Molar um málfar og miðla 2093

NÝIR VENDIR …

Auglýsingar Hamborgarabúllu Tómasar eru oft frumlegar og skemmtilegar. Rétt eins og auglýsingarnar frá Kaupfélagi Borgfirðinga. Koma stundum þægilega á óvart.

Nýlega (13.01.2017) mátti heyra svohljóðandi auglýsingu í Ríkisútvarpinu frá Hamborgarabúllu Tómasar: Nýir kústar sópa best. Ekki kann Molaskrifari fyllilega að meta þetta. Er ekki hinn gamli orðskviður eða málsháttur enn í góðu gildi: Nýir vendir sópa best? Er nokkur ástæða til að breyta því? Kannski hefur textahöfundur óttast að hlustendur skildu ekki orðið vöndur. Nýir vendir sópa best - þýðir að nýliðar séu líklegri til meiri og betri verka en þeir sem fyrir voru.

 

BANDAFYLKIN, EÐA HVAÐ?

Í dagskrárkynningu Ríkissjónvarps í Morgunblaðinu (13.01.2017) er sagt frá verðlaunamyndinni Dóttur kolanámumannsins (1980- The Coal Miner´s Daughter). Þar segir: Loretta ólst upp í sárri fátækt í Kentucky-fylki en varð síðar heimsfræg söngkona. Kentucky er eitt af ríkjum ( e. state) Bandaríkjanna. Það er ekki fylki, - enda tölum við ekki um Bandafylki Norður Ameríku, heldur Bandaríki Norður Ameríku. -  Annars hefur kvikmyndaval Ríkissjónvarps batnað mikið  frá því sem var hér fyrir 2-3 árum, þegar stundum var eins og grafið hefði verið niður á botn ruslakistunnar þegar kom að því að velja kvikmyndir. Nú eru þeir reyndar orðnir fáir, sem eiga ekkert annað áhorfsval en Ríkisútvarpið.

 

ÓLYFJAN

Fyrirsögn af visir.is (12.01.2017):Vara nemendur HÍ við að þeim gæti verið byrlað ólyfjan. Ólyfjan er kvenkynsnafnorð. Þess vegna ætti fyrirsögnin að vera: Vara nemendur HÍ við að þeim gæti verið byrluð ólyfjan.

http://bin.arnastofnun.is/leit/?q=%C3%B3lyfjan

 

RÚSSAR Í STRÍÐI

Rússar eru í stríði, áróðursstríði. Það er ekki nýtt, en nú er vígvöllurinn ljósvakinn  og netheimar. Rússar brjótast inn í tölvukerfi og reyna að hafa áhrif á úrslit kosninga í öðrum löndum. Reyna að skaða stjórnmálamenn, sem þeim eru ekki að skapi. Þetta reyndu þeir til dæmis í forsetakosningunum í Bandaríkjunum í nóvember á liðnu ári. Þeir hafa víðar verið að verki við sambærilega iðju. –Rússar  hafa einnig  verið iðnir við að dreifa lygafréttum, uppspuna og óhróðri. Það er ekki ný bóla.

Í Fréttatímanum (14.01.2017) segir, að Hannes Hólmsteinn Gissurarson prófessor við Háskóla Íslands hafi nýlega verið í viðtali    ,, við skoskt útibú rússneska áróðurmiðilsins Sputnik News“. Um það fyrirtæki segir Fréttatíminn: ,,Sputnik News er í eigu rússneska ríkisins og hefur ítrekað verið bent á að fréttaflutningur miðilsins litist af áróðursstríði Pútíns við Vesturlönd. Pútín og hans menn voru fyrirferðarmiklir í Panamaskjölunum“

Prófessor dr. Hannes Hólmsteinn var samkvæmt Fréttatímanum að verja Sigmund Davíð Gunnlaugsson í þessum rússneskættaða áróðursmiðli.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

 

 

Molar um málfar og miðla 2092

,,EKKI FRÉTT“

Stundum er talað um ,,ekki fréttir“, þegar skrifað er um eitthvað sem ekki er nýtt , ekki breyting, ekki í frásögur færandi. Þannig ,, ekki frétt“ var á fréttavef Ríkisútvarpsins (12.01.2017). Fyrirsögnin var: Utanríkisráðherra mótfallinn aðild að ESB. Það er ekki nýtt. Það er ekki frétt. Guðlaugur Þór Þórðarson, sem nú  er orðinn utanríkisráðherra hefur lengi verið andvígur ESB- aðild. Kannski ekki alltaf, - fremur en flokkur hans.  http://www.ruv.is/frett/utanrikisradherra-motfallinn-adild-ad-esb

 

ÆTTERNI

Í fréttum Stöðvar tvö (11.01.2017) var sagt frá kveðjuræðu Obamas Bandaríkjaforseta. Sagt var, að faðir hans hefði verið geitahirðir í Kenýa. Þessi fullyrðing sést og heyrist stundum í fjölmiðlum. Faðir Obamas var vissulega fæddur í Kenýa. Hann var hagfræðingur, með meistaragráðu frá Harvard háskólanum í Bandaríkjunum. Virðist hafa verið laus í rásinni, átt erfiða ævi og glímt við áfengisvanda.

 

VIÐTAL

Upplýsingafulltrúi Samtaka ferðaþjónustunnar fékk dálítinn ræðutíma í fréttum Stöðvar tvö á fimmtudagskvöld (12.01.2017) Á mörkunum að hægt væri að kalla það viðtal. Í lokin sagði fréttamaður: Frábært. Við þökkum kærlega fyrir þetta. http://www.visir.is/section/MEDIA99&fileid=SRC5DFD79E2-CFED-4CFA-8A8D-D6B56B536CF9 (09:16)

Eftir ágætan pistil eða innslag um iðnnám í í lok fréttatímans notaði fréttaþulur líka orðið frábært   ( sem áður hefur verið nefnt í Molum sem dæmi um orð, sem orðið er útþvæld klisja). Gott að allt skuli vera svona frábært, - nema reyndar orðaforðinn!

Skondið viðtal, var hins vegar í fréttum Ríkissjónvarps þetta sama kvöld. Fréttamaður var við Seljalandsfoss og ræddi við ferðamenn og  sveitarstjórann í Rangárþingi eystra, Ísólf Pálmason, sem er með allra skemmtilegustu Framsóknarmönnum. http://www.ruv.is/sarpurinn/ruv/frettir/20170112 Viðtalið hefst á 10:05, en skemmtilegheitin byrja á 13:55 ! – Svona eiga sýslumenn að vera !

 

ÓSÓTTIR VINNINGAR

Stóri vinningurinn fyrndur, sagði í fyrirsögn á mbl.is (12.01.2017). Í fréttinni kom fram að í fyrra fyrndist vinningur að upphæð 20 milljónir króna í íslenska lottóinu, því enginn miði fannst! Enginn gaf sig fram. Einnig kom fram, að í hverjum mánuði væru vinningar að upphæð ein og hálf til tvær milljónir króna, sem ekki væru sóttir.

 Þetta er óboðlegt hjá fyrirtæki sem hefur lögbundið  ríkiseinkaleyfi til langs tíma. Það hefur hag af því að vinningar séu ekki sóttir.

Þegar Molaskrifari bjó í Noregi keypti hann stöku sinnum lottómiða. Við fyrstu miðakaupin fékk hann spjald á stærð við greiðslukort,sem hann sýndi svo í hvert skipti sem hann keypti miða. Vann reyndar  aldrei  neitt sem máli skipti, en í lottókerfinu var alltaf vitað hver átti hvern einasta miða, sem vinningur kom á. Engir ósóttir vinningar. Hvers vegna er samskonar kerfi ekki notað hér? Það er ekki gott að gera út á ósótta vinninga eins og íslenska lottóið gerir með nokkrum hætti.

http://www.mbl.is/frettir/innlent/2017/01/12/stori_vinningurinn_fyrndur/

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

 

 

 

 

 

Molar um málfar og miðla 2091

MAT

Fréttamat er auðvitað umdeilanlegt. Skrifara fannst það skrítin forgangsröðun hjá umsjónarmanni Kastljóss (11.01.2016), þegar rætt var við formenn stjórnarflokkanna að byrja á því að ræða um ESB-mál. Hversvegna?

 Vegna þess að ESB hefur lýst því yfir, að engin ný ríki geti öðlast aðild á næstu árum. Það sé ekki á dagskrá. Í öðru lagi er mikil óvissa um framvindu mála innan ESB í tengslum við útgöngu Breta. Það líða ár uns þau mál verða komin á hreint. Um það er ekki mikill ágreiningur. Þess vegna hefur þetta mál hvað okkur varðar verið lagt til hliðar um sinn. Við bíðum átekta, hvað sem skoðunum um aðild eða atkvæðagreiðslur líður. Málið er ekki á dagskrá.

 

HVAÐ ÞARF TIL?

Ríkissjónvarpið heldur áfram að birta ódulbúnar áfengisauglýsingar, - til dæmis á miðvikudagskvöld í þessari viku (11.01.2017), - þrátt fyrir að stofnunin hafi fengið stjórnvaldssekt eða sektir fyrir að auglýsa áfengi. Hvað þarf til að breyta þessu? Molaskrifari vonar að nýr ráðherra Ríkisútvarpsins hafi í sér dug og döngun til að taka í lurginn á stjórnendum, sem telja sig hafna yfir lögin í landinu, - þurfi ekki að fara eftir þeim.

 

AÐ ÁVARPA (EITTHVAÐ)

Molaskrifari hefur hnotið um það nokkrum sinnum að undanförnu að ýmsir eru farnir að nota sögnina að ávarpa í nýrri merkingu og gætir þar áhrifa frá ensku, - eins og svo víða á lendum móðurmálsins um þessar mundir. Að ávarpa er að yrða á, eða tala til. Getur líka verið að flytja (stutta) ræðu: Ráðherra ávarpaði fundinn, flutti ávarp á fundinum.

 Nú er í vaxandi mæli farið að nota þessa sögn eins og enska sagnorðið to address er stundum notað, um að hefjast handa við eitthvað, hefja verk, ráðast í verkefni , takast á við eitthvað ( failure to address the main issue, Encarta World English Dictionary)-  Taka ekki á kjarna málsins. Dæmi um þessa notkun sagnarinnar að ávarpa heyrðum við til dæmis í viðtali við forseta ASÍ í seinni fréttum Ríkissjónvarps (11.01.2017). ,, … og það er ekki ávarpað í þessum stjórnarsáttmála, nein svona tillaga að því hvernig á að höndla þá deilu ...“ (03:35) http://www.ruv.is/sarpurinn/ruv/tiufrettir/20170111

Þessi þróun er ekki af góða.

 

INNPÖKKUN

 Af fréttavef Ríkisútvarpsins (11.01.2017). Fráfarandi utanríkisráðherra gaf eftirmanni sínum kaffibolla, sem í var aðgangskortið að ráðuneytinu. Í fréttinni sagði: ,, Kaffibollinn hafði verið pakkaður inn og ofan í honum var aðgangskortið að ráðuneytinu.“

Kaffibollanum hafði verið pakkað inn. Enginn les yfir.

http://www.ruv.is/frett/gudlaugur-fekk-kaffibolla-fra-lilju

 

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

 

Molar um málfar og miðla 2090

SLYS OG SKÝRSLA

Enn eitt banaslysið varð í sandfjöru við suðurströndina í gær , þegar úthafsalda hreif fjölskyldu, hjón og tvo unglinga með sér. Unglingarnir og faðirinn björguðust en konan drukknaði. Í fréttum Ríkissjónvarps (09.01.2017))var sagt, - sjúkrabílar fluttu afganginn af fjölskyldunni til Reykjavíkur. Ekki mjög vel orðað.

 Í frétt um  þetta hörmulega slys á mbl.is (10.01.2017) segir: ,, Um klukku­stund eft­ir að til­kynn­ing um slysið barst sást hvar kon­an rak á land í fjör­una skammt aust­an við Dyr­hóla­ós.“ Þessi villa sést of oft. Konan rak ekki á land. Konuna rak á land. Enginn yfirlestur. http://www.mbl.is/frettir/innlent/2017/01/10/for_ut_med_soginu/

 

 Í viðtali við fulltrúa Landsbjargar í fréttum Stöðvar tvö (09.01.2017) kom fram, að til er skýrsla frá árinu 2010 þar sem meðal annars er fjallað um brýnar aðgerðir til að tryggja öryggi ferðamanna. Sú skýrsla virðist hafa legið í ráðherra/ráðuneytisskúffum í ein sex ár og ekkert með hana gert. Hverjir bera ábyrgð á því? Ráðherrar ferðmála? Væri nú ekki ágætt efni í einn Kastljóss þátt eða svo að fjalla svolítið um þessa skýrslu, aðgerðaleysi stjórnvalda og hvað gera þurfi strax?

 

KYNNING Á STJÓRNARSÁTTMÁLA

Þegar Bjarni Benediktsson verðandi forsætisráðherra kynnti stjórnarsáttmála nýrrar ríkisstjórnar í Gerðarsafni (10.01.2017) sagði hann meðal annars: ,, Í stjórnarsáttmálanum birtast áherslur flokkanna þriggja í mörgum málaflokkum, sem við teljum að tali mjög vel inn í þetta ástand og skipti máli til að viðhalda ….“ - og: ,,Stjórnarsáttmálinn talar þannig mjög vel inn í ástandið á Íslandi í dag“. Molaskrifari játar að þetta orðalag, - að stjórnarsáttmáli tali inn í ástandið á Íslandi er honum framandi  Sennilega átti ráðherra við að í stjórnarsáttmálanum væri tekið á, fjallað um, vanda íslensks samfélags í dag.

 

AÐ BLÆÐA

Notkun sagnarinnar að blæða vefst fyrir ýmsum. Einhverjum blæðir, - það rennur blóð úr einhverjum, segir orðabókin. Sbr. e-m blæðir út blæðir til ólífis, - deyr vegna blóðmissis. Visir.is greindi ( 09.01.2017) frá stúlku, sem sögð er haldin óvenjulegum sjúkdómi, það blæðir úr augum hennar, nefi og eyrum. Í fréttinni sagði: ,, Fólk hefur horft á hana byrja að blæða í skólanum.“ – Þetta hefði átt að orða á annan veg. –Til dæmis:  Fólk hefur horft á þegar henni byrjar að blæða. http://www.visir.is/segir-augnblaedingu-hja-dottur-sinni-ekki-folsun/article/2017170119981

 

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

 

Molar um málfar og miðla 2089

MEINLOKAN MARGTUGGNA

Sagt var í íþróttafréttum Ríkissjónvarps (05.01.2017): Í seinni leik kvöldsins mættust gestgjafar Danmerkur …. Þarna var verið að tala um dönsku gestgjafana,  sem héldu mótið, - ekki  einhverja sem voru gestjafar Dana, buðu Dönum. Þetta er einkennileg meinloka og undarlegt, að íþróttafréttamenn skuli ekki  vita  hvernig á að nota  orðið gestgjafi.

 Í sama fréttatíma var talað um að taka þátt á HM. Er ekki  eðlilegra  að tala um að taka þátt í einhverju fremur en að taka þátt á einhverju? Molaskrifari hefði haldið það og mun hafa nefnt þetta áður!

 

AULAVILLA

Víðir benti skrifara á frétt á  mbl.is (06.01.2017) Í fréttinni segir: segir: "Sam­tals fær 391 lista­menn lista­manna­laun árið 2017"
Samkvæmt minni málvitund fá listamenn listamannalaun eða þrjú hundruð níutíu og einn listamaður (391) fær listamannalaun.

Þakka Víði ábendinguna. Hrein aulavilla. Enginn les yfir.

http://www.mbl.is/frettir/innlent/2017/01/06/391_faer_listamannalaun/

 

FRÉTTABRANDARI FÖSTUDAGSINS

Það hlýtur að vera fréttabrandari  föstudagsins (06.01.2017) að maðurinn, sem olli spjöllum á fjórum  kirkjum á Akureyri hafi ferðast milli kirknanna á hjólabrettti. Þetta var margtuggið í okkur.  Hvaða máli skipti það? Undarleg áhersla í frétt af þessu  óþokkaverki.

Talað var um um klæðningu á  Akureyrarkirkju. Ég hef alltaf haldið að Akureyrarkirkja væri múrhúðuð og mulningur settur í múrinn.   Er múrhúðun klæðning?  Held  ekki.

 

 

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

 

 

Molar um málfar og miðla 2088

ELDINGAR

Þegar fjöldi eldinga sló niður var sagt í næturfréttum Ríkisútvarps (05.01.2017). Eldingarnar slógu ekki niður. Eldingum sló niður.  Þegar fjölda eldinga sló niður. Enginn las yfir.

 

KYNNING Á LÍKAMSRÆKT

Í Kastljósi Ríkissjónvarps (04.01.2017) var  fjallað um líkamsræktarstöðvar. Þar var talað um  þjálfun í líkamsræktarstöðvum, sem er hreint ekki ókeypis. Þar var hins vegar ekki talað um þá líkamsrækt sem er ódýrust og kostar ekki neitt nema góða gönguskó og hlífðarfatnað. - Að ganga úti ( eða inni þegar er mikil hálka eða óveður) og borða minna. Of fáir hugsa í þá veru.

 

NÓAFLÓÐ SYKURSINS

Töluverð umræða hefur verið í fjölmiðlum að undanförnu um sykurneyslu á Íslandi og þyngd Íslendinga. Sérfræðingar eru á því að hvítur sykur sé megn óhollusta, megi næstum kalla eitur, segja sumir. Mikið væri fróðlegt ef aðalsykurdreifararnir, íslenskir gosframleiðendur og Mjólkursamsalan upplýstu hve mörg hundruð tonn af sykri þeir nota í framleiðslu sína á ári.

 Á sjötta áratugnum vann ég sumarlangt í Haga í vesturbænum þar sem Eimskip var með vörugeymslur syðst við Hofsvallagötu. Handan götu var Vífilfell, sem framleiddi Kóka kóla. Man eftir vörubílalestum sem komu þangað hlaðnar 45 kílóa léreftspokum með sykri, þegar verksmiðjan fékk sykursendingar. Þá dalaði áhuginn á þessum drykk, nema til mjög takmarkaðs brúks. Sykurpokar  voru hins vegar fengnir í verslunum, þegar þeir höfðu verið tæmdir. Svo voru þeir þvegnir og bleiktir þar til merkingar hurfu af þeim að mestu og notaðir í lök, koddaver og sængurver á heimilum þar sem hlutirnir voru nýttir vel og ekki úr miklu að spila. Sama gilti um hveitipoka. Það sást oft djarfa fyrir Gold Medal og Phillsbury merkjum á sængurfatnaði í mínu minni. Vann við að sendast, afgreiða og vigta upp sykur, hveiti . rúgmjöl og fleira  í tveimur nýlenduvöruverslunum. Fyrstu Skeifunni á horni Snorrabrautar og Njálsgötu sumurin 1952 og 1953 og í verslun Axels Sigurgeirssonar í Barmahlíð 8 veturinn1953 til 1954 fyrir hádegi fram að skólatíma kl 13 45 . Námsbókunum var ekki mikið sinnt veturinn þann !- En þetta var nú útúrdúr !

 

Smáviðbót af visir.is (04.01.2017): ,,Íslenskt neftóbak hækkaði um 60 prósent í verði um áramótin. Fæst nú íslensk neftóbaksdós á 3.058 krónur í verslunum Hagkaupa.“ Væri ekki tilvalið að hækka sykurverð um sömu prósentu? Um 60% ?  http://www.visir.is/islenskt-neftobak-haekkadi-um-60-prosent-i-verdi-um-aramotin/article/2017170109729

 

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

 

Molar um málfar og miðla 2087

FYRIR RANNSÓKN MÁLS

Það virðist vera staðlað orðalag í dagbókarfærslum lögreglunnar að tala um að maður/menn séu vistaðir í fangageymslu fyrir rannsókn máls. Úr frétt á mbl.is (04.01.2016) Sam­kvæmt upp­lýs­ing­um úr dag­bók lög­regl­unn­ar voru menn­irn­ir í ann­ar­legu ástandi og eru vistaðir í fanga­geymslu lög­reglu fyr­ir rann­sókn máls. Þetta er óeðlilegt orðalag. Mennirnir voru vistaðir í fangageymslu vegna rannsóknar málsins. Reyndar hefur oft verið minnst á þetta sérkennilega orðalag hér í Molum.

http://www.mbl.is/frettir/innlent/2017/01/04/skemmdarvargar_teknir_med_thyfi/

 

 

Í FAÐMI …

Það er kannski viðkvæmt og að einhverra mati óviðeigandi að hafa skoðun á orðalagi í andlátstilkynningum. Nú heyrist æ oftar á þeim vettvangi , ,,að N.N. hafi látist í faðmi fjölskyldunnar“.. Þetta er sjálfsagt fallega hugsað, en er orðið hálfgerð klisja, ef þannig má að orði komast.     Kannski er þetta sérviska Molaskrifara.

 

VIÐTÖL

Stundum eru viðtöl þannig, að maður er eiginlega engu nær að viðtalinu loknu, engu fróðari. Þannig leið skrifara eftir viðtal í fréttum Ríkissjónvarps (04.01.2016) við verkefnisstjóra eldsneytis og vistvænnar orku hjá Orkustofnun um kolanotkun í stóriðju á Íslandi. Það sem einna helst stóð kannski eftir að þessi kolanotkun væri ekki af hinu góða, en verra væri þó ef stóriðjan væri til dæmis í Kína ! Stundum verða viðtöl lakari en efni standa til, þegar þau eru í beinni útsendingu í fréttatímum. Það er oft eins og  spyrli liggi svo mikið á, að hann megi varla vera að þessu.

 

SKAUPIÐ

Þeir sem annast áramótskaup Ríkissjónvarps mega bærilega við una ef helmingi aðspurðra finnst Skaupið þokkalegt eða gott. Væntingar margra eru í þá veru að helst megi ekki slakna á bros- og hlátursvöðvum í heila klukkustund. Þannig getur það aldrei orðið.- Sem betur fer, liggur mér við að segja. Svo er margt sinnið sem skinnið.

Það góða við Skaupið þessu sinni var að þar var enginn einn lagður í einelti. Margir fengu sinn verðskuldaða skammt. Það hefur komið fyrir að  manni hefur þótt að næstum eins mikið , ef ekki meira, væri lagt upp úr því að meiða en skemmta. Svo var ekki að þessu sinni og það var gott, þótt ýmislegt megi að finna. Þarna verður aldrei gert svo öllum líki.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 2086

LANGLOKA OG ENDURTEKNINGAR

Geir Magnússon, sem er búsettur erlendis, fylgist vel með íslenskum fjölmiðlum. Hann skrifar Molum af og til en hefur stundum samband beint við fréttamenn, þegar honum þykir eitthvað athugavert við texta og bendir á hvað betur mætti fara. Því er misjafnlega tekið, að hans sögn. Geir benti Molaskrifara á þessa frétt eða grein á mbl.is (30.12.2016). http://www.mbl.is/frettir/taekni/2016/12/30/einstakur_vidburdur_a_nordurskautinu/

 Geir segir þetta,, langloku og endurtekningar“. Best er að lesendur dæmi hver fyrir sig. Þakka ábendinguna, Geir.

 

HÚS ÚR TRÉ

Þetta er úr frétt um skógarelda í Síle á visir.is (03.01.2016): ,, Skógareldarnir kviknuðu síðdegis á mánudag í grennd við vatnið Laguna Verde og náði að breiðast út til Playa Ancha, þar sem mikill fjöldi er af húsum úr tré.“ Hér hefði farið ólíkt betur á því að segja til dæmis: … þar sem mikið er um timburhús. Mikill fjöldi húsa úr tré er ekki vandað orðalag. Þar að auki er augljós málvilla í setningunni. Enginn metnaður. Enginn les yfir.

http://www.visir.is/slokkvistarf-gengur-vel-i-chile/article/2017170109704

 

 

EKKI FRÉTT

Hér er dæmigerð svokölluð ekki frétt af visir.is . Skrifað um atburð ,sem ekki getur talist fréttnæmur.

http://www.visir.is/haettu-snarlega-vid-lendingu-vegna-annarrar-flugvelar-a-brautinni/article/2017170109736

Hér gerðist ekki neitt, nema hvað næsta flugvél á undan þeirri sem um var fjallað var  aðeins of sein að beygja af lendingarbraut inn á akstursbraut. Ítrustu öryggisreglum var fylgt. Floginn var auka hringur og svo lent. Engin hætta og engin frétt. Gúrkutíð.

 Hér verður það fjölmiðlum líka fréttaefni, ef vegna bilunar eða einhvers annars verður  tveggja eða þriggja tíma seinkum á einhverri flugferð. Þykir ekki fréttnæmt frá  flugvöllum í öðrum löndum.  

 

 

 

FRÁBÆRT!

Í stuttu fréttainnslagi (sem var um það bil ein og hálf mínúta) í fréttatíma Stöðvar tvö (03.01.2017) tókst fréttamanni , sem annars sagði ekki margt, að segja: Frábært, þrisvar sinnum! Það var auðvitað frábært, eða þannig. Frábært er ofnotaðasta orð tungunnar um þessar mundir. http://www.visir.is/section/MEDIA99&fileid=SRC9C8C882F-816B-4A9A-9C90-82B81F5DA2E2

Þetta  frábæra og merkilega viðtal hefst á 14:30 eða þar um bil.

 

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 2085

EINFÖLD SAMLAGNING

Rafn skrifaði á nýársdag: ,, Sæll Eiður

Það er ekki aðeins málþekking fréttabarna, sem virðist vera fyrir neðan alla hellur. Kunnátta í reikningi og stærðfræði virðist vera á svipuðu stigi. Í minni skólatíð var kennt, að 1+11+1 gæfi útkomuna 13. Í frétt mbl.is hér fyrir neðan verða ein fyrrverandi eiginkona, 11 ættingjar hennar og einn árásarmaður hins vegar að 12 föllnum.“

Þakka bréfið, Rafn. Eigum við ekki að segja að það hafi verið fljótaskrift á þessu?

http://www.mbl.is/frettir/erlent/2017/01/01/ruddist_i_parti_og_drap_tolf/

ERFITT ER ÞAÐ

Afskaplega reynist mörgum, sem fréttir skrifa, erfitt að nota sagnirnar að kaupa og að versla rétt. Eftirfarandi er af fréttavef Morgunblaðsins mbl.is (30.12.2016): Flug­elda­sala hef­ur gengið vel hjá björg­un­ar­sveit­um Slysa­varn­ar­fé­lags­ins Lands­björgu und­an­farna daga. Stóri dag­ur­inn er samt á morg­un þegar lang­flest­ir versla sér flug­elda. Fólk verslar sér ekki flugelda. Fólk kaupir sér flugelda. Kaupir flugelda.

http://www.mbl.is/frettir/innlent/2016/12/30/aevintyri_framundan_i_flugeldasolu_2/

 

MEIKAR SENSE!

Á forsíðu Fréttablaðsins (30.12.2016) var svo hljóðandi fyrirsögn: Reggísinfónían meikar sens. Þessi fyrirsögn í Fréttablaðinu er sannarlega ekki til fyrirmyndar. Eiginlega til skammar. Háborinnar skammar. Molaskrifari segir ekki meir.

 

ENSKA ENN

Á hverjum degi er slett á okkur íensku, í fréttum viðtölum og auglýsingum, Á nýársdag var viðtal í Morgunblaðinu við Jón Gnarr , fyrrverandi borgarstjóra, leikstjóra áramótaskaups Sjónvarpsins.

Hann segir þar: Við þurftum svolítið að ákveða hvaða ,,take“ við ættum að taka á ríkisstjórnina. Hvernig við ættum að taka á ríkisstjórninni, hefði verið ágætt að segja á íslensku. Í viðtalinu kemur fram að Jón Gnarr er á förum til Texas til að ,,kenna kúrs í handritagerð við háskólann.“  Þarf að tala um að ,, kenna kúrs“? Hann er greinilega byrjaður að æfa sig. Kunnugir telja, reyndar að í Texas sé fleiri en einn háskóli.

 

FYRIRSAGNARVILLA

 Fyrirsagnarvilla var á mbl.is á nýársdag. Fyrirsögnin var svohljóðandi: Öryggisráðið kýs um vopnahléið .

Öryggisráðið var ekki að kjósa um eitt eða neitt. Þar átti að greiða atkvæði um ályktun um vopnahlé í Sýrlandi eins og segir réttilega í fréttinni. ,, Álykt­un Rússa þar sem lýst er stuðningi við vopna­hlés­sam­komu­lagið í Sýr­landi sem þeir og Tyrk­ir höfðu milli­göngu um verður tek­in til at­kvæðagreiðslu í ör­ygg­is­ráði Sam­einuðu þjóðanna. „

http://www.mbl.is/frettir/erlent/2016/12/31/oryggisradid_kys_um_vopnahleid/

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 2084

ÓGLÆSILEG BYRJUN Á NÝJU  ÁRI

Svona skrifaði Sigurjón Molum á nýársdag:

Heill og sæll Eiður og gleðilegt nýtt ár.
Ekki byrjar nýja árið glæsilega hjá fjölmiðlum.
Snemma á nýársmorgun blasti þessi fyrirsögn við mér á Mbl.is „Fólkið sem fór á ferlegu ári“. Hér var verið að fjalla um andlát þekktra aðila á nýliðnu ári. Hér hefði verið nær að tala um fólkið sem að féll frá eða einfaldlega fólkið sem lést á árinu. Umfjöllunin sjálf var svo lítið betri en fyrirsögnin.

Svo blasti við mér á vef Ríkisútvarpsins frétt af fólskulegri árás sem framin var á nýársnótt. Fréttin hófst með þeim orðum að „Alvarleg líkamsárás var gerð í Gerðunum í Reykjavík“. M.b.kv. Sigurjón. Þakka bréfið og nýársóskir, Sigurjón. Satt er það,

ekki er þetta góð byrjun.

http://www.mbl.is/folk/frettir/2017/01/01/folkid_sem_for_a_ferlegu_ari/

Og : http://www.ruv.is/frett/alvarleg-likamsaras-i-reykjavik

Vonandi skánar þetta. 

 

 

SEM VAR STAÐSETTUR!

Sumir þurfa að staðsetja alla skapaða hluti. Þetta er af mbl.is (30.12.2016): Eld­ur kviknaði í snjó­bíl björg­un­ar­sveit­ar­inn­ar Ársæls sem var staðsett­ur við flug­elda­sölu henn­ar í Skeif­unni í dag. Bíll stóð, eða var, við flugeldasölu björgunarsveitarinnar í Skeifunni.  

http://www.mbl.is/frettir/innlent/2016/12/30/eldur_kviknadi_i_snjobil/

 

 

VANKUNNÁTTA

Aftur og aftur lesum við fyrirsagnir og fréttir þar sem vankunnátta í grundvallaratriðum málfræði tungunnar stingur í augu.

Þetta er af visir.is ( 29.12.20916): Hjúkrunarheimili lokað vegna slæms aðbúnað íbúa.

http://www.visir.is/hjukrunarheimili-a-stokkseyri-lokad-vegna-slaems-adbunad-ibua/article/2016161228840

Var síðar lagfært.

 

LAGERINN TELUR …

Í útvarpsfrétt (28.12.2016) var fjallað um vöruskort í Grímsey vegna þess að þangað hafði hvorki verið hægt að sigla né fljúga vegna illviðra. Nóg væri þó til af flugeldum fyrir áramótin: Lagerinn telur tvö bretti, var sagt. Kannski hefði mátt orða þetta á annan veg. Hvernig telur lagerinn? Tvö vörubretti með flugeldum eru í eynni.

 

MEIRA UM FLUGELDA

Ýmsir sem sáu möguleika á skjótfengnum gróða seldu flugelda í samkeppni við björgunarsveitirnar fyrir áramótin. Fyrirtæki sem kallar sig flugeldar. com auglýsti að hjá þeim fengi fólk flugelda á helmingi minna verði en í fyrra!   Minna verði!  Það var og. Við tölum um lægra verð, ekki minna verð.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG