Molar um málfar og miðla 261

 Í hálfrar mínútu sjónvarpsviðtali í Ríkissjónvarpinu  (20.02.2010) tókst sigurvegaranum í prófkjöri Sjálfstæðismanna í Kópavogi að  segja  þrisvar sinnum ofsalega og einu sinni ofboðslega. Ofsaleg orðgnótt, -  ekki satt ?

 Í dægurmálaþætti á  Rás  eitt , RÚV, var nýlega sagt:  .... framkvæma  tvöfalt  lögheimili og  ...engin efnisbreyting sem þarf að breyta.  Rétt er að  fram komi, að það var  gestur í þættinum ,sem  notaði þetta  orðalag, ekki  starfsmaður  RÚV.

 Viðbúið er að skýrsla rannsóknarnefndar Alþingis verði frestað á ný ...  Ekki er  þetta  nægilega gott hjá þeim á vefmiðlinum  visir.is (17.02.2010). Þar flaska menn sífellt á  grundvallaratriðum málfræðinnar.

   Í fréttum Stöðvar tvö (18.02.2010)  var sagt: „... ekki dómurinn, heldur  álitshnekkurinn". Orðið hnekkur, er  ekki til  íslensku. Þarna átti að tala um álitshnekki, en hnekkir er  eintöluorð,sem þýðir, tjón,áfall eða  afhroð og álitshnekkir,  er  það þegar einhver  setur niður  að  virðingu  eða  trúverðugleik, eins og  orðabókin  segir.

Gera verður þá kröfu til þeirra sem sitja á Alþingi Íslendinga, að þeir séu þokkalega máli farnir, og  segi ekki eins og þingmaðurinn,sem rætt var  við  í  hádegisfréttum RÚV (19.02.2010)  „.... getum ekki landað verri samning en sá sem á að fella".  Molaskrifari lætur lesendum eftir að  greina villurnar í þessu  setningarbroti.

Athugasemdir

[Kjartan Sigurgeirsson, 22.2.2010 kl. 10:36]

Einhverra hluta vegna hef ég ekki rekist inn á þessa síðu þína fyrr en nú, en er ánægður með að hafa fundið einhvern sem hefur áhyggjur af þróun og notkun tungumálsins okkar. Sennilega telst ég seint sérfræðingur í málinu en mér líkar illa augljós misnotkun þess. Ég tók til dæmis eftir því í morgunblaðinu í dag að talað er um stóra byrgði, ég hélt alltaf að hún væri þung, eins er gjarnan talað um stórar fjárhæðir, hélt þær væru háar. En þakka þér, kem til með að skoða þessa umfjöllun þína í framtíðinni.