frá United Airlines lenti í svo mikilli ókyrrð á Atlantshafi að þrír um borð slösuðust, segir visir.is (25.05.2010). Þetta á auðvitað að vera: Þota frá United Airlines lenti í svo mikilli ókyrrð...

Athugasemdir

[Sigurður Hreiðar, 27.5.2010 kl. 12:14]

Sýnist þú hafa orðið fyrir einhverri truflun við gerð þessara mola, félagi Eiður. Þarftu ekki að endurskrifa aðra málsgrein alveg? – Mbkv.

[Eiður Svanberg Guðnason, 27.5.2010 kl. 12:41]

Kærar þakkir, Sigurður  Hreiðar. Þarna  hafði skotist inn setningarbrot, sem  þar átti  alls ekki heima.  Vona að þetta sé í lagi núna.

[Egill Þór (IP-tala skráð) 28.5.2010 kl. 05:38]

... er ekki kominn tími á að þú hættir þessum skrifum þínum, Eiður?

Það er varla að maður lesi þetta án þess að verða var við villur! Og afsakanirnar þínar eru heldur aumlegar; "skotist inn setningarbrot"..., "læðst inn" eða bara hvað sem er!

Ég er ekki mjög greindur maður og kannski ekki sá besti í íslenskunni EN mér finnst þessi skrif þín hálfgerð móðgun við íslenska tungu yfir höfuð!

Hverju ertu eiginlega að halda fram? Að "við hin" séum bara aular og vitleysingar sem höfum engan rétt á að tjá okkur?

Vissulega mætti betrumbæta texta í hinum ýmsu fjölmiðlum en auðvitað gerum við mistök stundum!

En að eyða allri okkar orku í að leita þau uppi finnst mér frekar "lame" !!

p.s. ég les þig nú samt alltaf ;) !!

p.p.s ég varð að setja eitt enskt orð inn, hehe!

[Jóhanna (IP-tala skráð) 28.5.2010 kl. 11:25]

DV 27. maí 2010:

Er ekki full ástæða til að gera athugasemdir við fréttir sem skrifaðar eru af fréttamönnum sem kunna ekki að beygja orð, eins og t.d. orðið „faðir“ í þessari frétt:

… Sonurinn var með skeflingarsvip er faðir hans lýsti því hvernig hann vildi losna við hann. Er nokkrir vegfarendur sýndu drengnum áhuga og fóru að spyrjast fyrir um hversu mikið hann borðar á dag þá réðust reiðir vegfarendur á faðirinn. Lögreglan var mætt á vettvang skömmu síðar og handtók faðirinn. …

[Eiður Svanberg Guðnason, 28.5.2010 kl. 16:24]

 Jú , Jóhanna. Það er svo sannarlega ástæða til þess. Því miður virðast sumir  sem fást  við fréttaskrif algjörlega ókunnugir grundvallarreglum tungunnar. þannig er nú það.