Molar um málfar og miðla CLIV

 Gott Silfur Egils (20.09.2009).   Ágæt umræða. Prýðisþýðing á  viðtali við  formann loftslagsnefndar Sþ.  Kastljósi  RÚV hrakar hinsvegar  með hverjum þætti. Þar þarf að að breyta. Þau  Sigmar og Þóra  klikka ekki í Útsvari,sem er með allra  besta  efni  RÚV.   Meðal annars vegna þess að  allir sem á horfa verða óbeinir þátttakendur í keppni liðanna. Fréttaauki Elínar og  Boga (20.09.2009), frásögnin  af litlu stúlkunni hér á Íslandi og  ástandinu  í Lettlandi var vel unnið og áhugavert efni. Ósjálfrátt fór maður að bera  saman  í huganum Ísland og  Lettland. Það setti eiginlega að manni  hroll. Svo kom einhver  gaur og þéraði menn í hástert uppi í Hveradölum !

Afleit villa slæddist inn í sjónvarpsfréttir  RÚV (20.09.2009) þegar  sagt var  frá Októberhátíðinni í München. Þá var talað um bavarískan prins.  Sá landshluti sem  hér um  ræðir  heitir á íslensku Bæjaraland (e. Bayern) og íbúar þar  eru bæverskir. München er höfuðborg Bæjaralands.Svo  er  Bæheimur (e. Bohemia) vestasti hluti Tékklands. Þeir sem  þar búa  eru bæheimskir.  Orðið bavarískur er ekki til á íslensku. Maður var að vona að fréttastofa RÚV  væri vaxin upp úr svona villum.  Svo er greinilega ekki.

Beygingafælni sér víða  víða stað. Í auglýsingu í Morgunblaðinu (19.09.2009) segir: Aðaleign félagsins  er fasteignin að Eyrarveg 2 ..   Hér   hefði átt að  standa  Eyrarvegi 2. Ríkisútvarpið  leggur  sitt  af mörkum   í þessu  efni þegar (19.09.2009) sagt er í dagskrárkynningu:  Fylgist með  Formúla þrjú... Áhorfendur  fylgjast ekki með eitthvað,  heldur  einhverju. Hér  hefði átt að  segja :  Formúlu þrjú.

Sérlega hallærisleg auglýsing var í  RÚV sjónvarpi (19.09.2009). Hún hljóðaði  svona:  Fitness Sport alltaf inni. Hrognamál, hrærigrautur. Engin  sía  virðist til staðar í auglýsingadeild RÚV. Sem þetta er pikkað á lyklaborð tölvunnar heyrir skrifari  auglýsingu í RÚV: Taxfree af búsáhöldum, Húsasmiðjan. Þessar auglýsingar eru, annars ágætu fyrirtæki, til skammar. Taxfree er enska. Auglýsingar í íslensku útvarpi eiga  að vera á íslensku. Í  reglum  Ríkisútvarpsins  um auglýsingar og kostun  dagskrárefnis segir orðrétt í 3.gr. 2.tölulið:Auglýsingar skulu vera á lýtalausu  íslensku máli.  Þess utan er það bull að tala um taxfree af einhverju og Húsasmiðjan hefur enga  heimild  til að sleppa  virðisaukaskatti af einu eða  neinu. Fyrirtækið   getur  hinsvegar veitt viðskiptavinum  afslátt  sem nemur  virðisaukaskatti á það sem keypt  er.

Fréttamaður  Stöðvar tvö (19.09.2009)  sagði:  .. fjórir og hálfur milljarðar. Í þessu  tilviki er það  hálfur sem  ræður því  að milljarðarnir eiga  að vera í eintölu. Þessvegna  hefði átt að segja: Fjórir og  hálfur milljarður

Þingmenn Framsóknarflokksins hafa sumir hverjir  tamið sér ljótara orðbragð  en heyrst hefur í íslenskri  stjórnmálabaráttu  í  áratugi. Þannig  segir  einn  helsti  talsmaður flokksins um ummæli  forsætisráðherra sem sagði að að  stjórnarandstaðan  hefði brugðist  trúnaði, að ummælin séu  ómerkilegur lygaáróður. Gífuryrði af þessu tagi  verðfella málstað þess sem lætur  sér svona lagað um munn fara. Stjórnmálamenn sem  svona tala  eru ekki vandir að virðingu sinni. Enn sannast hið fornkveðna, að sannleikanum verður hver sárreiðastur.