Molar um málfar og miðla 292

 Makalaust er, að Ólafur Ragnar Grímsson,  forseti Íslands,  skuli  koma fram í  sjónvarpi BBC og hóta umheiminum Kötlugosi (19.04.2010). Orð hans hafa  þegar valdið  okkur miklu tjóni.  Athyglissýkin á  Álftanesi virðist ekki eiga sér  nein takmörk. Ólafur Ragnar hefur  alla ævi verið gjörsamlega dómgreindarlaus á  sjálfan sig. Viðtalið er skelfilegt: http://news.bbc.co.uk/2/hi/programmes/newsnight/8631343.stm?ls

Sýna Hrafni stuðning með því að flagga fánum í Laugarnesinu, segir  visir.is í fyrirsögn (19.04.2010).  Flagga fánum !  Það var og.

Úr mbl.is (19.04.2010): Hrafn er með fiska í tjörnunum, en hann segir ljóst að hann drepist við þessar aðgerðir.  Ljótt er atarna. Er þetta nú ekki fulllangt gengið, enda þótt  Hrafn telji  sig ekki þurfa að hlíta sömu reglum og  aðrir borgarar? Það er hinsvegar rétt hjá borgaryfirvöldum að láta hann ekki komast upp með að leggja undir sig Laugarnesið.

Líklega smáatriði, að sumra mati, en  rétt skal vera rétt. Úr  mbl.is (18.04.2010): ...en allir stærstu flugvellir landsins, þ.m.t. Gardermoen í Osló, eru nú opnir.  Gardermoen flugvöllur er  um 50 kílómetra norður af Osló. Hann er ekki  í Osló. Þetta er því eins og að segja að Keflavíkurflugvöllur sé í Reykjavík.

 Í sjónvarpsauglýsingu  er talað um  góða afslætti. Orðið afsláttur er eintöluorð. Ekki til í  fleirtölu. Auglýsingastofur verða að hafa á að skipa fólk,i sem kann grundvallaratriði íslenskrar málfræði.

Í frétt  RÚV (18.04.2010)  var talað um eldingavirkni í gosmekkinum. Nægt hefði að tala um eldingar í gosmekkinum. Eldingavirkni er bara vitleysa.

 Það er vandaverk að gera neðanmálstexta  við myndir  í sjónvarpi.  Textar Veturliða Guðnasonar  við danska Glæpinn og textar Helgu Guðmundsdóttur  við frábæra þáttaröð  Davids Attenboroughs Lífið í Ríkissjónvarpinu eru  einstaklega vandaðir  og  vel  gerðir. Fleiri gera og vel í þessum efnum, þótt ekki sé það tíundað hér.

Eftirfarandi er af pressan.is (18.04.2010): Tvítug bresk stúlka hefur verið úrskurðuð í landlægt áfengisbann. Hún er því bönnuð á hverjum einasta bar á Bretlandseyjum, en þeir eru nokkuð margir. Hún er jafnframt bönnuð á öllum stöðum landsins þar sem áfengi er selt þannig að bannið tiltekur til allra skemmtistaða, hótela og vínbúða í landinu. Ástæðan fyrir þessu stranga banni er að stúlkan, Laura Hall, hegðar sér svo illa með áfengi.  Ekki verður annað sagt, en að þetta sé  skelfilegur og óboðlegur texti. Miðill,sem vill vera marktækur, birtir ekki svona bull.

Molar um málfar og miðla 291

 Af hverju þarf mbl.is (16.04.2010)  falla á  léttustu prófunum? Flug Icelandair til London, Kaupmannahafnar, Stokkhólms og Amsterdam í fyrramálið verður seinkað til klukkan 12 á hádegi ..Þetta á að vera. Flugi Icelandair... seinkar.

 Tvennt úr fréttum Stöðvar tvö (16.04.2010):  Búist er við að ösku taki að  falla... Búist er  að  öskufall verði, - eða  búist er við að aska  byrji að falla... Og:  Við hverju eruð þið að búast?  Við hverju búist þið?

Úr RÚV (16.04.2004): Ef  gosinu heldur áfram  svo lengi... Ef  gosið heldur áfram svo lengi..

Það var handagangur í öskunni,  sagði fréttamaður RÚV sjónvarps (16.04.2010) Allavega heyrði Molaskrifari ekki betur. Skiljanlegt mismæli, - ekki satt ?

Getur einhver skýrt þetta , mbl is (16.04.2010):  Kom í ljós að litlar breytingar hafa orðið á svæðinu, aðrar en þær að ásjóna gíganna í eldstöðinni er orðin afmynduð.  Hvað þýðir afmynduð í þessu samhengi?

 Bjarni Sigtryggsson gaukar oft  athugasemdum  að Molum. Hann sendi eftirfarandi (18.04.2010): "Haft var eftir nafnlausum embættismanni..."sagði í kvöldfréttum RUV áðan. Það hlýtur að vera óþægilegt fyrir ónafngreindan embættismann að vera nafnlaus í þokkabót. - Rétt er það, Bjarni. Ef til vill væri ástæða til að nafngreina þann,sem svona skrifar!

Molar mm málfar og miðla 290

Eftirfarandi snilldarsetning er  úr dv. is (15.04.2010): Talið er útilokað að hann sé ekki borgunarmaður fyrir skuldinni.Hér hefur blaðamaður  líklega ætlað að skrifa : Talið er útilokað, að hann sé borgunarmaður fyir skuldinni. Tvöfalda neitunin snýr merkingunni við.  Kannski er þetta rangt hjá Molaskrifara

 Í fréttum RÚV var (15.04.2010) sagt frá kosningabaráttu í   Bretland og talað um tvær aðrar kappræður.  Tala hefði átt um tvennar kappræður, þar sem um fleirtölu orð er að ræða.

 Í Skólahreysti í RÚV sjónvarpi var tekið svo til orða,að  tilteknum skóla hefði tekist að  skjóta ….skóla fyrir aftan sig. Molaskrifari þykist hafa heyrt talað um að einhverjum takist að skjóta  öðrum  aftur fyrir sig,  í merkingunni að fara fram fram úr eða hafa betur. 

Úr dv.is (15.04.2010):..einhverjir nemendur MS ákváðu að fylla anddyri Verzlunarskólans af hestaskít.  Hvað varð um hið ágæta orð hrossaskítur ?

Úr visir.is (15.04.2010):  Í tilkynningu frá lögreglustjóranum á Hvolsvelli kemur fram að verið sé að loka Mýrdalsjökli vegna öskufalls. Hann er svo sannarlega ekki valdalaus, lögreglustjórinn á Hvolsvelli !

Úr mbl.is. (15.04.2010): Vegagerðarmenn hafa flutt tæki að Markarfljóti og eru að undirbúa sig undir að gera við hringveginn..  Hér  hefði nægt að segja að  vegagerðar menn væru að búa sig undir að gera við hringveginn , — ekki undirbúa  sig undir.

Þetta var fremur þunnur þrettándi. Fer  kannski málfar batnandi  í fjölmiðlum?  Ekki sér Molaskrifari betur en Moggi sé  að  skána (16,04.2010) og landið sé að rísa hjá Mogga. Blaðið  gerir  hamförunum  fyrir austan vönduð og ítarleg skil frá mörgun sjónarhornum. Kannski er Eyjólfur að hressast.Svona var þetta í gamla daga, fjölmennt og gott  starfslið,sem sótti fram í einni fylkingu undir  sameiginlegri herstjóri, Matthíasar, Styrmis og Bjössa Jóh.

Molar um málfar og miðla 289

   Það er  virðingarvert og þakkarvert að Morgunblaðið skuli vikulega birta pistla um íslenskt mál undir heitinu Tungutak. Nýjasta  pistilinn (11.042010) skrifaði Ingibjörg B. Frímannsdóttir. Hann heitir: Meira um mælt mál. Allir fjölmiðlamenn, sem lesa fréttir í útvarpi eða sjónvarpi, ættu að lesa þennan pistil  og tileinka sér það sem þar er sagt.  Það gildir einnig um þá sem kynna dagssskrá  sjónvarpsins á skjánum.

 Þetta minnti mig  reyndar  á  þegar  Baldur Jónsson,prófessor, var að leiðbeina okkur fréttamönnum  sjónvarps, forðum daga.  Ég fékk það verkefni að lesa texta þar sem kom fyrir orðið, - Bandaríkjunum.  Ég las það eins og það var skrifað með skýrum  --unumframburði í lokin.  Nei,  sagði  Baldur, - þú  átt að bera þetta fram: Bandaríkjonum.  Og ég sem  hélt að ég væri að vanda mig ! Lét mér þetta að kenningu verða.

  Óþolandi finnst  Molaskrifara, þegar fréttalesarar taka eitt orð í setningu og  hátóna það, þannig að setningin verður öll óeðlileg. Þetta mátti heyra í  fréttum Stöðvar tvö (11.004.2010) Þar sem orðið Baldvinsskáli fékk þessa meðferð í frétt um ferðamenn á  Fimmvörðuhálsi.  Svo er algengt að heyra þetta í  kynningum á efni Kastljóss, þar sem einn kynnir  hátónar  orð, sem  honum (henni)  finnst rétt að leggja  sérstaka áherslu á og bjagar þannig alla setninguna. Þetta er hægt að lagfæra, ef áhugi er á.

 Enn fellur dv.is á prófinu í grundvallaratriðum málfræðinnar (12.04.2010): Hinn 61 árs gamli Roy Amor grunaði ekki að saklaus brandari ... Þetta á auðvitað að vera: Hinn 61 árs gamla Roy Amor grunaði ekki....

Molar um málfar og miðla 288

 Stórskemmtilegt var að hlusta á frásagnir  Eiríks  Kristóferssonar  skipherra í samtali  frá árinu 1966 við Jónas Jónasson (Rás  eitt, RÚV 11.04.2010). Eiríkur  talaði vandað mál, enda af þeirri kynslóð og  ekki langskólagenginn. Hann talaði um myrkhræðslu, ekki myrkfælni (bæði orðin að sjálfsögðu góð og gild) og  hann sagðist hafa  sett stefnuna þannig að þeir væru langlausir við Þormóðssker. Þetta orðalag hefur Molaskrifari ekki heyrt áður, en  það er vissulega skýrt og skiljanlegt. Útvarpsmenn eiga að gera sér tíðförulla í gullkistu RÚV. Þar er  sægur af samtölum Jónasar og fleiri góðra  útvarpsmanna, sem eiga erindi við samtímann, þótt komin séu til  ára sinna.

  Ummæli Sigmars Guðmundssonar um „fjölmiðlahórerí" hafa valdið fjaðrafoki hjá ráðamönnum RÚV. Sigmar sagði aðeins það sem margir hafa hugsað. Þetta voru þörf orð. Sannast nú hið  fornkveðna, að sannleikanum verður hver sárreiðastur. Ekki neitar Molaskrifari  því, að honum finnst Kastljósið stundum feta tæpan stíg í þessum efnum. Enginn fjölmiðill kemst þó með tærnar þar sem Útvarp Saga hefur hælana þegar að þessu kemur. Þar eru heilu þættirnir lagðir undir auglýsingar tiltekinna fyrirtækja. Þar eru  oft engin mörk milli dagskrárefnis og auglýsinga. Þetta heitir að misbjóða  hlustendum. Svo má nefna það í framhjáhlaupi, að  aðeins einn af þeim þremur, sem flestar auglýsingar lesa þar á bæ, hefur þægilega  útvarpsrödd.

 Í kynningu á daksrá  RÚV (11.04.2010) var talað um að þjóna hlutverki. Molaskrifari  er því vanur að talað sé um að  gegna hlutverki. Hinsvegar er talað um að eitthvað þjóni ekki neinum tilgangi. Það hvarflar stundum að Molaskrifara hvort það þjóni nokkrum tilgangi að gera athugasemdir við málfar í fjölmiðlum.

 Fáránlegt orðalag var í fréttum Ríkissjónvarpsins (11.04.2010) þegar sagt var frá fyrirhuguðum umræðum um skýrslu rannsóknarnefndar Alþingis á Alþingi. Þá var sagt, að formenn stjórnmálaflokkanna mundu flytja erindi um skýrsluna.  Á Alþingi flytja menn ræður, ekki erindi. Þetta eiga fréttamenn að vita ! Fréttamaður, sem þekkir ekki muninn á ræðu og erindi, ætti að læra móðurmálið betur.

Lánalínu kastað til Grikkja. Fín fyrirsögn í Mogga (12.04.2010)

  Látlaus viðhöfn var á flugvellinum í Varsjá, höfuðborg Póllands, þegar hermenn báru kistu forsetans út úr flugvélinni.(visir.is. 11.04.2010). Hér sýnist Molaskrifara, að fréttamaður hafi  ruglað saman orðunum athöfn og viðhöfn, sem auðvitað eru ólíkrar merkingar.

Molar um málfar og miðla 287

 Í tvígang hefur Hannes þó ekki tekið þátt á mótinu, sagði íþróttafréttamaður RÚV í kvöldfréttum Ríkissjónvarpsins (10.04.2010). Ekki í fyrsta skipi, sem íþróttafréttamenn taka  svo til orða. Menn  taka ekki þátt á móti  heldur í móti. Menn geta  hinsvegar  keppt á móti. Málfarsráðunautur Ríkisútvarpsiins  þarf að skýra þetta út fyrir íþróttafréttamönnum.

Fólk vill sjá íslensk bönd, segir í fyrirsögn á mbl.is (09.04.2010). Íslensk bönd eru ekki snæri. Þetta þýðir víst, að   fólk vilji hlusta á  íslenskar hljómsveitir.

Vitnað var DV í morgunþætti Rásar eitt (09.04.2010) en þar var sagt frá hinu dularfulla átöppunarveri,sem sagt er að rísa muni á Snæfellsnes. Svo var  til orða  tekið að heimasíða fyrirtækisins lægi niðri, í þeirri merkingu, að heimasíðan væri ekki aðgengileg, lokuð  eða óvirk. Hjá  fjölmiðlamönnum liggur margt niðri umferðarljós geta legið niðri, símkerfi geta  legið  niðri og sjálfsagt fleira.  Prýðilegt  væri,  ef umsjónarmaður  morgunþáttarins og  Aðalsteinn  Davíðsson fyrrum málfarsráðunautur RÚV  nefndu þessa ambögu í spjalli sínu um íslenskt mál  næsta föstudag.

Það þarf að huga vel að beygingum, þegar  skrifað er. Í fréttum Ríkissjónvarpsins (08.04.2010) var sagt: að eftirlit með fjármálastofnunum hafi verið  ábótavant.  Einhverju er ábótavant, ekki eitthvað. Þess vegna  átti að segja: ...að eftirliti með fjármálastofnunum hafi verið ábótavant.

 Svo er spurt í lokin: Hvaða tengsl sér  Fréttastofa ríkisins milli hvalreka á Suðurlandi og eldgoss á Fimmvörðuhálsi ?   Þetta var tengt saman með  býsna sérkennilegum hætti í kvöldfréttum Ríkissjónvarpsins (10.04.2010)

Molar um málfar og miðla 286

  Samfylkingin vill að bærinn kaupi ókláruð íbúðarhúsnæði í bænum og breyti þeim í kaupleiguíbúðir og félagslegar íbúðir.Úr dv.is (08.04.2010). Orðið húsnæði er  eintöluorð. Það er ekki til í fleirtölu. Í  fréttum Ríkissjónvarpsins (08.04.2010) var fjallað um auðlindagjald og sagt: Gjaldtakan gæti aukið tekjur ríkisins af erlendum stóriðjum.Orðið  stóriðja er eintöluorð, ekki til í fleirtölu.  Sjá Beygingarlýsingu íslensks nútímamáls á vef Stofnunar Árna Magnússonar í íslenskum fræðum.

Þar kemur jafnframt fram að meðfylgjandi loftmynd hafi verið tekin um páskahelgina af Arnóri Páli Valdimarssyni hjá Flugfélagi Vestmannaeyja. Þetta er úr mbl.is. (08.04.2010) . Var Arnór Páll beittur ofbeldi um sjálfa páskahelgina?  Molaskrifari  ætlar rétt að vona,  að  svo hafi ekki verið, heldur hafi Páll Arnór látið myndina af hendi átakalaust. Þetta finnst  Molaskrifara allsendis óþörf þolmyndarnotkun.- Meðfylgjandi loftmynd  tók Páll Arnór Valdimarsson hjá Flugfélagi Vestmannaeyja um páskahelgina.  

 Nýlega var svo til orða tekið  í fréttapistli í RÚV , að einhverjum hefði ekki enst erindið eða e-n hefði þrotið erindið. Þarna var  ruglað saman orðunum erindi og örendi.  Þegar einhvern þrýtur örendið, þá er átt við að hann  skorti  kraft eða úthald til að ljúka  einhverju (Mergur Málsins , Jón G,. Friðjónsson bls.1002). Þar kemur líka fram að örendi er hk. et. , útöndum, sá tími sem útöndun tekur. Sá sem er örendur ,  er lífvana eða  dauður. Erindi er allt annað.

  Ríkissjónvarpið hefur farið  langt fram úr  sjálfu sér í umfjölluninni um morðárás bandarískra hermanna í  Bagdad í júlí árið 2007. Það er eins og dómgreind hafi brenglast  hjá stjórnendum.  Í seinni féttum  sjónvarps (07.04.2010) sagði  fréttamaður:.. myndbandið sýnir skotárás úr herþotu Bandaríkjahers...    Eins myndirnar bera með sér var árásin gerð úr  þyrlu, ekki þotu.  

 Orðið nepotismi var notað í morgunfréttum  RÚV (08.04.2010), vina og kunningjastjórnmál, sagði fréttamaður. Orðið nepotismi er  alþjólegt orð, notað í mörgum tungumálum. Betri þýðing á orðinu hefði verið frændhygli; nepotismi er það þegar stjórnmálamenn hygla ættmennum sínum sérstaklega. Alþekkt  fyrirbæri í íslenskum  stjórnmálum um áratugaskeið.

Í yfirliti hádegisfrétta RÚV (08.04.2010) klukkan tólf var talað um valdahroka. Í hádegisfréttunum var hinsvegar  talað um valdhroka, sem Molaskrifara  finnst betra, þótt vera megi að báðar séu orðmyndirnar réttar.

Molar um málfar og miðla 285

 Molaskrifari er einkar íhaldssamur.  Hann hefur jafnan  hlustað á morgunfréttir RÚV  oftast bæði klukkan   sjö og átta. Hann hefur nú  uppgötvað að  morgunfréttir Bylgjunnar  eru oftast betri.  Betra er seint en aldrei, segir líklega einhver. Starfsmannafjöldi og  mikill kostnaður  við fréttastofu skiptir   ekki  sköpum í þessu   tilliti.

  Fréttir Bylgjunnar  klukkan tólf á hádegi eru líka ágætar.  RÚV er með stutt  fréttaágrip virka  daga klukkan tólf á hádegi. Hversvegna ekki  á laugardögum og sunnudögum ? Hversvegna eru ekki fréttir á sömu tímum um helgar og á  virkum dögum? Er ekki fólk á vakt?  Hið nýja hádegisútvarp, sem  tekur við af fréttaágripinu klukkan tólf hefur hvorki orðið  fugl né fiskur, - ekki ennþá allavega. RÚV heldur sig  enn við að  vera með  aðalfréttatíma  dagsins klukkan 12 20. Þetta var víst upphaflega hugsað þannig, meðan allir  fóru heim í hádegismat, að menn næðu fréttum og  gætu svo farið aftur  til vinnu klukkan 12 45. Nú fara menn ekki lengur heim í hádegismat en RÚV situr fast í þessar  tímasetningu.

Hvað fór ykkar á milli ? Svona spurði fréttamaður  RÚV sjónvarps  yfirlögregluþjóninn á Hvolsvelli í   viðtali  um leitina að fólki  sem  hafði yfirgefið bíl sinn á öræfum, með hörmulegum afleiðingum eins og síðar kom í ljós. Hvað fór  ykkur  í milli?,  hefði fréttamaður átt að segja. Fréttastofa  ríkisins gerir ekki alltaf miklar  kröfur um málfar fréttamanna.

Stofnanamáls sér víða stað. Í þættinum  Samfélagið í nærmynd, þar sem oft er áhugavert efni  (RÚV 31.03.2010), var rætt  við formann Landsbjargar um björgunarsveitir og eldgosið á Fimmvörðuhálsi. Í þættinum talaði umsjónarmaður um að margt hefði breyst  frá því síðast varð stórgos hér á landi. Hann sagði: „...almenningur er orðinn meiri... umfangsmeiri stærð." Hann átti  við að fólki hefði  fjölgað.

Tollvörðum á John Lennon-flugvellinum í Liverpool á Englandi grunaði að ekki væri allt með felldu ....Stóð í dv.is (06.04.2010). Tollvörðum grunaði.... Átti  að vera: Tollverði grunaði...

Enn koma  aðilar við sögu. Úr mbl.is (06.04.2010): Stillt var til friðar og að því loknu var aðili færður til yfirheyrslu.  Lögregla kom nefnilega auga á poka með ætluðu maríjúana inni í íbúðinni sem lagt var hald á. Molaskrifara  fellur  líka  illa að sjá talað um ætlað maríjúana.

Alþingismaður, sem reyndar er mikill bögubósi, talaði í útvarpsviðtali (RÚV  06.04.2010) um  að ... biðja afsökunar fyrir að hafa tekið  þátt...  Fólk biðst afsökunar á  einhverju, ekki  fyrir eitthvað.

Hvað annað fólst í aðkomu Íslendinga að myndbandinu  skelfilega frá Bagdad, en að  hlusta grannt á  það sem sagt var og og semja neðanmálstexta ?  Fjölmiðlar gera mikið úr  aðkomu RÚV og  tiltekins þingmanns. Það var svo sannarlega   þarft verk að  birta þetta, en  hvað annað var gert en að þýða textann ? Það hefur hvergi komið fram.

Molar um málfar og miðla 284

 Átakanlegt var að horfa á Kastljós að kveldi annars  páskadags,  er sýnt var myndband af því er bandarískir  hermenn  skjóta  óbreytta  borgara í Bagdad með hríðskotabyssu úr þyrlu. Þetta var skelfilegt og þyngra en tárum tekur að  horfa á saklausa borgara myrta  og heyra  svo hermennina hreykja sér af voðaverkunum.

  Það  er hinsvegar ámælisverð  dagskrárgerð hjá   Sjónvarpi ríkisins að sýna þetta efni klukkan hálf átta að kveldi  annars dags páska. Það eru óafsakanleg.  Það er líka einkennileg dagskrárgerð að  sýna íslenska  kvikmynd tuttugu mínútum eftir miðnætti og vinnudagur  að morgni hjá flestum! Svo er Kastljósið  endursýnt klukkan að ganga þrjú um nótt ! Enn er spurt  hvort endursýning Kastljóss sé tekjutengd?  Þetta er með öllu óskiljanlegt. Þeir sem  setja saman  dagskrá   Sjónvarpsins ættu að fást við eitthvað annað.

Molaskrifari stenst ekki mátið og birtir  hér málsgrein úr  frétt á mbl. is (05.04.2010) um starf björgunarsveita á Fimmvörðuhálsi. Lesendur  dæmi:

„Ég held við getum öll sagt okkur það sjálf að ásóknin verður aldrei í þessu magni til lengri tíma, þ.e. mörg þúsund manns að leggja leið sína á gossvæðið á hverjum degi,“ segir Svanur og bendir á að Landmannalaugar hafi mikið aðdráttarafl en þar er engin gæsla eða skipulagt vöktunarstarf. „Það svæði er jafn hættulegt hálendislega séð þó veður séu mest óútreiknanleg á Fimmvörðuhálsi þó víða væri leitað á landinu.“

   Oft hefur hér verið  vikið að því hvernig  hver  étur eftir öðrum í ljósvakamiðlunum. Nú er  það svo í  Sjónvarpi  ríkisins, að enginn segir lengur  klukkan átta eða klukkan tíu. Allt gerist á slaginu  átta eða slaginu tíu.  Ósköp  er þetta hjákátlegt.

Molar um málfar og miðla 283

 Stundum verður óskiljanlegur talnaruglingur í fréttum. Morgunblaðið segir (05.04.2010) frá kínversku kolaskipi er strandaði undan ströndum Ástralíu:  950 þúsund lestir af olíu eru um borð í skipinu, sem var að flytja kol til Kína þegar það strandaði.  Hvernig skyldi kolaflutningaskip, sem er með 950 þúsund lestir af olíu innanborðs líta út?  Auðvitað hafa þetta  verið  950 lestir. Skrifað án hugsunar. Sama henti  Ríkisútvarpið í annarri  skipafrétt (05.05.2010) á þessum sama sólarhring.  Sagt var frá suður kóresku olíuskipi,sem sómalskir sjóræningjar náðu á sitt vald. Í frétt sem  margendurtekin var frá miðnætti var alltaf sagt  að í  skipinu væru tvær milljónir tonna af olíu.  Þetta hefur samkvæmt  því  ekki  verið nein smáfleyta. Enda sagði um skipið  í fréttinni: Það er 333 metrar á lengd og 319.000 tonn að stærð. Það  var svo loks í sjö fréttum um morguninn að  menn voru farnir að hugsa sæmilega skýrt í Efstaleitinu.  Þá var réttilega sagt ,að í skipinu væru tvær milljónir tunna af olíu. Eitt  er tonn annað er tunna.

 Fréttamönnum RÚV er einstaklega lagið að spyrja viðmælendur sína spurninga,sem ógerlegt er að svara.  Vikið var að þessu í nýlegum  Molum  varðandi  viðtal við vísindamann um gosið á   Fimmvörðuhálsi. Í hádegisfréttum (04.04.2010) var fjallað um deilu unglækna á Landspítalanum. Þá spurði  fréttamaður, efnislega: Kalt mat, Hvenær leysist deilan?   Bjóst  fréttamaðurinn við að svarið yrði : Á miðvikudaginn klukkan kortér yfir  fjögur !

Á dv.is halda einföldustu atriði málfræðinnar áfram að vefjast fyrir mönnum. Úr dv. is (04.04.2010):  ...að þeir sem leggja leið sína um svæðið stafar hætta af sprungunni. Þarna á auðvitað að standa: .. að þeim sem leggja leið sína um svæðið stafar hætta af sprungunni.

Á leiðinni niður sáum við hraunsúluna í loft upp, hún var farin að spýja það hraustlega. Lýsing blaðamanns Morgunblaðsins á eldgosinu á Fimmvörðuhálsi (mbl.is 01.04.2010)

...flugóhapp varð á Fimmvörðuhálsi í síðustu viku án þess að slys urðu á fólki. (mbl.is. 02.04.2010)Kannski ættum við að láta Mogga njóta vafans og  segja,að þetta sé innsláttarvilla. 

Í kvöldfréttum RÚV (01.04.2010) var talað um að kappkosta um að sverta nafn sitt... Það er ekki venjulegt að tala um að kappkosta um eitthvað  heldur einungis að kappkosta.

 Nú orðið geta fréttamenn ekki vitnað í neinn  eða haft ummæli eftir  einhverjum öðru vísi en að segja: Samkvæmt þessum og samkvæmt  hinum.  Auðvitað er ekkert að því að segja:  Samkvæmt upplýsingum lögreglunnar. Ekki samkvæmt lögreglunni.  Samkvæmt  sýslumanninum, er ekki í lagi.  Að sögn  sýslumannsins...Eða Jón Jónsson sýslumaður segir... En það er með þetta eins og svo margt annað að étur hver  eftir öðrum.