Molar um málfar og miðla 285

 Molaskrifari er einkar íhaldssamur.  Hann hefur jafnan  hlustað á morgunfréttir RÚV  oftast bæði klukkan   sjö og átta. Hann hefur nú  uppgötvað að  morgunfréttir Bylgjunnar  eru oftast betri.  Betra er seint en aldrei, segir líklega einhver. Starfsmannafjöldi og  mikill kostnaður  við fréttastofu skiptir   ekki  sköpum í þessu   tilliti.

  Fréttir Bylgjunnar  klukkan tólf á hádegi eru líka ágætar.  RÚV er með stutt  fréttaágrip virka  daga klukkan tólf á hádegi. Hversvegna ekki  á laugardögum og sunnudögum ? Hversvegna eru ekki fréttir á sömu tímum um helgar og á  virkum dögum? Er ekki fólk á vakt?  Hið nýja hádegisútvarp, sem  tekur við af fréttaágripinu klukkan tólf hefur hvorki orðið  fugl né fiskur, - ekki ennþá allavega. RÚV heldur sig  enn við að  vera með  aðalfréttatíma  dagsins klukkan 12 20. Þetta var víst upphaflega hugsað þannig, meðan allir  fóru heim í hádegismat, að menn næðu fréttum og  gætu svo farið aftur  til vinnu klukkan 12 45. Nú fara menn ekki lengur heim í hádegismat en RÚV situr fast í þessar  tímasetningu.

Hvað fór ykkar á milli ? Svona spurði fréttamaður  RÚV sjónvarps  yfirlögregluþjóninn á Hvolsvelli í   viðtali  um leitina að fólki  sem  hafði yfirgefið bíl sinn á öræfum, með hörmulegum afleiðingum eins og síðar kom í ljós. Hvað fór  ykkur  í milli?,  hefði fréttamaður átt að segja. Fréttastofa  ríkisins gerir ekki alltaf miklar  kröfur um málfar fréttamanna.

Stofnanamáls sér víða stað. Í þættinum  Samfélagið í nærmynd, þar sem oft er áhugavert efni  (RÚV 31.03.2010), var rætt  við formann Landsbjargar um björgunarsveitir og eldgosið á Fimmvörðuhálsi. Í þættinum talaði umsjónarmaður um að margt hefði breyst  frá því síðast varð stórgos hér á landi. Hann sagði: „...almenningur er orðinn meiri... umfangsmeiri stærð." Hann átti  við að fólki hefði  fjölgað.

Tollvörðum á John Lennon-flugvellinum í Liverpool á Englandi grunaði að ekki væri allt með felldu ....Stóð í dv.is (06.04.2010). Tollvörðum grunaði.... Átti  að vera: Tollverði grunaði...

Enn koma  aðilar við sögu. Úr mbl.is (06.04.2010): Stillt var til friðar og að því loknu var aðili færður til yfirheyrslu.  Lögregla kom nefnilega auga á poka með ætluðu maríjúana inni í íbúðinni sem lagt var hald á. Molaskrifara  fellur  líka  illa að sjá talað um ætlað maríjúana.

Alþingismaður, sem reyndar er mikill bögubósi, talaði í útvarpsviðtali (RÚV  06.04.2010) um  að ... biðja afsökunar fyrir að hafa tekið  þátt...  Fólk biðst afsökunar á  einhverju, ekki  fyrir eitthvað.

Hvað annað fólst í aðkomu Íslendinga að myndbandinu  skelfilega frá Bagdad, en að  hlusta grannt á  það sem sagt var og og semja neðanmálstexta ?  Fjölmiðlar gera mikið úr  aðkomu RÚV og  tiltekins þingmanns. Það var svo sannarlega   þarft verk að  birta þetta, en  hvað annað var gert en að þýða textann ? Það hefur hvergi komið fram.

Athugasemdir

[Þorgrímur Gestsson (IP-tala skráð) 7.4.2010 kl. 14:46]

Öll tæknivinna, þ.m.t. klipping og hljóðsetning, var unnin hér. Það var raunar gert utan RÚV en ætli sé ekki átt við að Kristinn Hrafnsson sem átti víst talsverðan hlut að máli við vinnslu myndbandsins, m.a. heimildaöflun, fór til Bagad ásamt tökumanni og hefur væntanlega komið heim með efni tengt þessu hryggilega máli.

[Vilhjálmur Örn Vilhjálmsson, 7.4.2010 kl. 22:28]

Stundum varpar þú fram góðum spurningum, Eiður Svanberg. Þingmaðurinn hélt að sími hennar væri hleraður vegna þess að hún var að vinna fyrir Wikileaks í stað Alþingis. Þýðingar og textagerð getur verið varhugaverð iðja, en vart leitt til þess að menn þurfi að óttast að "Stóri Bróðir" sé að kíkja yfir öxlina á þeim. 

[Sigurður Hreiðar, 9.4.2010 kl. 10:59]

Til viðbótar um grun: Ég hef þráfaldlega heyrt tekið svo til orða í RÚV að „grunur leikur á um“ e-ð. Verð að viðurkenna að þetta „um“ fer fyrir brjóstið á mér.

Viðurkenni að ég hef ekki séð alla málfarspistla þína, hélt líka að þú væri farinn frá mbl.is. En ugglaust hefurðu einhvern tíma tekið fyrir þá áráttu fréttamanna að segja að eitthvað sé „líkt og“ þegar það er nákvæmlega eins og. -- Þetta fer líka fyrir brjóstið á mér og er þó ekki brjóstveikur svona almennt séð.

[Eiður Svanberg Guðnason, 9.4.2010 kl. 13:48]

 Þetta eru sannarlega réttmætar ábendingar,Sigurður Hreiðar, eins og þín var von og vísa. Ég hætti að blogga  á Moggabloggi, þegar ég hætti að kaupa Mogga. Svo gerðist ég áskrifandi aftur og  byrjaði þá að blogga á ný - pistlarnir birtast reyndar einnig á  Eyjunni.  Mér fannst nefnilega erfitt að lifa og vita ekki hverjir  væru  dauðir, - það var ein meginástæðan  fyrir því að  ég gerðist   áskrifandi að nýju.

[Sigurður Hreiðar, 9.4.2010 kl. 14:17]

Þetta þekki ég. Þegar ég hætti að fá Moggann í hendurna sem blaðamaður hætti fólk að deyja -- og byrjaði ekki aftur fyrr en ég gerðist áskrifandi að Mogganum. Það atvikaðist raunar þannig að konan mín gaf mér helgarákskrift að téðu blaði -- og þaðan var leiðin greið að fullri áskrift.

Ekki svo að skilja að ég sé sólginn í mannfall, en ég vil -- eins og þú -- eiga möguleika á að fylgjast með hverjir kveðja af gömlum samferðamönnum. Og þeir týna tölunni býsna hratt.

Mér datt ekki í hug að segja Mogganum upp þó Davíð skálmaði þar inn. Það hefði frekar verið þegar Óskar fór að segja upp sumum bestu starfsmönnum Moggans. 

[Vilhjálmur Örn Vilhjálmsson, 9.4.2010 kl. 14:18]

Já, færðu aftur Ligkistemagasinet? Leitt að vita til þess að blöðin séu að verða eins og Íslendingabók Tímans.