Molar um málfar og miðla CIII

 Molahöfundur  gerðist  svo  djarfur   að senda fréttastofu Ríkisútvarpsins   vinsamlega ábendingu  um framburð á  nafni borgarinnar Urumqi í vestur Kína  eða  gamla  Austur Túrkestan sem  mjög er í fréttum þessa dagana.  Það hafði  ekki áhrif því í fréttum (08.07.2009) kallaði fréttaþulur (útvarpsstjóri) borgina Úrúmkí, sem  er rangt. Ekki þarf  annað en að  fletta upp í Merriam-Webster Online Dictionary  á netinu, þar er  hægt að hlusta á þrennskonar framburð þessa borgarheitis. RÚV framburðinn Úrúmkí er þar ekki að  finna.  Skylt er að  geta þess að í átta fréttum RÚV (09.07.2009)var   rétt farið með bæði nafn borgarinnar og  frumbyggja  svæðisins. 

Í Molum hefur áður verið  agnúast út í  fyrirtæki sem  nota  slettuna  tax free í auglýsingum. Á  það hefur verið bent  að   fyrirtæki hafa ekki leyfi  til að  fella niður  virðisaukaskatt af seldum  vörum, en þau geta  auðvitað  gefið  viðskiptavinum afslátt sem nemur  virðisaukaskattsprósentunni. Steininn  tekur  úr þegar   Húsasmiðjan  auglýsir  tax free af öllu  pallaefni.  Þetta er  einstaklega óvandað málfar.Eiginlega málleysa.  Fyrirtæki sem eru vönd að virðingu sinni  eiga að  hafa auglýsingar  á vönduðu máli, - á góðri íslensku  ekki á  hrognamáli.

 Úr Vefmogga (08.07.2009): ...stefna og lega mengunarinnar bendir þó til að ólíklegt sé að hún komi frá skipi á siglingu. Verð að  játa , að  ekki átta ég mig  á  hvað stefna og lega mengunarinnar er. Nema  það sé  staðsetning olíuflekksins  sem  fréttin er um.

Í Mogga (09.07.2009) er sagt frá því í efnistilvísun á baksíðu að Ragnar Bjarnason syngi  djass-standarda.  Orðið  standard er  ekki nýtt í íslensku,  Orðið  staðall hefur  þó  nær  alveg komið í staðinn fyrir það   í merkingunni gæðastig. Enn heyrist það  þó notað í merkingunni venjulegt. samkvæmt  reglum, t.d.  standard þykkt.  Mig  minnir  að í bernsku  hafi ég heyrt  talað um  standard lampa,  en   það er frá  Bretlandi komið, seinna varð þetta standlampi, sem  er   gegnsætt og ágætt orð. Líka minnist ég þess að hafa heyrt  standard sem  einhverskonar mælieiningu um  timbur (í miklu magni)  en ekki hefur mér  tekist að  finna því  stað.  Hinsvegar er algjör óþarfi  að  nota  enskuna  standard  um  gömul og  vinsæl lög. Á tímabili  töluðu þulir   RÚV mikið um  big band  tónlist,um leik  fjölmennra djasshljómsveita, en  orðið  stórsveit hefur  útrýmt þeirri slettu .

Molar um málfar og miðla CII

 

Sjónvarpsfréttir  RÚV ( 07.07.2009)  og Þóra Arnórsdóttir  í Kastljósi fá  prik  fyrir umfjöllun um Sjóvá-Milestone -Askar  svindlið. Varpað var ljósi á  málið og þetta skýrt á mannamáli. Vilhjálmur Bjarnason hitti naglann á  höfðuðið í lokin, - eins og hann hefur  svo oft gert.  Fáránlegt er hinsvegar  að Kastljós  skuli fara í  sumarfrí , þegar Alþingi  er að ljúka  störfum  og ótal mál á  lokasnúningi.  Dæmigert  stjórnleysi hjá RÚV. Kastljós hefði  átt að  bíða þingloka með  sumarleyfi.

 Skrifað stendur  á Vefvísi (04.07.2009): ...verktakafyrirtækið KNH ehf., þarf að staðgreiða fyrir tækjabúnaði þar sem breskt fyrirtæki treystir ekki íslenskum bönkum. Hér hefði átt að segja: staðgreiða tækjabúnað. Einfalt mál? Ekki fyrir þann sem er illa að sér í íslensku.

Vefdv skartar eftirfarandi (06.07.2009):  ... segir móðir stúlkunnar að hana hafi hlakkað mikið til heimsóknarinnar.  Meiri snilld úr  sama vefmiðli:  Hún játaði einnig að hafa ekið bifreið frá Reykjavík uns vestan við Markarfljót þegar lögregla hafði afskipti af henni. Ekki verður sagt að mikið fari  fyrir skýrri hugsun í þessari setningu.

Auglýsingastofur eiga margar erfitt með að koma frá sér óbjöguðum texta. Í helgarútgáfu  Fréttablaðsins (04.07.2009)  stóð  eftirfarandi í auglýsingu frá Korputorgi:  Þeir sem versla á Korputorgi   býðst að taka þátt í léttum og skemmtilegum  ratleik...

Ótrúlega margar villur eru í stuttri frétti á Vefvísi (06.07.2009) um bát sem leki kom að á Skagafirði.  Fyrst   er sagt  að  báturinn  hafi verið í  Skagafirði,  - það er inni í landi, -  auðvitað var  báturinn á  Skagafirði.  Í  öðru lagi er  tvísagt að lekið hafi komið að  bát, ekki báti eins og  rétt  er.Beygingin er  bátur,  bát, báti , báts. Þá er  sagt að  báturinn hafi  verið  2,5  sjómílum  frá  Drangey, en á  auðvitað að vera  2,5  sjómílur. Það er afrek út af fyrir  sig  að koma  svo mörgum  villum í svo fáar línur. Á fréttavef RÚV (06.07.2009) er fyrirsögn á  frétt um þennan  sama atburð: Björguðu sjómanni norðan af Drangey ! Hér   hefði  átt   að  segja  norður af Drangey.  

Meira af Vefvísi (06.07.2009). Í frétt um  slys  í Hvalfjarðargöngum segir: Ekki er ljóst á þessari stundu hvenær göngin opna.  Hvenær göngin opna hvað? Það sem  skrifari á  við er að  ekki sé ljóst hvenær  göngin verði opnuð.

Við  erum að sjá verulega aukningu í komum á þjónustumiðstöðvar borgarinnar ,sagði  embættismaður  Reykjavíkurborgar (04.07.2009) í  hádegisfréttum RÚV.

Svo væri ekki úr vegi að fréttamenn RÚV samræmdu framburð sinn á  heiti  frumbyggjanna í Xinjiang í Kína og höfuðborginni þar Urumqi. Þar er að gerast mikil  sorgarsaga. Þetta er  gríðarlega áhugavert  land. Borgirnar Kashgar og Urumqi eru einhverjar þær eftirminnilegustu sem ég hef heimsótt og  eiga sér merka  sögu. Gamla Austur Túrkestan er eitt af löndum  framtíðarinnar auðlindaríkt og áhugavert  fyrir margra hluta sakir.

Sífelldur skollaleikur

Stjórnarandstöðuflokkar á Íslandi hegða sér á  annan veg en  stjórnarandstaðan gerir á  Norðurlöndunum.  Hjá Sjálfstæðisflokknum  snýst þetta um að  djöflast gegn öllu sem  ríkisstjórnin  gerir,  sjá hvergi neitt nema  svartnætti  og  djöfulskap,sem er  eins og   sagt var „hænufet  frá landráðum”.  Stjórnarandstaðan er í sífelldum skollaleik.

 Hjá  Framsókn er hinn óreyndi þingflokkur mest í fíflagangi, vill helst  tala um  fundarstjórn forseta og fer þá út og  suður. Þar eiga þó ekki  allir þingmenn  þess  flokks óskipt mál. Eftir átján ára stjórnarsetu  kunna  Sjálfstæðismenn ekki annað en  að vera í stjórn. Þeir umhverfast í stjórnarandstöðu. Einstaklingar sem  annars eru   sæmilega dagfarsprúðir og   tiltölulega hófstilltir  fara  hamförum í ræðustóli  , baða út   öngum og hafa í frammi mikla háreysti. Hinn ungi þingflokkur Framsóknar  bölvar og ragnar og hefur klámyrði í flimtingum.Stjórnarandstaðan gefur  stjórnarliðum ekki  hljóð.  Frammíköll eru ekki ný á þinginu,  en  látlaust  gjamm og  hávaði er óþörf nýlunda.     Þau setja  ræðumann   kannski svolítið  út  af laginu  en  sé hann með  á nótunum og  snöggur  að hugsa  snýr hann frammíkallinu oft upp í háðung  fyrir þann sem kallaði   frammí. Núverandi stjórnarandstaða   er  gjörsneydd kímnigáfu og  því  verða  frammíköllin aldrei annað en  truflun og skarkali.   Sá  sem þetta ritar  man  vel  stjórnarandstöðu  Sjálfstæðisflokksins á árunum  1988  til 1991. Þá  var geðillska þeirra með ólíkindum. Ég var þá   formaður  allsherjarnefndar  efri deildar. Þangað kom frumvarp , afar vel undirbúið,  valinkunn kona hafði verið  formaður nefndarinnar sem  samdi frumvarpið.  Einn af fulltrúum Sjálfstæðisflokksins í  nefndinni  vildi senda  frumvarpið  til umsagnar eitt  hundrað aðila.  Margir þeirra höfðu komið að  samningu  frumvarpsins.  Tilgangurinn var   sá  einn að  tefja málið. Í annað  skipti  kom  fulltrúi  SÍS á  fund  nefndarinnar  að beiðni okkar  vegna  frumvarps  sem  var til afgreiðslu.   Honum ofbauð   framkoma   eins  nefndarmanna og hann stóð upp og  kvaddi.  Það kom í hlut  formanns  að  hlaupa á eftir honum  fram á gang í Þórshamri og  biðjast afsökunar  fyrir  hönd  nefndarinnar. Það er ekki nýtt að Sjálfstæðismenn ærist í  stjórnarandstöðu. Þeir  telja  sig fædda og útvalda til að stjórna. Þeir kunna  ekki að taka    því mótlæti sem  það er að vera í stjórnarandstöðu, enda margir  silfurskeiðarmenn frá  fæðingu. Rifja upp að lokum það sem  Allaballi  sagði við mig eitt sinn á síðkvöðli: Það er  allt í  lagi að vera í stjórnarandstöðu, - það verst hvað það er  andskoti leiðinlegt !   

Við vorum höfð að fíflum

 Það kemur æ betur í ljós hvernig  við höfum öll , öll þjóðin, verið höfð  að  fíflum.

Svolítið einfaldað var þetta svona:

Samson  fékk að kaupa Landsbanka Íslands, - banka allra  landsmanna, af því að   þeir áttu svo mikinn gjaldeyri eftir að hafa selt Heineken bjórverksmiðju í Rússlandi. Nú er komið í ljós að þeir  fengu  verulegan hluta kaupverðsins að láni  í Búnaðarbankanum (var Búnaðarbankinn  ekki ríkisbanki þá ?) , -  væntanlega í  sauðalituðum krónum.  Nú bjóðast þeir af miklu örlæti til að  borga  lítið brot af láninu til baka.

 Fengu svo ekki útvaldir  Framsóknarmenn lán í Landsbankanum til  að kaupa  Búnaðarbankann,sem  seinna varð  Kaupþing ?   Þannig  voru helmingaskiptin fullkomnuð.  Það  skyggði að  vísu  aðeins á að valinkunnur  Sjálfstæðismaður sagði sig úr  einkavæðingarnefndinni  af því að hann hafði aldrei kynnst öðrum eins  vinnubrögðum.

 Undirritaður  eru nú ekki mikið  fyrir að sletta  ensku, en sennilega er þetta það sem Englendingar mundu kalla: The  perfect crime.  - Hinn fullkomna  glæp!. Ekki sé  ég betur.

Þeir hafa haft okkur öll að  fíflum og hlæja  nú að okkur sem  treystu þeim.

Mikil fífl  vorum við.

 

 

 

 

 

 

Molar um málfar og miðla CI

Þeim sem langar í styrju eða fisk.. stóð í myndatexta í Morgunblaðinu (03.07.2009) Og ég sem hélt að Mogginn væri vaxinn upp úr  svona  villum !

 Heyrði  brot úr endurteknum þætti í Útvarpi Sögu (03.07.2009) þar sem  verið var að mæra og auglýsa hvalaskoðunarfyrirtæki í  Reykjavík.  Þar var skemmtileg  ambaga, eða mismæli, þegar önnur konan sem  rætt var  við kallaði hvalbátana ryðkálfa, en ætlaði sér  væntanlega að segja ryðkláfa. Annars hafa mér  sýnst hvalbátar Kristjáns  Loftssonar  bara  líta prýðilega út og vera hafnarprýði þótt komnir séu vel  til ára sinna. Í lokin sagði svo  stjórnandi þáttarins: Við  erum að  verða uppiskroppa með þáttinn. Hann átti  við að þeim tíma sem þættinum var  ætlaður í dagskránni  væri að ljúka. Að verða uppiskroppa með  eitthvað  er að  komast í þrot.  Þannig getur kaupmaður orðið uppiskroppa með  kanil eða kaffi.

Af Vefdv  (03.07.2009): Hann segist vonast til þess að svona lagað endurtaki sig ekki aftur.Það hálfa  hefði verið nóg. Meira af Vefdv (04.07.2009) : Þeir sem ætla að leggja leið sína í Þjórsárdal eða Úthlíð í dag er þó bent á að hafa fyrst samband við.... Fastir liðir eins og venjulega. Skrifari man ekki hvaðan hann lagði af stað.

Í  stuttu viðtali (04.07.2009) í hádegisfréttum  RÚV sagði  embættismaður Reykjavíkurborgar fjórum sinnum: Við erum að sjá.. Minna hefði mátt gagn gera. Sá hinn sami  talaði um að  koma fólki í virkni. Líklega var átt við að virkja hæfileika fólks  til góðs. Margt fleira  mætti segja um þetta stutta  viðtal.  Góðvinur sem einnig  hlustaði á þetta  viðtal sagði að senda ætti  þennan embættismann á námskeið í íslensku fyrir útlendinga !  Í  sama fréttatíma  var haft eftir  formanni  launþegasamtaka að menn væru ekki að ná  lendingu...

 Stundum er hér vikið að orðalagi í auglýsingum. Í heilsíðu auglýsingu  (DV, 03.-05.07.2009) býður  Humarskipið upp á ferskann humar. Sumar auglýsingastofur hafa   ekki vald á  grunnatriðum íslenskrar málfræði. Meira um auglýsingar: Ég verð að játa að ég átta  mig  ekki alveg á  auglýsingu Ríkisútvarps um eigið ágæti  þar sem  notuð   eru  brot úr   frægu Kastljósi  með Davíð Oddssyni og úr ávarpi  Geirs H. Haarde  forsætisráðherra þar sem hann biður  Íslandi  guðsblessunar.  Mér   finnst þessi auglýsing  ógóð. Kannski er ég einn um  þá  skoðun.  Mér finnst ekki í lagi að Ríkisútvarpið noti samtalsbrot og  brot úr  ræðu með þessum hætti.

 Einhverntíma sagði ég að  fjölmiðlamönnum liði best er þeir  töluðu við aðra  fjölmiðlamenn.  Sigmar Guðmundsson talaði við Láru Ómarsdóttur í Kastljósi og Lára  talar  við Sigmar í morgunútvarpi Rásar tvö. Þau eru  bæði starfsmenn Ríkisútvarpsins.  Alltaf er gott að leita ekki langt yfir skammt !

Annars er  firna mikið af  góðu efni í dagskrá   hljóðvarpsins og þar hefur  Sigrún Stefánsdóttir  dagsskrárstjóri breytt mörgu til bóta.Óþarfi fannst mér þó að slátra morgunvaktinni á  Rás eitt. Þar var ekkert að. Þar þurfti ekki að breyta.  En sérstaklega hrósa ég  vel undirbúnum og  vönduðum  tónlistarþáttum, sem eru margir á  Rás eitt. Ekki  er  hægt að  segja  það sama um sjónvarpið. Þrjár bandarískar bíómyndir í  bunu (03.07.2009) Það er ekki dagskrárgerð sem  hægt er að hrósa.

Hélt að ekkert væri eftir til að selja

 Það verður að segjast eins og er að þessi frétt kemur verulega á óvart. Ég hélt að bæjarstjórinn í Keflavík (sem ég fæ mig  aldrei til að kalla Reykjanesbæ) væri  búinn að  selja allar eigur bæjarins ,sem á annað borð væri hægt að koma í verð.

 Ég á líka erfitt með að átta mig á því að ein helsta mótbára Sjálfstæðismanna gegn  aðild að ESB er sú að ekki megi  hleypa útlendingum í  orkuauðlindir okkar   frekar en  afhenda þeim  fiskinn í sjónum.  Kannski er  bæjarstjórinn bara ekki í nógu  góðu sambandi við  flokksforystuna. Allavega vefst þetta svolítið  fyrir mér.

Kaupin í HS Orku bænum í hag

Molar um málfar C

 Dæmi um stofnanastíl af vef Ríkisútvarpsins (02.07.09.): Hann segir fjölda ferðamanna hafa stigmagnast jafnt og þétt í sumar. Átt er við að  ferðamönnum hafi  fjölgað jafnt og þétt í allt sumar ! Fjöldi ferðmanna stigmagnast!. Þetta er einstakt orðalag.

Litlu betra er það sem lesa má í frásögn Vefvísis af Alþingi (02.07.09.): Bjarni sagði ræðu Össurar vera samfelldur brandari. Hér á  auðvitað að  standa , að  formaður  Sjálfstæðisflokksins hafi sagt ræðuna vera samfelldan brandara. Máltilfinningu skortir hjá  skrifara.

Icvesave deilan ber á góma, sagði  dagsskrárstjóri  RÚV sjónvarps, er hann kynnti  efni Kastljóss í fréttatímanum (02.07.09.) Hann átti  við að  Icesave  deiluna  bæri á  góma.

 Enn er  ruglað  saman því sem  tvisvar eða  þrisvar hefur verið nefnt hér:  Að  ganga eftir og  að ganga á  eftir. Þessu var ruglað saman í fréttum Stöðvar tvö (02.07.09.) Að ganga  eftir  einhverju er að óska  eftir einhverju eða  krefjast einhvers.  Eitthvað gengur  eftir, er að eitthvað fari eins og  ráð  er fyrir gert.  En að ganga á  eftir   er  að  fylgja einhverjum  eftir. Að ganga á eftir  stúlku  með  grasið í skónum,  er  að sækjast mjög  eftir  ástum  stúlku. -Minnir  reyndar á  eina  fegurstu  ástarvísu  tungunnar,sem Páll  Ólafsson orti:

Ég  vildi ég  fengi að vera  strá

og visna í skónum þínum,

því léttast gengirðu efalaust á

yfirsjónum mínum.  

Það þarf að laga þessa ambögu eigi síðar en strax. Þetta skrifar Birgittta Jónsdóttir alþingismaður á  bloggsíðu sinni og  er að  fjalla um  vankanta  eða annmarka á  bótareglum atvinnuleysistrygginga.  Ambaga er  rangmæli eða  rassbaga. Líklega er þingmaðurinn að  rugla saman  ambögu og annmarka. Það er alltaf  heldur til bóta að þekkja merkingu þeirra orða sem maður  notar.  Svo er eigi síðar en strax eitt af þessum ofnotuðu orðatiltækjum,sem verða óþolandi.

 Sumir virðast þeirrar  skoðunar að í netheiminum leyfist hvaða málfar sem  er.  Einn þeirra er  Andrés  Jónsson,sem  skrifar eftirfarandi á  Eyjunni: Eitt af vandamálum Samfylkingarinnar er að eftir því sem hún stækkar, þá verður hún meira mainstream.Sem gerir að verkum að það verður svolítið keimlíkt fólk sem sest í allar stöður.Svona middle-of-the-road fólk, sem spilar safe.

Ekki veit  ég hvort Andrés Jónsson  er að sýna lesendum að hann kunni svolítið í ensku  eða að hann kunni ekki íslensku og  geti ekki orðað hugsanir sínar  nema á hrognamáli.

Hvar í veröldinni nema  á Íslandi gæti  birst  svona  fimm dálka  fyrirsögn í  víðlesnu blaði (Morgunblaðið 02.07.09.):  Eigandi  Eimskips þekkir Clinton ? Sennilega hvergi.  Ein  birtingarmynd vanmetakenndar er að þurfa að nugga  sér utan í frægt fólk. Þetta  höfum við séð  á Álftanesinu.  Ennþá  skýrar kemur þetta  fram  í eftirfarandi klausu  undir þessari  fyrirsögn: Ekki nóg með að Bill Clinton komi næstum við  sögu hins endurreista  Eimskipafélags, þá bregður  Warren  Buffet, þekktasti fjárfestir  heims, næstum fyrir (svo!).  Og á hvaða  grunni hvíla þessi skrif ? Nýr  eigandi  þriðjungshlutar  í hinu  kollsiglda óskabarni  þjóðarinnar  er  kunningi Bills Clintons og  erlendir lögfræðingar  sem  hafa unnið  fyrir  Warren Buffet komu að málum hins  nýja  Eimskips.  Þannig er nú það.

Hafa nú verið  birtir  hundrað Molar um málfar og  sýnist auðvitað sitt hverjum um það sem hér hefur  verið  sagt. Að líkindum munu molaskrif eitthvað strjálast um  sinn.

Molar um málfar XCIX

 Morgunblaðinu verður  tíðrætt um það á  forsíðu (30.06.09.) að komu nýrra gæsluflugvélar  til landsins seinki vegna  pappírsvinnu í tengslum  við  tryggingar og  fleira.   Orðið pappírsvinna  er  aulaþýðing á  enska  orðinu paperwork. Á íslensku heitir þetta skriffinnska.

Vefmoggi  segir í fyrirsögn (30.06.09.): Keyrt á reiðhjólamann. Fyrirsagnarhöfundur  hefur líklega ekki þekkt orðið hjólreiðamaður,sem þó er  notað í fréttinni undir  fyrirsögninni.

Á Vefvísi er skrifað (30.06.09.): Rétt rúmlega sextugur bóndi nálægt Hellu var dæmdur fyrir að hóta sveitungi sínum og fyrir vopnalagabrot. Það var hinn nítjánda ágúst á síðasta ári sem bóndinn sendi sveitungi sínum eftirfarandi skilaboð:Þetta er enn eitt  dæmi þess að blaðamaður  kann   ekki einföldustu beygingar nafnorða í íslensku.   Hér á  orðið  sveitungi  auðvitað að vera í þolfalli,  sveitunga, í báðum tilvikum.  Ýmislegt fleira  er  raunar athugavert við þessa frétt.

  Greinilegt er að  fyrirtækið  Rekkjan  ehf  skiptir  við  auglýsingastofu þar sem  menn kunna ekki  móðurmálið nægilega vel. Í  heilsíðu auglýsingu frá Rekkjunni í Fréttablaðinu (30.06.09.)  eru  auglýst með  flennistóru letri þrýstijöfnunarsvampsrúm (hvað  svo sem þar nú er !). Svamps  er  eignarfallsmynd orðsins  svampur, þar  ætti  að  standa  svamprúm ekki svampsrúm. Ef  verið væri að auglýsa  rúm úr  stáli mundi sagt stálrúm, - ekki  stálsrúm.

  Bloggari  skrifar um verkefni,sem hann kallar  Plöggum námskeið  saman. Þetta er hrognamál.