Snargalin hugmynd félagsmálaráðherra

  Sú hugmynd félagsmálaráðherra að koma þeim til bjargar, sem  áttu ekki peninga, en  keyptu sér samt rándýra bíla á gengistryggðum lánum, er auðvitað snargalin.  Útreikningar Morgunblaðsins í dag eru einkar athyglisverðir, að ekki sé meira sagt. 

Hversvegna á að verðlauna þá sem keyptu sér Porsche, Land Cruisera, Range Rovera, Lexusa, ofurpallbíla og hvað þetta heitir nú allt saman  og tóku til þess  gengistryggð lán, allt  að 100% af bílverðinu og  bættu svo kannski  húsvagni við til að vera menn með mönnum og með almennilegan skuldahala. Þessir menn veðjuðu á,  að gengið mundi þróast þeim í hag. Þeir  töpuðu og þá  eiga þeir ekki að geta skellt  skuldinni á aðra. Allra  síst á félagsmálaráðherra að  láta almenning hlaupa  undir bagga með þeim. Ráðherra misskilur  hlutverk sitt. Þeir, sem eru í vandræðum vegna  kaupa á dýrum bílum  eiga bara að selja súperjeppana og fá sér eitthvað  ódýrara. Þetta er ekkert flókið.

 Kannski er þetta einhver  tegund af „nýfélagshyggju",sem gamall krati  ekki skilur. Allavega er þessi hugsun ekki í anda þeirrar jafnaðarstefnu, sem margir  hafa  eldri kynslóðinni  vilja í hávegum hafa. Sá sem þetta ritar á enga samleið  með  svona hugmyndum og hefur  enga samúð með þeim sem  keyptu sér ofurbíla sem þeir áttu  ekki fyrir. Þeir  menn verða bara að taka afleiðingum gjörða sinna.

 

Lán dýrra bíla afskrifuð mest

Molar um málfar og miðla 270

 

 Bjarni Sigtryggsson sendir Molum eftirfarandi undir  fyrirsögninni,

„Enn  um útbreidda vanþekkingu á  viðtengingar hætti.

Hvað er athugavert við þessa upphafsmálsgrein RÚV-fréttar í dag, fimmtudag?

"Hanna Birna Kristjánsdóttir, borgarstjóri Reykjavíkur, segir augljóst að færa þurfi fjármál Álftaness til betri vegar áður en farið verður að ræða sameiningu við annað sveitarfélag."

Jú, það sem er athugavert er að samkvæmt henni má ætla að ákveðið hafi verið að hefja sameiningarviðræður milli bæjarfélaganna. "...áður en farið verður..." bendir til þess að svo verði. Í viðtengingarhætti myndi standa: "...áður en farið yrði..."

Vanþekking á viðtengingarhætti er svo útbreidd meðal fjölmiðlafólks í dag að það veldur ruglandi fréttaskrifum. Viðtengingarháttur er notaður þegar eitthvað er skilyrt".
Takk fyrir sendinguna, Bjarni. Gott er að eiga góða að.

 Kynnir í Kastljósi RÚV talaði um (13.03.2010) að fara með sigur úr býtum. Hér  er blandað saman tveimur orðatiltækjum,   að bera úr býtum,   að hafa ávinning af einhverju og  að fara með sigur  af hólmi,  vinna eða sigra.

Orðalag í þróttafréttamanna er stundum kostulegt , ekki síst þeirra ,sem  flytja   fréttir  af ökukeppni sem kennd er við  formúlu. Formúlafréttamaður Stöðvar tvö  (13.03.2010) tók svo  til orða: ..og það eru margir  sem komið hafa fram úr skúmaskotum   til að fylgjast með  endurkomu kappans !!!Það var og.

 Í fréttatíma Stöðvar tvö (13.03.2010)var fjallað um fíkniefnasmygl. Þá sagði fréttamaður: ... fundu tollverðir fíkniefni á Jón Þóri. Hér skorti á nafn  mannsins  væri rétt beygt , ...fundu tollverðir fíkniefni á Jóni Þóri.

Molar um málfar og miðla 269

 Bjartsýnn var Molaskrifari á að  fréttamönnum tækist að tala rétt um  það hvenær kjörstaðir væru opnar og hvenær þeim  væri lokað í þjóðaratkvæðagreiðslunni  a laugardaginn var. Bjartsýnn þar til hann hann heyrði þrautreyndan fréttamann á Stöð tvö segja (06.03.2010): Kjörstöðum lokar klukkan tíu í kvöld.   Kjörstöðum lokar ekki,   kjörstöðum var lokað klukka  tíu um kvöldið.

Útsvarsstjarna sigrar prófkjör,segir í fyrirsögn á pressan.is  (06.032.10). Menn sigra ekki prófkjör, menn  sigra í prófkjöri. Menn sigra ekki keppni. Menn sigra í leik.  Sá sem þetta hefur  skrifað, er ekki slyngur í réttri notkun móðurmálsins.

Í fréttum Stöðvar tvö var nýlega   talað um að bera hitann og þungann í málinu. Þetta er ekki rétt notkun þessa orðtaks. Talað er um að einhver beri hitann og þungann af einhverju, þegar  sá sem um  er rætt, er sá sem mest mæðir á.

Jónas Kristjánsson, jonas.is ,  tvískrifar  orðið  þátttaka með  t- um í bloggi sínu (06.03.2010). Pennaglöp. Jónas veit auðvitað betur.

 Í RÚV (06.03.2010) ,líklega í Gettu betur, var talað um útgerðarbónda.  Betra or  væri , -  útvegsbóndi. Gamalt og  gott orð. Guðmundur Jónsson á Rafnkelsstöðum í Garði minn fyrsti vinnuveitandi, er ég var sjö ára, var útvegsbóndi. Hafði kýr í fjósi , báta á sjó og saltfisk á stakkstæði, eða reit.  

  Við erum með verulegan sneisafullan pakka í dag, sagði íþróttafréttamaður RÚV (06.03.2010) Þetta er á margan hátt óæskilegt orðalag.  „Pakkinn", sem hann talar um er líklega íþróttafréttatíminn. hann getur auðvitað verið sneisafullur, en aldrei   verulega sneisafulllur !

 Í spurningaþætti RÚV sjónvarps (06.03.2010) var  birt mynd af höggmynd Einars  Jónssonar og sagt að hún héti Útlagar. Molaskrifari hefur alltaf staðið í þeirri trú, að myndin héti Útlaginn. En rétt er það hjá RÚV að myndin heitir Útlagar. Eins gott  að vera ekki of fljótur á sér.

Þegar  brotsjóir  riðu yfir farþegaskip á  Miðjarðarhafi  og tveir farþegar biðu bana var sagt á í einhverjum miðlinum, að  manntjón hefði orðið í öldugangi ! Klaufalega orðað.

Molar um málfar og miðla 268

   Í fréttum beggja sjónvarpsstöðvanna (03.03.2010) var talað  um að skipa  bráðabirgðastjórn yfir bankanum (VBS).  Þetta samræmist ekki  máltilfinningu Molaskrifara.  Honum finnst  eðlilegra að  tala um bankanum hafi verið skipuð bráðabirgðastjórn, eða  að bráðabirgða  stjórn hafi verið skipuð,eða sett,  yfir  bankann. Nú má  vel vera að þetta sé  rangt hjá Molaskrifara. Fróðlegt  væri að  fá  viðbrögð lesenda við þessu.

 Maður sem  rætt var við í fréttum Stöðvar tvö (03.03.2010) sagði: ... þá erum  við með ekkert ráðuneyti, sem ... Eðlilegra  hefði verið: ...þá erum við ekki með neitt ráðuneyti,sem....

Erlend pör sem koma í tæknifrjóvgun til Íslands  fjölgað verulega.Þessi fyrirsögn var á visir.is (03.03.2010). Vonandi er sá sem þessa fyrirsögn samdi, ekki lesblindur, en þetta er með ólíkindum.

 Dagskrárlok er klukkan.... ,sagði dagskrárkynnir  Ríkissjónvarpsins (02.03.2010). Lok í merkingunni lyktir eða  endalok  er ekki til í eintölu. Þessvegna hefði átt að segja. Dagskrár lok eru klukkan...

  Í fréttatíma RÚV sjónvarps (02.03.2010)  var sagt um flugvirkja, að þeir hefðu fellt  kjarasamninginn með miklum yfirburðum.  Þetta orðalag ber  ekki vott um ríka máltilfinningu. Betra hefði verið að segjaað kjarasamingurinn hefði verið felldur með yfirgnæfandi meirihluta atkvæða.  Í sama fréttatíma var sagt að utanríkisráðuneytið hefði tekið efri hæð Iðnós  til leigu. Hér  hefði  verið að mati Molaskrifara  verið   eðlilegra að  tala um að taka  á leigu,  það sem auglýst hefur verið til leigu.

 Nútíðarnafnháttarsýkin er áleitin.- Bretar og Hollendingar eru ekki að gefa okkur nein svör , sagði  stjórnmálaforingi við fréttamenn (02.03.2010) og  átti  við að við fengjum ekki svör  frá  Bretum og Hollendingum eða  að Bretar og Hollendingar svöruðu okkur ekki.

  Þegar í    fréttum RÚV  sjónvarps  (02.03.2010) var talað um steypuklæddan stöpul, sá Molaskrifari ekki betur en verið væri að tala um steypta undirstöðu lyftumasturs í   skíðalyftu.  Eða hvað? Aldrei heyrt talað um steypuklædda stöpla. En steypuklæddur stöpull væri líklega  stöpull úr tré, , klæddur  þunnu lagi af steypu, eða forskalaður, en sú  aðferð heyrir líklega  sögunni til.

Sænskir Þjóðernissinnar styðja okkur !!!

  Það munar örugglega um stuðning  þjóðernissinnaflokks,sem hlaut 2.9% atkvæða í kosningunum 2006. Í stefnuskrá hans segir  meðal annars á heimasíðu flokksins: 

 Foreign policy

The Sweden Democrats believe that immigration, Islamization, supranationality(e.g., the European Union), cultural imperialism(mainly from the USA), and globalisationare threats to Swedish culture. The party wishes to pursue a looser co-operation between Sweden and other European states.

Fleira athyglisvert mætti nefna.

Krefjast þess að Íslandslán verði greidd út

Er nú ekki mælirinn fullur, -- og skekinn

 Til þess að geta  baðað sig enn einu sinni í ljósi fjölmiðla athyglinnar tilkynnti ábúandinn á Bessastöðum, , Ólafur Ragnar Grímsson forseti, hvenær hann mundi mæta á kjörstað. Þangað  fór hann til að greiða atkvæði um sína  eigin ákvörðun.

 Það markar hinsvegar  tímamót í sögu forsetaembættisins, að hann skyldi senda  forsætisráðherra og  fjármálaráðherra tóninn   eins og hann gerði í  dag. Það hefur enginn  forseti  áður gert. Maðurinn hefur aldrei kunnað sér  hóf hvorki í orðum né gjörðum.

Ólafur Ragnar búinn að kjósa

Molar um málfar og miðla 267

   Prýðileg umfjöllun um Færeyjar var í þeim langlífa og ágæta þætti  Steinunnar Harðardóttur Út um græna grundu á Rás eitt í Rúv  (06.03.2010). Þar var rætt við Sigrúnu  Valbergsdóttur,  sem þekkir  manna best til vel til í Færeyjum og er þar tíður gestur. Umsjónarmaður hefði þó mátt nota nýrri  tölur  en frá  2006 um íbúafjölda.Tölur frá  2009 eru  aðgengilegar á netinu.  Þessi Færeyjaumfjöllun var ágætur eftirréttur við færeyska  veislu hjá Jóhannesi í Fjörukránni kvöldið áður, en þar eru  Færeyjadagar um helgina.

  Ekki heyrði Molaskrifari betur en  áttafréttir RÚV (06.003.2010)  væru  um 80& orðrétt þær  sömu og fluttar  voru klukkan eitt eftir miðnætti aðfaranótt laugardagsins !

  Hverjum eiga hlustendur að trúa ? Í fréttatíma Stöðvar tvö (01.03.2010) var sagt að tekist hefði að ná sambandi  við 39  af þeim 40 Íslendingum ,sem  vitað væri um í Síle. Hálftíma síðar var sagt í  sjónvarpsfréttum RÚV, að ekki hefði tekist að ná  sambandi við  sex af þeim Íslendingum ,sem vitað væri um í Síle.  Önnur hvor  fréttin var röng, en hvor?

  Oft er Molaskrifari hissa á  dagskrárgerðinni hjá RÚV, nefskattssjónvarpinu. Mánudagskvöldið 1. mars voru endursýndir í beit tveir þættir  af    Aðþrengdum eiginkonum! Það er  svo sannarlega reisn yfir þessu.

 Lagersalan  við Bæjarlind í Kópavogi auglýsir á Bylgjunni (28.02.2010). Verslum föt fyrir minna. Ótrúleg verð.  Það er ekkert til sem, heitir að versla  föt. Við kaupum föt, en líklega verslar Lagersalan með föt.  Svo  á , að mati Molaskrifara , ekki að hafa orðið  verð í  fleirtölu. 

 Í fréttatíma RÚV  sjónvarps  (01.03.2010) var sagt  frá   starfsmönnum Landhelgisgæslunnar ,sem  eru innlyksa í Síle. Sagt var að þeir  væru heilir  heilsu. Ekki fellir  Molaskrifari sig við þetta orðalag. Eðlilegra hefði verið að segja  að mennirnir  væru  heilir á húfi. Oft er sagt um þá sem verið hafa veikir, að þeir séu orðnir  heilir  heilsu. Þarna  er  blæbrigðamunur  á.  Ágætt var  í fréttum Bylgjunnar, þegar sagt var að mennirnir væru  heilir á  húfi og við  góða heilsu. Prýðilega orðað.

Úr mbl. is (023.03.2010): .. er bíll,sem var að fara yfir umferðarljós fékk annan bíl inn inn í hliðina.  Ekki er þetta mikil  ritsnilld. Bjarni Sigtryggsson spyr með réttu: Skyldi bíllinn hafa verið í aðflugi eða flugtaki þegar honum var ekið yfir umferðarljósin? Ekki getur Molaskrifari svarað því.

Toppurinn á ruglinu

Ef þetta er ekki toppurinn á ruglinu, þá veit ég ekki hvað. Moggin hefur  nú tekið ábúandann á Bessastöðum í dýrlingatölu, - um sinn !

Ólafur Ragnar ætlar að kjósa

Deild í Framsóknarflokknum

 Nú vita allir að þetta svokallaða Indefence , er deild í Framsóknarflokknum, rétt eins og UMFÍ.

Furðar sig á ummælum ráðherra

Kúlulánakosning

  Ég fer á kjörstað til að kjósa gegn kúlulánum  forystumanna  gömlu stjórnarflokkanna.

Þjóðin láti ekki kúga sig