Molar um málfar og miðla 288

 Stórskemmtilegt var að hlusta á frásagnir  Eiríks  Kristóferssonar  skipherra í samtali  frá árinu 1966 við Jónas Jónasson (Rás  eitt, RÚV 11.04.2010). Eiríkur  talaði vandað mál, enda af þeirri kynslóð og  ekki langskólagenginn. Hann talaði um myrkhræðslu, ekki myrkfælni (bæði orðin að sjálfsögðu góð og gild) og  hann sagðist hafa  sett stefnuna þannig að þeir væru langlausir við Þormóðssker. Þetta orðalag hefur Molaskrifari ekki heyrt áður, en  það er vissulega skýrt og skiljanlegt. Útvarpsmenn eiga að gera sér tíðförulla í gullkistu RÚV. Þar er  sægur af samtölum Jónasar og fleiri góðra  útvarpsmanna, sem eiga erindi við samtímann, þótt komin séu til  ára sinna.

  Ummæli Sigmars Guðmundssonar um „fjölmiðlahórerí" hafa valdið fjaðrafoki hjá ráðamönnum RÚV. Sigmar sagði aðeins það sem margir hafa hugsað. Þetta voru þörf orð. Sannast nú hið  fornkveðna, að sannleikanum verður hver sárreiðastur. Ekki neitar Molaskrifari  því, að honum finnst Kastljósið stundum feta tæpan stíg í þessum efnum. Enginn fjölmiðill kemst þó með tærnar þar sem Útvarp Saga hefur hælana þegar að þessu kemur. Þar eru heilu þættirnir lagðir undir auglýsingar tiltekinna fyrirtækja. Þar eru  oft engin mörk milli dagskrárefnis og auglýsinga. Þetta heitir að misbjóða  hlustendum. Svo má nefna það í framhjáhlaupi, að  aðeins einn af þeim þremur, sem flestar auglýsingar lesa þar á bæ, hefur þægilega  útvarpsrödd.

 Í kynningu á daksrá  RÚV (11.04.2010) var talað um að þjóna hlutverki. Molaskrifari  er því vanur að talað sé um að  gegna hlutverki. Hinsvegar er talað um að eitthvað þjóni ekki neinum tilgangi. Það hvarflar stundum að Molaskrifara hvort það þjóni nokkrum tilgangi að gera athugasemdir við málfar í fjölmiðlum.

 Fáránlegt orðalag var í fréttum Ríkissjónvarpsins (11.04.2010) þegar sagt var frá fyrirhuguðum umræðum um skýrslu rannsóknarnefndar Alþingis á Alþingi. Þá var sagt, að formenn stjórnmálaflokkanna mundu flytja erindi um skýrsluna.  Á Alþingi flytja menn ræður, ekki erindi. Þetta eiga fréttamenn að vita ! Fréttamaður, sem þekkir ekki muninn á ræðu og erindi, ætti að læra móðurmálið betur.

Lánalínu kastað til Grikkja. Fín fyrirsögn í Mogga (12.04.2010)

  Látlaus viðhöfn var á flugvellinum í Varsjá, höfuðborg Póllands, þegar hermenn báru kistu forsetans út úr flugvélinni.(visir.is. 11.04.2010). Hér sýnist Molaskrifara, að fréttamaður hafi  ruglað saman orðunum athöfn og viðhöfn, sem auðvitað eru ólíkrar merkingar.

Athugasemdir

[Sigurður Hreiðar, 12.4.2010 kl. 13:11]

Orð í tíma töluð, eins og vanalega, Eiður. Er samt eilítið hugsi yfir athugasemd þinni um að þjóna hlutverki. Þetta held ég að mér sé tamt og hafi verið um dagana og hafi lært sem barn: Þetta er ónýtt, það þjónar ekki lengur sínu hlutverki. Enda náskyld merking að þjóna og gegna.

En umfjöllunin minnir mig á að nú stunda allir kynlíf, líka þeir sem eiga skyndikynni og gera bara einu sinni dodo með þeim tiltekna félaga. Eg vil heldur að fólk iðki kynlíf. Mér finnst það að stunda fela í sér stöðuga endurtekningu.

Það er nefnilega, eins og felst í spjalli þínu, ekki alltaf sama hvaða sögn er notuð um tiltekna atburði.

[Eiður Svanberg Guðnason, 12.4.2010 kl. 17:57]

 Þetta er rétt hjá þér, Sigurður Hreiðar. Ég hef   sagt heldur of mikið.  Að þjóna hlutverki og  gegna hlutverki  er að  líkindum  jafngilt, - jafngott.

[Kalli Sveinss (IP-tala skráð) 13.4.2010 kl. 14:26]

Einlægi Eiður !

 Jú, það sannarlega þjónar tilgangi að gera athugasemdir við málfar í fjölmiðlum.

 Haltu áfram því góða verki.

 Þú og " Kalli Sveinss.," voru ósparir á gagnrýnina  í þá gömlu góðu daga í Útvarpsráði !

 Of margar rekagáttir í fjölmiðlum !