Molar um málfar LVIII

 Enn halda menn áfram að  „sigra keppni" í íþróttafréttum  fjölmiðla. Þannig var til orða tekið í Rúv  sjónvarpi (19.04.)  að „Everton  hefði sigrað  vítaspyrnukeppni". Knattspyrnulið  sigrar í  vítaspyrnukeppni  eða  vinnur keppnina. Þannig heyrði ég þetta, allavega. Ekki  vil  ég þó með öllu útiloka að mér hafi misheyrst. Sá sem  þetta  las  er nefnilega ekki  einn af bögubósunum.

 Í íþróttafréttum Stöðvar tvö (19.04.)  var sagt  að  tiltekið  íþróttalið hefði verið „í miklum vandræðum sóknarlega".  Sá sem  fréttina  skrifaði átti  við að sókn liðsins  hefði gengið illa. Þetta er auðvitað  ótækt  orðalag.

Stundum má gera langa sögu stutta:  Í  Vefmogga stendur (20.04.):„Íslenskir námsmenn í Horsens í Danmörku eru æfir yfir því að þeim hafi verið vísað frá þegar þeir hugðust taka þátt í þingkosningunum og greiða utankjörfundaratkvæði hjá ræðismanninum í bænum í dag ". Þarna  hefði mátt segja:  Íslenskir námsmenn í Horsens í Danmörku eru  æfir vegna þess að þeir gátu ekki kosið hjá  ræðismanninum í bænum í dag.

Hér  hefur áður verið   vikið að meðlimum, áhafnarmeðlimum og  aðilum. Meðlimir  voru á  ferðinni   Vefvísi, saman ber  eftirfarandi: „Meðlimir Björgunarfélags Hornafjarðar eru nú á leið á Öræfajökul ".  Þarna  hefði   til dæmis mátt nota orðið  liðsmenn, - ef  sagt  hefði verið  félagar úr  Björgunarfélagi, hefði mátt tala  um nástöðu. Vefvísir  hafði eftir  hæstaréttarlögmanni og þingmanni  (18.04.) að  það  væri „virðingavert" að  bankastjóri  skyldi hafa  beðist  afsökunar. Þarna vantaði   einn bókstaf - r - Þarna  átti  auðvitað að  standa virðingarvert.

„Gengi bréfa Marel Food  Systems falla í byrjun  dags", segir  Vefvísir í  fyrirsögn  (20.04.). Gengi er  eintöluorð og þarna ætti því að standa:  Gengi  bréfa Marel Food  Systems  fellur... eða:  Gengi bréfa Marel Food  Systems féll í byrjun  dags.

Steypustöð Sjálfstæðisflokksins

 Íslenskt  slanguryrði yfir  algert rugl er steypa. Þegar  sagt er  að eitthvað  sé  alger steypa þá er  það sem  sé  tóm  vitleysa eða  tóm tjara svo notað  sé  annað orðatiltæki. Þegar leiðtogar Sjálfstæðisflokksins tala  um að  ESB  sé  að   blanda sér í kosningabaráttuna á Íslandi og   sendiherra  ESB á Íslandi með  búsetu í Noregi sýni Íslendingum  dólgslega  framkomu þá  er rétt að  athuga hvað sá  ágæti  sendiherra  gerðist  sekur um.

  Afbrot hans var, að hann sagði, að  sú  tillaga  Sjálfstæðisflokksins,að  við fengjum Alþjóða gjaldeyrissjóðinn til að  aðstoða okkur  við einhliða  upptöku  Evru  væri hrein  vitleysa, tóm  tjara  eða  alger  steypa  svo  notað sé  slangur. Í viðtölum  sagði hann um þessa  vitleysistillögu, að  hún væri  „sheer nonsense"  eða  „rent  nonsense" eins og mér  heyrðist hann  líka  segja.

  Er það  „dólgsleg framkoma" að benda  kurteislega  á  að  tillaga um tilteknar aðgerðir  ríkjabandalagsins sem hann er  fulltrúi  fyrir  sé óframkvæmanleg og  fjarri þeim raunveruleika  sem við öllum blasir.? Mér finnst það ekki. Með því að benda  á þessa staðreynd er hann einungis að sinna  eðlilegum  starfsskyldum. Sagt er að sannleikanum verði hver  sárreiðastur og  svo er líklega hér. En steypustöð flokksins   er nú á  fullu  í aðdraganda kosninganna og   þótt mikið sé framleitt af steypu er ég ekki viss um að  hún seljist mjög  vel.