Köllum sendiherrann í Washington heim

  Í annað skipti á skömmum tíma er  leyniskjölum lekið í vefinn Wikileaks,sem samkvæmt blaðafregnum hefur haft innbrotsþjóf í vinnu á Íslandi. Lekinn er talinn vera í bandaríska utanríkisráðuneytinu.  Þetta hefur ekki gerst áður í samskiptum Íslands og Bandaríkjanna. Bandaríkin voru  fyrsta ríkið til að viðurkenna Ísland sem fullvalda  ríki 1944. Þau höfðu þá haft hér ræðismann frá  1940, sem  gerður var að  sendiherra  1941 (Envoy  Extraordinary and Minister Plenipotentiary). Árið 1955 var  sendiherraembættið  hér hækkað um gráðu og eftir það hét sendiherrann ambassador.  23  einstaklingar hafa verið sendiherrar Bandaríkjanna á Íslandi. Nú háttar svo  til að  enginn   bandarískur  sendiherra  er á  Íslandi og hefur ekki verið frá því  á  fyrrihluta árs  2009. Þetta er einsdæmi í samskiptum ríkjanna og er engin tilviljun, þótt erfitt sé að ráða í hversvegna Bandaríkjamenn lítilsvirða okkur með þessum hætti. Yfir sendiráðinu  á Íslandi er forstöðumaður,  settur  tímabundið (Chargé d’ affaires ad interim). Og öðru vísi mér áður  brá. Í sendiráðinu er enginn varnarmálafulltrúi. Varnarmálafulltrúi bandaríska  sendiráðsins á  Íslandi  er í bandaríska sendiráðinu í Osló ! Síðasti sendiherra  Bandaríkjanna  á Íslandi var Carol van Voorst. Hún fór héðan á fyrrihluta  árs  2009  eftir  fordæmislausa  sneypuför til Bessastaða, en  henni  hafði verið tilkynnt að sæma ætti hana fálkaorðunni og hefur hún verið búin að fá samþykki  bandaríska utanríkisráðuneytisins til að mega  þiggja orðuna. Skömmu áður en hún og maður hennar   renndu í hlað á Bessastöðum  var hringt í bíl þeirra  frá  forsetaembættinu og  sagt  að   sendiherrann fengi  enga  fálkaorðu . Þetta væri allt  misskilningur. Allt í plati. Slík framkoma þjóðhöfðingja við sendiherra, sem er að kveðja,  hlýtur að vera  einsdæmi í sögu diplómatískra samskipta og er auðvitað fáheyrður dónaskapur. Sagt var í fréttum ,að bandaríski sendiherrann hefði  skilið forseta vorn á þann veg, að þeir  einir  fengju  fálkaorðuna, „sem  hennar væru verðir”. Aldrei hefur  fengist fullnægjandi  skyring á þessari  fáránlegu  uppákomu. Hún var okkur til háborinnar skammar. Nú er senn komið ár síðan hér var síðast bandarískur  sendiherra. Varla  er  skortur á framboði  til  slíkra embætta í bandaríska stjórnkerfinu. Eitthvað annað veldur því,  að hér hefur ekki verið skipaður sendiherra. Svo bætist við, að  skjölum er kerfisbundið lekið  til lekavefsins  Wikileaks. Þá  hljótum við að íhuga að kalla sendiherra okkar  í Washington D.C. heim,  til skrafs og ráðagerða. Það ætti að gerast sem fyrst.  

Athugasemdir

[Eiður Svanberg Guðnason, 29.3.2010 kl. 21:04]

 Af óskiljanlegum ástæðum þurrkuðust öll greinaskil út, er ég  vistaði þessa færslu.

[Hildur Helga Sigurðardóttir, 29.3.2010 kl. 21:40]

Skiljanleg er færslan þó, Eiður -og atvikið í heimreiðinni að Bessastöðum var með þvílíkum ólíkindum, að það hefur kallað á skýringu æ síðan. Hvað gerðist þarna, sem varð til þess að þjóðhöfðingi Íslands ákvað að móðga og niðurlægja fulltrúa valdamesta ríkis í heimi með þessum hætti ???

Eitt af því sem ósköp einfaldlega verður að útskýra, hefur ekki verið gert hngað til, en haft sínar -skiljanlegu- afleiðingar.

[Þorsteinn Briem, 29.3.2010 kl. 23:59]

1. desember 1918 er miklu merkilegri dagur í okkar sögu en 17. júní 1944.

"Ísland varð sjálfstætt og fullvalda ríki 1. desember 1918 og fékk þá í hendur æðsta vald í öllum málum sínum, þ.á.m. utanríkismálum. En samið var um að Danir færu með utanríkismálin í umboði íslensku ríkisstjórnarinnar."

Meðferð utanríkismála - Utanríkisráðuneytið

[Þorsteinn Briem, 30.3.2010 kl. 00:16]

Eðlilega er bandaríska stjórnsýslan í fýlu út í kónginn á Bessastöðum, sem er þar að auki gamall kommúnisti.

Sendiráð Íslands í Moskvu var opnað árið 1944, áður en Seinni heimsstyrjöldinni lauk.

Sendiráð Íslands í Moskvu

[Svavar Örn Guðmundsson, 30.3.2010 kl. 10:15]

Af hverju á að kalla sendiherrann okkar heim frá Washington? þetta er leki sem án efa er verið að vinna í að uppræta.

Ekki var kallaður sendiherrann okkar heim frá Bretlandi þegar þeir settu hryðjuverkalögin á okkur.... hefur ekkert gott upp á sig að kalla sendiherrann heim útaf svona smámunum, ekkert merkilegt sem kom fram í þessum skjölum heldur.

Svavar

[Þorsteinn Briem, 30.3.2010 kl. 10:24]

Bretar og Hollendingar eru einnig í fýlu út í kónginn á Bessastöðum vegna IceSave-málsins.

"Í nóvember 2008 var haldinn fundur með ráðherrum Norðurlandanna og Rússlands en þá var Ólafur mjög harðorður og skv. minnisblaði sem lekið var til fjölmiðla átt forseti m.a. að hafa ávítað Norðurlandaþjóðirnar fyrir að hafa ekki komið Íslandi til hjálpar í fjármálakreppunni. Þann 16. febrúar 2009 ritaði Eiður Guðnason sendiherra harðorða grein þar sem hann taldi forsetann hafa sagt rangt frá ummælum sínum í boðinu."

Ólafur Ragnar Grímsson - Wikipedia

Á svig við sannleikann - mbl.is

[Einar Þór Strand, 30.3.2010 kl. 13:42]

Eiður bara ein heimskuleg spurning og hún er.  Hvers vegna í ósköpunum hefur maður á tilfinningunni að íslenska utanríkisþjónustan sé ekki að vinna vinnuna sína núna og hafi ekki gert það í eitt til tvö ár?