Molar um málfar LX

  Alkunna er að orð hafa stundum gjörólíka merkingu í eintölu og  fleirtölu. Bjarni Sigtryggsson, áhugamaður um móðurmálið, sendi Molum eftirfarandi:

 „Íslendingar eru átakaþjóð og vinna oft þrekvirki í skorpum. En fleirtölumynd þessa orðs hefur aðra merkingu og því brá mér er ég heyrði í upphafi þáttarins Samfélagið í nærmynd á Rás 1 á mánudag komist svo að orði:

"Kvenfélagasamband Íslands og Félag héraðsskjalavarða á Íslandi hafa
nú hafið átök um söfnun og varðveislu skjalasafna kvenfélaganna..."

Ég sé fyrir mér harða baráttu."    Takk fyrir þetta,Bjarni. Gaman  væri að fá  fleiri athugasemdir,  og  dæmi,  frá þeim sem  lesa þessa pistla.

Það er farið að harðna á dalnum hjá RÚV þegar umsjónarmenn tónlistarþátta (KK 22.04.) geta ekki farið  rétt með  nafn hins kunna og  fjölhæfa  útvarpsmanns Jónasar Jónassonar. Sami umsjónarmaður kynnti   kínverskt lag  með  ensku heiti og kínversku. Hann hefði að skaðlausu mátt sleppa enskunni og  segja í  staðinn  fyrir „Riding a Bicycle in Spring," „Hjólaferð  að vori."

Það er ótrúlegt hve oft  sömu  villurnar heyrast í ljósvakamiðlum. Gestur á Rás tvö sagði (22.04.) í morgun: „... vona  að þeim beri gæfu til..." Hefði að  sjálfsögðu átt að segja, að þeir beri gæfu til. Sami maður sagði svo: „... börnin blæða..." Börnunum blæðir,  hefði  hann betur  sagt. Í gamla daga, veit ekki hvort  svo er enn, þýddi sögnin að  blæða, að  borga eða splæsa, sem var annað  slanguryrði. „Hann var blankur, svo ég varð að blæða." „Ég splæsti á hann kaffi og  tertu."

Aðeins meira um   Rás  tvö. Ég gaf mér svolítinn tíma til að  hlusta á morgunútvarp Rásar tvö (22.04.). Á stuttri  stundu tókst umsjónarmanni að fara  rangt með  nafn  væntanlegs gests (Hjálmtýr, ekki Hjálmar)  og  rugla  saman  milljónum og milljörðum. Svo var sitt af hverju athugavert við upptalninguna á  atburðum, sem  áttu að hafa gerst þennan  dag á árum eða öldum áður. Þarna þarf aukna vandvirkni, eins og áður hefur verið bent á. Það voru alltof margar  ambögur  í máli umsjónarmanns (GG). Ríkisútvarpið  hefur lögbundnar skyldur  við tunguna. Það á ekki gera minni  kröfur til málfars á  Rás tvö en gert er á  Rás  eitt.

Fyrir nokkrum  dögum lá  leið  Molahöfundar um  fréttastofu RÚV. Þar voru þá  starfsmenn þýskrar  sjónvarpsstöðvar  að   taka  viðtal  við  Ingóllf Bjarna Sigfússon  um landsmálin, á þýsku. Samtímis voru starfsmenn ítalskrar sjónvarpsstöðvar að  ræða, á ítölsku, við Þóru Arnórsdóttur. Nöfnu hennar Tómasdóttur hef ég heyrt  tala  gullfallega norsku. Gott er að  RÚV skuli hafa á að skipa svo vel menntuðu og  reyndu  starfsfólki. Þetta fannst mér flott.