Bravó!

Stórkostlegt ! Þá  fær maður kannski  heimilislækni.

35.000 fermetra heilsumiðstöð mun rísa í Garðabæ

Vel að orði komist

Alltaf gleðst gamalt blaðamannshjarta,þegar  vel er komist að orði í fréttum. Það gerðist  þegar í sjónvarpsfréttum RÚV í gærkveldi var sagt, að  vínbændur í Frakklandi  væru  kampakátir því uppskeruhorfur væru  góðar og mikil spurn eftir  kampavíni.

Það vakti hinsvegar ekki gleði að heyra í fréttayfirliti Stöðvar tvö  talað um að "íkveikjumenn" væru valdir að skógareldunum hörmulega í Grikklandi. Þetta er öldungis óþarft nýyrði.

Slíkir óþurftarmenn menn heita brennuvargar á íslensku.

Ekki til fyrirmyndar !

Ótrúlegt,en satt !

Ekki til fyrirmyndar eða eftirbreytni.

HRÓSVERÐ AFREK

 Þrennt  hefur orðið mér umhugsunarefni núna um helgina.

 

Í  fyrsta lagi  hversu vel var bersýnilega staðið að  skipulagningu og  leit   að Þjóðverjunum   tveimur sem  týndust á öræfum Vatnajökuls. Leitin  bar því miður ekki árangur ,en  engum dylst,  að við eigum harðsnúið lið  björgunarmanna, sem  eru  vel  tækjum búnir og  þrautþjálfaðir. Þeir unnu afrek  við erfiðar aðstæður.

Björgunarsveitirnar, landhelgisgæsla og  lögregla  eiga mikið hrós  skilið fyrir  frammistöðu sína.

.

Í öðru lagi hve  hratt og örugglega var  brugðist við  rútuslysinu í Bessastaðabrekku eystra. Frá   sjónarhóli  áhorfanda hér syðra var ekki annað  að  sjá  en þetta hefði gengið  hratt og  fumlaust  fyrir sig og   slösuðum komið undir  læknishendur á  undraskömmum tíma. Þar var  greinilega  fyrir hendi  þjálfað lið, sem vann eftir viðbragðsáætlun,sem  dugði þegar á  reyndi.

 

Í þriðja lagi  afrek  reykkafaranna tveggja úr  Slökkviliði  höfuðborgarsvæðisins sem  björguðu  tveimur unglingsstúlkum  frá  bráðum bana í eldsvoðanum að Stuðlum. Þeir  hættu lífi sínu  og  góð þjálfun  reið baggamuninn.

 

Allt  er  þetta  hrósvert og staðfestir  hve  nauðsynlegt er að  liðsmenn  landhelgisgæslu, lögreglu og  björgunarsveita  hafi yfir að ráða góðum  búnaði og  séu í  góðri þjálfun.

Það er þessvegna  sorglegt  þegar  heyrast raddir úr hópi  stjórnmálamanna,sem   reyna að gera  viðleitni  Björns Bjarnasonar dómsmálaráðherra tortryggilega, þegar hann stuðlar að því  að þessar öryggissveitir okkar séu sem  best  búnar og í góðri þjálfun til að bregðast  við  aðsteðjandi vá og vanda.   

  

Vel að orði komist

Það er vel að orði komist hjá  fréttastofu Ríkisútvarpsins,  þegar sagt er að  fellibylurinn Dean  sæki  í  sig  veðrið  á Karíbahafi. Prik fyrir það.

Elsta bókaverslun landsins  Eymundsson  fær  hinsvegar ekki prik fyrir  auglýsinguna  þar sem  námsmenn eru hvattir  til "að versla skólabækurnar" hjá  Eymundsson.

Eymundsson verslar með  bækur og margir kaupa bækur hjá Eymundsson.

Að "versla eitthvað"  er rassbaga.

Orð í belg

Í  þessum stopulu skrifum eru stundum gerðar athugasemdir við málfar fjölmiðla , - ekki  síst  Morgunblaðsins , Ríkisútvarpsins og netmiðilsins  visir.is. Það er ekki af því  að  höfundi þessara lína  sé  eitthvað í nöp  við þessa miðla , - öðru nær. Þetta er eingöngu  gert til að   benda á það, sem  hefur farið úrskeiðis, í þeirri  veiku von að  húsbændur á þessum höfubólum  geri bragarbót. Þessvegna legg ég orð í belg. Lesendum er auðvitað frjálst að líta á þetta sem nöldur eða smámunasemi, en í raun eru þessar ábendingar  aðeins óskir um vönduð  vinnubrögð.

Áskrifendur Morgunblaðsins  eiga kröfu  á því að fá  vel skrifað  blað.  Fyrir nokkrum dögum var sagt frá  manni á forsíðu Morgunblaðsins   sem, fengið hefði  “frostbit”. Frostbit er aulaþýðing á  enska orðinu “frostbite” sem á íslensku  heitir kal. Aular eiga ekki að fá inni á  forsíðu Morgunblaðsins.

Í miðopnugrein  í Morgunblaðinu í dag segir  lögreglustjórinn á  höfuðborgarsvæðinu, Stefán Eiríksson: “Hlutfall ofbeldisbrota í miðborginni,sem framin eru frá miðnætti til klukkan sex að morgni hefur hækkað á síðustu árum”.

Á  forsíðu blaðsins  segir hinsvegar, að lögreglustjóri segi í grein í blaðinu , “ að hlutfall ofbeldisbrota  sem framin eru í miðborginni frá miðnætti til kl.  sex að morgni hafi  fjölgað”. Þetta er rangt. Lögreglustjóri   sagði að hlutfallið hefði hækkað, - ekki fjölgað

Hlutfall vex eða hækkar. Því  fjölgar ekki  hvað þá að það  fjölgi !  Lögreglustjórinn er betur að sér  í íslensku en blaðamaður  Morgunblaðsins.

Fréttastofa Ríkisútvarpsins vitnaði þessa grein í morgunfréttum í dag og   hafði þetta rétt.

Ennfremur  er greinarstúfur   á  forsíðu Morgunblaðsins  í dag þar sem þetta  er að finna: “... stunda  mjög alvarlega áfengisneysluhegðun”. Þetta er nú eiginlega ekki mannamál. Það sem átt er við, er þeir sem  um er rætt, drekki allt of mikið,  neyti alltof mikils áfengis.
En  svo  Fréttastofa Ríkisútvarpsins  fái líka svolítið olnbogaskot, þá   var  talað um að senda   friðargæsluliða  frá  Asíu til Darfúrhéraðs, en  Afríkuríki settu sig á móti  þeim  “ráðahag”. Ráðahagur þýðir kvonfang. Líklega ætlaði fréttamaður  að segja,   að  Afríkiríkin væru andsnúin þeirri  ráðagerð.

Annars er það  umhugsunarefni að sá  maður, sem   við heyrum í fréttum  RÚV  og einna best er máli  farinn, er Kristinn R. Ólafsson sem í áratugi hefur  átt heima á  Spáni.

Auðvitað  starfa margir  prýðilega skrifandi og talandi á þessum miðlum.

Þeir eru bara ekki nógu margir.

Kalskemmdir í Hádegismóum

Á forsíðu Morgunblaðsins  fyrir fáeinum dögum var frétt  um hæsta mann heims. Þar sagði orðrétt: "Ástæðan var sú , að hann hafði ekki efni á skóm og fékk því frostbit."

Hafði ekki efni á  skóm !  Ánalegt orðalag.

Frostbit , - er þó  sýnu verra. Það er   bjálfaþýðing á  enska orðinu  frostbite, sem á íslensku heitir kal.

Heilasellur  við Hádegismóa hafa orðið kalskemmdum að bráð.

Nú er  hún Snorrabúð  stekkur......

 

Einmitt það!

Herjólfur  lagði af stað til Eyja  með fullan bát farþega, mátti lesa á mbl.is -  Það var og  -  Ríkisútvarpið kemst þó ekki með hælana   þar sem mbl.is hefur  tærnar,  svo notuð sé nýleg myndlíking úr fréttum Ríkisútvarpsins !

Ferðir til Eyja ganga vel