Molar um málfar og miðla 383

  Ungum blaðamanni var einu sinni ráðlagt að lesa á hverju ári  einhverja af Íslendingasögunum, ef hann vildi  taka framförum í  stíl og málnotkun. Í nokkur ár tókst að standa við þetta. Þetta  hollráð má  að skaðlausu endurtaka  og beina  til  ungs fólks sem nú fæst við skriftir í fjölmiðlum. Vaxi ungum fjölmiðlungum þetta í augum,  þá þurfa þetta ekki endilega að vera gullaldarbókmenntirnar heldur bara góðir  textar nútímahöfunda.

  Þá dettur Molaskrifara í hug að benda á  Góða dátann Svejk, eftir Jaroslav  Hasek (1883-1923)  sem hiklaust er  ein af perlum heimsbókmentanna. Þýðing Karls  Ísfelds  er hrein snilld (segi helst ekki lengur tær snilld eftir  að bankamaðurinn, höfundur Icesave, eyðilagði það orðtak). Þetta er dásamlegur texti. Konfekt (eins og góðvinur Molaskrifara segir um fína texta) orðgnóttin sjaldgæf og valdið á  tungunni traust. Ef ungu fólki vex í  augum að lesa  bókina þá er til  á 12 hljómdiskum upplestur  Gísla Halldórssonar leikara á þýðingu Karls, samtals  sextán klukkustundir. Hljóðbókaklúbburinn gaf út 1995 og á heiður skilinn  fyrir það. Lestur  Gísla  er listaverk. Magnað listaverk. Það er dauður maður,  sem Gíslí  hrífur ekki með sér  á flug og hjá Molaskrifara er skammt milli skellihlátra undir  þeirri stórkostlegu skemmtan sem það er að upplifa   Góða dátann Svejk  með Gísla Halldórssyni. 

Það er eins gott að hafa skriðstillinn við stjórnvölinn, þegar hlustað er á  Gísla lesa  Svejk í bíl  á leið  austur í sveitir.

Kjarnyrtur txti Karls Ísfelds  er  öndvegiskennari, - þeim sem vilja læra.

 Úr mbl.is (18.08.2010): Eldurinn logaði glatt í spýtuhrúgu á 2. hæð hússins þegar slökkvilið kom að. Hér hefði átt að tala um spýtnahrúgu  ekki spýtuhrúgu.

 Úr mbl.is (18.08.2010): Slökkviliðs- og sjúkrabíll eru nú á leið upp í Heiðmörk, en tilkynning barst um að heyrst hefði í mögulegu bílslysi. Alltaf heyrir maður eitthvað nýtt! Þetta orðalag hefur Molaskrifari aldrei heyrt áður.

 Blaðamaður á visir.is  skrifar (18.06.2010):Olía lak úr bílnum sem velti og var óttast að hún læki í vatnið. Bíllinn sem velti! Þetta er eiginlega  verra en smábarnamál.   Þið þurfið að bæta ykkur, Vísismenn.  Eftirfarandi er úr mbl.is  sama dag: http://www.mbl.is/mm/frettir/innlent/2010/08/18/olvun_i_heidmork/

  Úr dv.is (19.08.2010):Þeim langar að ferðast um heiminn og meðal staða sem þeim langar að fara til eru Aqaba í Jórdaníu, Kúveit, Búdapest, Marseille, Silkeborg og Baden-Baden svo einhverjir séu nefndir. Þeim langar....  Það var og.  Tuskaðu þágufallssjúklingana til, Reynir ritstjóri. Þeim langar er tvítekið  í þessari stuttu setningu !

 

Molar um málfar og miðla 382

„Ekki er kyn þótt keraldið leki, því botninn er suður í Borgarfirði", áttu Bakkabræður að hafa sagt á sínum tíma. Fréttamaður Stöðvar tvö  sagði (17.08.2010) í fréttum: ... eins og  fram hefur  komið í fréttum lak fyrirtækið seyruvökva úr rotþrónum út á vatnsverndarsvæðið á Þingvöllum. Fyrirtækið lak ekki. Starfsmenn fyrirtækisins losuðu  seyru eða seyruvökva úr  rotþróm á  vatnsverndarsvæði,  sem er  auðvitað glæpsamlegt athæfi. En heilbrigðisyfirvöld virðast ætla að taka á þessu með silkihönskum. 

  Í fréttum Ríkissjónvarpsins (17.08.2010) sagði fréttamaður: ... þá hafa  fjöldi ábendinga borist frá almenningi. Hér  hefði fréttamaður betur  sagt, -- þá hefur fjöldi ábendinga borist frá almenningi. Eða: ...þá hafa  fjölmargar ábendingar borist frá almenningi.

  Þeir sem lesa eða  segja fréttir  verða að vera skýrmæltir.  Ríkissjónvarpið sagði  frá  kóramóti (17.08.2010)  sem á vef   Ríkisútvarpsins var reyndar  kallað , 1800 manna kórmót (svo!). Ógerlegt var að  heyra hvort sá  sem flutti okkur fréttina  sagði: ... hátíðin lýkur, eða hátíðinni lýkur. Þetta var hálfgert tuldur

Eftirfarandi orðalag af pressan.is  (17.08.2010) er út í hött:... hann er grunaður um aðild við verknaðinn.  Réttara væri: .., hann er grunaður um aðild að verknaðinum.   Talað er um að eiga  aðild að einhverju, ekki aðild  við eitthvað.  

 

Makalaus er vitleysan sem  vellur upp úr fyrirferðarmestu þáttastjórnendum Útvarps Sögu, útvarpsstjóranum Arnþrúði og Pétri  Gunnlaugssyni. Dag eftir  dag tala skötuhjúin um að hér  þurfi að koma á  utanþingsstjórn og að forseti Íslands  verði að  skerast í leikinn !  Það hefur áður  verið nefnt hér  að svona bull ber vott um hyldjúpa vanþekkingu  á lýðræði, þingræði og stjórnkerfi landsins.  Það versta  við þetta er , að   til er  auðtrúa fólk,sem  trúir þessari vitleysu. Þetta er því ekki aðeins slæmt. Þetta er hættulegt.  Það er nefnilega gömul saga og ný, að sé lygi endurtekin nægilega oft,  fara margir að halda að hún sé heilagur sannleikur.

Þau Arnþrúður og Pétur  tala ævinlega  eins og á Bessastöðum sitji einvaldur,  sem  geti þegar honum svo sýnist vikið löglegri stjórn landsins frá og skipað stjórn að eigin geðþótta. Þau segja að það  væri gert í nafni lýðræðis, ef Ólafur Ragnar  tæki sig  til og skipaði utanþingsstjórn að höfðu ítarlegu samráði við sjálfan sig !

   Ólafur Ragnar hefur að vísu  haft uppi ýmsa einstæða og sérstæða  tilburði í embættistíð  sinni á Bessastöðum. En þetta vald hefur hann ekki . Guði sé lof fyrir það.

 Molaskrifari man ekki betur en Halldór Laxness hafi einhvern tíma sagt, að heimsins mesta lýgi  væri á prenti. En það var fyrir  daga Útvarps Sögu.

 Forgangsröðun stjórnenda Ríkisútvarpsins í Efstaleiti kemur  venjulegu fólki oft undarlega fyrir sjónir. Nú er  þátturinn Orð skulu standa  skorinn við trog, en fastráðnum fótboltafræðingum,sem Ríkisútvarpið svo kallar fjölgað á íþróttadeildinni.  Þátturinn Orð skulu standa  fjallar um  íslenska  tungu. Móðurmálið á ekki alltaf upp á pallborðið í upphæðum Efstaleitisins.

Molar um málfar og miðla 381

  Það er ekki eitt, sem er að þessari  frétt á  dv.is (16.08.2010), heldur allt: http://www.dv.is/frettir/2010/8/16/bjorn-grunadur-um-fimmtiu-innbrot/    Reynir, ritstjóri:  Svona fólki á ekki að sleppa lausu í nánd  við nettengdar tölvur.

 Vaxandi tilhneigingar gætir til að bera  þf.et. ýmissa  orða með ákveðnum greini , eins og  brúin,  frúin, fram   eins og  þau séu skrifuð  brúnna, frúnna. Þetta er rangt. Heyrðist meðal annars skýrt og greinilega  í morgunfréttum Ríkisútvarpsins (16.08.2010).  

 Visir.is (16.08.2010): Verkjalyfinu magnýl er ekki dreift hérlendis þessa dagana,- Er verkjalyfjum dreift ?  Líklega er átt við hér, að  verkjalyfið magnýl sé ekki á  boðstólum, ekki fáanlegt í  lyfjabúðum um þessar mundir.

 Í  fréttum Ríkissjónvarps (16.08.2010) var sagt: ... og því þurftu þeir að há þriggja holu umspil (innsk. einvígi?) um sigurinn.... Nú má vera  að kunnáttuleysi hái Molaskrifara , - en ekki fannst honum þetta eðlilegt orðalag. Ekki fremur en þegar þennan  sama  dag, þegar sagt   var í  fréttum Stöðvar  tvö,  þegar  skorið var upp í dag, -   verið var að segja  frá því að  börn í  skólagörðum voru að taka upp kartöflur og grænmeti. Þau voru við uppskerustörf. Ankannalegt orðalag , en líkast til ekki rangt.

Vinstri grænir bregðast ekki fremur en fyrri daginn. Þegar talað  er um að veita lögreglu hér á landi svipaðar heimildir til rannsókna og  löggæsluyfirvöld í grannlöndum okkar hafa,  stökkva  talsmenn þeirra fram á fjölmiðlasviðið og  byrja að tala um mannréttindi.  Mannréttindi skipulagðra glæpagengja eru líklega  mikilvægari en mannréttindi almennra borgara að þeirra mati. Það ber að vernda  glæpamenn sem koma  hingað í hópum í skjóli Schengen  til að brjótast inn á heimili okkar  og íslensk fyrirtæki og  stela úr verslunum.  Heyr á endemi, segir Molaskrifari.

Tillaga Rögnu dómsmálaráðherra er fín. Hana ber að samþykkja.

 

Molar um málfar og miðla 380

  Fjölmiðlamenn ættu sem flestir að gera sér far um að hlusta á pistla þeirra  Hönnu G. Sigurðardóttur og Aðalsteins Davíðssonar um daglegt mál á mánudagsmorgnum í morgunþætti Rásar eitt. Þar er vikið  að  orðum og orðtökum  sem algengt er að séu rangt notuð .

Úr mbl.is (15.08.2010): Magnús Orri Schram, þingmaður Samfylkingarinnar, segist ekki hugnast meiri skattahækkanir en er þó hrifinn af hugmyndum um bankaskatt.  Hér ætti að  dómi Molaskrifara að standa: Magnús Orri Schram, þingmaður Samfylkingarinnar, segir sér ekki hugnast meiri skattahækkanir....

 Úr mbl.is (15.08.2010): Að sögn lögreglunnar í Borgarnesi voru veðurskilyrði góð og vegurinn þurr. Veðurskilyrði voru voru góð. Með öðrum orðum: Veður var gott.

  Molalesandi spyr spyr hvort Molaskrifari hafi séð það verra og vísar á eftirfarandi grein n á pressan.is:http://www.pressan.is/Frettir/LesaFrett/thorvaldur-gylfason-spurdur-hvort-kreppunni-se-lokid-ja-og-nei---stjornmalastettin-enn-spillt. Molaskrifari verður að játa, að hann hefur eiginlega ekki séð það verra.

 "Bjarni Sigtryggsson Molavin sendi  Molum eftirfarandi: Þessi furðulega orðaða frétt er amk. merkt höfundi sínum, Aðalsteini Kjartanssyni ([e-mail]):

http://www.dv.is/frettir/2010/8/14/mynd-af-barni-med-hasspipu-leidir-til-handtoku-modur-thess/

1. Hún var handtekinn...
2. Barnið féll ekki á eiturlyfjaprófi... (did not fail a drug-test - mældist ekki undir áhrifum)
3. Málið var blásin upp í fjölmiðlum...
4. Það sé vakningfyrir dóttur sína...  (wake-up - áminning)
   
5. Hún sé í fíkniefnaráðgjöfog foreldra þjálfun... (counselling - meðferð)

Það er sorgleg staðreynd að ekki er hægt að lesa DV einn einasta dag án þess að rekast á amböguskrif af þessu tagi. Reynir Traustason er ritstjóri og hann ber endanlega ábyrgð á þessu."

 

Molar um málfar og miðla 379

 

 

   Svona mætti ná  fram umtalsverðum sparnaði í Rekstri Ríkisútvarpsins OHF,  ætti að vera HFO -  Hlutafélagið okkar.

1.     Leggja niður Rás tvö. Bylgjan og fleiri stöðvar sinna þeim, sem vilja afþreyingarútvarp. 

2. Hætta við tíufréttir í sjónvarpi. Þær  eru hvort sem er  oftast 95% óbreytt efni úr sjöfréttunum.   

3. Minnka framlög til íþróttadeildar um helming.  Þannig  mætti spara mikið fé, en samt  sýna íþróttum sóma. Þeir sem  vilja meiri íþróttir, geta keypt áskrift að íþróttarásum Stöðvar tvö. 

 4.Breyta starfsemi Ríkissjónvarpsins þannig að  meira verði sýnt  af íslensku efni,  fréttatengdir umræðuþættir ,tónlistarþættir, íslenskar kvikmyndir  og endursýnt efni. Sjónvarpið hefur senn starfað í 44 ár. Í fórum þess  er mikið af allskonar  efni sem þolir endursýningu. Þá ætti einnig að  horfa til þess hvernig norrænu stöðvarnar  raða dagskrá saman. Sýna vandaðar heimildarmyndir og  sígildar kvikmyndir. Vanda langtum betur til vals á erlendu efni en nú tíðast. Styðja við bakið á gerð íslenskra kvikmynda og heimildarmynd. Látið Stöð tvö og Skjá einn um  froðuna. 

  Við þurfum menningarlegt sjónvarp, sem sinnir lögboðnu hlutverki sínu. Slíkt  sjónvarp  höfum við Íslendingar ekki um þessar mundir. 

   Fínn Tungutakspistill  Þórðar  Helgasonar í Lesbók Mogga  um helgina. Pistillinn heitir Fjármálið og inntak hans er að hinn fallni aðall  fjármálalífsins þurfi nú að læra  móðurmálið !  

 Úr dv. is (12.08.2010): Lögreglumaður í Minnesotaí Bandaríkjunum varð heldur betur hissa þegar hann mætti á slysstað þar sem bíl hafði verið ekið á skilti. Þannig vildi til að annar ökumannana var drukkin tólf ára stelpa. Annar ökumannana (ökumannanna) ? Þetta hefur greinilega verið bíll gerður  fyrir  tvo ökumenn, eða hvað ?

Ágætu blaðamenn  mbl.is: Ekki lítilsvirða lesendur með því  að tala  við þá á leikskólamáli: Þá var einnig um miðnættið tilkynnt um ökumann við Bræðraborgarstíg, sem var að leggja bifreið í stæði og klessti utan í annan bíl á stæðinu.  (13.08.2010)

Netlaus í tvo sólarhringa fór  Molaskrifari að skoða ambögur,sem hann hafði hripað hjá sér fyrir þremur árum:Mbl.is  05.04.2007

Þá segist hann telja ákveðna hættu á því að atkvæði kjósenda minnstu flokkanna muni detta niður dauð og þannig styrkja stöðu stjórnarflokkanna þvert á fyrirætlanir þessara flokka.Ummæli ungs stjórnmálamanns.  Fyrr  má  nú vera, að  atkvæði  detti  niður  dauð eða  verði  bráðkvödd.  Vissulega er  talað um að  atkvæði  falli  dauð, en   sú  orðnotkun að þau  detti niður  dauð er ekki  lofsverð. 

Blogg. Mbl Afkastamikill bloggari talaði um stóra þjóðsöngvarmálið   í tengslum við  skrumskælingu Spaugstofumanna á þjóðsöngnum. Sami talaði líka um tölvu rímixið  á þjóðsöngnum??????  Líklega  verið að tala um tölvugerða hljóðblöndun  þjóðsöngsins.

 

Molar um málfar og miðla 378

 

 Mikið er á stundum metnaðarleysið í Kastljósi  Ríkissjónvarpsins.  Kallaður var á skjáinn í kvöld (13.08.2010) nýráðinn aðstoðarmaður formaður  Sjálfstæðisflokksins.  Hann hefur svo sem enga stöðu í samfélaginu, nema sem flokkshestur í Valhöll. Hafði enda lítið að segja, nema þá helst, hérna, hérna í næstum hverri setningu. Bjóðið okkur eitthvað betra á  föstudagskvöldum en menn sem  tala um Magmadílinn og   segja  að eitthvað meiki ekki sens.  Þið gerið kröfur til okkar um að borga nefskatt. Við gerum líka kröfur til ykkar.

Úr fréttum Stöðvar tvö (11.08.2010): ....enn vantar styrktarfélaginu  níu milljónir króna... Hvað á að gera við þágufallssjúka fréttamenn? Leggja þá inn á  sjúkrahús þar sem  þeim er kennd íslenska? Rúmin þar yrðu fljót að fyllast.

  Velunnari benti Molaskrifara á frétt í  dv.is, sem hefði  verið fádæma illa skrifuð. Hann sendi tengil  við  fréttina, sem  þá var búið að lagfæra talsvert. Góð er hún ekki: http://www.dv.is/frettir/2010/8/12/octopus-akureyri-paul-allen-og-felagar-kafa/

  Talsmenn þjóðkirkjunnar eru þögulir sem gröfin  um kynferðisbrot innan  kirkjunnar. Talsmaður  ráðs eða nefndar ,sem fjallar um þau efni neitar að  gefa fjölmiðlum  upplýsingar og  biskupinn kemur í  viðtal  og segist ekkert vita.  Ætlar  íslenska þjóðkirkjan að falla í sömu gryfju og kaþólska kirkjan ?

  Talsmaður Stígamóta talaði í fréttum Stöðvar tvö (12.08.2010)  um að hylma yfir um.  Hér  hefði nægt að segja hylma yfir, - leyna.  Í sama fréttatíma sagði fréttamaður .... fræðsluherferð líkt og þá sem samtök hennar hafi í undirbúningi, sé því mikilvæg. Klúður.

Úr visir.is (12.08.2010):  Að auki reyndist bíllinn vera ótryggður og þá voru ákvæði um skoðun heldur ekki fyrir hendi. Hvað eru ákvæði um skoðun? Var bíllinn ekki bara óskoðaður , eins og sagt er?

 Það er eins gott  að játa ósigur, þegar ljóst er að orrusta hefur tapast.  Molaskrifari lærði það á sínum tíma að verð væri eintöluorð. Gott  verð ,ekki  góð verð. Notkun fleirtölunnar  er  orðin  svo útbreidd að hún heyrist nú orðið oftar en eintalan. Í  sexfréttum Ríkisútvarpsins (13.08.2010) var viðtal við kvótakóng  úr Vestmannaeyjum ,sem aðeins kunni að nota orðið verð í fleirtölu. Þannig er nú það.  Hann var mjög ánægður með verðin sem hann var að fá  fyrir ferskan fisk sem fluttur var til útlanda, -- eða þannig !

Molar um málfar og miðla 377

 Úr kófinu  austur í Moskvu sendi Bjarni Sigtryggsson Molavin eftirfarandi:

„mbl.is: "Norðmaðurinn sem fannst látinn í Paradísardal í Syðri-Straumfirði á austurströnd Grænlands á mánudaginn..."

Nákvæmni í staðarlýsingum er þakkarverð, en hún verður þá að vera rétt. Hér ruglar Mbl. saman austurströnd og vesturströnd Grænlands. Auk þess minnir mig að talað hafi venjulega verið um Syðri-Straumsfjörð en ekki Straumfjörð. Um liðna helgi áberandi rangt farið með staðsetningu í frétt af árekstri margra bíla í Skagafirði. Ýmist sagt vera rétt hjá Varmahlíð eða rétt við Öxnadalsheiði. Stór Íslandskort eiga að vera til á vegg á hverri fréttastofu." Satt segirðu,Bjarni, og menn eiga að gaumgæfa  kortin. Bjarni hefur skýra sýn á tunguna þótt skyggni sé ekki  mikið austur þar.

Guðmundur Kristjánsson velunnari Mola sendi eftirfarandi:

„Gat ekki stillt mig um að vekja athygli á  geislandi ritsnilld  þeirra á Mogga:

Fyrirsögn (11.08.2010) Slóvakar neita að lána Grikkjum. Landsþing Slóvakíu hafnaði í dag þátttöku í næstu greiðslu á sameiginlegu láni Alþjóðagjaldeyrissjóðsins og Evrópusambandsins til Grikklands. Lánið á að koma í veg fyrir að Grikkir greiði ekki skuldir sínar. Grikkjum er semsagt veitt lán til að  geta greitt skuldir sínar og Slóvakar vilja ekki vera með !"  Rétt er það, Guðmundur, það geislar af þessu um langa vegu ! Svo ætti nú fremur að tala um þjóðþing Slóvakíu, en Landsþing.

Nú er í auglýsingum talað um rapsolíu,  olíu sem unnin er úr repjufræjum. Við eigum að  sjálfsögðu eins og bent hefur verið á  að  kalla þetta repjuolíu. Einhverjum kann að  finnast það óþjált orð. Það venst.  Gömul saga er af því að  vegfarandi vestanhafs sá  fólk álengdar  við  störf á akri, kallaði til þess á ensku og spurði hvað verið  væri að  rækta.   Honum  brá, þegar svarað var hátt og  skýrt:  Rape!

 visir.is (10.09.2010): ... þegar að hún datt í heitt vatn sem hafði fallið úr hvernum Strokki. Og meira úr sömu frétt:..að reyna að koma málum tengdu Geysissvæðinu í betra horf.  Og enn meira úr sömu frétt: ... að setja upp skilti sem vari við hættuna  af hverunum.  Ekki mikið reynt að vanda sig ! Fréttin var reyndar frekar stutt.

Molar um málfar og miðla 376

    Ráðamönnum Ríkisútvarpsins þótti Spaugstofan ekki á vetur setjandi.  Henni var slátrað í morgun (10.08.2010). Hún var misjöfn ,ofast  góð. Stundum sljó  en oftar beitt , svo ýmsa  hefur undan sviðið. Sumir  pólitíkusar  munu ekki gráta Spaugstofuna. Líklega verður  flaggað á Bessastöðum. Nú geta   Efstaleitismenn fjölgað í íþróttadeildinni og  ráðið   fáeina  fótboltafræðinga til viðbótar til að  opinbera visku sína á skjánum. Og svo verður  dagskráin í vetur  væntanlega að uppistöðu til  endalausar bandarískar þáttaraðir (rétt eins og í kvöld 12.08.2010) sem hægt er að kaupa fyrir slikk. Við getum öll farið að hlakka til vetrarins.  Guði sé  lof og prís fyrir  norska ,danska og sænska  sjónvarpið. (Aldrei óraði mig fyrir að ég ætti eftir að segja þetta !)

 Sífellt halda  fréttamenn  Ríkisútvarpsins áfram að segjast vera  við stjórnarráðið, þegar þeir standa fyrir  framan Stjórnarráðshúsið við Lækjartorg.  Oft hefur þetta verið nefnt áður. Stjórnarráðið er  samheiti  yfir öll ráðuneytin. Þetta er skemmdarstarfsemi að yfirlögðu  ráði. Það er ekki hlutverk Ríkisútvarpsins að ástunda slíkt.

  Í skjátexta,  í auglýsingu í Ríkssjónvarpinu (10.08.2010) mátti lesa: Aumkunnarvert....   Gleymd er  nú sú einfalda, gamla,góða  -unn stafsetningar regla. Einkunn, miskunn,  forkunn og  vorkunn. Þetta var  barnaskólanámsefni í gamla daga. Nú geta menn sennilega útskrifast  úr háskóla án þess að  fá nasasjón  af -unn reglunni.

 Hér er sí og æ verið að nudda vegna sömu mistakanna:  Fréttamaður   Ríkissjónvarps  sagði (10.08.2010):  Um leið og stöðin opnaði.... Hvað opnaði stöðin? Líklega opnaði hún  sig.  Hér  átti að segja: Um leið og stöðin var opnuð.

  Íþróttafréttamaður Stöðvar tvö  sagði (10.08.2010). Við ætlum að gera  góð skil á  því efni. Þetta er  ekki gott.  Íþróttafréttamaðurinn hefði átt  að segja:  Við ætlum að gera því efni góð skil.    Að gera góð skil er að  sinna af kostgæfni.

 

 Önnur  algeng  villa var í fréttum Stöðvar tvö þetta sama  kvöld  þegar sagt var frá íseyju eða ísfleka   sem brotnaði úr jökli á Grænlandi og rekur  nú  fyrir  vindi og  hafstraumum.   Hún mun reka ..   sagði fréttamaður   og endurtók: ... ef hún  rekur til  suðurs. Hér átti   að segja : Hana mun  reka...  ef hana rekur til suðurs.

 Eftirfarandi setning er úr frétt á mbl.is (10.08.2010): Lögfræðingur efnahags- og viðskiptaráðuneytisins var afhent niðurstaða lögfræðiálits LEX fyrir Seðlabankann til að styðjast við í starfi sínu, með því skilyrði að því yrði ekki dreift frekar um ráðuneytið.  Metnaðurinn ræður ekki ríkjum á mbl.is.

Lækkunin nær ekki til íslensku olíufélaganna !

  Það er greinilegt að þessi lækkun  bítur ekki á samansúrruðu samráðskerfi olíufélaganna á Íslandi. Hvað  dvelur Orminn langa ? Hvar er er nú Samkeppnisstofnun?

Veruleg lækkun á heimsmarkaðsverði á olíu

Molar um málfar og miðla 375

 

  Seint verður sagt ,að málfar í íþróttafréttum Stöðvar  tvö sé til fyrirmyndar. Í kvöld  (09.08.2010) var þar sagt:  Birgir Leifur setti nú allt í sölurnar... Á íslensku tölum  við um að leggja  allt í sölurnar, ekki setja allt í sölurnar. Ástandið er  svo sem lítið betra í Efstaleitinu. Þar var sagt í íþróttafréttum (09.08.2010): Frammistaða hans á mótinu var það versta á ferli hans. Hér  hefði Molaskrifari  viljað heyra: Frammistaða hans á mótinu var sú versta á ferli hans.

Niðurskurðurinn í Efstaleitinu á  greinilega  ekki að bitna á íþróttadeildinnii  Ekki verður annað séð (09.08.2010)  en búið sé að ráða sérstaka  fótboltafræðinga, eða sérfræðinga eins og  þeir voru kallaðir   til að  fjalla um hina göfugu íþrótt, knattspyrnuna.

 Í þessum Molum verða ekki gerðar margar athugasemdir við málfar í  sjöfréttum Ríkissjónvarps (09.08.2010) Molaskrifari játar að honum seig  blundur á   brá  rétt  eftir að fréttatíminn byrjaði  og  svaf vært næstum til loka.

   Það var ekki sýnt mér, því miður,  sagði  forsætisráðherra í hádegisfréttum Ríkisútvarpsins (10.08.2010). Það var og. Hélt mér hefði misheyrst. Hlustaði aftur  á netupptökuna. Mér misheyrðist ekki. Og segi bara líka, - því miður.

  Í Kastljósi (09.08.2010) var ágæt og tímabær umfjöllum um rafbækur. Molaskrifari hefur  undanfarna  mánuði   fengið vikuritið Newsweek í Kindle  rafbókina  sína. Áskriftin kostar   um 350 krónur á mánuði, enginn pappír og ekkert vesen. Frábært.

 Aðfaranótt þriðjudags (10.08.2010) hlustaði Molaskrifari á endurtekinn auglýsingaþátt ferðaskrifstofunnar Iceland Express í Útvarpi Sögu   í umsjón Ásgerðar Jónu Flosadóttur,sem  fræg er af verkum  sínum hjá  Mæðrastyrksnefnd (sjá t.d. grein í Morgunblaðinu 30.11.2003), innan  Frjálslynda flokksins  og raunar víðar. Tilefni  þáttarins var viðtal við Óttar Guðmundsson lækni um Póllandsferðir. Auglýsingaupptalning  umsjónarmanns í upphafi þáttarins var svo yfirgengileg,  að Óttari lækni greinilega ofbauð , því umsjónarmaður missti út úr sér: - Nú hristir læknirinn   höfuðið ! Líklega hefur honum þótt taka í hnúkana, þegar konan fór að tala um læknisfræði og lækningamátt  snákaolíu  og Kínalífselexíra,  sem hún var auglýsa og ekkert komu Iceland Express eða Póllandi við. Landlæknir ætti að athuga þessar háskalegu fullyrðingar. Það gæti verið  til væri fólki sem tryði konunni.

Allt sem Óttar sagði um Pólland   var hinsvegar  prýðilegt og fróðlegt. Þáttur  umsjónarmanns var eins og  við var að  búast.   Hún fann sér  tækifæri til að nefna  vesaling minn  til sögunnar, þótt ekki litgreindi hún sálu mína  að þessu sinni. Í heild var þátturinn  staðfesting á  öllu því sem Molaskrifari hefur áður  sagt. Hann er langt  fyrir neðan virðingu nokkurs  fjölmiðils,sem  veita vill áheyrendum heiðarlega þjónustu. Það er kannski  ekki ofarlega á  lista hjá Útvarpi Sögu. Forstjóri  ferðaskrifstofunnar Iceland Express er  stjórnarformaður svokallaðrar Fjölskylduhjálpar Íslands, einkafyrirtækis , þar sem Ásgerður  Jóna Flosadóttir situr í forstjórasæti, þegar  hún er ekki á flugi  með Iceland Express.  Líklega  á ódýrari farmiðum en almenningi gefst kostur á að kaupa. 

Kannski á það eftir að renna  upp fyrir forstjóra Iceland Express að  konan er ekki traustvekjandi talsmaður  fyrirtækis hans og ólíkleg  til að færa honum farþega á færibandi.