Molar um málfar XXXIX

  Lítill bæklingur kom inn um bréfalúguna í morgun með  dagblöðunum. Framan á honum stendur: „Afsláttur sem  telur". Þetta þykir  mér  ekki til  fyrirmyndar. Veit  að  vísu  að  reiðareksmenn um málfar   hafa sett  þessa  merkingu í orðabók, en merkja   jafnframt  sem  málnotkun  sem  ekki  sé  æskileg.  Hér  er  sögnin að  telja   látin  þýða   að eitthvað  skipti máli. Beint úr  ensku-  „something that  counts".

  Í  fyrirsögn á  dv.is  var  (01.04) talað um „Þekktustu böndin..." Af hverju   þarf að  nota  slettuna  „band" um  hljómsveit? Það  skil ég ekki.  Fyrir  allmörgum árum  töluðu  sumir  þulir RÚV  jafnan  um  „big band", þegar  var  verið að kynna   leik  fjölmennra jasshljómsveita. Nú  hefur  hið ágæta orð  stórsveit útrýmt  þessu  „big band" tali. Sem  betur fer.

Fréttamaður  Stöðvar tvö  tók  svo  til orða í  fréttum (01.04),  að  „margt væri ábótavant".  Það er  kannski ofsagt að mörgu hafi   verið ábótabót  um íslenskukunnáttu  fréttamannsins. Þetta hefði hann þó betur   orðað  á  annan veg.

Þingmenn sýna  Alþingi  ekki mikla  virðingu, þegar  þeir standa  bölvandi og ragnandi í ræðustóli eins og ítrekað hefur gerst að undanförnu. Þingmenn sýna   þinginu  heldur ekki  virðingu með  söng úr  ræðustóli. Það er fíflagangur.

Stöku sinnum  rekst  maður  á óborganlegar setningar á  Moggablogginu. Eins og  til  dæmis þessa (01.04): „Er þetta ekki meira fréttnæmt heldur en þessi steypa með Jesús Krist sem hélt ekki vatni." Skýr texti. Skýr hugsun.

Molar um málfdar XXXVIII

 Úr Vefmogga (31.03) ,,Síld hefur vaðið um Hafnarfjarðarhöfn undanfarnar vikur."  Bara  veður  um höfnina !  Hvíklík ósvífni.  Samkvæmt málvenju ætti  hér  að  segja  : Síld  veður  Í Hafnarfjarðarhöfn. En lesendur Vefmogga  geta andað  rólega því seinna í sömu frétt  segir:,,Ekki er talin sérstök hætta stafa  af síldinni þar sem  straumar inn og út úr höfninni  hreinsa  hana nokkuð vel" . Mikið  var það nú gott, -  hættuleg skepna  síldin .

 ,,Fyrr í þessari viku flaug Madonna, 50 ára, til Malaví ásamt þremur börnum hennar Lourdes, Rocco og David Banda."  Vefvísir 31.03. Madonna flaug  til Malavi ásamt   þremur  börnum hennar. Hennar hverrar ? Auðvitað  flaug  hún til  Malaví  ásamt þremur börnum sínum.

,,Aka þarf með sérstakri gát um Kambana á Hellisheiði en þar er nú fljúgandi hálka."  Vefmoggi 31.03. Um Kambana  á Hellisheiði ! Það var og. Líklega  hefur sá  sem  skrifaði þessa frétt aldrei  ekið austur yfir Fjall.

Einkennileg er sú árátta ýmissa þingmanna, að geta aldrei  sagt ég  nema  bæta  við  orðinu  sjálfur, - ég  sjálfur. Einkum  eru það  ungir þingmenn sem hafa  tilhneigingu  til  að tala  svona. Þessu  hef ég  tekið  eftir  bæði í bloggskrifum og  ræðum á  Alþingi.  Einu sinni  reyndu menn að forðast að  nota  fyrstu persónu fornafnið ég úr  ræðustóli  þingsins. Það er  liðin  tíð.