Molar um málfar og miðla CIX

 Í tíu fréttum RÚV  sjónvarps (21.07.2009)  var sagt: Davíð Bragi Konráðsson fornleifafræðingur  brá í brún þegar... Betur hefði  fréttamaður sagt: Davíð Braga Konráðssyni fornleifafræðingi  brá í  brún þegar..  Í sama fréttatíma  var sagt að Icesave málið væri  þungt á  fæti. Rugl. Kannski mætti   segja málið  þungt í vöfum, eða bara erfitt viðfangs.

 Af Vefdv (21.07.2009): ..þar sem gerðar eru athugasemdir við hjólbarða konunnar ...   Það sem  blaðamaður á  við er að gerðar hafi verið athugasemdir  við hjólbarðana  á  bíl konunnar.  Varla hefur konukindin verið á hjólbörðum.

Hvenær rífur þingmaður trúnað? Þannig  spyr bloggari á Moggabloggi. Þjóðin veit að margir þingmenn rífa kjaft. Bloggari  er ekki   góður í stafsetningu. Hann  hefði átt að  skrifa: Hvenær  rýfur þingmaður trúnað?  Rýfur af að rjúfa.

Venjuleg og algeng  ambaga í Vefmogga (22.07.2009): ..á flugvellinum í Toronto hafi heyrst tilkynnt í hátalarakerfinu að þeir sem hefðu keypt áfengi á vellinum væri ráðlagt að skila því.  Hér ætti  auðvitað að standa: ..að þeim sem hefðu keypt áfengi á vellinum væri ráðlagt að skila því.

Fyrirtækið Rekkjan og  auglýsingasmiður þess  halda áfram að misþyrma móðurmálinu í heilsíðuauglýsingum í  dagblöðunum  (Fréttablaðið 22.07.2009) þar sem  auglýst  eru svo kölluð  þrýstjöfnunarsvampsrúm.  Ef   fyrirtækið  væri að  auglýsa trérúm  hétu þau  væntanlega trésrúm í samræmi  við þetta! Að þessu hefur  raunar verið  vikið áður í Molum.