Molar um málfar og miðla 374

 Úr mbl.is (08.08.2010) : Gæði andrúmsloftsins hafa hrakað talsvert í Finnlandi síðustu daga.  Gæðin hafa hrakað ! Það var og.  Einhverju eða einhverjum  hrakar. Þessvegna  hefði  blaðamaðurinn átt að skrifa: Gæðum andrúmsloftsins  hefur hrakað... Það er nú reyndar afrek á sinn hátt að koma tveimur villum í  svona  stutta setningu. 

 Áhorfendum,sem langar... las fréttaþulur Stöðvar tvö (08.08.2010) án þess að hiksta ! Ríkissjónvarpið lét ekki sitt eftir liggja . Þennan sama  dag  stóð í skjátexta  með dagskrárkynningu:  Hneppa fólkinu í þrældóm....  Einhver er hnepptur í þrældóm. Þágufallið  þarna er út úr kú.

Kirkjan er ekki að skorast úr leik, segir í fyrirsögn greinar í Fréttablaðinu (09.08.2010). Hér sýnist Molaskrifara að tveimur föstum orðatiltækjum hafi verið  blandað saman:  Að skorast undan einhverju, að færast undan einhverju  og að skerast úr leik, hætta þátttöku eða bregðast félögum sínum.

Fyrirsögn á  mbl.is (08.08.2010) Árekstur við Öxnadalsheiði. Auðvitað er ekkert rangt við þetta, en hljómar samt ekki alveg nógu vel í eyrum Molaskrifara.

 Gott var að heyra  hnykkt á ýmsu,sem fjallað hefur verið um í Molum , í málfarsspjalli við Aðalstein  Davíðsson  fyrrum málfarsráðunaut  RÚV í morgunþætti Rásar eitt (09.08.2010). Aðalsteinn er smekkmaður og hæfilega umburðarlyndur, þegar íslenskt mál á í hlut. Molaskrifara að skapi.

  Ósköp var að  heyra í kvennahópi í Útvarpi  Sögu (endurtekinn þáttur 09.08.2010). Hallærislegir fimmaura brandarar og  bjánafliss var þar í forgrunni. Konurnar  sáu ástæðu til að taka  fram að þær  væru bara að drekka HO2  eins og þær sögðu , ein þeirra hafði loks rænu  á að leiðrétta þetta og  segja H2O. Eins gott að C2H5OH  kom ekki við  sögu,eða hvað ?

 Á dögunum var það nefnt í Molum að óskrifuð  bók um  Jónínu Benediktsdóttur hefði  fengið ókeypis auglýsingu í viðtali  í  Kastljósi Ríkissjónvarpsins.  Viðtali  þar sem ekkert nýtt eða áhugavert kom fram.  En Ríkisútvarpið gerir það ekki endasleppt.  Það birti að loknum kvöldfréttum (09.08.2010) viðtal við höfunda  annarrar óskrifaðrar bókar. Í þetta sinn   var það væntanleg bók um ævi afrískrar hórumömmu. Það eina sem kom fram  var, að  höfundarnir ættu eiginlega eftir að kanna flesta  hluti aðeins betur. Það er synd að segja að  stofnunin sinni ekki bókmenntum. En líklega  er  of mikið í lagt að kalla þetta fagurbókmenntir.

Molar um málfar og miðla 373

   Í þessa stuttu setningu hefur blaðamanni mbl.is tekist að troða ótrúlega mörgum málvillum : Um borð í dráttarvélinni var maður og barn sem flutt voru með þyrlunni til aðhlynningar á Borgarspítalann.  Menn eru ekki um borð í dráttarvél, frekar en menn eru um borð í bíl. Þá  hefði átt að segja .. voru maður og barn  og þau voru  flutt til aðhlynningar á Borgarspítalanum, sem líklega heitir nú Landspítalinn í Fossvogi.  Ef þið ritstjórar mbl.is  haldið að okkur áskrifendum megi bjóða hvað sem er, þá vaðið þið í villu og svima.  ---  Þegar sagt var frá þessu slysi í tíufréttum Ríkisútvarpsins (07.08.2010)  var talað um  lögregluna á Stykkishólmi. Hvar er nú listinn sem einu sinni var til  á fréttastofu Ríkisútvarpsins  með forsetningum með íslenskum  staðanöfnum? Sennilega hafa fréttastjórinn  og málfarsráðunautur ákveðið að fleygja honum í ruslakörfuna í nafni umburðarlyndis.

 Í hádegisfréttum Ríkisútvarpsins (07.08.2010) var sagt frá flóðunum miklu í  Pakistan.  Þar sagði fréttamaður skýrt og greinilega: Einhverjir voru orðnir úrkula vona.  Orðtakið  er að verða  úrkula vonar,  missa alla von um að eitthvað gerist.  Í sömu frétt sagði fréttamaður: ..forseti Pakistans hefur hafnað gagnrýni, sem hann hefur hlotið, fyrir að hafa ekki orðið eftir  í Pakistan á þessum hamfaratímum. Hann er nú í opinberri heimsókn í  Bretlandi.  ...fyrir að hafa ekki  orðið eftir !  Hér hefði  átt að segja  að forsetinn hefði verið gagnrýndur fyrir  að fara frá Pakistan  eða  fyrir að fara úr landi á þessum hamfaratímum.   Þegar sagt er að einhver hafi orðið eftir, er um leið sagt að einhverjir aðrir hafi haldið  áfram: „Jón varð eftir á  Akureyri, en við  héldum áfram til Húsavíkur." Sá sem  svona skrifar hefur ákaflega litla máltilfinningu. Ríkisútvarpið okkar er svo metnaðarlaust gagnvart íslenskri tungu ,að það jaðrar við að skemmdarverk  séu  unnin þar oft á dag. Hvern einasta dag. Svo var ráðinn nýr málfarsráðunautur til að blessa þetta. Ja, hérna.- Auðvitað vinna margir  góðir íslenskumenn  hjá  Ríkisútvarpinu. Bögubósarnir eru bara of margir og skyggja á hina.

Eyjubloggarinn Friðrik Friðriksson sendi Molum  eftirfarandi:  Sæll Eiður og takk fyrir pistlana.  Vek athygli þína á meistarasmíð í orðaböggli í Mogga í dag á bls. 37 um æfi Arnolds Schwarzenegger.  Það er fyrirsögnin sem er svo stórbrotin að Magnús Óskarsson hefði líklega sett hann á forsíðu hjá sér...„Arnold S braust úr auðmjúklegum grunni með,járnviljamarkmiðasetningu“  Það verður varla skrautlegra.. kv. Friðrik Friðriksson (Eyjubloggari) Rétt er það Friðrik, að verra getur þetta varla orðið.

Úr mbl. is (06.08.2010): Í þessu tilfelli virðist sem bíllinn hafi þotið upp og skíðað á vatnsaganum á veginum og farið út af þar sem hann valt og endaði á toppnum.  Vægt  til  orða tekið , er þetta einkennilega orðað. Betra hefði verið að segja: Svo virðist sem bíllinn hafi flotið stjórnlaust á  vatnshimnu á  veginum, runnið útaf , oltið og endað á toppnum.

Aðstandendur  hátíðarinnar voru sáttir með daginn, var sagt í fréttum Ríkissjónvarps (07.08.2010). Á íslensku segjumst við vera sátt við eitthvað , ekki með eitthvað. Sjálfsagt rennur þetta þó greiðlega í gegnum umburðarlyndissíu málfarsráðunautar Ríkisútvarpsins. Hún hefur svo víða möskva.

 

Molar um málfar og miðla 372

 

 Í fréttum Stöðvar tvö (06.08.2010) var sagt frá fyrirhuguðu flugi bandaríska flugfélagsins  Delta milli Bandaríkjanna og Íslands. Sá sem skrifaði  fréttina var heldur illa upplýstur. Í fyrsta lagi sagði hann, að  til flugsins yrðu notaðar breiðþotur af gerðinni Boeing 757-200, sem gætu flutt um 180 farþega. Þotur af gerðinni Boeing 757 eru ekki breiðþotur. Það eru samskonar þotur og Icelandair notar.  Traustar og fínar vélar,sem hafa reynst afburða vel,  en eru ekki breiðþotur. Breiðþotur eru  með  þrískiptar sætaraðir, tvö eða þrjú sæti við glugga,  síðan gang, og þrjú eða  fjögur miðjusæti og síðan gang og aftur tvö eða þrjú gluggasæti.  Í öðru lagi sagði fréttamaðurinn ,að Delta Airlines  væri eitt af stærstu flugfélögum heims og  það allra stærsta ef miðað væri við flugflota. Þetta skildi Molaskrifari ekki. Delta Airlines hlýtur þá að vera stærsta flugfélag í heimi, -  eða hvað?

Lilja Bolladóttir sendi Molum eftirfarandi: „Fyrir nokkru var Blóðbankinn líka með auglýsingarherferð, þar sem hann var að hvetja fólk til að koma og gefa blóð.... og þá sagði í hádegisfréttum Bylgjunnar: "BANKANUM VANTAR BLÓÐ"!!!! ......Maður hikstar nú sko yfir minna..... Þágufallssýkin virðist vera orðin viðurkennd í okkar orðalagi, enginn kippir sér lengur upp við hana, en pirrar mig allavega alltaf jafn mikið. Mér finnst algjörlega óskiljanlegt, að fólk sem kann ekki eða getur ekki, talað rétt mál, sé að flytja okkur fréttir.... það getur farið óendanlega í taugarnar á mér þótt ég vinni ekki í þessum geira. Mér finnst ég eiga kröfu á vel talandi og skrifandi fréttamönnum, allavega frá Ríkisfréttastofunni. Þeim ber skylda til að halda uppi vönduðum og hlutlausum fréttaflutningi.... en eru alveg að bregðast, finnst mér." Kærar þakkir fyrir þetta , Lilja.

 Halda þeir sem setja saman dagskrá Ríkissjónvarpsins í alvöru, að fjölskyldur setjist við skjáinn á  besta tíma á  föstudagskvöldum til að horfa á bandarísku dellumyndirnar sem Ríkissjónvarpið kallar fjölskyldumyndir?

 Það var dapurlegt að hlusta og horfa á frétt Ríkissjónvarpsins (06.08.2010) um fullorðið fólk sem stelur grænmeti frá börnum í skólagörðum. Það var líka dapurlegt að heyra fréttamanninn,sem flutti okkur þessa frétt segja: ... var búið að stela mikið af grænmeti... Fáið piltinum önnur verkefni ,Efstaleitismenn.

 Í þessum sama fréttatíma Ríkissjónvarpsins var sagt frá  ... ólögmætum samráðshringjum... Hefði átt að vera ... ólögmætum samráðshringum. En þessi athugasemd sannar líklega  skort Molaskrifara á umburðarlyndi. 

   Í fréttum Stöðvar tvö  (06.08.2010) var talað um ... ólögmæti gengistryggingu lána.  Hefði átt að vera... ólögmæti gengistryggingar lána.  Og svo  talaði þingmaðurinn, sem rætt var við  um að stjórnsýslan sé  brotin !

   Í morgun kaus  Molaskrifari með buddunni. Hann spurði um verð á innanlærisvöðva  úr lambi í Nóatúni ,  verðið var rúmlega  fjögur þúsund krónur  kílóið.  Hryggvöðvi  úr lambi  með girnilegu fitulagi ( en líklega ekki mjög hollu) , kostaði tæplega fjögur þúsund krónur  Molaskrifari keypti úrvals  svínahnakka  fyrir minna en helming af þessu verði. Nú vill landbúnaðarráðherra framsóknarvinstrigrænna ná  tökum á svínakjötsframleiðslunni svo hægt sé að hafa meira fé af okkur neytendum.  Það er aldeilis ótækt, að við skulum eiga kost á ljúffengu svínakjöti á  viðráðanlegu verði. Því verður að breyta.

 Þegar svokölluð Hagsmunasamtök heimilanna (06.08.2010) segja á visir.is: Nokkur fjöldi fólks hefur haft samband við Hagsmunasamtök heimilanna og lýst yfir áhyggjum sínum vegna ráðningar Ástu Sigrúnar Helgadóttur í embætti umboðsmanns skuldara.-  Þá er það dæmigerð dylgjufrétt. Hvað er nokkur fjöldi fólks margir einstaklingar ? Hversvegna kemur þetta fólk ekki fram undir nafni ? Af hverju er þetta ekki rökstutt? Molaskrifari þekkir ekkert til þeirrar konu sem hér um ræðir, en svokölluð Hagsmunasamtök heimilanna eru ekki sérstaklega trúverðug samtök. Enda urðu þau til sem einskonar útibú Framsóknarflokksins á sínum tíma.

Molar um málfar og miðla 371

 

 Í fréttum Ríkisútvarpsins (04.08.2010) um áhrif eldgossins úr Eyjafjallajökli á heilsu fólks í grennd við eldfjallið var  hvað eftir annað  talað  um þá sem  voru með sögu um  astma. Ekki fellir  Molaskrifari  sig við þetta orðalag. Betra hefði verið að tala um fólk sem glímt hefði við astma eða sjúkdóma í öndunarfærum eða átt við slíka sjúkdóma að stríða.  

Lilja Bolladóttir sendi Molum eftirfarandi: „í aðalfréttatíma RÚV um daginn(27.07.2010), í sjónvarpinu kl. 19, og í fyrstu frétt þar að auki..... sem taldist ansi stór frétt um kaup Magma á HS orku osfrv..... þar birtist "vélrituð" tafla yfir hvernig Magma ætlaði að fjármagna kaup sín og þar var "reiðufé" skrifað REYÐUFÉ!! Maður hefði nú búist við meiru af Ríkismiðlinum sjálfum Eigum við afnotagjaldsgreiðendur ekki kröfu og heimtingu á öðru og betra??'
Hvað finnst þér?"  Jú, við eigum heimtingu á öðru og betra. Um það er ég hjartanlega sammála þér. En er þetta ekki  ein af afleiðingum þess að  reynsluboltar eru látnir fjúka og reynslulaus ungmenni ráðin í þeirra stað ?

 Umræðan um einkarétt íþróttafélaganna, ungmennafélaganna og ÖBÍ á Lottói er komin á nýtt stig eftir  fund   fulltrúa Bandalags íslenskra listamanna og dómsmálaráðaherra sem Ríkisútvarpið greindi ítarlega frá  4. ágúst. Takk fyrir það. Hef ekki séð að aðrir fjölmiðlar hafi sýnt þessu  áhuga. Nú mun forysta íþróttahreyfingarinnar væntanlega  ganga af göflunum að nýju eins og hún gerði þegar  sá sem þetta ritar skrifaði smágrein í Fréttablaðið um að endurskoða ætti Lottókerfið og  hleypa fleiri aðilum að gnægtaborðinu. Þá ætlaði allt vitlaust að verða. Forystumenn úr íþróttahreyfingunni  ruddust fram á ritvöllinn hver um annan þveran og vörðu meðal annars vínveitingar í golfskálum þar sem golf  var kynnt unglingum.

  Það á endurskoða allt þetta kerfi  og meðal þeirra sem hljóta  að koma til álita  í  endurskoðuðu eða nýju lóttókerfi eru UNICEF á Íslandi,  félög sem styðja langveik börn,Bandalag íslenskra skáta og Bandalag íslenskra listamanna.   Það þarf að lina um  einokunartök núverandi rekstraðila Lottósins á  þessari miklu peningavél og leyfa fleiri  almannasamtökum að  njóta góðs af. Það á ekki að nota Lottóið til að niðurgreiða golf eða  borga ofurlaun forystumanna ÍSÍ, KSÍ og innlendra sem erlendra atvinnumanna í íþróttum. Breytum kerfinu sem búið var  til að næturlagi í reykfylltum bakherbergjum Alþingishússins á sínum tíma.

Molar um málfar og miðla 370

 Það vantaði  svo sannarlega ekki  að það væri  menningarleg reisn yfir dagskrá  íslenska  Ríkissjónvarpsins okkar í  gærkveldi (05.08.2010). Að loknum fréttum og Kastljósi var okkur  boðið upp á eftirfarandi:  Bræður og  systur, bandarísk þáttaröð.  Réttur er settur, bandarísk þáttaröð. Nýgræðingar , bandarísk  þáttaröð.  Svo komu tíufréttir og veður. Þá kom Framtíðarleiftur, bandarísk þáttaröð.  Skylt er að geta þess að svo  kom   alíslenskur fótbolti  á skjáinn klukkan  ellefu ! Hvað voru menn  svo að fjasa hér í gamla daga um   slæm áhrif    frá Kanasjónvarpinu í Keflavík? Molaskrifari er ekki sérstaklega  andvígur bandarískum þáttaröðum, en fyrr má nú rota en dauðrota. Þetta er  hreint út sagt ekki boðlegt, ágætu Efstaleitismenn. 

 Farið var í fegurðarátak í Reykjavík ... var sagt í  Ríkissjónvarpinu (04.08.2010). Molaskrifari hefur ekki heyrt talað um fegurðarátak, en  rétt  orð hér  væri   líklega fegrunarátak. Átak til að fegra  borgina.

 BP  tókst að innsigla borholuna á Mexíkóflóa, segir í fyrirsögn á  dv.is (04.08.2010) BP innsiglaði ekki borholuna. BP tókst að loka  borholunni, eða  stöðva lekann úr  borholunni. Hér er á ferðinni aulaþýðing á  ensku  sögninni to seal, sem  bæði  getur þýtt að innsigla og  að loka eða þétta.

 Í sexfréttum Ríkisútvarpsins (04.08.2010) sagði íþróttafréttamaður: Tiger Woods gæti átt í hættu að... Talað er um að eiga  eitthvað á hættu, ekki í hættu.

 Í fréttum Stöðvar tvö  var fjallað um galla,sem komið hafa í ljós í burðarvirki  glerverksins sem prýða á  tónlistar- og ráðstefnuhöllina Hörpu. Þar var sagt  að það þyldi ekki íslensku vindáttina. Eðlilegt hefði  verið að segja að það þyldi ekki íslenska  rokið.

  Úr bloggfærslu á blog.is (04.08.2010): Hvers vegna verslar ekki Reykjavikurborg hagkvæmt inn fyrir ALLA nemendur í grunnskólum....?   Algengt er að  skrifarar   þekki  ekki muninn á  sögnunum að kaupa og versla. Hér  hefði átt að standa : Af hverju stuðlar Reykjavíkurborg ekki að hagkvæmum innkaupum fyrir alla nemendur í grunnskólum...? 

 Úr dv.is (04.08.2010) : Vörubílstjóri skaut átta samstarfsfélaga sína til bana og svipti sig svo lífi í gær. Klúðurslegt orð, samstarfsfélagi. Vinnufélagi ,eða starfsfélagi hefði verið betra.

Á dögunum, þegar Útvarp Saga var við sitt sama heygarðshorn að níða íslensku utanríkisþjónustuna, hringdi hlustandi  til að hrósa  fyrirgreiðslu íslenska sendiráðsins í Peking, Maðurinn fékk varla að ljúka máli sínu því  umsjónarmaður þáttarins, Pétur Gunnlaugsson þurfti að gera auglýsingahlé. Hrós um vel unnin verk í utanríkisþjónustunni  á ekki upp á pallborðið hjá  ráðamönnum Útvarps Sögu.

Molar um málfar og miðla 369

 Bjarni Sigtryggsson ,Molavinur, sendi Molum eftirfarandi réttmæta ábendingu: „Á unglingsárum mínum norðanlands heyrði ég oft talað um *lystiskip* þótt þau væru sjaldséð við Ísland í þá daga. Mér finnst þetta heiti í senn þjálla, fallegra og réttara orð en *skemmtiferðaskip* sem nú er notað nær eingöngu yfir þau siglandi hótel, sem sækja heim íslenzkar hafnir allt sumarið. Eflaust er þó einhver skemmtun um borð fyrir farþega, sem flestir hafa lokið ævistarfi sínu og ferðast um heiminn í lystisemdum." Sammála þér, Bjarni. Þörf ábending.

 Sigríður Guðlaugsdóttir, nýr fréttaþulur  Stöðvar tvö, kemst prýðilega frá  fréttalestri. Hefur  viðfelldna rödd og útgeislun. Virðist líka blessunarlega laus  við þann fatafígúrugang,sem sumar konur  hafa tileinkað sér í sjónvarpi. Meginregla í sjónvarpi er að klæðaburður eða hárgreiðsla eigi  aldrei að beina athygli frá efninu. RÍkissjónvarpið fellur því miður oft í þessa  gömlu gryfju. Vel valið hjá  stjórnendum Stöðvar tvö.

mbl.is (02.08.2010):Gunnar Þ. Andersen, forstjóri Fjármálaeftirlitsins, telur að í nóvember í síðasta lagi muni liggja fyrir hversu mikið fé bankarnir þurfa á að halda. Seinni hluti þessarar setningar ætti að vera svona: ... hversu miklu fé bankarnir þurfi á að halda.

 Og svo segir Moggi: Mikil umferð framhjá Borgarnesi (02.08.2010). Þjóðvegur 1 liggur  um Borgarnes, - ekki framhjá Borgarnesi.  Sá  sem þetta skrifaði á greinilega eftir að koma í Borgarnes,.

Sóttu veikan mann á rússneskan togara, sagði í fyrirsögn á visir. is ( 02.08.2010). Forsetningin á  er út í hött í þessu sambandi. Nær hefði verið að segja: Sóttu veikan mann  í rússneskan togara.  

Gott Kastljós RÍkissjónvarps (03.08.2010). Viðtal Sigmars  við fyrrverandi umboðsmanna skuldara var  eiginlega leikur kattarins að músinni. Það jaðraði við að maður  hefði samúð  með þeim fyrrverandi.  Sigmar var vel undirbúinn og eiginlega glaðbeittur, vissi greinilega að hann var einn um hituna.  Gott skúbb,  svo notað sé blaðamannaslangur. - Þetta orð er íslenskun á  enska orðinu scoop, sá sem er fyrstur með frétt . Mér hefur alltaf fundist að þetta ætti að heita skúpp.!

 Í fréttatíma  Stöðvar  tvö (03.08.2010) var talað um þátttöku í fjölbreyttum vinnumarkaðsúrræðum. Fjarri því að vera mannamál.

  Í íþróttafréttum Ríkisútvarpsins sagði íþróttafréttamaður: ....  segir árangurinn hafa gengið  vonum framar.  Svona er  ekki hægt að taka  til orða. Árangur getur verið vonum framar.  Betri en búist var við.  Árangur  getur  verið góður eða slakur. Hann getur aldrei gengið vonum framar !

 

Molar um málfar og miðla 368

   Af hverju ertu með  verðlaunapening,   spurði sjónvarpsfréttamaður sjö ára stúlku  Stúlkan svaraði að bragði: Af því að ég vann !

Hraðakstrar í Húnaþingi, sagði í fyrirsögn á  mbl.is (03.08.2010). Orðið akstur er ekki til í fleirtölu. Svo einfalt er nú það.

  Aðstoðarmaður  menntamálaráðherra  varð frægur að endemum á  dögunum fyrir orðbragð í  tölvupósti. Í tíu fréttum  Ríkissjónvarps (03.08.2010) var haft  orðrétt  eftir  aðstoðarmanni félagsmálaráðherra:.. svo sjoppan yrði opin , þegar fólki mætti... Aðstoðarmaðurinn  kallaði  skrifstofu umboðsmanns skuldara  sjoppu !  Líklega ættu ráðherrar að vanda  sig meira, þegar þeir velja sér  aðstoðarmenn.

Gæslan fann villta konu, sagði í fyrirsögn á mbl.is (01.08.2010). Sá sem  benti  Molaskrifara á þessa fyrirsögn fullyrðir að konan hafi verið frumbyggi ! það var greinilegt að  viðvaningar höfðu  tekið völdin á mbl. is um helgina. Eftirfarandi  dæmi bera vott um það: Fallið var um einn meter. Drengurinn lenti illa og missti við það andann um stund. ....Stór rúta missti smurolíuna niður á bílastæði og í götuna við Uppsalaveg á Húsavík í dag.

Eigið þið von á mikið af  fólki í dag ?  Þannig  spurði  fréttamaður Stöðvar tvö  ( 31.07.2010)   Hann  átti við hvort von væri á mörgu fólki  til Eyja í dag. Í sama fréttatíma var sagt  að þoka hefði verið að valda truflunum á  flugi. Betra hefði verið að segja  að þoka hefði valdið truflunum  á flugi.  Frakkinn sigraði hundrað metrana, sagði íþróttafréttamaður  Stöðvar tvö (31.07.2010)   og  sagði svo að  tiltekinn garpur hefði stolið  sigrinum og annar nappað  sigrinum.  Vonandi hefur lögreglan haft hendur í hári þjófanna.Sami fréttamaður sagði daginn eftir  að  ágætur íþróttamaður hefði  sigrað kúluvarpið.  Óboðlegt málfar.

  Það  ar  ágætlega að orði komist í  fréttum Ríkissjónvarpsins , þegar sagt var (31.07.2010): Talið er að  ein milljón manna hafi orðið fyrir skakkaföllum vegna flóðanna.

 Ríkisútvarpið hneykslaðist á því (01.08.2010), að bjór hefði verið auglýstur á ljósastaurum í Borgarnesi. Ríkissjónvarpið  sýnir þjóðinni daglega bjórauglýsingar og  opinberar þannig virðingarleysi  þessarar þjóðarstofnunar fyrir   landslögum og  reglum. Ekki hefur verið fjallað um bjórauglýsingar Ríkisútvarpsins í Ríkisútvarpinu.

Molar um málfar og miðla 367

   Visir.is  sagði frá  því er hvítabjörn  var drepinn á Svalbarða (30.07.2010): Hvítabirnir eru friðaðir á Svalbarða. Sýslumaðurinn þar sagði hinsvegar augljóst að dýrið hafi verið drepið í sjálfsvörn og eftirmáli því enginn.   Eftirmáli þýðir  niðurlagsorð , texti aftan  við meginmál. Eftirmál eru hinsvegar eftirköst, afleiðing, rekistefna vegna tiltekins  atferlis. Hér hefði því átt að standa: Eftirmál urðu því engin.  Það er ótrúlega  algengt að  ruglað sé  saman  eftirmála og eftirmálum. Í stað hafi hefði átt að segja hefði.

  Fínn þáttur Lönu Kolbrúnar Eddudóttur um Bítlalög með íslenskum textum, eða Bítlalög á íslensku eins og hún orðaði það. Ríkisútvarpið,  rás eitt (30.07.2010).

 Ég er á móti ESB af því ég vil ekki Breta inn í landhelgina aftur, sagði Guðni vinur minn Ágústsson í Kastljósi (30.07.2010). Það er ekki á  góðu von, þegar umræðan um ESB er á þessum nótum.  Guðni veit vel ,að Bretar eigan engan úthafsflota lengur, -   þeir eiga ekki skip til að senda  til Íslands, þótt slíkt væri í boði. Það verður auðvitað aldrei í boði. Þetta er dapurlegt dæmi um  það hvernig andstæðingar ESB aðildar  tala og hræða fólk með  hálfgerðum hótunum.

 Hvenær skyldi Ríkissjónvarpið hætta að bjóða áhorfendum upp á  vonlausar amerískar dellumyndir  á föstudagskvöldum ? 

  Það er mikill misskilningur hjá  stjórnendum Fréttastofu Ríkisútvarpsins, að halda að allir fréttamenn geti verið fréttaþulir.  Að þessu hefur verið vikið hér áður.  Þeir sem lesa  fréttir verða að vera áheyrilegir. Á það  skorti nokkuð  í morgunfréttum (02.08.2010).

  Dagskrárstjóri  Ríkisútvarpsins segir í viðtali við Morgunblaðiðað þar séu   (30.07.2010) ýmsar leiðir til niðurskurðar á teikniborðinu.  Er þá verið að teikna  niðurskurðarleiðir ?

Á heimasíðu Ríkisútvarpsins er listi yfir starfsmenn stofnunarinnar.  Þar telst Molaskrifara til að séu hátt í 340 nöfn. Væri ekki hægt að komast af með aðeins færra fólk?  Þetta er eiginlega með ólíkindum.

    Hér var á dögunum vikið að  skrumþætti  Jónu Ásgerðar Flosadóttur, Á Ferð og flugi með Iceland Express, í  Útvarpi Sögu. Svo merkilega vill til, að  Matthías Imsland , forstjóri ferðaskrifstofunnar Iceland Express, (Iceland Express er  ekki flugfélag) er  stjórnarformaður Fjölskylduhjálpar Íslands, einkafyrirtækis Jónu Ásgerðar Flosadóttur. Svona er Ísland í dag.