Molar um málfar og miðla CXLVII

„Stundum eyðileggur fólk líka bara fyrir sér sjálft, þegar það firrist við að svara eðlilegum fyrirspurnum blaðsins,“  segir  bloggari  í Vefdv (08.09.2009). Molaskrifari hefur aldrei heyrt orðatiltækið að  firrast við.  Nafnorðið firra  er  fjarstæða  eða  vitleysa. Sögnin að firra  þýðir að   svipta einhvern einhverju  eða  losa einhvern við eitthvað. Miðmynd  sagnarinnar að  firrast  er að  fjarlægjast eða halda sig  burtu frá  einhverju. Notkun sagnarinnar  firrast  í  tilvitnaðri setningu  er því hrein firra.  Að skirrast  við eitthvað  eða einhverju er  hinsvegar að  kinoka sér  við einhverju eða  vilja varast að gera eitthvað, segir orðabókin.  

Í fréttum RÚV sjónvarps (09.09.2009) var  fjallað um breytingar á námslánum.  Þá   sagði  fréttamaður:...sem þurfti að  framfæra  sér   á (upphæð) ..... Hér  hefði Molaskrifara þótt eðlilegra  að  segja: .. sem þurfti að framfleyta sér á .... Kannski var þetta bara mismæli.

  Rétt  málnotkun á  ekki upp á  pallborðið  hjá  ýmsum sem  skrifa í Vefdv. Eftirfarandi var skrifað um Harry  Bretaprins (10.09.2009): Þeim peningum hefur síðan verið ávaxtað skynsamlega og upphæðin hækkað umtalsvert.  Sögnin að ávaxta  stýrir  ekki þágufalli .Þessvegna  hefði átt að standa  þarna: Þeir  peningar hafa verið ávaxtaðir  skynsamlega ....  Í  sömu frétt stendur: ..né fagna sínum nýfengna auð.... Nafnorðið  auður  beygist:auður,auð auði,auðs. Við  fögnum  sigri, ekki  sigur. Þessvegna  hefði átt  að standa  þarna:  ....né fagna  sínum nýfengna auði...

Sjö-núll  fyrir  Íslendingum, segir í  fyrirsögn á  Vefvísi (10.09.2009). Molaskrifari áttar  sig ekki á  notkun þágufalls í þessu tilviki  og  teldi eðlilegra  að  í fyrirsögninni  hefði verið  sagt: Sjö-núll fyrir  Íslendinga.

 

Molar um málfar og miðla CXLVI

Ekki linnir aðilafárinu í fjölmiðlum. Þetta er úr Vefmogga  (08.09.2009): Tveir erlendir aðilar á miðjum aldri.. ..  Af hverju ekki tveir útlendingar á miðjum aldri ?  Mennirnir  voru fullir og  höfðu klifrað upp  í turn Hallgrímskirkju og tekið  til  við  að  slá í kirkjuklukkurnar. Á vef RÚV  er  þessi frétt einnig, en þar er talað um menn en  ekki aðila. í Vefvísi   er talað um tvo útlendinga. Prik fyrir það.

Vefvísir (08.09.2009) segir frá  bankaráni í Danmörku þar sem  maður ógnaði starfsfólki og viðskiptavinum með tvíhleyptri hlaupstífðri haglabyssu. Þetta er ekki illa að orði komist. En orðið  stífður  er ekki til.  Hér  ætti að standa  stýfður, styttur  eða  þverskorinn,  sbr.  stúfur.  En hlaupstýfð haglabyssa  er gott um það sem á  ensku er kallað  sawed-off shotgun. Glæpamannavopn.

Sjóminjasafnið Víkin í Reykjavík kynnir  sig á  Fésbókinni, m.a. með þessum orðum: boðið uppá leiðsagnir um Varðskipið Óðinn kl. 13, 14 og 15-Mín máltilfinning  er  að  orðið leiðsögn  sé ekki til í  fleirtölu. Þess vegna hefði farið  betur á að segja: ...  að  boðið sé upp á  leiðsögn um  varðskipið Óðin á þessum  tilteknu  tímum, -  ekki Óðinn (eins og  sagt  er: Óðinn, Óðin,Óðni,Óðins)) Orðið  varðskip á  heldur ekki að rita með  stórum  staf og  svo er  upp á   skrifað í tveimur orðum. Það eru því  fjórar villur í  þessari stuttu tilvitnun í Fésbókina. 

 Það er ekki mikil máltilfinning til  staðar , þegar sjónvarpsmaður í Kastljósi Ríkissjónvarpsins segir (08.09.2009) uppi í Hafnarfirði. Ótrúlegt en  satt.

Molar um málfar og miðla CXLV

 Í fréttum Stöðvar  tvö (07.09.2009) af ferjuslysi  við  Filippseyjar var  sagt  skipið  tók að hallast.  Það er  gott og gilt orðalag, en lakara  var að  heyra í  sömu  frétt að skipið  hefði   skyndilega  byrjað að hallast á  hliðina. Í  RÚV  sjónvarpsfréttum var  fjallað um bát sem  sökk      á Ohrid vatni undan  strönd Makedóníu. Þar var sagt:  Skyndilega  fór  báturinn að halla. Þetta er  að dómi Molaskrifara röng  notkun  sagnarinnar að halla. Einhverju hallar, eitthvað hallast. Einkennilegast  finnst  Molaskrifara þó að  enginn  skuli hafa notað orðið  slagsíðu, sem  átti við í báðum tilvikum.

 Einkennilega orðuð frétt í Vefdv (07.09.2009) :Ferðafólkið var að þvera Tjarnarkvísl þegar áin tók bílinn.  Tjarnarkvísl er staðsett SV af Sátujökli sem er skriðjökull norðanmegin í Hofsjökli.

Fólkið var að  þvera ána.. fólkið var  að  aka yfir ána. Áin tók bílinn.. líklega  hefur   bíllinn flotið upp eins og  sagt er.Einnig  hefði mátt segja að  straumurinn hefði tekið  bílinn.  Svo  er  orðinu  staðsett ofaukið í seinni setningunni.  Tjárnarkvísl  er  SV af Sátujökli... Í   Netmogga  er þessi frétt ágætlega orðuð,  nema  að þar er líka talað um að  Tjarnarkvísl  sé  staðsett  suðvestur  af Hofsjökli. Í Vefvísi segir um sama mál: Reyndist fólkið heilt á húfi eftir að hafa fest bifreið í Tjarnarkvísl, en náði að komast úr honum  Hér  talar  skrifari  fyrst um  bifreið,en er svo greinilega að hugsa um bíl, þegar hann lýkur setningunni.

Meira  af Vefdv (07.09.2009) : Þau eiga alls sex börn og er Svanhildur ólétt af því sjöunda.  Hér ætti  samkvæmt  minni máltilfinningu að  nota  aðra  forsetningu og   segja : ..ólétt að því   sjöunda. Eftirfarandi er  einnig  af Vefdv: Tveir aðilar hafa verið handteknir vegna málsins. Ætlar þessu endalausa aðilabulli  aldrei að linna ?

Sumt er erfitt að skilja í dagskrárgerðinni  hjá  RÚV, þessu opinbera hlutafélagi sem við eigum öll. Hversvegna, til dæmis,  er ekki fréttayfirlit  klukkan tólf á   hádegi á laugardögum og sunnudögum ?   Hversvegna  eru ekki  fréttir á nóttinni klukkan  þrjú og  klukkan  fjögur? Fréttir eru klukkan  tvö og   svo aftur  klukkan  fimm. Frétttamaður  er  því á  vakt  alla nóttina. Það er margt skrítið í kýrhausnum  við  Efstaleiti.

Enn er  svo undrast á því hvaða  tilgangi það þjónar að endursýna Kastljós klukkan eitt að nóttu.  Er ekki verið að   reyna að spara? Vonandi  nær  sparnaðarviðleitnin í ríkisrekstrinum alla leið upp í Efstaleiti.

 

Molar um málfar og miðla CXLIV

  Fréttaþulur  RÚV  sjónvarps (06.09.2009) sagði  í upphafi  frétta: Þeim sem  dreymir um...  Þetta   endurtók þulur  svo  í yfirliti í fréttalok og  sagði  aftur: Þeim sem  dreymir um....Þetta er  eins og að segja : Mér  dreymdi...... Þarna  átti  auðvitað að  segja : Þá  sem  dreymir um... Í sama  fréttatíma  sagði íþróttafréttamaður um  úrslit  í leik: Lokatölur urðu  tvö eitt  fyrir  Englendingum.  Tvö eitt  fyrir  Englendinga hefði verið rétt að segja.   Meira um íþróttir:  Fréttaþulur  Stöðvar tvö (06.09.2009) sagði:  Þar sem landsleikur Íslands og Norðmanna ber  hæst.  Að minni hyggju hefði hann átt að segja: Þar sem landsleik Íslands og  Noregs  ber  hæst.

 Enn fjölgar átlettunum. Þessi pest  virðist  breiðast hraðar út en  svínaflensan.  Golfátlett var auglýst í útvarpi (06.09.2006). Þegar  Molaskrifari  ók Dalveginn sá hann Factory átlett.  Hugmyndaflug og orðgnótt íslenskra kaupmanna er með ólíkindum.  Í  Skeifunni  eru   ein tvö  átlett  næstum hlið við hlið og  eitthvað er  af þessum ófögnuði vestur á  Granda.

  Í  Íslenskri orðabók er  skilgreining á  sögninni að þinglýsa. Þar kemur líka  fram  að  sögnin stýrir þágufalli, samningi er þinglýst. Ömurlegt var að hlýða á  fréttamann í sjöfréttum RÚV  (05.09.2009) sem var að  segja  frá sölusamningum og leigusamningum sem, hafði verið þinglýst   tala þrisvar sinnum um  samninga sem voru þinglýstir. Átti  auðvitað að  segja -  samningum sem var þinglýst. Þeir sem   svona  tala þurfa að læra betur. Rétt var  farið með þetta í inngangi sem þulur las.  

Að því loknu lét hann sig hverfa út úr íbúðinni, segir  í Vefogga  (05.09.2009) Þetta  hefur verið sannkallaður  töframaður, enda var hann  undir annarlegum áhrifumeins og  það var orðað í fréttinni.

Á vef RÚV (05.09.2009) er  fyrirsögn um  skipið  dularfulla: Varningur  Arctic Sea  enn ráðgáta. Þarna  hefði  farið betur á að tala um  farm  skipsins,  ekki varning  skipsins.

Molar um málfar og miðla CXLIII

Á Vefvísi stendur (04.09.2009) og er  haft eftir  Sigurði Einarssyni fyrrum  Kaupþingsstjóra:  Á Íslandi, líkt í Lúxemborg, væri hægt að tjónka við eftirlitinu (eftirlitið=fjármálaeftirlitið) . Sögnin að  tjónka  við þýðir að   stjórna , hemja  eða  ráða við. Hún stýrir þolfalli.  Tjónka við einhvern. Hér  lætur blaðamaður sögnina  stýra þágufalli sem er  rangt. Ræða  Sigurðar var flutt á  ensku þannig að ambagan er á  ábyrgð blaðamanns  Vefvísis.  Upphaf setningarinnar ætti líka að vera: Á Íslandi, líkt og í Lúxemborg. Ritstjórn vefvísis gengur illa að tjónka  við lélega penna.

Mikil  rausn er  það  hjá þjóðarútvarpinu að fjalla  einu sinni í viku um daglegt mál  í morgunþætti  Rásar eitt. Þakka ber, þótt lítið sé.

 Bjarni Sigtryggsson sendi Molum  eftirfarandi pistil:"Lík þriggja ungabarna finnast í húsi"

Þannig hljóðar fyrirsögn á frétt dv.is um óhugnanlega uppgötvun. Fréttin hefst á þessum orðum.

"Þrennt hefur verið handtekin eftir að lík þriggja nýfæddra barna frá níunda áratug síðustu aldar fundust í húsi í úthverfum Merseyside í Englandi."

Hér er ýmislegt athugavert. Í fyrsta lagi sú árátta að tala um ungabörn, þar sem átt er við ungbörn. Barnalegt málfar, sem fólk ætti að hafa hætt að nota strax eftir leikskóla. Í öðru lagi finnst mér enn hjákátlegt að tala um "á síðustu öld" þegar um er að ræða atburði sem gerðust seint á tuttugustu öldinni. Það er svipað og að segja "í fyrra" um nýliðna daga strax í upphafi nýs árs. Loks er það þetta með Merseyside í Englandi. Borgin Liverpool stendur við ósa Mersey ár og allt það byggðarlag (Liverpool, Runcorn og aðliggjandi bæir) er gjarnan nefnt Merseyside. Skýrara hefði verið að segja að þetta hefði gerst í úthverfi Liverpool. - kv Bjarni

Molaskrifari er  reyndar ekki sammála Bjarna um að orðið ungabarn sé  barnamál. Skrifari leggur orðin ungbarn og ungabarn að jöfnu. En um það má  sjálfsagt deila. Mér finnst reyndar líka í lagi , þegar talað er um atburði sem áttu sér stað fyrir  aldamót að  segja á öldinni sem leið, - felli mig  betur við það orðalag en  að segja á síðustu öld.  Landafræðina í grennd við Liverpool þekki ég ekki ,en sjálfsagt er þetta rétt. Þakka sendinguna og áhugann,sem hún gefur til kynna. 

Molar um málfar og miðla CXLII

Molaskrifara verður tíðrætt  um Ríkisútvarpið, enda  er það sá  fjölmiðill og  sú fréttalind sem flestir landsmenn nýta og það er þjóðin öll sem á þetta  opinbera hlutafélags  eins og   hamrað  er á í auglýsingum. Slakt  þótti  molaskrifara að í sjöfréttum hljóðvarps  (03.09.2003) voru aðeins þrjár  fréttir  (fyrir utan stutta íþróttafrétt). Fyrsta frétt var  reyndar innlend frétt um  slökkvilið höfuðborgarsvæðisins og  Reykjavíkurflugvöll, sem  búið var að  birta kvöldið áður.

Það var ágætlega að orði komist  í fréttum RÚV   sjónvarps (03.09.2009) þegar sagt var að lögreglan hefði upprætt kannabisplöntur.  Líka   var gott  að  sagt var Í RÚV  fréttum að  ný  brú  hefði verið   formlega  tekin í notkun yfir Mjóafjörð vestra.  Stöð  tvö  sagði  hinsvegar  í fréttayfirliti að samgönguráðherra  hefði vígt  nýja brú. Kristján Möller  samgönguráðherra vígir ekki eitt né neitt, enda  ekki  vígður maður. Meira um Stöð  tvö.  Þar flaskaði  fréttamaður  á  framburði  á heiti  ríkisins Arkansas í Bandaríkjunum . Hann bar það  fram  með  sterku ess-hljóði í lokin. Réttur  framburður   er   hinsvegar   eftir  einfaldri  hljóðskrift: Arkanso.  Þetta hélt ég að  væri eitt  af því fyrsta  sem  fréttamenn tileinkuðu sér  varðandi framburð  erlendra  staðanafna. Enn heyrir maður   KonnekkTikött (Connecticut),  í stað Konnettikött

Það var annars athyglisvert  að  Ríkisútvarpið  skyldi  sjá  ástæðu til að  biðja  knattspyrnuáhugamenn sérstaklega velvirðingar á því að sýning frá  framlengingu einhvers leiks í útlöndum yrði ekki á dagskrá fyrr en  seint í kvöld. Ég man ekki til  þess að almennir áhorfendur hafi verið  beðnir  velvirðingar því þegar  fréttum er ýtt  til  hliðar  til að sýna frá íþróttaviðburðum af ýmsu tagi. Þó má það vera.

Tvísagt var í fréttum RÚV sjónvarps klukkan sjö (03.09.2009) að eftir   fyrsta desember  þyrfti að  flytja  tuttugu  tonn af  sorpi  af  Suðurlandi til urðunar í Reykjavík. Kostnaður yrði um 200 milljónir. Þetta var óskiljanlegt með öllu. Í  tíu fréttum var þetta svo leiðrétt og sagt að hér   væri um að ræða  tuttugu þúsund tonn af sorpi. Það var allt annar handleggur. Einkennilegt hvernig  svona  augljósar  villur  fara í gegnum margar síur.

Karlmaður í Flórída í Bandaríkjunum brá heldur betur í brún þegar hann sá froskaleifar í Pepsi-dós sem hann hafði opnað,  skrifar  Vefmoggi (03.09.2009). Mér brá í brún við að lesa þetta.Maður  bregður ekki í brún. Manni  bregður í brún. Þess vegna hefði þarna átt að standa : Karlmanni í Flórída í Bandaríkjunum brá heldur betur í brún...Svo verður  Molaskrifari að játa  að honum finnst  orðið  froskaleifar óvenjulegt að  ekki sé  meira  sagt!

Molar um málfar og miðla CXLI

 

Það er algjör óþarfi  hjá  RÚV  að  nota  landaheitið  Montenegro (morgunfréttir  03.09.2009) þegar við  eigum hið gamla  og góða heiti Svartfjallaland. Gott nýyrði er  stikla (Morgunblaðið 03.09.2009) yfir   sýnishorn úr kvikmynd sem á  ensku   er kallað trailer.  Vont  er  hinsvegar heiti á  skyrdrykk frá  fyrirtækinu Mjólku, sem  fyrirtækið kallar boost. Það orð er ekki íslenska  heldur  enska. Svona nafngiftir eru skemmdarverk.

Í tíu fréttum RÚV sjónvarps (02.09.2009) var okkur  sagt að  Ban Ki-moon  aðalritari,eða  framkvæmdastjóri Sameinuðu þjóðanna hefði heimsótt norðurheimskautið. Norðurheimskautið er norðurpóllinn. Ban Ki-moon fór    ekki á  norðurpólinn. Hann  hefur verið í heimsókn á  Svalbarða  undanfarna  daga í boði norska umhverfisráðherrans Eriks Solheim og  sigldi  að ísröndinni  við  Svalbarða  norðan við Nýja Álasund,  samkvæmt  fréttum norskra  netmiðla,sem  Molaskrifari  telur  vita meira um málið  en  RÚV.  Þetta eru ekki traustvekjandi vinnubrögð hjá fréttastofu RÚV.    Í íslenski orðabók segir: heimskaut, endi jarðöxulsins, jarðpóll.

Þingmaður klessir  á hjólreiðmann(svo!), segir í  fyrirsögn í Vefdv (02.09.2009), en  vestur í Ameríku ók þingmaður  yfir  gatnamót á rauðu  ljósi og  keyrði á  hjólreiðamann. Þetta þótti fréttnæmt  af því að þingmaður  átti í hlut. Þeir sem  enn hafa ekki  þroskast frá   barnamáli  leikskólans  eiga að  finna sér annað starf en að skrifa  fréttir. Að klessa á, -  er barnamál  sem  ekki á  heima í fréttum. Þeir sem fara um á  reiðhjólum  eru  hjólreiðamenn, ekki hjólreiðmenn eins og  sagði í fyrirsögn Vefdv.

 Bílvelta var í Arnarfirði í dag, segir Vefmoggi (02.09.20089). Einmitt það. Það var  bílvelta. Af hverju ekki : Bíll valt í Arnarfirði í dag ?

 Af umfjöllun fjölmiðla  að undanförnu sést    samhengi hlutanna.  Milljarðagjaldþrot verða þegar menn fara í rekstur sem  þeir  hafa ekki  hundsvit á. Í sumum  fyrirtækjum voru reyndir starfsmenn sem  gjörþekktu  reksturinn og  atvinnugreinina látnir  víkja fyrir  nýliðum  sem vissu ekkert um reksturinn en  voru  góðir í Excel töflureiknivélinni. (Ef ég leyfi mér  svolítinn orðaleik á ensku , mætti segja: They didn´t excel !)  Það er ekki sjálfgefið  að sá  sem kann að selja kaffi og  hveiti  kunni að reka banka. Eða sá sem grætt hefur  á   grænmetissölu (munið þið  grænmetissvindlið mikla ? ) sé  snjall  við  rekstur  flugfélags, sem  reyndar  tókst að  „margselja" með milljarða „gróða". Nú  eða að kvótakóngur,útgerðarmaður og þyrlueigandi  úr Eyjum,sem kann að gera út,  sé  snjall  bílasali og komi einu  öflugasta bílaumboði landsins á vonarvöl. Sá hinn sami  stofnsetti leikfangaverslun  fyrir  stóru strákana (vélsleðar,fjórhjól, hraðbátar og fleira) og tapaði milljarði. Englendingar hafa lengi sagt: The difference  between the men and the boys, is the price of their  toys.,  eða: Munurinn drengja og manna er  verðið leikfanganna. Þessir   piltar héldu að þeir  gætu allt  og mættu allt. Þeir gerðu allt. Því fór sem fór.

Molar um málfar og miðla CXL

Af Vefdv (01.09.2009): Yfirvöld höfðu ákveðið að jafna nokkrar hæðir og hóla til að geta byggt fleiri íbúðarhúsnæði í þorpinu."Við þessa setningu   finnst Molaskrifara tvennt  athugavert. Hið  fyrra  er  að jafna nokkrar hæðir og  hóla. Betra hefði  verið að  segja  að slétta  hæðótt landslag  eða slétta úr  hólum og  hæðum. Hitt er verra : ..til að geta  byggt  fleiri íbúðarhúsnæði. Húsnæði er  eintöluorð í íslensku. Það er ótækt  að að tala um mörg  húsnæði. Þarna  hefði átt að segja,  til  dæmis: Til að geta byggt  fleiri íbúðarhús,  eða  til að auka íbúðarhúsnæði.

Með örfárra daga millibili hefur Molaskrifari  rekist á þessa ambögu í sama miðli, - Vefdv. : „..... þar sást bíll Árna Johnsens alþingismanns lagður beint fyrir utan Valhöll hjá kanti sem málaður er gulur." Við  segjum hann lagði  bílnum á  bílastæði, ,-  ekki: Hann lagði bílinn á  bílastæði. Það fer ekki mikið fyrir máltilfinningunni hjá þeim sem  svona  skrifar. Þetta var í Vefdv (01.09.20009). Þessi sama  ambaga var á  Vefdv í fyrradag. Þar er greinilega  einhver  að  skrifa fréttir  sem  skynjar  engan  mun á því að segja:  Bíl var lagt eða  bíll var lagður. Ótrúlegt.

Ekki get ég að því gert ,að mér finnst Ríkisútvarpið vera eins og áttavilltur unglingur á morgnana. Nú  er  búið að  færa þáttinn Vítt og breitt á  Rás eitt  í kjölfar sjöfrétta.  Morgunfrúarhjalið er horfið.Það er  reyndar  í góðu lagi. Á  Rás  tvö er á sama  tíma  Morgunvaktin  sem er ekki  svipur hjá sjón með  nýjum umsjónarmönnum. Aulafliss   á ekki heima í  svona þætti.  Nú eru tveir  fréttatengdir þættir á sama tíma.  Þessu ætti að breyta. Á annarri rásinni    ætti að vera vandaður  fréttatengdur þáttur, eins og Morgunvaktin sem áður var á  Rás eitt  og á  hinni  rásinni  þáttur með notalegri   tónlist, - þáttur sem  tæki mið  af því hve  stór  hluti   hlustenda er  fólk á miðjum aldri og  eldra, en   sá  hluti  hlustenda (eigenda) er ekki ofarlega á blaði í Eftsaleitinu.

 

Molar um málfar og miðla CXXXIX

 Áhugamaður um tunguna benti Molahöfundi á eftirfarandi klausu  í Vefmogga:„Báturinn hefur hlotið nafnið Le Dré en skírnarathöfn undir stjórn Peters Bürchers biskups kaþólsku kirkjunnar á Íslandi, fór fram í Hafnarfjarðarhöfn fyrir sjósetningu bátsins." Síðan spyr sá sem rak augun í þetta: „Er unnt að skíra bát? Er skírn ekki það, þegar maður er tekinn í samfélag kirkju? Getur bátur gerst slíkur félagi? Er honum ekki gefið nafn?"  Auðvitað er þetta hárétt. Bátar  og skip eru ekki skírð. Þeim  eru gefin nöfn.    Svo má  bæta  við að sagt er að  þessi athöfn hafi  farið  fram „í Hafnarfjarðarhöfn fyrir sjósetningu bátsins". Ef báturinn hefur verið í Hafnarfjarðarhöfn  hefur verið  búið að sjósetja hann.

 Þetta minnir  á notkun  sagnarinnar að  vígja, sem  nú er orðið algengt að nota þegar ný mannvirki  eru  tekin í notkun. Þegar Molaskrifari skrifaði fréttir  fyrir meira en   þrjátíu árum var lögð rík áhersla á að ekki  væri  sagt að mannvirki  væri  vígt, nema  prestvígður maður  blessaði   það og þá sem það  notuðu. Nú má  nota  orð  Torfa Erlendssonar sem á að hafa  sagt „allan andskotann vígja þeir", þegar Hallgrímur Pétursson var vígður  til embættis sem prestur á Hvalsnesi.

Í sjö fréttum RÚV í morgun (01.09.2009)  sagði fréttamaður „að lán hefði verið neytt upp á Íslendinga". Þetta er  rangt. Hann hefði átt að  segja að láni hefði verið neytt upp á Íslendinga. Það er  talað um að neyða einhverju (þgf.)upp á einhvern. Ambagan var endurtekin í áttafréttum. Heyrnartækin eru ekki í lagi í Efstaleitinu.

Margt er skrítið í  dagskrárgerð  RÚV. Mér er til  dæmis  algjörlega óskiljanlegt hversvegna Kastljós er  endursýnt klukkan að ganga  tvö að nóttu. Langflestir  þeirra sem missa  af Kastljósi á venjulegum útsendingartíma geta  horft á þáttinn á netinu.  Eldri borgarar sem  ekki eru  með  tölvu vaka  varla  eftir   endursýningu fram á miðja nótt. Ef  nauðsynlegt er að  endursýna Kastljós ætti að gera það  á skikkanlegum tíma  daginn eftir frumsýninguna.Raunar eru  þessir þættir oft þannig að ekki er nokkur ástæða til að endursýna þá.  Varla getur  verið að endursýningin  sé  einhverskonar launauppbót  starfsmanna.  Því vil ég alls ekki trúa.

 Sagt  er frá  verðhækkunum á ýmsum matvörum í fjölmiðlum  í dag. Bónus , þar sem  Molaskrifari  verslar jafnan  tók forskot á  sæluna. Lítil  ferna  af  jógúrt  frá  Húsavík hafði í gær (31.08.2009)hækkað úr  167 kr. í  172 kr. Kostaði  reyndar  fyrir  10  dögum eða  svo  163 kr.