Molar um málfar XXVIII

  Alþingismönnum, sem öðrum, lætur misvel að tjá sig í rituðu máli. Eftirfarandi  las ég á þingmannsbloggi í gærkveldi: ,,Útvaldir gæðingar inni í bönkunum sem stýrt er af pólitísk skipuðum bankaráðum er ætlað það hlutverk að ákveða hverjir fái afskriftir á sínum lánum." Hér ætti í  fyrsta lagi að standa - Útvöldum gæðingum og  svo eru bankaráðin ekki ,,pólitísk skipuð", heldur pólitískt. Þetta er dæmi um það sem svo  oft  sést . þegar komið er  fram í miðja setningu man  skrifari ekki lengur hvaðan hann lagði af stað.  Það mætti raunar gera  fleiri athugasemdir við tilvitnaða setningu.

Benedikt spurði í athugasemd   við síðustu Mola hvað mér  fyndist um það er  stjórnmálamenn  sífellt  tala um  að ,,taka umræðu" um  eitthvert mál.  Eins og þér, Benedikt,  finnst mér þetta ótækt orðalag, - alveg jafnslæmt og þegar stjórnmálamenn segja að   framundan   séu  ,,stórar ákvarðanatökur". Veit eiginlega ekki hvort er verra.Sem ég setti punktinn aftan  við þessa setningu   sagði  þulur  RÚV í  dagskrárkynningu, að sagt yrði frá  fyrstu póstferðinni ,,alla leiðina frá Reykjavík til Akureyrar". Ef póstferð hefur verið farin frá Reykjavík til Akureyrar hefur hún að sjálfsögðu verið  farin alla leiðin, ekki hálfa leiðina !

Nefnifallssýki breiðist út. Í íþróttafréttum  RÚV í hádeginu las  íþróttafréttamaður:,,... en  tíminn nægði henni til að tryggja sér  sæti á heimsmeistaramótinu í sumar eins og  Ragnheiður  Ragnarsdóttir..."

Svo þakka ég enn og  aftur  jákvæð við brögð við þessum ábendingum og  hugleiðingum.

 

 

Afeitrun og Bessastaðir

  Enn einu sinni tengir athafnakonan Jónína Benediktsdóttir stólpípuverkefni sitt  við forsetafrúna og Bessastaði. Það heyrði égí endurteknum útvarpsþætti á Bylgjunni í morgun. Þetta gerði frú Jónína enda þótt  forsetaskrifstofa hafi í  yfirlýsingu  svarið fyrir  tengsl  forsetafrúarinnar við  stólpípurnar. Það ósmekklegasta við þáttinn í morgun var þó að heyra Jónínu Benediktsdóttur  herma  eftir  Dorrit Moussaieff og íslenskum framburði hennar. Það var   mikil ókurteisi.

Ríkisútvarpið varð sér  tvisvar til skammar með því  að auglýsa  þessar  skottulækningar. Nú hafa  Stöð tvö  og Bylgjan bæst í hópinn. Það var hálfóhugnanlegt að heyra  að  stólpípumeðferðinni  fylgdi að  fólk  væri látið hætta  að taka lyf  sem það  tæki samkvæmt læknisráði. - En ef  fólkið verður  veikt ? Þá er það bara sent inn í íslenska  heilbrigðiskerfið ,sem á að sjá um að lækna það.   Líka var skrítið að  heyra, að stólpípan væri lækning við sykursýki  tvö, sem kölluð  er, og ég man ekki hverju   fleiru. Hæpnar og nær örugglega ósannar  fullyrðingar. 

 Skipulagðar stólpípuferðir  hvort sem er til Póllands, Mývatns  eða  suður á Vallarheiði eru skottulækningar ætlaðar auðtrúa fólki. Það hefur réttilega verið  sagt að það eina sem léttist í þessum ferðum sé pyngja þátttakenda. Svo er flaggað þingmanni, súlustaðarstjóra og safnaðarforstjóra  til að blessa ósköpin.

Fyrri fyrirbæri sama  eðlis hafa verið  kennd  við  Kínalífselexír og  Snákaolíu, -  í besta falli gagnslaus  blekkingalyf,  sem  prangað var inn á  saklaust  fólk til að  hafa af því fé.

Enginn íslenskur læknir hefur  viljað leggja nafn sitt við þessar skottulækningar  Til þess hefur  þurft að  flytja inn fólk. Segir það ekki allt sem segja þarf ?

Hér er  verk að vinna fyrir  Umboðsmann neytenda,sem  sýnt  hefur ágætt frumkvæði í mörgum málum.

 

 

Molar um málfar XXVII

 Enn eitt  fyrirtækið  auglýsir nú undir heitinu „outlet". Fyrirtækið er til húsa á  Fiskislóð  Í Reykjavík og  selur  skó. Það  auglýsir: „ Tveir fyrir einn á öllum skóm á  tilboði". Ekki  get ég skilið það  öðruvísi en ef ég kaupi  einn skó þá fái ég tvo. -  Hvílík kjarakaup ! ,,Outlet" sýkin er bráðsmitandi því í dag auglýsa  tvö  fyrirtæki  undir þessu  hallærisnafni, þau eru  við sömu götuna, Faxafen. Líklega er þetta einhver  fenjapest.

„Ein stærsta kannabisræktun sögunnar", sagði í   þriggja dálka  fyrirsögn Mogga í  gær. Þarna hefði átt  að standa  mesta  en ekki „stærsta". Svo mætti líka  gefa því gaum að þetta  er   örugglega ekki mesta kannabisræktun sögunnar,  enda þótt það kunni að vera  mesta kannabisræktun sem  sögum fari af hér á landi. Það er annar handleggur. Svo segir Fréttablaðið okkur í dag: ,,Risavaxin Sony-auglýsing  tekin á Íslandi". Hér er átt við  sjónvarpsauglýsingu , geri ég ráð fyrir, en mér er hulin ráðgáta hvernig  hún getur verið   risavaxin ! Í fréttum RÚV sjónvarps í kvöld talað um ,,stóra mótmælagöngu í París", líklega hefur þá verið þar múgur og margmenni

Séð hef  ég í fréttum að nú standi til að  skipuleggja ferðir   til útlanda  til að  stunda fjárhættuspil, nánar tiltekið póker.  Er ekki einboðið að  fararstjórar í þeim ferðum verði útrásarvíkingarnir, sem   spilað hafa  fjárhættuspil með  peninga þjóðarinnar í útlöndum  undanfarin ár? Þeir hafa reyndar  allir  spilað rassinn úr  buxunum, ekki bara sínum , heldur líka okkar, en þannig  er nú fjárhættuspil.  Kannski mætti  fá  heiðursfararstjóra  af  Álftanesinu og  aðstoðarfararstjóra úr pókerliði Framsóknarflokksins !

Á Vefdv  stóð þessi setning í gær: „Árið 1989  eldaði hann mat ofan í George Bush þáverandi forseta Bandaríkjanna og  faðir  núverandi forseta". Þarna  ætti  auðvitað að standa   föður...   ekki faðir og   svo  er  Barack Obama  núverandi  forseti  Bandaríkjanna. Ekki er vitað til þess að George Bush  sé  faðir hans.  Það væri ekki vitlaust ef  ritstjórn DV  kannaði þegar  blaðamenn  eru  ráðnir  hvort þeir kunni að beygja  ýmis algengustu orð móðurmálsins  eins og  faðir,móðir, bróðir  og  systir. Stundum er  engu líkara en  ekki sé  lengur  fjallað um beygingar þessara orða í grunnskólanámi á Íslandi.

Á  Vefvísi   mátti lesa: „... þegar Þorsteinn fór erlendis". Það er  ekkert  til sem  heitir að  „fara erlendis". Við  förum til útlanda,  við  förum utan. Og við getum  dvalist langdvölum erlendis.  Seint lærist sumum að fara rétt með þetta.

Það er til marks um enskuvæðinguna að í Kastljósi í kvöld var áhorfendum, sem  vildu fræðast um Hjálparstofnun kirkjunnar bent á vefsíðuna ,,help.is". Þeim sem  vilja  fræðast um Akureyri   er í sjónvarpsauglýsingum bent á  vefinn´´visitakureyri.is". Líklega er ég  alveg  laus við að hafa húmor  því mér fannst dapurlegt hvernig Kastljós RÚV  byrjaði með  fíflagangi sem  hélt  síðan áfram með hallærisinnskotum út  þáttinn þar sem verið var að vekja  athygli á  fjársöfnun  í þágu góðs málstaðar.

Þessi pistill er skrifaður á  fartölvu sem ekki þýðist  beiðni mína  um  upphafsgæsalappir - alt0132. Kunningi benti mér  á einfalda lausn,  svo einfalda  að hún er  næstum brosleg. Slá bara inn tvær kommur! Það  þýðir að vísu  að ,,gæsalappirnar"  verða ekki alveg  eins við upphaf og enda tilvitnunar, en það verður að hafa það.

Molar um málfar XXVI

    Mjög þótti mér einkennilega til orða tekið í fréttum  Stöðvar tvö í kvöld. Þar var fyrst  sagt:„Gemlingarnir eru farnir að bera sín fyrstu lömb", og  seinna „ Gemlingurinn,sem bar lambið". Ef um tvílembinga hefði verið að ræða hefði líklega verið sagt: „Gemlingurinn sem bar lömbin". Mér var kennt  að  hér  ætti  að nota  þágufall um  afkvæmið og   segja: "Gemlingurinn ,sem bar lambinu".

    Hér var  fyrir nokkru (XIX)  vikið að því sem ég kalla kækorð. Það kalla ég ofnotuð orð  sem oft algjörlega að þarflausu   er  skotið inn í  texta.  Forvígismaður  verkalýðssamtaka sagði í gær um umdeildar arðgreiðslur  Granda:„..fer algerlega fyrir brjóstið okkur".  Sami maður  sagði :„... hreinlega siðlaust".  Af hverju ekki bara  siðlaust. „Löglegt en siðlaust" . Hefði þessi meitlaða setning batnað, ef Vilmundur Gylfason hefði sagt:„Algerlega löglegt en hreinlega siðlaust" . Öldungis ekki , enda  var Vilmundur enginn bögubósi, - öðru nær. 

    Í morgunútvarpi Rásar eitt í morgun var þátturinn Okkar  á milli. Þar ræddi umsjónarmaður við unga  konu   sem  búið hafði í Bandaríkjunum um árabil og  seinna  stundað nám í Danmörku.  Bæði spyrill og  viðmælandi  voru  einstaklega vel málin þannig að ég fór að leggja við  hlustir. Það  eina  var að ungan  konan  var  mjög  hrifin af orðinu "ofsalega" og ofnotaði það. Annars  var þetta  fyrsta flokks  útvarpsefni á  vönduðu máli.

       Ekki veit ég hver  fyrstur notaði orðatiltækið    „kortéri  fyrir kosningar". Gæti  hafa verið Jón Baldvin.  Það er ágætlega að orði komist. En þetta hættir að vera skemmtilegt þegar annarhver pólitíkus  er farinn að  tönnlast á því í tíma og ótíma.

    Á Pressunni las  ég  :„Tryggingar taka hækkunum". Af hverju ekki að segja : Tryggingar hækka. Þar var  líka  talað um  „ eigin áhættur" í  fleirtölu.  Kann því  illa.

Moggabloggari talaði um  „að bera hag flokks síns eitthvað  fyrir brjósti". Þarna er orðinu eitthvað   ofaukið.

     Að lokum:  Umsjónarmaður  auglýsinga á  sjónvarpsstöðinni ÍNN ætti að kenna   auglýsingaþul að segja  súkkulaðikaka, ekki "súkklakaka", eins og  dengt er yfir áheyrendur á hverju kvöldi. Á færeysku  heitir  reiðhjól nefnilega súkkla og mér  dettur alltaf  eitthvað  furðulegt í hug , þegar ég  heyri þennan   hallærislega framburð.

Molar um málfar XXV

   Þegar ég las um að nú ætti að taka  upp „kynjaða hagstjórn" á Íslandi, vissi ég eiginlega ekki hvaðan á mig  stóð veðrið. Það  skal  fúslega játað að ég skildi þetta ekki. Þegar lengra var lesið komst ég að  raun um að þessi  svokallaða kynjaða hagstjórn átti að fela  í sér að  stjórnvaldsaðgerðir fælu ekki í sér  mismunun karla og kvenna. Einmitt það. Og ég sem var svo vitlaus að halda að þetta  væri  stjórnarskrárbundið, en í 65.grein  stjórnarskrár lýðveldisiins segir:„Konur og karlar skulu njóta  jafns réttar í hvívetna". Ég hélt að þetta  dygði. Það gerir  það greinilega ekki að  mati  þeirra sem landinu stjórna.  Mér  finnst  samt  einhvernveginn að  með orðunum „kynjuð hagstjórn" sé  verið að   reyna að  pakka   jafnrétti  inn í  nýjar umbúðir, klæða það nýjum keisaraklæðum. Já ,  „ Ekki er kyn þótt  keraldið leki",  sögðu Bakkabræður ,ef ég man rétt. Maður verður  bara  að  vona að þessi  nýja hagstjórn verði góðkynjuð.

  Í Háskóla Íslands  ku vera  kennd  fræðigrein ,sem kölluð er „kynjafræði". Mér hefur  alltaf  fundist að þar væru á  ferðinni  gervivísindi og  að sú  virðulega fræðastofnun  Háskóli Íslands hafi    þarna lent á  glapstigum og sett niður sem alvöru háskóli.  Kannski er ég einn um þessa skoðun

   Sögnin að heyja  verður mörgum að fótakefli.  Á dv.is  stóð í gær :„....en hún háir nú lokabaráttuna við krabbamein."  Þarna ætti  eftir minni máltilfinningu að  standa , ... en hún heyr  nú  lokabaráttuna við krabbamein.

  Á Vefmogga i dag  er  sagt frá  hundi sem  eigandinn hefur  með sér  í heimsóknir  á  elliheimili. Talað er um hundinn sem  „fjórfættan". Nú er það  sjálfsagt ekki  rangt  til orða  tekið en hið venjulega hygg ég sé að   að   segja  ferfættur. Þetta er nú reyndar bara sparðatíningur ! Reyndar sýnist mér þetta hafa verið leiðrétt í kvöld og „fjórfættur" breytt í ferfættur.

Molar um málfar XXIV

 Vefvísir hefur tekið sérstöku ástfóstri við íslenska stúlku sem búsett  er í Búlgaríu og birtir  oft  pistla þar sem  orð hennar og  gjörðir eru til umfjöllunar. Í  dag er sagt frá  þátttöku hennar í einhverskonar  keppni og fylgja sex myndir af henni og unnustanum. Frásögnin er hrærigrautur af ensku og íslensku. Líklega er  stúlkan búin að  gleyma móðurmálinu  að hluta, því samkvæmt frásögn  blaðsins talar  hún um „charity night" og  segist vera „nominated í over all flokki ". Þetta er vondur grautur og Vefvísi ekki  til vegsauka.

 Meira um slettur. Á leiðinni  austur í Grímsnes í morgun  sá ég, að  við  þjóðveg 1  líklega skammt  austan  við borgarmörkin hafði verið komið  fyrir  bíl með auglýsingaskiltum. Auglýsingar  af þessu tagi munu vera  ólöglegar. Á auglýsingaskiltunum  stendur  „Diggaðu Dew",sem mér  skilst að eigi  að vera auglýsing  fyrir svaladrykk. Þetta ætti að  fjarlægja sem skjótast, - þó ekki  væri nema  vegna  málfarsins.  Slæmt væri ef við  fengjum skiltaskóg  meðfram  vegum landsins þar sem móðurmálinu  væri misþyrmt með þessum hætti.  Lögreglan ekur  áreiðanlega framhjá þessu lögbroti oft á  dag.

Talað var um beitingu  hryðjuverkalaga í Bretlandi gegn Íslandi  í fréttatímum beggja sjónvarpsstöðva í kvöld. Í fréttum Stöðvar  tvö  sagði þulur ranglega , „vegna beitingu hryðjuverkalaga". Hefði átt að  vera   vegna beitingar hryðjuverkalaga . Í  sjónvarpsfréttum  RÚV var réttilega talað um „að mótmæla beitingu hryðjuverkalaga".

Framburður nokkurra  erlendra staðaheita hefur unnið sér  hefð í íslensku. Þannig  er um heiti borgarinnar Hull þar sem íslenskir  togarar og   bátar   seldu afla  forðum tíð. Í íslensku  hefur  borgin  jafnan verið kölluð Húll. Nú  eru íþróttafréttamenn allt í einu farnir að  tala um Höll. Mér  finnst að þrátt fyrir allt  eigum  við að halda íslenska framburðinum og kalla borgina Húll. En auðvitað er það álitamál.

Meira um framburð. Mikið  væri  gaman ef forystumenn Frjálslyndaflokksins hættu að  tala um   "Frálsdaflokkinn". Jón Magnússon alþingismaður  bar nafn flokksins yfirleitt skýrt  fram , en hann hefur  nú flúið  flokkinn.

Byr með betlistaf

 Árið 2008  tapaði Sparisjóðurinn Byr 29 milljörðum króna.

 Árið 2007 greiddu ( stofnfjár)eigendur   Sparisjóðsins  Byrs sér  13.5 milljónir króna í arð úr svonefndum varasjóði eins og það var orðað í frétt.

 Árið 2006 varð 8 milljarða króna hagnaður  af rekstri Byrs.

Árð 2009  vilja stofnfjáreigendur Byrs  að ríkið, íslenskir  skattgreiðendur, rétti þeim 11  milljarða króna.

Allar þessar tölur  eru  úr fréttum í  dag.

Þetta er líklega það sem Vilmundur landlæknir (?)  kallaði kapítalisma  andskotans.

Skilur þetta einhver?  Ég  skil það ekki.  Kannski er  þetta  sú  „fjárhagslega heilsa" sem  þetta fyrirtæki bullar sífellt um í auglýsingum ?

Molar um málfar XXIII

   Í  Morgunblaðinu í dag  er greint frá  Árnamessu  þar sem  menn „Minntust 95 ára árstíðar Árna Helgasonar í Stykkishólmi".  Hér  er sitthvað málum blandið. Í  fyrsta lagi  er árstíð  hluti úr árinu, vetur,sumar vor  eða haust. Skrifari ætlaði sennilega að nota  orðið ártíð, en það er  rangt orð í þessu  tilviki. Ártíð  er  dánarafmæli  eða  sá  tími sem er liðinn frá láti manns.  Í Stykkishólmi var hinsvegar  verið að minnast þess að  Árni Helgason, póstmeistari, bindindisfrömuður , fréttaritari og gamanvísnahöfundur og  sitthvað  fleira  hefði orðið  95 ára, á laugardaginn var, ef  honum hefði  enst  aldur. Árni var fæddur 14.mars  1914. Hann lést 27. febrúar 2008. Það er því enn langt í  95. ártíð hans. 

   Það var ánægjulegt að hitta Árna  vin minn í Færeyjum síðsumars eða haustið 2007 er hann var þar á ferð með Lionsmönnum úr Hólminum. Hann var þá  eldhress. Við fórum í  bíltúr um bæinn og nágrenni . Heimkominn  sendi hann mér   elskulegt bréf og  geisladisk með  gamanvísum  sem   teknar voru upp  árið  2004 er hann  stóð á  níræðu. Það eru hreint engin ellimörk á þeirri upptöku.

En þetta með  rétta notkun  á orðinu ártíð hefur  verið  fjölmiðlamönnum erfitt svo lengi sem  ég man, en  aldrei hef  ég séð því ruglað  saman við árstíð  fyrr en nú. Ártíð var eitt  af  þeim orðum sem  Emil Björnsson  fyrsti fréttastjóri   Sjónvarpsins lagði   ríka áherslu á að  við notuðum rétt,sem þá  störfuðum á fréttastofunni. Sjónvarpið  sagði frá  Árnamessu í fréttum í kvöld  og féll ekki í ártíðargryfjuna.  Það hefði mátt nefna í fréttinni að Árni Helgason var fyrsti fréttaritari   Sjónvarpsins í Stykkishólmi og gegndi því  starfi  með miklum sóma. Stjórnendur frétta og fréttaauka í Sjónvarpi RÚV eru hinsvegar ekki mikið  fyrir að hampa nöfnum þeirra sem þar unnu  á upphafsárunum.

 Á Vefmogga í dag er sagt frá því að fulltrúar í velferðarráði Bolungarvíkur hafi  afsalað sér þóknun fyrir  störf í  ráðinu.Haft er  eftir  viðmælanda :„Þetta er  hugsjón hjá fólki að vera í svona nefndum en ekki gróðrarvon". Hér  er ruglað  saman orðunum gróður  þar sem eignarfallið er gróðrar og  gróði þar sem eignarfallið er  gróða. Þarna  á  auðvitað að standa:   ekki gróðavon.

  Enn um málfar í íþróttafréttum og  er þar af nægu að taka. Mjög algengt  er að heyra  talað um „að taka þátt á mótinu". Mér finnst eðlilegra að tala um að taka þátt í móti, eins og  við  tölum um að taka  þátt í mótmælum, en hinsvegar er ekkert að því að tala um  að keppa á móti,  á sundmóti  eða  frjálsíþróttamóti.

 

Molar um málfar XXII

   Málblómin  spretta vel á Vefvísi, sem er mikil  amböguuppspretta. Þar mátti lesa eftirfarandi  fyrirsögn í gær:„Opnaði verslun með notuðum barnafötum". Aldrei  hef ég heyrt að  tekist hafi að opna eitt eða neitt með  notuðum barnafötum. Algengast er líklega  að nota lykla  þegar verslanir eru opnaðar. En   þeim sem samdi þessa  fyrirsögn  er fyrirmunað að kunna að nota  sögnina   að opna. Í fréttinni segir: „.....hugmynd  að  versluninni,sem opnaði  að Bæjarhrauni í Hafnarfirði í dag."  Hvað opnaði þessi  verslun ?  Það er  látið ósagt. Enda opnaði þessi verslun ekki neitt. Hún var opnuð.

    Meira af Vefvísi: „..segir  í  pistli á heimasíðu sinni að kjörsókn hafi verið afleidd". Greinilegt er að annaðhvort þekkir  skrifari  ekki orðið  afleit  eða  er ekki læs, - nema hvorttveggja sé. Á umræddri  heimasíðu stendur  nefnilega  skýrt og  skilmerkilega að kjörsókn hafi verið  afleit.

    Málblómin dafna víðar. Stundum finnst mér  eins  og  viðvaningar  fá mjög að spreyta  sig á netmiðlunum um helgar. Það á ekki  síst við um Vefmogga. Þar er í dag  frétt um sprengingu í kolanámu í Bosníu. Sagt er að  sprengingin hafi orðið í „kolanámi". Eðlilegra  væri að tala um kolanámu. Vel má þetta vera innsláttarvilla. Að vísu er  orðið  nám  gamalt heiti yfir námu,  sbr. hinn  kunna reyfara  eftir Rider Haggard „Námar Salómons konungs". Í þessari frétt  segir líka, að um sé að  ræða  „metangassprengju". Hér ruglar  skrifari saman orðunum sprengju og  sprengingu. Sprenging verður þegar  sprengja springur.

 Í íþróttafréttum    sjónvarps í kvöld bættist enn ein ambagan  við í anda  þess  að sigra  keppni ,sigra kosningar  eða  sigra leik. Í þetta  sinn var það að sigra  rall. Það  virðist erfitt að uppræta þennnan ósóma.

 Talsvert var um fréttir  af blaki í sjónvarpsfréttum kvöldsins. Til fróðleiks má  geta þess að á  færeysku heitir blak „flogbóltur". Það orð  bjó   hinn orðhagi nýyrðasmiður  Færeyinga Jóhan Hendrik  W. Poulsen  til árið  1975, þegar   færeyskt  lið var að  fara til Íslands   að keppa í  þessari  íþrótt.  Hann hafði til  hliðsjónar að  fyrri  hluti  enska  heitisins   á blaki , volleyball, er  skylt latnesku  sögninni volare  , -  að  fljúga.  Þetta  kemur   fram í bókinni Mál í Mæti, greinasafni sem  gefið var út á  sjötugsafmæli Jóhans Hendriks  árið 2004.

Molar um málfar XXI

     Í dagskrárkynningu í RÚV  var  sagt að í tilteknum þætti yrði fjallað um  Hays kóðann. Orðabókin mín  segir, að kóði  eða kóti  sé  forritunartexti ritaður á  forritunarmáli. Það sem á  ensku  heitir Hays Code eru   ekki forritunarreglur heldur  umdeildar  siðareglur,  sem  voru í  gildi í bandaríska kvikmyndaiðnaðinum á árunum 1930 til 1968.  Á ensku er orðið  code  notað um lagabálka,  t.d.  penal code , hegningarlög,  eða um   siðareglur, code of  conduct.  Það er   röng málnotkun að  kalla   þessar gömlu bandarísku siðareglur  kóða. Kóði er allt  annað.

    Sparisjóðurinn  BYR  hefur lengi  angrað   ýmsa með    auglýsingabulli um  „fjárhagslega heilsu", það er  að  segja  góða  fjárhagsstöðu. Á íslensku er ekkert  til sem heitir   að vera  við  góða  „fjárhagslega heilsu".   Þetta er  aulaþýðing á  ensku  hugtaki. Nú hefur  komið í ljós  að  sparisjóðurinn BYR  tapaði   29 milljörðum í   fyrra og  biður  íslenska  skattgreiðendur, íslenska  ríkið um aðstoð.  Svo  notuð séu þeirra  eigin orð þá er    sparisjóðurinn  BYR  afskaplega  heilsulaus  um þessar mundir svona  „fjárhagslega  séð" eins og þeir  mundu líklega  sjálfir  segja. Hvað  skyldu  þeir  annars hafa sóað mörgum milljónum eða  milljónatugum í þessar arfavitlausu auglýsingar ?

Sömu ambögurnar ganga sífellt  aftur. Maður hnýtur um  þær hvað eftir annað. Á dv.is  í dag eru tvær  gamalkunnar afturgöngur.  Sú fyrri er  :  „..Vaka sigraði  kosningar  til ráðsins." Það  sigrar enginn kosningar. Einstaklingar  eða  samtök  sigra í kosningum  eða  vinna  kosningar.  Um þetta var  fjallað í Molum um málfar XV.  Hin ambagan er: „...rétt eftir að kjörstöðum lokar".  Formaður kjörstjórnar Sjálfstæðisflokksins í Reykjavík  endurtók  svo þessa  ambögu  í  fréttum RÚV  sjónvarps í kvöld. Þetta er    rugl.  Kjörstöðum lokar ekki    frekar en  verslunum lokar, þegar enginn er gerandinn.  Rétt væri að   segja: ... rétt eftir lokun kjörstaða.Einnig mætti  segja: Rétt  eftir  að kjörstöðum var lokað,  eða  rétt eftir  að  kosningum lauk.  Fréttamanni RÚV  tókst hinsvegar að hafa  þetta   rétt í fréttum klukkan 2200. Prik fyrir það.

Fréttamaður  RÚV  sjónvarps  talaði í kvöld í frétt um prófkjör um tilfæringar á  listum, en átti  við  tilfærslur. Tilfærsla er  að  færa  eitthvað til, eða þegar eitthvað  færist   til. Tilfæringar eru hinsvegar  útbúnaður,  tæki  eða  umbúnaður. Í eintölunni    þýðir  orðið tilfæring , - aðflutningur, eitthvað sem  kemur  að notum eða  sem hjálpar. Samkvæmt orðabókinni getur orðið einnig þýtt  bardús  eða  staut.