Vonandi misheyrðist mér !

Heyrði ekki betur  en  menntamálaráðuneytið,sem á að standa vörð um íslenska tungu,  auglýsti ráðstefnu í hádegisútgarpinu undir heitinu: " Ekta  eða  feik". Menntamálaráðuneyti  lýðveldisins á  að nota íslensku í auglýsingum. Vonandi misheyrðist mér. Ég óttast þó  reyndar að ég hafi heyrt rétt. Engum til sóma. Hvorki  ráðuneytinu né Ríkisútvarpinu.

Ítarefni um kjötinnflutning

Áhugasömum um frekari fróðleik skal bent á  leiðara Ólafs Þ. Stephensens  ritstjóra  24 Stunda í dag  "Gleymska Guðna" . Húmoristarnir á  ritstjórn blaðsins  hafa svo sett   bráðfyndna grein   Bjarna Harðarsonar alþingismanns Framsóknar   um sama  efni  "Kratar  allra flokka og  hrátt kjöt" á síðuna andspænis  leiðaranum. Í samhengi  er þetta tvennt  bráðskemmtilegur og fróðlegur lestur.

PS: Hér í  Færeyjum  er frjáls innflutningur  á kjöti:  Hér  eru lambahryggir og læri frá Goða  við hliðina á  lambalærum frá   Argentínu  og  Nýja Sjálandi. Hér fást líka  kjúklingar og  svínakjöt  frá Ítalíu og Dannmörku og er þá fátt eitt nefnt.

Engar fregnir  eru af manntjóni af völdum þessa innflutnings.

Vilja ekki innflutning á fersku kjöti

Ótrúleg mistök í Kastljósi !

Í Kastljósi  Ríkissjónvarpsins í kvöld var  boðað viðtal  við  aðaldómara í  málinu  gegn Birgi Páli Marteinssyni,sem  dómur var keðinn upp í á  miðnætti sl.  föstudag í Þórshöfn í Færeyjum..

Ekki var  rætt  við  dómarann, heldur var flutt  viðtal við verjanda Birgis Páls, lögmanninn Óla Jakúp Kristoffersen úr færeyska  sjónvarpinu í kvöld. Það  kom margsinnis  greinilega fram  í viðtalinu   að verið var að ræða  við lögmann  Birgis Páls  en ekki dómarann. Hlustaði enginn, skildi enginn?  Engin  skýring , engin  afsökun  í lokin,  bara bless og  sjáumst seinna, eða eitthvað í þeim  dúr. Skelfileg vinnubrögð.

Það er eitthvað alvarlegt að að í  ritstjórn  dægurmálaþáttar , þegar svona  mistök  verða. 

Ást á ensku

Einhverra hluta   sýnist mér að konur í hópi vinstri  grænna hafi sérstakt  dálæti á ensku.

Ekki er  langt  síðan ritari  flokksins Sóley Tómasdóttir  sagði í  Silfri Egils "Jæja, whatever". Nýlega  sagði  þingmaður  VG Álfheiður  Ingadóttir í sama þætti. "Ég segi nú bara:  So  what !" Í  dag skrifar  svo  VG bloggarinn  Jenný Anna;  "Ég missti  kúlið,  ég er bara svona happígólökkí kona".

Kann einhver skýringu á þessari sérkennilegu málhelti ?

 

 

Faðir, um föður.....

 Það verður nú  eiginlega að gera þá  kröfu  til þeirra sem skrifa fréttir á mbl.is að þeir kunni að beygja  algeng orð  eins og  faðir. 

"Faðir þess síðarnefnda bar fljótt að og var honum gerð grein fyrir málinu... "  

Engin  máltilfinning. Engin íslensku kunnátta.  Ekki boðlegt í alvörufjölmiðli.

Ungir veggjakrotarar handsamaðir

Hrátt kjöt

Svolítið  sérkennilegt hvernig  fjölmiðlar tönnlast á því að nú  eigi  að leyfa  innflutning á "hráu kjöti" eins og  hver  étur upp eftir öðrum. Hversvegna ekki fersku kjöti?  Við flytjum  út  ferskan fisk.Minnist  þess aldrei að hafa heyrt  talað um að  flyttum út  hráan  fisk !

Einkaþotuflug úr iðrum tölvunnar...

Í iðrum tölvunnar minnar  fann ég langa  frásögn  sem ég hafði skrifað  í september  1985 er við fórum sex alþingismenn  með  einkaþotu , - skrúfuþotu   frá  Helga Jónssyni til Nuuk í Grænlandi.Tilefnið var stofnfundur vestnorræna þingmannaráðsins.

Flugvélin var  tekin á leigu  til að  spara  ferðatíma. Flogið var beint frá  Reykjavík til Nuuk. Flugtíminn var 3 klukkustundir og 40 mínútur.Hinn kosturinn var  að  fljúga  frá Keflavík til Kaupmannahafnar  gista þar yfir  nótt. Fljúga  síðan til Syðri Straumfjarðar á Grænlandi  og  taka  aðra  flugvél  þaðan  til Nuuk. Fara  síðan   sömu leið  til baka á  tveimur  dögum. Beina flugið  frá Reykjavík til Nuuk    kom sem sé  í stað tveggja daga  ferðalags og  gistingar.

Ég sé ekki betur en þetta sé  nákvæmlega það sama sem menn eru  nú að hneykslast á  að forsætisráðherra og utanríkisráðherra hafi gert  að undanförnu.

Þingmennirnir sem  fóru í þetta  leiguflug  voru: Páll Pétursson, Friðjón Þórðarson,Steingrímur J. Sigfússon,Sigríður Dúna Kristmundsdóttir,Stefán Benediktsson og Eiður Guðnason. Einnig var með í för  Aðalheiður Birgisdóttir  ritari á skrifstofu Alþingis.

Það gerði ekki  nokkur maður  athugasemdir  við þetta  ferðalag "með einkaþotu" eins og það nú heitir.

En eins og  þar stendur:  Ekkert er nýtt undir sólinni.

Það  gerðir ekki nokkur maður

Ekki sannfærandi

Verð að játa að mér finnst  það ekki mjög  sannfærandi þegar félagar úr  Ferðaklúbbnum 4x4  koma á BMW  slyddujeppunum sínum  til að loka  aðgengi að olíubirgðastöðinni í Örfirisey. Þetta  verður ennþá hjákátlegra ef satt er sem  fjölmiðlar hafa  greint frá, að  félagar í 4x4 njóti  sérstakra afsláttarkjara hjá olíufélögunum við  kaup á eldsneyti. Það getur nú reyndar varla  verið satt. Aðrir  bílaeigendur eru þá  að  niðurgreiða  eldsneytið  til þeirra.

Þá held  ég að  trukkadólgarnir  sem nú  hrella   saklausa vegfarendur séu með framkomu sinni  löngu búnir að  uppræta þann samúðarsnefil ,sem þeir kunna  að hafa haft hjá einstaka manni. Langlundargeð lögreglunnar gagnvart þessum háskalegum  lögbrotum er lítt skiljanlegt.

 

Ekki hátt ris

Fjaðrafokið vegna  ferðar tveggja ráðherra og  föruneytis  til Búkarest er með ólíkindum.Einhver mundi segja að þetta  væri  til vitnis um málefnafátækt  stjórnarandstöðunnar. Auðvitað eru þess mýmörg   dæmi að ráðherrar og þingmenn  hafi  ferðast öðruvísi en með áætlunarflugi. Til  dæmis með  flugvél Landhelgisgæslu  eða  flugmálastjórnar meðan hún var til. Þetta er auðvitað gert þegar það er hagkvæmt.

Í maí 1983  fóru þingmenn til  Færeyja í leiguflugvél vegna þess að það var hagkvæmt og hentugt. tveimur árum síðar þegar Vestnorræna  ráðið var stofnað í Nuuk á  Grænlandi  fóru  þingmenn þangað með skrúfuþotu frá Helga Jónssyni vegna þess að það var hentugt og hagkvæmt.

Nú 23 árum síðar  fóru  ráðherrar og  föruneyti með þotu til Búkarest af þvb að það var hentugt og hagkvæmt. Þá ætla  þingmenn stjórnarandstöðu af göflum að ganga af hneykslan.

Það er ekki hátt á þessu risið.

Ferðamáti gagnrýndur