Molar um málfar og miðla 418

  Þegar farið er í ferðalag  er nauðsynlegt að vita hvert á að fara og  hvaða leið er skynsamlegast að velja. Á þessu  flaskaði Alþingi Íslendinga. Nefndin var undir  forystu VG leidd inn  á pólitíska hefndarslóð í skjóli úreltra laga, sem  segja annað réttlæti  gilda  fyrir  ráðherra en  aðra borgara.  Skúmaskotapólitík á ekki heima á Alþingi.  Orð og gjörðir sumra  þingmanna  voru þinginu ekki til sóma þriðjudaginn  28. september 2010.

  Rök Guðmundar Steingrímssonar í Kastljósi (29.01.2010) voru sannfærandi. Ekki fannst  Molaskrifara það sama um rök Marðar Árnasonar. Svo mætti í bróðerni benda  fréttamanni Kastljóss á að  hljómsveitir,sem  flytja  svokallaða sígilda tónlist,  eru ekki  kallaðar bands á ensku. Það  orð er  notað um hljómsveitir sem flytja annarskonar tónlist.

  Molaskrifari hefur jafnan  borið blak  af Steingrími J. Sigfússyni undanfarin misseri, enda hefur hann  ásamt Össuri (sem hefur staðið sig  frábærlega  í ESB  málunum eins og nýleg skoðanakönnun reyndar sýnir) verið hinn raunverulegi leiðtogi stjórnarinnar.   Lítið  lagðist hinsvegar fyrir kappann, þegar hann reyndi að  snúa sig út úr  túlkun  Þorsteins Pálssonar   á orðum  hans , þegar hann sagðist hafa  viljað að annar maður yrði ákærður. Þorsteinn sagði réttilega, að Steingrímur hefði  gefið í skyn að Alþingi  væri að hengja bakara fyrir smið.  Frá þessum ummælum getir Steingrímur  ekki hlaupist. Hann á ekki einu sinni að reyna það. Það skildi hvert mannsbarn hvað hann átti við.  Það var ekkert flókið.

Árni M. Mathiesen verður ekki stefnt, sagði umsjónarmaður  morgunútvarps Rásar tvö (29.09.2010). Undarlegt   tilfinningaleysi gagnvart beygingakerfi málsins. Nafn Árna átti auðvitað að vera í þágufalli. Sami  umsjónarmaður gerði  ráð fyrir  að allir  hlustendur  skildu ensku. Vitnaði í fésbókarummæli á ensku og þýddi þau ekki.

Í allan október, segir í auglýsingu ferðaskrifstofunnar Iceland  Express. Máltilfinning Molaskrifara er  að annaðhvort  ætti að  segja: Allan október, eða í október.

 Í annarri sjónvarpsauglýsingu   stendur orðið þorskalifur á skjánum. Í lesnum texta er hinsvegar  talað  um þorsklifur. Það telur Molaskrifari  í samræmi við málvenju.

Sóðaskrif eru í vaxandi mæli farin að  skjóta upp kollinum í athugasemdum við þessa Mola mína. Hér  eftir  mun  skrifari  fjarlægja slíkar athugasemdir.  Athugasemd  Arnþrúðar Karlsdóttur , útvarpsstjóra Útvarps  Sögu, þar sem hún hótar  eiginkonu minni,  stendur  þó enn á  sínum stað, þótt  sóðaleg sé. Hún er til vitnis um innræti  skrifarans.  

Molar um málfar og miðla 417

  Úr dv. is (27.09.2010): ...þegar hann ók einu af farartækjum fyrirtækis síns fram af klettabjargi. Að tala um að aka fram af klettabjargi er  bull.  Rétt hefði verið að tala um að  aka fram af klettum, eða að  aka fram  af bjargbrún.  Meira úr  dv.is sama  dag:  Deilur innan forystusveitar uppljóstrunarsíðunnar Wikileaks hefur orðið til þess að þýskur talsmaður síðunnar, Daniel Schmitt,...Deilur  hefur ekki orðið til þess... deilur  hafa orðið til þess, að.... Enn úr  dv.is: ....en það flæddi gríðarlega yfir veginn þar í gærkvöldi og við brúnna yfir Holtsá. Flæddi  gríðarlega yfir  veginn er ógott orðalag og sá sem skrifar um brúnna, er  líklega sá  sami  og  skrifaði um ánna í fyrradag.  Meira úr sömu frétt: Vatnsmagn í Svaðbælisá hefur minnkað verulegu og flýtur ekki yfir þjóðveginn lengur. Það var og.  Vatnsmagnið flaut yfir veginn !

Enn einu sinni skal hér minnst á  sögnina að opna. Ranglega sagði  fréttamaður Stöðvar tvö (27.09.2010) að  tónlistarhúsið  Harpa opnaði í maí á næsta ári. Tónlistarhúsið  opnar hvorki eitt né neitt. Það verður  opnað.  Rétt var með þetta farið í fréttum  Ríkissjónvarps.  Annars var frétt  Stöðvar  tvö um þetta svolítið kostuleg  því  sagt var að  Askenasí vonaðist til að Karl Bretaprins  kæmi á opnunartónleikana  sem Askenasí mun stjórna. Í fréttinni kom hinsvegar  fram að  Askenasí var að  láta í ljósi  von um að rétt stjórnvöld  hér á landi   byðu Bretaprinsi á tónleika.

Gera verður  þær  kröfur að málfar í fréttum  Ríkisútvarpsoins  sé   sæmilega  formlegt.  Kjánalegt var að  tala um (27.09.2010)  Búðahálsvirkjun ,sem eina  bestu framkvæmd sem Íslendingar hafi orðið vitni að  frá því eftir bankahrun.  Við höfum ekki  orðið vitni að  neinu í þessu sambandi.  Orðalagið  nokkur óvissa virðist hlaupin í  fyrirhugað álver  er ekki boðlegt og  heldur ekki  að tala um að álver  verði blásið af.  Þetta var svo allt  endurtekið í fréttum Ríkissjónvarps klukkan  sjö sem æ  oftar eru bara myndskreytt útgáfa sex frétta   Ríkisútvarpsins.

Velunnari  Mola  sendi  eftirfarandi úr  mbkl.is (28.09.2010):"Flugvélin er lítil Beech Craft Bonanza ferjuvél, sem var á leiðinni frá Sonderstrom á Grænlandi til Íslands."Hann spyr: Er þetta ekki Syrði Straumfjörður ?  Auðvitað er það rétt til getið.  Landafræðikunnátta er ekki lengur til staðar á  ritstjórnum íslenskra fjölmiðla.  Molaskrifari leiðréttir  svo smáatriði. Vélin er af gerðinni BeechcraftBonanza.

 Í  fréttum Stöðvar tvö (27.09.2010) var  talað um 1,3 milljarð króna. Hefði átt  að vera  1,3 milljarða króna. Aukastafurinn  ræðu tölunni.

Molar um málfar og miðla 416

   Úttekt  Svavars Halldórssonar á   hugsanlegum afdrifum   landsdómsmála á Alþingi var skýr og vel fram sett í fréttum Ríkissjónvarps (26.09.2010). Sama má  segja um   samantekt um fyrirhugaða  fangelsisbyggingu. Ótrúlegt hvernig   það mál hefur velkst í kerfinu árum saman án þess að  nokkuð gerðist.

Í þriggja línu feitletraðri ,tveggja  dálka  fyrirsögn í Morgunblaðinu (27.09.2010) segir:  Segir  samninga við kröfuhafa miða ágætlega.   Hér hefði átt á standa:  Segir  samningum við kröfuhafa miða ágætlega. Eða: Segir samninga við kröfuhafa ganga ágætlega. Í fréttinni undir þessari fyrirsögn segir svo: Böðvar segir segir viðræðum við kröfuhafa  ganga ágætlega.  Ætti að  vera:... segir viðræður við kröfuhafa ganga ágætlega.  Ótrúlega áttavilltur  blaðamaður  sem  skrifaði þessa  frétt.

 Í Morgunblaðinu (28.09.2010) segir: Kínverska sendiráðið  Í  Reykjavík óskaði þess af stjórnanda Alþjóðlegrar kvikmyndahátíðar í  Reykjavík,... Þessi notkun  forsetningarinnar af stríðir gegn málvenju.  Rétt hefði verið að segja: Kínverska sendiráðið óskaði þess við stjórnanda.....  Eða,   fór fram á á það við stjórnanda.... 

Ótækt orðalag í frétt á dv. is (26.09.2010): Rúta með 49 farþega keyrði á brú sem gengur yfir hraðbrautina og flaug í veg fyrir bíl sem kom úr gagnstæðri átt. Brú gengur ekki  yfir  hraðbraut. Brú er yfir hraðbraut.

Meira úr dv.is  sama dag: .. .en miklir vatnavextir hafa verið á Suð- og Suðausturlandi í kjölfar rigninga og bráðnun jökla.Hér  hefði farið betur á að segja: ... miklir vatnavextir hafa verið á Suður- og  Suðausturlandi í kjölfar rigninga og asahláku á jöklum. Enn er vitnað í dv.is:  „Ég var að koma frá því að kanna aðstæður. Það virðist ennþá vera að bæta í ánna..."  Það bætir ekki i ánna  heldur ána.

 Hin skelfilega  Hemma Gunn auglýsing frá Iceland Express er aftur kominn á skjáinn. Molaskrifari var að vona  að hún væri komin í ruslakistuna. Molaskrifari er sannfærður um að hún  fælir  fólk frá því að  versla  við ferðaskrifstofuna.  Þessi auglýsing er  óendanlega hallærisleg.

Molar um málfar og miðla 415

 Í fréttatíma Stöðvar tvö (25.09.2010) var sagt: Hann segist viljugur að veita Íslandi ráð.... Betra hefði verið: Hann segist fús til að veita Íslandi ráð. Eða,  hann segist reiðubúinn að veita Íslandi ráð.

Góðvinur Mola austur í  Moskvu sendi eftirfarandi:  "Beckham spilaði í 90 mínútur í nótt" segir visir.is. Hið rétta er auðvitað að hann lék í 90 mínútur í gær. Leikurinn fór fram að degi til í Los Angeles þótt komin hafi verið nótt á Íslandi. Dagurinn er ekki samtímis á allri jörðinni eins og flestir vita. Það er orðið býsna algengt að fjölmiðlafólk taki til orða með svo villandi hætti.
kv.Molavin. Takk fyrir  þetta.  Sama villa var í Ríkissjónvarpsfréttum  (25.09.2010), þegar sagt var að utanríkisráðherra  hefði flutt  ræðu á allsherjarþingi Sameinuðu þjóðanna í nótt. Þar hefði átt að segja að hann hefði flutt ræðu í gær.  Sem hann gerði.

Svo sem  Molalesendur flestir vita, er Molaskrifari  ekki  sérfræðingur á  sviði  fótbolta. Alltaf mislíkar honum , þegar sagt er að knattspyrnumaður hafi misnotað  vítaspyrnu ,   ef  markmaður  ver  vítaspyrnu frá honum. Rétt er að tala um að misnota   vítaspyrnu,  ef sá, sem  tekur  spyrnuna, hittir  ekki markið, brennir af , eins og sagt hefur verið í áratugi. Í hinu tilvikinu á að hrósa  markmanni fyrir  markvörsluna.  Það er engin misnotkun  á vítaspyrnu þótt markvarsla sé góð.

 Í fréttatíma  Ríkissjónvarps (25.09.2010) var  flutt brot úr ræðu utanríkisráðherra á Allsherjarþingi  Sameinuðu þjóðanna.  Ráðherra gerði   ástandið  Í Palestíu að umtalsefni.  Um mannréttindabrotin þar sagði hann:  ...   where  human rights  are broken.  Nú er   utanríkisráðherra prýðilegur enskumaður, en hann semur ekki allar sínar ræður sjálfur.  Molaskrifari hallast því að  þarna hefði ráðherra átt að segja: ... where  human rights are violated.   Minnist  þess ekki að hafa heyrt   tekið svona til orða  áður.  Á íslensku   tölum við um að brjóta mannréttindi. Það er ekki hægt að þýða orðrétt á ensku. Rights are violated but rules are broken.  En þetta er auðvitað bara smámunasemi og tuð hjá Molaskrifara.

Molar um málfar og miðla 414

  Í hádegisfréttum  Ríkisútvarpsins  (24.09.2010) var  sagt  frá lokum hvalvertíðar.  Sagt var  um langreyði, sem  komið var með að landi í Hvalfirði:  Lokið er við að flensa hann.    Hvalaheitið langreyður er  kvenkynsorð. Þessvegna  hefði  átt að segja, að lokið  væri við að  flensa hana. Þetta hefur víst verið nefnt hér áður.

   Fréttastofa  Ríkisútvarpsins er  svo föst í fortíðinni, að þar eru engar  fréttir klukkan 12  á hádegi  á sunnudögum. Þeir sem  þá  vilja  hlusta á fréttir  verða  að   stilla á  Bylgjuna. Ótrúlegt.

  Í kvöldfréttum Ríkissjónvarpsins (25.09.2010) var sagt: Málflutningur í nokkrum prófmálum vegna málsins hefjast í  héraðsdómi 15. október.  Hvernig sleppa  svona  villur  alla leið inn í stofu til okkar ?

Í mbl.is (24.09.2010) er bæði  í frétt  og í fyrirsögn talað um   brimrótarfyrirbæri , sjaldséð brimrótarfyrirbæri.  Eignarfall orðsins  brimrót er  brimróts.    þegar talað um  rót  í grasafræði , --  er  eignarfallið  rótar.

Meira  úr  mbl.is (25.09.2010): Hjúkrunarkona í bandaríska hernum sem var rekin fyrir að vera samkynhneigð er frjálst að snúa aftur í herinn. Hjúkrunarkonu er frjálst. Ekki hjúkrunarkona  er frjálst. Segja mætti einnig, að  hjúkrunarkonan sé frjáls að því að ganga aftur í herinn

 Í hádegisfréttum Ríkisútvarpsins var fjallað um starfsemi Rauða kross Íslands og um símtöl um beiðnir um aðstoð: Þau hafa  fjölgað á þessu ári. Rétt væru að segja, að þeim, símtölunum , hefði  fjölgað. Síðan sagði fréttamaður að dregið  hefði úr hjálparbeiðni.Hér  hefði átt að nota fleiritölu og tala um að dregið  hefði úr hjálparbeiðnum.

 Það var fleira sem var  ekki eins og það átti að vera í þessum hádegisfréttatíma  frá Estaleitinu. Þar var sagt   frá  fyrirhugaðri  málshöfðun  félaga úr Abba-hópnum  vegna notkunar á einu af lögum þeirra. Sagt var: .... eru vanir því að lög þeirra séu notuð í ýmis tilefni.  Hefði betur verið  sagt ,við ýmis tilefni  eða  af ýmsu tilefni.

    Lög um landsdóm og ráðherraábyrgð stenst, ...  sagði fréttaþulur Ríkisútvarpsins (24.09.09.2010). Lög er fleirtöluorð. Lög standast, hefði því átt að segja.

Molar um málfar og miðla 413

  Þrátt fyrir allt leynist ýmislegt gott innan um  íhalds- og afturhaldsbullið á ÍNN.  Ingvi Hrafn sagði hlýlega og  fallega frá erfiðum veikindum  Jóns Arnar bróður síns, sem  býr ásamt  fjölskyldu  sinni í Regina Sask.  í Kanada. Þetta var vel gert ,Ingvi Hrafn, og snart alla, sem þekkja þetta góða fólk. Vonandi fær  Jón Örn  góðan bata. Við Eygló nutum gistivináttu þessara sæmdarhjóna á sínum tíma Í Regina. Það voru góðar stundir.

 Hláleg málvilla er í frétt í mbl.is (24.09.20010). Þar segir:  Árni Páll fór erlendis í morgun.  Menn  fara utan. Menn eru erlendis. Menn fara ekki erlendis. Hefur  einhver heyrt talað um að fara hérlendis ?  Moggi, Moggi, hvar ertu staddur ? 

   Í  þáttum  Péturs Gunnlaugssonar í Útvarpi Sögu  Línan er laus,er  orðið   stjórnmálastéttin nefnt að meðaltali á   fimm mínútna fresti.  Í því felst alltaf  lítillækkun þeirra sem komið hafa að stjórnmálum.  Í þessum þætti var nýlega talað um karakterheimsku. Það er reyndar   einkar lýsandi orð.

Embættismaður myrtur í New York,  segir í fyrirsögn fréttar í mbl.is (24.09.2010). Fyrirsögnin er ekki röng, en hefði mátt vera skýrari. Það var erlendur sendimaður,sem var myrtur í New York. Það kemur fram í fréttinni.

 Það er til marks um sagnfræðilegt meðvitundarleysi þeirra sem halda um stjórnvölinn í Ríkissjónvarpinu í Efstaleiti ,að ekki  skuli sýndir einhverjir af þeim tugum  heimildamynda, sem norrænu sjóvarsstöðvarnar sýna frá árum heimsstyrjaldarinnar síðari.  Þessa þætti er áreiðanlega hægt að  fá á viðlíka verði og amerísku drauga-  og dellumyndirnar sem okkur er sífellt boðið að horfa á. Um hvað er þetta lið að hugsa ?   Líklega er það ekki að hugsa.

  Á sunnudagskvöld , samkvæmt  boðaðri dagskrár  norska  sjónvarpsins NRK 2 gefst kostur á að hlýða á  kínverska píanósnillinginn Yundi Li Hann veldur ekki vonbrigðum. Menningarmiðstöðin í Efstaleiti í Reykjavík  býður þjóðinni upp á  hvað á þessum sama tíma ?  Fótbolta. Hvað annað  !

 

Molar um málfar og miðla 412

 Úr dv.is (22.09.2010): ...og vantar stjórnarflokkunum aðeins tvö sæti til að tryggja sér hreinan meirihluta á sænska þinginu. Þetta köllum við íhaldsmenn um málfar  þágufallssýki, en  reiðarekssinnar telja  þetta rétt mál og  líklega   vandað orðalag.  Í anda þess að allt sem sagt er, - sé  rétt.

 Í fréttum Stöðvar tvö (22.09.2010) var sagt: Drengurinn var klæðalítill...  Þetta er  að sjálfsögðu ekki rangt, en Molaskrifari hefði fremur kosið, að hér hefði verið sagt í samræmi við málvenju: Drengurinn var klæðlítill.

 Í  fréttum Stöðvar tvö ( 22.09.2010) var ítrekað sagt,  að Rússar gerðu tilkall til Norðurskautslandsins. Það er ekkert land  á  norðurskautinu, bara hafís og líklega stöku vakir.  Enn eitt dæmið um vankunnáttu í  landafræði. Á suðurskautinu  er land. Ekki á norðurskautinu.

  Þegar fréttaþulur Stöðvar tvö (22.09.2010)  talaði um svonefnd hnoð, þegar fjallað var  um flugvélar var það eins og að tala um svonefndar skrúfur eða svonefnda nagla þegar  talað er um tréverk.  Líklega hafði sá sem skrifaði fréttina ekki hugmynd um hvað hnoð er.

Af pressan.is (23.09.2010): Þær upplýsingar fengust frá ráðuneytinu að ráðning Steindórs hafi borið brátt að. Ráðningin bar ekki brátt að. Hér hefði átt að segja ,að ráðninguna hefði borið brátt að. 

  Þótt mörg  íslensk fyrirtækjaheiti séu hnoð , til skammar  og tekin  beint úr úr ensku eru líka til  mýmörg prýðileg íslensk nöfn á fyrirtækjum.  Til dæmis nafnið á glerauganaversluninni,sem heitir Sjónarhóll í Hafnarfirði. Það er reyndar heiti hússins sem  Sjónarhólshjónin, þau Björn Eiríksson  og Guðbjörg Jónsdóttir reistu og þarna stendur enn.  Þar ráku þau verslun  og áður í timburhúsi sem vék fyrir því húsi sem þar stendur nú.  Þessi sæmdarhjón og mannvænleg börn þeirra voru  áberandi í Hafnarfirði á tuttugustu öldinni.

 Molaskrifari heyrði nýyrði í Útvarpi Sögu (23.09.2010), karakterheimska.Orðið var notað  til að lýsa Alþingi  Íslendinga, þinginu sem þjóðin hefur kosið.  Það skyldi þo ekki vera að þetta orði væri góð lýsing á  sumum sem hleypt er að hljóðnemanum í Útvarpi Sögu. Ruglið sem sent er út  frá Útvarpi Sögu á sér engin takmörk.

Molar um málfar og miðla 411

  Það er fordæmalaust með öllu að borgarstjóri virði ekki borgarfulltrúa svara á fundum borgarstjórnar, hefur dv. is eftir  borgarfulltrúa (21.09.2010). Ekki veit Molaskrifari betur en að það sé  fast orðatiltæki að tala um virða einhvern ekki svars (ekki svara), að virða einhvern ekki viðlits.

Í dagskrárkynningu í Ríkisútvarpinu (21.09.2010) var talað um að kenna námskeið. Það finnst Molaskrifara slæmt  orðalag. Námskeið eru haldin ,ekki kennd.  Líklega er þetta hrátt úr ensku, e.  to teach a course.

 Á eyjan.is   er haft  eftir  þingmanni (21.009.2010): ...Þetta er bara það sem lá í loftinu. Eins þetta spinn með leyndina á gögnunum, þetta er bara eitthvað spinn, því miður.  Það sem þingmaðurinn er að tala um er   kallað spuni á íslensku  en ekki spinn.   Spinn er  1. pers. et  af  sögninni að  spinna , ég spinn ,eða  stýfður boðháttur sömu sagnar. Spinn er ekki til sem  nafnorð í íslensku.  Spuni er  fínt  orð.

 Molaskrifari átti eftirminnilega kvöldstund heima hjá  Jóhani  Hendrik Winther Poulsen í Færeyjum fyrir  skömmu ásamt færeyskum vini. Færeyingar kalla Jóhan orðabókina  eftir  útvarpsþætti,sem hann annaðist árum  saman. Þættirnir voru fluttir tvisvar í mánuði. Á 75 ára afmæli hans  voru tæplega 200 þættir  gefnir út í bók.  Bókin er um  eitt þúsund  síður.  Jóhan  Hendrik  sýndi Molskrifara  athugasemdir ,sem hann hefur  hripað hjá sér, um ambögur einkum  í útvarpi: „Blessaður  vertu, ég á heilar sátur af þessu" sagði hann. Jóhan Hendrik talar prýðilega íslensku, enda stundaði hann nám  við Háskóla Íslands  og er íslenskum fræðimönnum að góðu kunnur. Um þessa  iðju hans  sagði Svenning Tausen nýlega í Dimmalætting:  Hann hefur eisini savnað ørgrynni av málspillum í føroyskum máli, mest arin av donskum máli. Tær hevur hann mest høyrt i Kringvarpi  Føroya og lisið tær  i føroysku bløðunum.

 Tað skuldi vera rímilegt og einasta natúrliga at Fróðskaparfelag  Føroya gevur hetta málspillusavn  Jóhan Hendriks  Winther Poulsen út. Tað fer at gagna  gagna føroyskum máli almikið". Talsverð umræða  verið  verið um málvernd í færeyskum blöðum  að undanförnu og verður ef til vill vitnað meira  í hana   síðar.

Ferðaskrifstofan Iceland Express  gerir ekki miklar kröfur til þeirra sem koma fram í hennar nafni og er ekki vönd að  virðingu sinni. Um það vitna þættir  sem hún borgar Útvarpi Sögu fyrir að birta.  Þættirnir  eru morandi í málvillum umsjónarmanns. Einkar fróðlegt var að hlusta á auglýsingaþátt um Orlandoferðir  þar sem rætt var  við svonefndan   sérfræðing, konu sem hafði farið þrisvar sinnum til Orlando!  Það var líka athyglisvert að heyra að  ein meginástæðan  fyrir því að áhugavert  væri að fara til Orlando væri sú ,að þar væri  svo gott að kaupa   varahluti í bíla.  Svo voru  átlettin   afar aðlaðandi. Þar mátti með því að  kaupa nógu mikið  hagnast, sem nam andvirði farmiðans. Þessir þættir eru ferðaskrifstofunni öldungis ekki til framdráttar.

Molar um málfar og miðla 410

Svolítið villandi fyrirsögn var í mbl. is (21.09.2010) 100 ár síðan kona var tekin af lífi í Virginíu.  Þegar fréttin  er lesin,  kemur í ljós, að  fyrirhugað er að taka  konu af lífi í Virginíu, en  kona var síðast tekin af lífi þar fyrir  hundrað árum.  Fyrirsögnin var  ekki röng, en horft var framhjá aðalefni fréttarinnar.  Í fréttinni segir ennfremur: ....og hafi verið undir sterkum áhrifum frá sér klárari fólki þegar morðin, sem hún var dæmd fyrir, voru framin.  . Áhrifum frá sér klárara fólki ,væri  betra, en ekki gott.

Úr íþróttafréttum mbl.is (20.09.2010): Hvað gerðist í þessu atviki?„Þetta kallast að lesa leikinn, það gerði ég en ekki dómarinn.  Boltinn datt fyrir framan mig og það koma tveir varnarmenn á fullri ferð í mig....   Það var og.

 Aðfaranótt  þriðjudags (21.09.2010) heyrði Molaskrifari brot úr endurteknu viðtali, (öllu fremur eintali Ólafs)  við Ólaf Ragnar  Grímsson  forseta Íslands í Útvarpi  Sögu. Í þeim stutta kafla,sem  Molaskrifari  hlustaði á  voru mýmargar staðreyndavillur. Ólafur  fór ekki einu sinni rétt með árið,sem hann fór í opinbera heimsókn  til Kína. Það var 2005 ekki 2006.  Það er  líka  rangt að allir sem komi  til Peking fái særindi í háls og nef vegna mengunar. Staðreyndir hafa    aldrei staðið  Ólafi Ragnari fyrir þrifum. Stjórnendur vissu ekkert í sinn haus.    Það rifjaðist upp við að hlusta á þetta, að   árið  2005 hafði Ólafur Ragnar ekki áhuga á að heimsækja  Xianiang þar sem unnið var að hitaveituframkvæmdum  á vegum  Íslendinga. En þá var Ólafur Ragnar heldur ekki búinn að finna upp hitaveituna.

  Hausthreingerningar standa  yfir í Útvarpi Sögu , því samkvæmt   því sem segir í Fréttablaðinu er  bæði búið að  reka  Sigurð G. Tómasson og Önnu Kristine Magnúsdóttur, -- með SMS símaskilaboðum !

 Nú orðið  kynnir  Molaskrifari  sér   fyrst efni norrænu sjónvarpsstöðvanna í Mogga, áður en hann lítur á dagskrá Ríkissjónvarpsins. Það er þó tilhlökkunarefni að horfa á Kilju Egils  í kvöld. 

Molar um málfar og miðla 409

  Í fréttum Ríkissjónvarpsins (20.09.2010) var talað um bavarískan prins  (e. Bavarian). Orðið bavarískur er ekki til  í íslensku. Sá sem er  frá Bæjaralandi, eins og  hér var um rætt,  er bæverskur. Nýir fréttamenn falla í gamlar gryfjur vegna þess að enginn segir þeim til eða les yfir það sem þeir skrifa.

Stundum hefur verið  vikið hér að tískuorðtökum, sem allt í einu skjóta upp kollinum og hver étur eftir öðrum. Sum lifa. Önnur hverfa Nú tíðkast mjög að segja að menn  geri eitthvað eins og  enginn sé morgundagurinn.  Þetta  á við það þegar  menn gera  eitthvað algjörlega taumlaust og  án allrar fyrirhyggju. Þetta er  beint úr ensku, -  like there is  no tomorrow.  Sama máli  gegnir líklega um slagorð olíufélagsins,sem  talar  í auglýsingum um að veita  viðskiptavinum sínum afslátt alveg vinstri hægri. Gefið er í skyn að   afslátt, og hann ríflegan,  sé víða að fá.

Kartöflumús,sem fær hvert mannsbarn til að slefa yfir, skrifar fastur Pressupenni (20.09.2010). Og segir svo: Kartöflumús er ekki bara góð með pottréttum og reyktum fiski því þær blása lífi í hefðbundnar kjötmáltíðir ef soðnum kartöflum er skipt út fyrir mús.  Höfundur er sennilega að skrifa um kartöflumýs, eða hvað ?

   Ragnar Eiríksson segist hafa verið að safna í sarpinn. Hann sendi eftirfarandi:

DV 13.sept., 2010
Ancelotti: Abramovich ekkert svo áþjáður að vinna Meistaradeildina
"Ég tala oft við Roman og hann er ekkert sérstaklega áþjáður að vinna
Meistaradeildina. Hann vill vinna allt, en hann er ekki örvæntingarfullur.
Ég finn ekki fyrir neinni pressu. Ég kýs að setja sjálfan mig undir pressu
því ég vil vinna," segir Ancelotti en Chelsea-liðið spilar gegn MSK Zilina á
miðvikudag í fyrsta leik sínum í riðlakeppni Meistaradeildarinnar.


Bæjarins Besta
bb.is | 16.09.2010 | 14:06
Vopnaður kökukefli og kjöthamar

DV
 16:13 > 16. september 2010
 Íslenk lán sem áður voru bundin gengistryggingu skulu bera óverðtryggða
vexti Seðlabanka Íslands.
Málið hefur velgst í dómskerfinu í allt sumar

Svipan 17. sept. 2010
Stjórnarliðarnir í sáttanefndinni voru nauðbeygðir af LÍÚ og
Sjálfstæðisflokknum