Molar um málfar og miðla 262

 Fjögurra dálka  fyrirsögn var á bls. 7  í Mogga (22.002.2010): Tungumál mega ekki detta út. Vandað málfar? Ekki finnst Molaskrifara það.

Úr dv.is (20.02.2010): Lögreglunni á Suðurnesjum hefur þó ekki borist fleiri tilkynningar um slíkt athæfi í Garðinum. Hér hefði átt að  standa:  Lögreglunni á  Suðurnesjum hafa  þó ekki borist...

Í íþróttafréttum RÚV sjónvarps  var sagt (16.02.2010): Það var  mikil eftirvænting fyrir leiknum.  Réttara hefði verið að  segja: Leiksins var beðið með mikilli eftirvæntingu.

Halló Moggi ! Úr mbl. is (20.02.2010). Fréttin  byrjaði svona: 64 nemendum og áhafnameðlimum var bjargað í gær.Gömul  regla í  fréttaskrifum er að  byrja aldrei  frétt á  tölustöfum. Enn skal  minnst á orðið  áhafnarmeðlimur,  mbl.is   skrifar reyndar áhafnameðlimum.  Skelfilegt orð,  sem  hvorki ætti að sjást né heyrast. Meira úr  mbl.is (21.02.2010) þar segir: Bíllinn er mikið skemmdur og  brotnuðu undan honum  tvö eða þrjú dekk.  Að mati Molaskrifara hefði  hér átt að tala um hjól, en ekki dekk. Annars sýnist kannski sitt  hverjum um það.

  Í fréttum  RÚV  af mannskaðaveðrinu á Madeira (21.02.2010) var sagt , að  aftakaveður hefði gengið yfir  eyna en í fréttum Stöðvar tvö var sagt,  að stormur hefði gengið yfir  eyna. Tvímælalaust betur orðað hjá  RÚV.

  Eftirfarandi frétt  af visir.is  (23.02.2010)  er lýsandi  dæmi um kunnáttuleysi þess sem skrifar. Þá krefjast samtökin einnig að Birnu Einarsdóttur, bankastjóra Íslandsbanka, Árna Tómassyni, formaður skilanefndar Glitnis og Friðriki Sophussyni, stjórnarformaður Íslandsbanka, verði vikið úr bankanum og atvinnulausum aðilum boðið stjórnarstörfin í stað þeirra.