Takmarkalaust (landlægt) tillitsleysi

  Það skiptir miklu í umferðinni, að ökumenn taki tillit hver til annars , -- og ekki aðeins í umferðinni heldur líka á bílastæðum þar sem ákveðnar reglur gilda.

Hún var ekki sýnilega  líkamlega fötluð konan,sem lagði í stæði greinilega merkt fötluðum við Hagkaup í Skeifunni í dag 23. júní. Hún var að fara með  blómasendingu í Hagkaup og  taldi rétt að nota  stæði fatlaðra meðan hún erindaði sig.

  Svo var það jeppakarlinn, eða kerlingin, sem  þurfti meira pláss en allir aðrir á bílastæðinu við IKEA í  Kauptúni í gærmorgun.   Það er líklega rétt sem sagt hefur verið,að hér á landi sé landlægt virðingarleysi fyrir lögum og reglum. Kannski er það líka  svo að þeir sem ekki geta fylgt einföldum reglum á bílastæðum eiga líka erfitt með að  fara eftir öðrum reglum samfélagsins.

Þær  eru  nefnilega einkum fyrir aðra.

Molar um málfar og miðla 335

- Þú telur að þetta hafi ollið skaða ?  Úr frétt mbl.is (23.06.2010). Nú ættu  verkstjórar á  ritstjórn mbl.is að brýna  fyrir blaðamönnum sínum að nota ekki sagnorð, sem þeir kunna ekki með að fara.  Hér hefði átt að standa: Þú telur að þetta hafi valdið skaða ?  Hið aldna og forðum   virðulega Morgunblað  verður nú æ oftar að athlægi  fyrir ambögur.

 Ekki fellir Molaskrifari sig  við orðalagið: „Valgerður segist sumsé hafa grunað allan tímann að gengistrygging lána væri ólögleg", sem lesa má í DV (22.06.2010). Ég gruna ekki , heldur grunar mig.  Því hefði verið  betra að segja. Valgerður segir að sig hafi grunað allan tímann... eða: Valgerði grunaði allan tímann...

Morgunblaðið hefur á ný hafið birtingu soragreina Sverris Stormskers. Ekki er það  blaðinu til sóma.

Hugsanavillur  er ekki bara að finna  í pólitískum skrifum Morgunblaðsins. Slíkar villur er líka að finna í fréttum.  Úr mbl.is (23.06.2010): Rússar minnkuðu innflutning á gasi til Hvíta-Rússlands um 60% í morgun...  Rússar flytja út gas  til Hvíta Rússlands, en Hvíta Rússland flytur inn gas frá Rússlandi. 

  Kominn er til starfa  nýr  dagskrárstjóri Ríkissjónvarpsins, Sigrún Stefánsdóttir. Henni   er óskað velgengni í starfi. Vonandi ber hún gæfu til að standa vel  í  ístaðinu á  móti taumlausum yfirgangi íþrótta- og  auglýsingadeilda.

En það hvernig  staðið var að ráðningu nýs dagskrárstjóra, án auglýsingar, ber vott  um að Ríkisútvarpið er ekki lengur  OHF, opinbert hlutafélag, heldur EHF, einkahlutafélag.