Hvaða dómstóla, Jón Steinar ?

  Virðulegur hæstaréttardómari segir í þessari Morgunblaðsgrein, að það sé  skylda  ráðamanna að láta dómstóla  fjalla um Iceasave- málið. Nú geta  menn haft ýmsar skoðanir á því hvort  hæstaréttardómari  eigi að blanda sér í  deilumál  af þessu  tagi með þeim hætti sem Jón Steinar Gunnlaugsson gerir. Víst tel  ég að það  þætti ekki við hæfi í grannlöndum okkar.

Það er hinsvegar  athyglisvert að  hæstaréttardómarinn   forðast  eins og heitan eldinn að nefna   hvaða  dómstóll ætti að  fjalla um deiluna. Sem er  auðskilið. Sá  dómstóll er  nefnilega ekki til. Ætti það að  vera   Efta dómstóllinn?  Bretar  eiga  enga  aðkomu að honum. Ætti það að vera dómstóll ESB?  Við eigum  enga aðkomu að honum.

Eru allir  búnir  búnir að  gleyma  því þegar Bretar  vildu  leggja   landhelgisdeiluna  fyrir Alþjóðadómstólinn í Haag ,en  Íslendingar  sögðu  nei.   Við  viðurkenndum ekki að  sá  dómstóll  hefði  lögsögu í málinu.

Samþykki  beggja  þarf til að  fara  dómstólaleiðina. Þar þarf  tvo  til. Við bætist að  við  vorum  fyrir  löngu  búin að  skuldbinda okkur  til að fara  samningaleiðina í þessu máli. Fleiri og   veigameiri  rök liggja  til þess að  dómstólaleiðin svokallaða hefur aldrei verið  fær í þessum máli.

Allt þetta veit  Jón Steinar Gunnlaugsson. Það eru engin lagarök að baki grein hans í Morgunblaðinu. Hún er  pólitískt innlegg  í málið.Og  líklegt gott innlegg að mati þeirra Sjálfstæðismanna,sem  nú hafa ákveðið að hlaupast frá ábyrgð sinni á málinu.

Skylda ráðamanna að láta dómstóla fjalla um Icesave, segir hæstaréttardómari

Molar um málfar XCII

 Er ekki lágmarkskrafa, að þeir  sem  skrifa  fréttir kunni að beygja algengustu orð móðurmálsins ?Eftirfarandi setning  er af  Vefdv (20.06.09.): Staða Sigurðar Jónssonar, yngri bróðurs Guðmundar í byrginu, er ekki öfundsverð. Svona  til að hnykkja á þessu  þá beygist orðið bróðir: Bróðir, bróður, bróður,bróður.

 Einkennilegt  finnst mér að  tala um stóra brautskráningu  eins og Ríkisútvarpið gerir (20.06.09.) á heimasíðu sinni: Þetta er stærsta brautskráning frá skólanum frá upphafi . Hér er átt við að aldrei hafi  fleiri útskrifast samtímis  frá  Háskóla Íslands.

Svo er hér ein gömul ambaga,sem  kom á skjáinn við tiltekt í  tölvunni:

Vefvísir 07.02.09.

Geir Haarde formaður Sjálfstæðisflokksins  grunar að Ólafur Ragnar  forseti Íslands hafi  vitað af...  Fastir liðir eins og venjulega

 

Molar um málfar XCI

Morgunblaðið  sagði frá  hlut sem féll  af himnum ofan: Hafði hann rekist í þakskeggið og er þar nú ágætis dæld. 19.06.09.).  Það skorti bara á að  blaðið birti mynd  af þessari ágætu  dæld,sem ég  efast  raunar um að  húseigandinn sé  mjög ánægður með.

 Fréttamaður á  fréttastofu RÚV  ræddi  við  starfsbróður sinn (19.06.09.), sem var staddur á  sjálfu hvalskurðarplaninu. Þetta minnir  svolítið á þegar   sumir  Alþingismenn segja: Ég  flutti frumvarpið sjálfur.

 Í  Morgunblaðinu (19.06.09.) er sagt um þann mikla völund og listamann Jens  Guðjónsson, gullsmið: Hann nam  fjögurra ára gullsmíðanám hjá...  Þetta er tuggustíll:  Menn   nema ekki nám.  Betra hefði verið: Hann stundaði gullsmíðanám í  fjögur ár hjá.... , eða: Hann nam gullsmíði í fjögur  ár hjá ....

 

  Oftar en ekki er  fréttamat fréttastofu Ríkisútvarpsins sérkennilegt, að ekki sé meira  sagt.  Þegar lögmenn, sem  virðast frekar vera í pólitík, en  fræðunum,  segja  að   við  gætum misst   Alþingishúsið  í hendur útlendinga  er það  fyrsta  frétt. En þegar rætt  er  við  formann íslensku  samninganefndarinnar  til að leiðrétta   þetta   endemis rugl  (19.06.09.)  er þeirri  frétt  holað niður undir lok hádegisfréttatímans. Það er  hægt að  tjá  hug sinn  til þjóðmála  með ýmsu móti .

Molar um málfar XC

  Garðapósturinn, óháð bæjarblað í Garðabæ og Álftanesi, barst mér í pósti  fyrir nokkrum dögum. Þar er eftirfarandi  að  finna:  Kópavogspóstinum hafði samband fiskiprinsinn,Eyjólf Júlíus Pálsson, eiganda  fiskverslunarinnar Hafið  - Fiskiprinsinn sem staðsett er  að Hlíðarsmára 8  í Kópavogi. Hafið er sérverslun með  fiskafurðir fyrir  kröfuhafa grillneytendur  á  sanngjörnu verði. Prinsinn hvað hann hefur  spennandi fram að  færa á grillið í sumar?  Þetta er    með ólíkindum.  Í sama blaðið  er  reyndar  ótal margt  fleira  athugavert  , eins og  til  dæmis: .. unnu út frá þemanu endursköpun  og nýsköpun, sem kennarinn hafði sett þær  fyrir.

Og ég held að það sé raunar til skammar hvernig  hún hagar sér á bjöllunni. Þetta hefur  Fréttablaðið (17.06.09.) eftir þingmanni  Framsóknarflokks. Ég læt  lesendum  eftir að  dæma   þetta orðalag þingmannsins.

Bjarni Benediktsson, formaður Sjálfstæðisflokksins, sagði í  umræðu um Icesave-samningana, að þingmenn væru ekki að fara að staðfesta þessa samninga (Vefmoggi 18.06.09.). Eru ekki að fara að staðfesta. Varaformaður Sjálfstæðisflokksins  sagði svo  á Morgunvaktinni ( 19.06.09.):  Það er  fyrst núna sem  við erum að fara að sjá.... Erum að fara að  sjá. Einmitt það. Bráðsmitandi. Og þingmenn  Framsóknar halda áfram að  segja : Mér  langar.  (Utandagskrár umræða um Icesave  18.06.09.)

Af   Vefvísi (18.06.09.): Einn fulltrúi frá hagsmunasamtökunum telur að breska ríkið eigi að standa betur við fæturna á þeim sparifjáreigendum sem töpuðu sparifé sínu á falli Landsbankans.  Standa betur  við  fæturna á ! Þeim  bregst ekki bogalistin á Vefvísi. Sá  sem þetta skrifar á líklega við að  yfirvöld eigi  að  styðja  betur  við bakið á  sparifjáreigendum. Standa betur  við fæturna á   einhverjum  gæti líklega nálgast það að troða einhverjum um tær.

Molar um málfar LXXXIX

  Úr Vefmogga (16.06.09.):Eitt tilvikanna átti sér stað milli Parísar og Tokyo en þá settu flugmenn vélarinnar af stað viðvörun, eftir vandamál tengt stormi. Afleiðing vandamálanna var að sjálfstýring vélanna var aftengd og önnur kerfi settu af stað viðvörun. Í öllum sex tilvikum tókst flugmönnunum að ná aftur stjórn yfir vélunum. Ekki  getur  þetta  kallast  skýr og skilmerkilegur  texti !

 Meira úr Vefmogga (18.06.09.): Sögðu yfirvöld í landinu fólkið hafa starfað með uppreisnarsamtökum á Niger Delta svæðinu í Nígeríu.Niger Delta  svæðið?  Eru það  ekki óshólmar Nígerfljótsins, fljótsins sem  landið  dregur  nafn sitt af ?

Ríkisútvarpið, þessi sameign okkar allra,  heldur áfram að  sletta á okkur  ensku.  Missið ekki ekki af  Rás tvö ópen, heyrði ég sagt þar í morgunútvarpi (16.06.09.) Líklega er þetta eitthvað í sambandi  við golf, -  eða hvað? Mikið er metnaðarleysi  þessarar stofnunar, sem  á að  standa vörð um íslenska  tungu. Hvorki  æðstu stjórnendur  né  stjórn stofnunarinnar virðast  hafa  minnsta áhuga á að  stofnunin starfi eftir  þeim reglum sem hún á að starfa eftir.

 Hér er oft  jöfnum höndum fjallað um fjölmiðlun og  málfar í  fjölmiðlum . Ekki veit ég á hvaða leið  Kastljós   ríkissjónvarpsins er, en   halelújaviðtalið  við  hæstaréttarlögmanninn Sigurð Þór Guðjónsson var með ólíkindum. Í Kastljósi hafa  dægurmálum oft  verið gerð  góð skil.  Því  var ekki fyrir að fara í þessu  viðtali Helga Seljans  um  lífeyrislán  fyrrum  bankastjóra  Landsbankans. Ef Kastljós  vildi fjalla um hin sérkennilegu  lífeyrismál  Sigurjóns  Árnasonar átti að  ræða  við hann,  ekki  launaðan talsmann  hans. Viðtalið var  eiginlega  lexía  í því hvernig  fara skal í kring um lögin.

  Það  var einkennilegt  fréttamat hjá   RÚV  sjónvarpi  (15.06.09.)  að  segja í  fyrstu frétt að Halldór  Ásgrímsson,fyrrverandi forsætisráðherra,  sé  þeirrar  skoðunar, að rétt hafi verið að einkavæða  bankana. Ég held  að um það hafi ekki verið  deilt. Gagnrýnin að undanförnu hefur ekki  beinst að því  að bankarnir voru einkavæddir,  heldur  hvernig þeir  voru einkavæddir undir helmingaskiptastjórn  Framsóknarflokks og  Sjálfstæðisflokks.

Dapurlegur málflutningur

  Það er heldur  dapurlegt, að  fyrrverandi  þingforseti, Sturla Böðvarsson, skuli  (ásamt  öfgabloggaranum Jóni Vali Jenssyni) misnota nafn Jóns Sigurðssonar með þeim hætti, sem hann  gerði í    ræðu sinni á  Hrafnseyri.  Jón Sigurðsson var  víðsýnn maður, sem meðal annars  háði „harðar rimmur  um verslunarmál landsins",  eins og  Páll E. Ólason  kemst að orði.

Hvernig í  ósköpunum geta  menn  tekið nítjándu aldar mann  og  gert honum upp  skoðanir  gagnvart  viðfangsefnum  tuttugustu og  fyrstu aldarinnar ? 

Þetta er auðvitað  svo  fráleitur málflutningur  að  engu tali  tekur. Þetta er  misnotkun á nafni Jóns  Sigurðssonar.

Öllu skal fórnað fyrir ESB-aðild

Molar um málfar LXXXVIII

 Í morgunfréttum RÚV (13.06.09.) var talað um munna Adenflóa.  Venjan  er  að tala um mynni  flóa  eða  fjarðar,fjarðarkjaft  eins er talað um  ármynni. Munni er  hinsvegar  notað um op eða inngang að helli. Hellismunni.

 Þegar sjónvarpað  var   frá  hátíðahöldunum á  Austurvelli að morgni þjóðhátíðardagsins sást hvar   kínverski sendiherrann á Íslandi sat í hópi  erlendra sendimanna. Eins og ýmsir muna þá   kallaði fréttastofa Ríkisútvarpsins   sendiherrann heim  til Kína  fyrir  hálfum mánuði  eða  svo, þegar  Dalai Lama heimsótti Ísland. Fréttastofan gaf líka í skyn  að  sendiherrann hefði heimsótt  forseta Íslands,  væntanlega í kveðjuskyni. Allt  var þetta  fleipur. Sendiherrann er  hér enn  og hann  fór ekki  til  Bessastaða. Það var  annar maður, - fyrrverandi sendiherra. Fréttastofan hefur ekki  leiðrétt   þessi ranghermi , né  beðið  hlustendur afsökunar á  alvarlegum mistökum  í  fréttaflutningi. Það er ekki gott.

  Þegar talað  er um að vera með óhreint mjöl í pokahorninu, finnst mér ævinlega að verið sé að rugla saman tveimur orðtökum. Annarsvegar að vera með óhreint mjöl í pokanum,-  vera  sekur  um e-ð og  að eiga eitthvað í pokahorninu, að luma á einhverju, venjulega einhverju jákvæðu eða  góðu. Vera má að þessi kenning mín sé  röng.  Mér  finnst  rökréttara  að vera með  óhreint mjöl í pokanum og að eiga eitthvað í pokahorninu.

Á vefvísi (13.06.09.) er vitnað orðrétt í fréttatilkynningu frá  ungum Framsóknarmönnum í  Kópavogi: Framsóknarmenn segja: „Við lýsum því yfir eindregnum stuðningi við Ómar Stefánsson oddvita til að leiða þetta mál til lyktar ..."   Að ljúka máli,  eða  fá  botn í mál,  er að leiða  mál  til lykta.   Lyktir  eru málalok.  Lykt er þefur. Það er  að minnsta kosti  venjulega merking og notkun þessar orða.

Ársgrundvöllurinn er lífsseigur. Í hádegisfréttum  RÚV (13.06.09.)  sagði maður,  sem  rætt  var  við: á  ársbasis  eða  ársgrundvelli.   Dugað hefði að  segja á ári.

Villandi fyrirsögn er á fréttavef RÚV. Þar segir (15.06.09.): VG vilja hafna tillögu um viðræður. Þegar fréttin er  lesin  kemur  er  ljós  að það er VG  félagið í Skagafirði,sem vill hafna  viðræðum um  Evrópusambandsaðild.

Gleðilega þjóðhátíð !

Framsóknarbloggarar fara hamförum

  Framsóknarbloggarar far nú hamförum á blogginu og freista þess að bera í bærifláka  fyrir   formann sinn, sem  gerði  sig eftirlminnilega  að  fífli í ræðustóli  Alþingis í dag. Það er ekki hægt að  afsaka  eða  réttlæta  framferði  formannsins,sem  alþjóð hefur  nú séð  oftar en einu sinni í sjónvarpi. Það er  auðvelt  að  skilja  að venjulega  fólki  er   ekki bara  nóg  boðið  heldur misboðið.  Raunar hafa fleiri  þingmenn Framsóknar í ræðustóli á  Alþingi  notað  orðbragð sem   er óboðlegt.  Bölv, ragn og klámyrði. Óreynt þinglið  flokksins heldur að þetta  sé stjórnarandstaða. Þetta er ekki  stjórnarandstaða. þetta er skortur á mannasiðum.

Óásættanleg framkoma forsetans

Hvað kemur næst frá Framsókn?

  Þeir sem  fylgjast  með sjónvarpsútsendingum  frá  Alþingi eru orðnir  ýmsu vanir  frá þingmönnum Framsóknarflokksins. Við höfum fengið  að heyra blótsyrði og  tal um blauta drauma ríkisstjórnarinnar, svo smekklegt  sem  slíkt  orðbragð nú er. Í  gær  heyrðum  við   formann   Framsóknarflokksins   garga á þingheim úr  ræðustóli þingsins. Það jaðraði við að hann væri ær.Hann gargaði  raunar á okkur líka sem  sátum heima í  stofu. Í  dag hrökklaðist  formaðurinn úr  ræðustóli, undan röggsemi  forseta, þegar hann  reyndi að misnota   dagskrárliðinn Umræður um fundarstjórn forseta.

Kjósendur   Framsóknarflokksins eru líklegar  stoltir  af  sínum mönnum.

Einleikur forseta á bjöllu

Molar um málfar LXXXVII

  Í  tíufréttum RÚV  sjónvarps (11.06.09.) var   greint  frá því hve margir  þingmenn hefðu opinberað   fjárhjagsleg hagsmunatengsl sín.  Þetta  reyndust vera   samtals  27 þíngmenn. Þrisvar sinnum  sagði  fréttaþulur, að þetta væri  langt innan við helmingur  þingmanna. Á   Alþingi Íslendinga  sitja   63 þíngmenn. Það væri  því nær lagi að segja  innan við helmingur,  eða  nær  helmingur vegna þess að  aðeins  vantar   5 þingmenn í hópinn þannig  að  fréttaþulur  hefði getað  sagt að  meiri  hluti  þingmanna  hefði  gert  þessi  tengsl  sín opinber.   Ekki fannnst mér  fagmannlegt  að taka  svona  til orða.

  Í fréttum Stöðvar  tvö (11.06.09.)  var  fjallað um lúxusíbúðir í eigu   auðmannsins Jóns  Ásgeirs  Jóhannessonar í Lundúinaborg.  Sagt var að  íbúðirnar   væru í sölumeðferð. Þetta  finnst mér aulastíll. Það hefði átt að  segja að íbúðirnar væru  til sölu. Þeir sem  selja svo kallað Herbalife, sem á að vera einskonar Kínalífselixír, kalla  sig ekki  sölumenn,  heldur  sjálfstæða  dreifingaraðila. Þetta er  auðvitað eins og hvert annað bull því  ekki  dreifa þeir þessu ókeypis. Þeir selja  Herbalife.

Skuldsett heimili eru viðkvæmari fyrir tekjumissi, sagði í fyrirsögn  í Morgunblaðinu (11.06.09.) Er það  ekki sjálfgefið ?

Þá var stúlkan að reka kúna en hún var nýbúinn að bera kálf. Vefvísir (11.06.09.) Áður hefur hér  verið gerð  athugasemd  við nákvæmlega samskonar orðalag.  Skrifari gerir engan greinarmun á  sögninni að  bera þegar hún  þýðir að halda á  og  tekur með sér þolfall eða  þegar  hún þýðir  að eignast afkvæmi og  tekur  með sér  þágufall,  -   kýrin  bar  kálfi.

En,  svei mér þá,  ef  málfarið hefur  ekki ögn  skánað á Vefdv að undanförnu. Vonandi getur maður  sagt:  Batnandi mönnum er best að  lifa !