Öldungis ótrúlegt !

Oft blöskrar okkur verðlag á innfluttum varningi á Íslandi, - með réttu.

Ekki síst þegar við höfum samanburð við verðlag í grannlöndum.

Fyrir nokkru sá ég smáhlut  í Húsasmiðjunni ,frekar  en Byko, , sem kostaði 690 krónur. Í gær  sá  ég sömu  vöru, nákvæmlega eins, frá  sama framleiðanda  í Bónus  hér í Þórshöfn í Færeyjum. Verðið  hér var 19.90 færeyskar (danskar) krónur, sem  jafngilda, kunni ég að  reikna, um 224  íslenskum krónum.

Þrefaldur  verðmunur !

Hver skyldi vera skýringin ?

Spyr sá sem ekki veit.

Íslendingar á síðum TIME

Tveir Íslendingar hafa á síðustu vikum komist á síður vikuritsins TIME. Ólafur Ragnar Grímsson,forseti, vegna endurnýjanlegrar orku á Íslandi. Hann lét þess getið,að Al Gore, fyrrum varaforseti  Bandaríkjanna , hefði vakið  áhuga hans á umhverfismálum. Einhver  spyr  sjálfsagt  hvort  hann hafi  aldrei hlustað á Hjörleif í gamla  Alþýðubandalaginu !Hinn er Kári Stefánsson forstjóri Íslenskrar erfðagreiningar,sem TIME  telur einn af eitt hundrað áhrifamestu einstaklingum í veröldinni. Það er ekki lítið. Í rauninni er merkilegt að íslenskir  fjölmiðlar skuli  ekki hafa veitt þessu meiri athygli.Þessi umfjöllun TIME er merkileg og sýnir Ísland í samhengi   tímans og  heimsvæðingar. Hér áður fyrr   komst Ísland á  síður  TIME  svona annaðhvert ár,  og þá oftast vegna eldgosa,  þorskastríða, Bobby Fischers eða Loftleiða.Þetta man ég  því ég var fréttaritari TIME  í hjáverkum frá  1965  til  1978. Tók við því embætti af Þórði Einarssyni, frænda mínum, síðar  sendiherra. Vissum  víst hvorugur af  frændseminni þá.  Þegar ég  tók sæti á þingi  1978 tók samstarfsmaður minn í sjónvarpinu, Bogi Ágústsson síðar fréttastjóri við.Nú er það  sjálfsagt svo, að  stórveldi á  borð við TIME  þurfa ekki hjáverkafréttaritara  á Íslandi  eða “stringer” eins og það heitir á  ensku.  Því veldur  breytt heimsmynd og breytt   tækni, og  samt er  Ísland oftar á síðum þessa  víðlesna rits en nokkru sinni fyrr. 

Tvöfeldni

  Það gæti ýmsum sýnst að við Íslendingar værum  , - eigum við að segja skemmtilega  tvöfaldir í roðinu.

* Við teljum sjálfsagt, að okkur sé frjálst að kaupa og  eiga  sumarhús á  Spáni eða í Flórída, en    til skamms tíma höfum við ekki mátt til þess hugsa að útlendingar ættu  sér  svo mikið sem hálfan hektara lands.

* Við bönnum erlendum klámsíðuhöfundum að  spjalla saman á Hótel Sögu og skoða landið okkur. Samtímis þessu  er kynórabloggsíða langvinsælasta lesefnið á  Moggabloggi.

* Við bönnum áfengisauglýsingar með lögum frá  Alþingi. Leyfum þær  samt  með því  skilyrði að orðinu "léttöl" bregði fyrir á skjánum í  svo sem sekúndu.

* Við teljum sjálfsagt,að  útlendingar sem hingað flytjast, læri íslensku og  taki upp alla okkar siði og venjur. Samtímis  rómum við Vestur Íslendinga    fyrir ást þeirra á íslenskunni og íslenskum siðum og venjum.

* Við teljum sjálfsagt  að lög og  reglur  gildi um aðra, - en ekki alltaf um okkur sjálf. Þetta mun raunar þekkt fyrirbæri úr sálfræðinni!

 

Sífellt sækir enskan á

Enskuslettur gerast æ  algengari í fjölmiðlum. Ástandið stefnir í að verða eins og  þegar  dönskuslettur óðu uppi um allt  samfélagið  og "fínt" þótti að sletta  dönsku. Jafnvel verra. Nú freistast maður til að halda að fólki þyki  "fínt" að sletta ensku

Frambjóðandi  og ritari stjórnmálaflokks sagði í   Silfri  Egils á dögunum: "Jæja, whatever"

Blaðamaður  Morgunblaðsins  sagði  og  skrifaði og  Moggi prentaði "Kom on, Geir" í viðtali  við forsætisráðherra lýðveldisins.

Skólastjóri   grunnskóla  sagði í hádegisfréttum  Ríkisútvarps í dag: "Fifty fifty , eins og  maður  segir á  góðri íslensku". Klykkti svo út með  einu  "ókey".

Stundum er það  svo, að þeir sem mest slá um sig með enskuslettum eru þeir sem minnst kunna í  því ágæta tungumáli. Gott er að kunna bæði  íslensku og ensku  en ástæðulaust að blanda þessum málum saman.

Það þarf að sporna við þessum ófögnuði.

Átaks er þörf.   - Tölum íslensku.