Meira sjónvarpshrós !

 Útsending   sjónvarpsins RÚV  frá komu  Silfurliðsins  til landsins í gær  og  hátíðahöldunum sem  fylgdu í kjölfarið var tæknilegt afrek. Til hamingju með  það  sjónvarpsfólk.

Mér þykir ekki ósennilegt að þetta  sé ein flóknasta  beina  útsending í sögu  sjónvarpsins.  Þetta  var eiginlega  tindurinn  eftir  frambæra frammistöðu  sjónvarpsmanna í Beijing.

Í Færeyjum  fylgdumst við  með þessu  um   gervihnöttinn Thor (færeyska orðið yfir gervihnött er   fylgisveinn).  Myndgæðin betri en hjá  Símanum í Garðabæ. Seinna um kvöldið var svo  færeyska sjónvarpið með  hálftíma  samantekt:  Silvurliðið  kemur  til  Reykjavíkur. Þar var  rætt  við Poul Mohr  fyrrum    aðalræðismann okkar í Færeyjum og  íslenska  handboltaboltamanninn Finn Hansson úr Hafnarfirði sem  leikur hér með Neistanum.

Glæsilegur árangur okkar fólks  í Beijing stappar stálinu í   vini okkar og  frændur hér í Færeyjum . Það ná  fleiri árangri en milljónaþjóðir.

Góð auglýsing frá Bræðrunum Ormsson

Hér  eru stundum  gerðar athugasemdir   við málfar ,- í fréttum og í auglýsingum.

Stutt og snaggaraleg auglýsing   frá  Bræðrunum Ormsson í sjónvarpinu í kvöld  er hrósverð. Þar  sagði einfaldlega : Þessi árangur er  gulls ígildi!

Eitthvað annað en enskusletturnar  frá   bílaumboðunum Toyota og  Ingvari Helgasyni sem hrella unnendur móðurmálsins  með "smæl" og "outlet".

Fínt hjá  Bræðrunum Ormsson !

Fullt hús í Fútastovu

Það var fullt út úr  dyrum í Fútastovu  í morgun. Þangað komu  50-60 manns, -  fleiri komust ekki  fyrir með  góðu móti. Margir Íslendingar  voru í  hópnum og  meðal  Færeyinganna   voru   Íslandsvinir, Lögþingsmenn og  Högni Höydal utanríkisráðherra.  "Við vinnum ",  sögðu  Færeyingar áður en leikurinn byrjaði. Stemmingin var frábær.

Frakkarnir reyndust ofjarlar okkar. Við því er ekkert að segja.  Þótt við töpuðum  fyrir þeim  unnum  við  samt.

Afrek íslensku  handboltamannanna   er  stórkostlegt og allt  var þetta  þetta ógleymanleg upplifun.

Ekki þótti mér  verra  er ég uppgötvaði að  ég  átti frænda í liðinu, en þetta  er nú bara mont !

Það var mikið kaffi   drukkið í  sendiráðinu eins og  Færeyingar kalla  aðalræðisskrifstofuna í Fútastovu.  Held ég hafi  hellt  níu sinnum upp  á könnuna.

Sjá myndir hér til hliðar, -  ekki  nógu  glúrinn  til að koma þeim  inn í textann.

Opið hús í Fútastovu

Í Færeyjum er  gríðarlegur íþróttaáhugi. Hér  í Þórshöfn gleðjast vinir okkar yfir  frammistöðu íslenska handboltaliðsins. Hamingjuóskum rigndi yfir  ræðismann í SMS  eða  Sölumiðstöðinni í morgun. Raunar rignir svo mikið í dag að  öllu flugi var aflýst um hádegi vegna  þoku og  roks í Vágum. Vélin sem átti að koma frá Íslandi í gærkveldi kemur  því ekki fyrr en á morgun, -- vonandi

Í fyrramálið klukkan 08:30  verður opið  hús í Fútastovu þar sem hægt  verður að  fylgjast með leiknum á  stórum skjá. Þangað eru allir velkomnir.

Sjónvarpsmenn fá hrós

Hér í Færeyjum  höfum við eingöngu, -  stopult þó -  fyglst með beinum útsendingum RÚV  frá Beijing. Það hefur  verið ógleymanlegt, - og ekki allt búið enn !  Sjónvarpsmennirnir  frá RÚV  sem þar hafa komið  við sögu hafa  staðið sig  frábærlega  og  eiga sannarlega hrós  skilið. Hafa    verið velvakandi  allan  sólarhringinn. Tímamunurinn í Kína er  ekkert grín þegar samskipti við Ísland eru annarsvegar. Tala af reynslu um það.

Hundraðfalt húrra !

Stórkostlegt. Fái handboltaliðið eins og það leggur  sig  ekki íslensku fálkaorðuna þegar það kemur  heim  úr þessari  frægðarför er  eins  gott leggja það fyrirbæri niðuir !

Bensínverð: Langlundargeð neytenda ,- og stjórnvalda

Langlundargeð okkar íslenskra neytenda,- og  stjórnvalda,-  gagnvart olíufélögunum er með ólíkindum. Á sömu stundu og fréttir berast  af hækkunum olíuverðs erlendis hækka olíufélögin á Íslandi  verð  til neytenda. Þegar  olíuverð hinsvegar lækkar erlendis, - og það hefur lækkað mikið  að undanförnu,- gerist ekkert  á sömu stundu, heldur  gerist lítið  og  seint.

Ótrúleg var fréttin í dag um að olíufélögin hefðu ÖLL  lækkað bensínverð um eina krónu og  hráolíuverð um tvær  krónur. Öll á  sama  tíma og öll um  sömu upphæð. Þetta er sko að kunna að  ganga í takt ! Það getur ekki verið  að  stjórnvöld láti þetta augljósa   samráð óátalið.

Hvað geta neytendur gert? Væntanlega  ekki mikið, en gaman  væri að heyra tillögur.

Hin misheppnuðu mótmæli  trukkakarla  í vor höfðu  engin áhrif og  voru aðstandendum  til skammar. Það þarf að  fara  aðrar leiðir, en þær  eru vandfundnar.

Ýmsir  bundu  vonir  við Atlantsolíu þegar það  fyrirtæki var sett á laggirnar. Ég var þeirra á meðal. Sé ekki betur en  Atlantsolía  sé orðinn partur  af sukksúpunni. Það  sama  gerist með Atlantsolíu og  gerðist með Hagtryggingu í gamla daga,sem  stofnsett var  gegn   gömlu tryggingarfélögunum. Hagtrygging  gekk  svo bara í lið með óvinunum og  gufaði loks upp.

Kaup á smáhlut í Hagtryggingu  voru  fyrsta  vonda  reynsla mín af hlutabréfakaupum.

Talsmaður Olís í  sjö fréttum í sjónvarps  ríkisins var í senn  grátbroslegur og  brjóstumkennanlegur. Enda vart á  öðru von. Hann var að  reyna að verja málstað sem er óverjanlegur.

Toyota slettir á okkur

Alveg er mér fyrirmunað að skilja hversvegna Toyotaumboðið  telur sér  sæma  að sletta  ensku  framan í þjóðina í hverri  auglýsingunni á fætur annarri.

Slettan að  "smæla" á ekkert  erindi   inn í íslenskan málheim. Það er  þessu ágæta fyrirtæki til minnkunar að  gefa íslenskri tungu og þeim sem unna móðurmálinu langt nef með þessum hætti.

Við höfum komist prýðilega  af með hið fallega orð bros.

Fyrirtæki eiga að sjá sóma sinn í að vanda málfar í auglýsingum.

Orðbragð á blogginu

Held  mig  geta  fullyrt að ég sé engin pempía. . En  lifandis skelfing   finnst mér  ósmekklegt þegar   fólk  notar  enska blótsyrðið "motherfucker" á  almennum ritvelli eins og  Moggablogginu, samanber:  "Sækadellik motherfucker takk fyrir kærlega", en  þetta  mátti lesa í dag á bloggi konu sem kennir  sig  við femínisma og  vinstri grænt. Orðbragð af þessu tagi er eiginlega utan alls velsæmis.

Umrætt  orð  er  eitt ljótasta blóts- og  klámyrði enskrar  tungu. Fólk  í enskumælandi  löndum  sem opinberlega  notar þetta orð  í skrifum   telst eiginlega  ekki í húsum hæft. Þetta er einhver  ljótasta sletta  sem maður sér.  Er það  svo að allt sé leyfilegt á blogginu?

Af hverju  líka   að  leggja áherslu á orð sín  með ógeðfelldum enskuslettum, þegar   íslenskan hefur þennan   stórkostlega og kjarnyrta orðaforða ?

Furðulegt.

Orkuhroki ?

Það er einkennileg afstaða   Orkuveitu Reykjavíkur  að neita fjölmiðlum um upplýsingar  um það hverjum  fyrirtækið  bauð á   tónleika Erics Claptons. Er þetta einhverskonar orkuhroki ?

Eiga ekki allir  viðskiptavinir  fyrirtækisins  heimtingu á því að  vita hverjum var  boðið?  Það er ekki  annarleg  forvitni  eða hnýsni heldur eðlileg  krafa um upplýsingar.

Orkuveitan getur  ekki haft neitt að fela í þessu máli  eða hvað?

Það hefur ekkert með  viðskiptahagsmuni að gera að leyna því hverjum var boðið.

Að halda  slíku fram  er  bara bull og þvættingur.