Molar um málfar og miðla 542

   Þar féllu nokkur él, sagði  veðurfræðingur í  veðurfréttum Ríkissjónvarps.  Molaskrifari man ekki til þess að hafa heyrt þetta orðalag, en það segir  svo sem lítið. Og auðvitað er ekkert  rangt við þetta orðalag. Þarna  hefði   einnig   mátt tala um éljagang. Nokkuð algengt er líka, að sagt sé: Það kastaði éljum, gekk á með éljum. 

   Molaskrifari telur rétt að vekja sérstaka athygli á  grein Karls  Kristjánssonar starfsmannastjóra Alþingis í Fréttablaðinu í dag (28.02.2011) þar sem hann fjallar um  einstæð vinnubrögð Ríkisútvarpsins og misnotkun á  stofnuninni  í þágu níumenninganna svokölluðu: http://www.visir.is/einhlida-og-villandi-umfjollum-ruv/article/2011702289975

     Sagnfræðingarnir, sem fram komu í Silfri Egils (27.02.2011) afgreiddu  Rómarrugl Ólafs Ragnars Grímssonar snyrtilega og kurteislega. Leitt er  hinsvegar að forsetinn skuli vera búinn að  eyðileggja orðatiltækið   söguleg tímamót.  Allt sem Ólafur Ragnar  tekur sér fyrir hendur markar orðið  söguleg tímamót. Því er þetta orðið merkingarlaust með öllu.

  Glæpadómstóll Sameinuðu þjóðanna verður falið að  rannsaka ...las fréttaþulur Ríkisútvarps hikstalaust í hádegisfréttum (27.02.2011). Hér  hefði  tvímælalaust átt að  segja: Glæpadómstól,  eða  glæpadómstóli  Sameinuðu  þjóðanna verður falið....

 Í þættinum Landinn  (27.02.2011) í Ríkissjónvarpinu  voru sýndir  tveir sólstólar, sem komið hafði verið   fyrir á  víðavangi. Fréttamaður  tók  svo til orða,  að einhver  hefði séð sér  leik á borði  og komið  stólunum  þarna  fyrir.  Molaskrifari áttar sig ekki hvaða erindi þetta  orðatiltæki átti í  þessu samhengi.  Að  sjá sér leik á borði er að   nýta sér gott  tækifæri til e-s  eða  grípa tækifærið til að koma  einhverju fram í eiginhagsmunaskyni,   svo  vitnað sé í Merg málsins   eftir    dr. Jón G.  Friðjónsson.  Þessi notkun  orðatiltækisins  var  út í hött. 

Komi maður of seint, biðst maður afsökunar. Það er almenn kurteisi.  Ríkissjónvarpið biðst ekki afsökunar þegar   sýningu þáttar (Lífverðirnir 27.02.2011) seinkar um  sjö  til átta mínútur vegna þess að útsendingarstjórar kunna ekki nægilega vel á klukku. Það er ókurteisi.

  Sjónvarpið sýndi þátt, sem hét: Hvert  stefnir Ísland?  Hvernig væri að gera þátt, sem héti: Hvert stefnir Ríkisútvarpið?

Molar um málfar og miðla 541

 Molaskrifari hélt að  búið  væri  að gera orðalagið  að sigra kosningar útlægt  úr  fréttastofu Ríkisútvarpsins. Svo er ekki. Það lifði góðu lífi í  morgunútvarpi  Rásar eitt (25.02.2011)

Hvað segir málfarsráðunautur Ríkisútvarpsins um orðalagið: Höfum það gaman saman?  Þetta orðalag glymur aftur og aftur í eyrum okkar  í  auglýsingum Ríkisútvarpsins um eigin dagskrá. Það er því heimasmíðað. Fróðlegt væri að heyra álit sérfræðings.

 Í íþróttafréttum mbl.is (25.02.2011) var talað um að tiltekinn íþróttamaður  vildi komast á lán.Líklega var átt  við að hann vildi leika sem lánsmaður með öðru félagi. Meira úr mbl. is  sama dag: Ingvar er aðeins annar Íslendingurinn sem keppir í háskólafimleikunum í Bandaríkjunum... Verið er að reyna að segja okkur að aðeins tveir  Íslendingar hafi náð þeim árangri að keppa í  fimleikum með háskólaliði í Bandaríkjunum. 

Valsmenn sveifluðu svo leiknum sér í vil, sagði íþróttafréttamaður Stöðvar tvö (26.02.2011). Ekki er þetta vel orðað.

 Molaskrifari  hefur efasemdir um  svohljóðandi fyrirsögn á fréttavef Ríkisútvarpsins (26.02.2011): Hveitiuppskera í uppnámi. Molaskrifari hélt að   uppnám væri  ringulreið eða  eitthvað í þá áttina. Þarna er verið að tala um yfirvofandi  uppskerubrest á hveiti.

  Á bókamarkaði í Perlunni kennir margra grasa, góðra grasa. Molaskrifara sýnist þó, að  þar sé ívið  meira  af  dýrum  bókum en var í fyrra. Samt er hægt að gera  kjarakaup. Molaskrifari fór út með fjórar bækur fyrir  2800 krónur. Góðar bækur, að sjálfsögðu. Rakst þar á litla  bók sem heitir Betrun, undirtitillinn er eitthvað í þessa veru: Hvernig  bæta má stjórnun og leiðrétta mistök. Bókin kostaði aðeins  490 krónur. Höfundur er fyrrverandi forstjóri Sjóvátryggingafélags Íslands. Molaskrifari féll ekki fyrir  freistingunni. Kannski verður þessi bók eftirsótt af söfnurum, er fram líða stundir. Hver veit?  Bókina kynnti  Vefverslun Forlagsins á sínum tíma með þessum orðum :  Í bókinni rekur Þór hvernig hann tókst á við verkefnin sem biðu hans þegar hann settist í forstjórastól Sjóvár; rekstur, samskipti, starfsanda, ímynd – en ekki síður mistökin og lærdómana. Þetta er gagnleg lesning fyrir stjórnendur og leiðtoga og lífleg hvatning til að ná enn betri árangri. Í bókinni  segir sennilega ekki frá örlögum bótasjóðs  félagsins og  11-12 milljarða framlagi skattborgaranna til að bæta  fyrir mistök eigenda og stjórnenda félagsins. 

 

Eins og karlinn sagði ....

  Það er eins og karlinn á Húsavík sagði: Það eru ekki alltaf þeir, sem þekkja mann mest,  sem treysta manni best.

50% vilja að Ólafur Ragnar bjóði sig fram aftur

Molar um málfar og miðla 540

 Kafarar skoðuðu undir Goðafoss í dag var sagt í  sexfréttum Ríkisútvarpsins (23.02.2011) Sama orðalag var notað í  fréttum Ríkissjónvarps. Þetta  er hálfklaufalegt orðalag. Betra  hefði verið að  segja, að kafarar hefðu skoðað botn Goðafoss í dag.  Í yfirliti um efni sama  fréttatíma var talað um að berja(uppreisnina í Líbíu) á bak aftur. Þetta er  rangt. Talað er um að brjóta á bak  aftur  í merkingunni að bæla niður. Svo  er  líka  hægt að tala um að berja eitthvað niður.  Fleira  var athugavert  við þessa  frétt eins og  til dæmis að tala um...  að höfuðborginni hafi verið lokað af.

Formaður Sjálfstæðisflokksins,sem Morgunblaðið kallaði nýlega vikapilt  Streingríms  J. á  ekki upp á pallborðið í Hádegismóum. Mbl.is  birt  frétt um  Icesave (24.02.2011) sem að meginefni var viðtal við Árna Pál Árnason. Í niðurlagi fréttarinnar var svo ein lína: Bjarni Benediktsson, formaður Sjálfstæðisflokksins tekur í sama streng.  Öðruvísi mér áður brá.  

  Það var mikil uppsláttarfrétt á Stöð tvö (22.02.2011) að  Atlanta  flugfélagið  væri að flytja hergögn og  líklega vopn  fyrir Bandaríkjaher til Afghanistan.  Kvöldið eftir varð  fréttastofa  Stöðvar  tvö að éta þetta allt ofan í sig. Fréttin reyndist tilhæfulaus.    Þegar fréttastofan var að bera þetta til baka var talað um innihald flugvélanna. Þar hefði farið betur á því að tala um farm  flugvélanna.

  Í  fréttum Ríkissjónvarps (23.02.2011)  var tekið svo til orða:  Helmingur þeirra hugmynda...hafa átt  viðkomu... Betra hefði verið: Helmingur þeirra hugmynda .... hefur haft viðkomu   eða   er kominn frá ...Svo var sagt:  Hugmyndahús háskólanna verður hinsvegar lokað næsta mánudag. Betra  hefði verið: Hugmyndahúsi háskólanna verður hinsvegar lokað á mánudaginn (kemur).

 Frétt Stöðvar tvö (23.02.2011) um uppsagnir karla og kvenna á heilbrigðisstofnunum víðvegar um landið var botnlaus. Okkur var sagt, að  15 körlum og  92 konum hefði verið sagt upp. Okkur var hinsvegar ekki sagt hve margir  karlar og hve margar konur  störfuðu við þessar stofnanir áður en uppsagnir komu til framkvæmda..  Þess  vegna vissum við ekkert um hvort hlutfallslega fleiri konum en körlum hefði verið sagt upp.  Undarlega slök vinnubrögð.

   Merkilegt hvað Ríkissjónvarpinu gengur illa að láta seinni fréttir  hefjast á réttum tíma (23.02.2011) þótt ekkert hafi borið út af í dagskránni.  Það þarf að fá fólk   sem kann á klukku til að stjórna  útsendingunni.

 Fínt  viðtal í Kiljunni við Unu Margréti Jónsdóttur, sem  unnið   hefur merkilegt menningarstarf   með söfnun   og  rannsókn söngvaleikja.  Molaskrifari tekur undir  allt  sem  þau  Páll Baldvin og Kolbrún sögðu um  Fátækt  fólk Tryggva Emilssonar.  Seilist fljótlega upp í hillu  til að endurlesa þá góðu bók.

   Mjög  góður pistill Kolbrúnar Bergþórsdóttur í Morgunblaðinu (24.02.2011).  Hún  veltir því fyrir sér hvort  fyrrum andstæðinga Ólafs Ragnars snúist til varanlegs fylgis við hann. Það eru kannski  svona innanbúðarhugleiðingar. Kolbrún greinir ástandið rétt: Á Bessastöðum situr einstaklingur sem  trúir fyrst og fremst á  sjálfan sig og  eigið ágæti og sér fátt annað.

Molar um málfar og miðla 539

   Í fréttum Stöðvar tvö var talað um, að tannlæknar  væru krafnir um. Hér hefði átt að segja, að tannlæknar væru krafðir um.  Eða þess  væri krafist, að tannlæknar....

  Beygingakerfið er á undanhaldi. Enn eitt  dæmið um  það var í mbl.is (23.02.2011): Ráðuneytið hefur náð samkomulagi við forsvarsmenn skólans um að nemendur sem hófu nám sl. haust verði gert kleift að ljúka námi sínu við skólann á vorönn 2012.  Hér átti auðvitað að segja:  ... nemendum ... verði gert  kleift...

 Dæmi um óþarfa þolmynd úr mbl.is (23.02.2011): Jón segir að fólkið sem komst inn í Túnis hafi verið rænt af mönnum í lögreglubúningum... Um  þetta þarf svo sem ekki að hafa mörg orð.

    Í Ríkissjónvarpinu var enn einu sinni sagt (22.02.2011): ... frá því  forseti synjaði  lögunum.  Molaskrifari er ekki sáttur  við þetta orðalag. Hefði fundist  betra að segja: .. frá því  forseti hafnaði því að  undirrita lögin.  Kannski er  Molaskrifari einn um þá  skoðun að ekki sé  rétt að nota sögnina að synja með þeim hætti, sem Ríkissjónvarpið gerði.

  Dagskrá íþróttahúss þjóðarinnar í Efstaleiti höfðaði ekki til Molaskrifara á þriðjudagskvöldið (22.02.2011). Hann horfði því á Lárus Blöndal hæstaréttarlögmann, fulltrúa  stjórnarandstöðunnar í Icesave  saminganefndinni  útskýra málið í  samtali við Ingva Hrafn í ÍNN  stöðinni. Lárusi tókst einstaklega vel að  útskýra þetta  flókna  mál og þær áhættur sem  felast í  hvorum  þeirra tveggja kosta sem   blasa við. Annarsvegar að  samþykkja þann samning sem  fyrir liggur eða  láta málið fara  fyrir dómstóla. Eftir útlistun Lárusar  er ekki hægt að velkjast í vafa um það hvor kosturinn  sé  betri. En  auðvitað eru  þeir til sem munu halda áfram að  berja hausnum við steininn og  kyrja: Við borgum ekki. Við borgum ekki , undir stjórn Morgunblaðsins og  fyrrum forkólfa Sjálfstæðisflokksins. 

 Ragnar Hall, hæstaréttarlögmaður  gerði Icesave málinu  einnig  mjög  góð skil í Kastljósi Ríkissjónvarpsins (22.02.2011). Hann talaði mannamál, þannig að allir gátu  skilið. Takk fyrir það. 

 Það er til marks um vinnubrögð Morgunblaðsins í Icesave  málinu að í dag (24.02.2011) birtir  blaðið leiðréttingu frá  forstjóra  ESA, Eftirlitsstofnunar EFTA. Hann ber af sér sakir. Leiðarahöfundur Morgunblaðsins  gerði honum upp skoðanir. Laug upp á hann , heitir það á íslensku.  Ný vinnubrögð  á Mogga. Ekki hvarflar að blaðinu að biðja  viðkomandi einstakling afsökunar. Morgunblaðinu er ekkert heilagt í  blindri baráttu gegn  Icesave. Allra síst sannleikurinn.

Molar um málfar og miðla 538

  Ólafur Ragnar mun eiga fund með páfa á þriðjudag og fær hann einkaáheyrn en slík þykir afar sjaldgæft,(mbl.is 22.02.2011) Það er auðvitað eins og hvert annað bull ,að  það sé sjaldgæft að þjóðhöfðingjar fái einkaheyrn  hjá páfa. Blaðamenn láta forsetaskrifstofuna plata sig. Það þætti sæta  tíðindum, ef þjóðhöfðingi ,sem óskar eftir áheyrn fengi ekki áheyrn. Morgunblaðið er gengið í lið með  forsetaskrifstofunni  að reyna að gera Ólaf Ragnar  að merkilegri persónu en hann er.  Sjá  annars  til gamans skýringu orðatiltækisins að tala við páfann á bls. 656 í bókinni Mergur  málsins  eftir   dr. Jón G. Friðjónsson

Á  fréttavef Ríkisútvarpsins (21.02.2011)  var skrifað um hungursneið.     Hér átti að skrifa  hungursneyð, neyð   af nauð.

  Ærið oft virðist  fréttamönnum  verða fótaskortur, þegar fjallað  er um strand Goðafoss  utan  við Frederiksstad. Í fréttum Stöðvar  tvö (21.02.2011) var  verið að segja  frá því hvenær ætti að freista þess að  draga skipið á  flot. Þá var sagt: ... en sjávarföll  verða einkar hentug þá.  Molaskrifara finnst ótækt að tala um að sjávarföll verði hentug. Betra  væri að segja til dæmis,   en þá stendur  vel á  sjó.  Eða, en þá  verður  hásjávað.

 Meira um  Goðafossfréttir og nú  af mbl.is (21.02.2011), en þar segir:  Gert er ráð fyrir því að hafsögumaður fari frá borði nokkrum sjómílum síðar en hann gerði.
Aðeins um sex skipalengdum frá þeim stað þar sem lóðsinn yfirgaf Goðafoss, sigldi skipið í strand, þá innan þeirra marka sem hafsögumaður á að vera viðstaddur.  Við þessar  fáu línur er ýmislegt að   athuga. Í fyrsta  lagi  er óeðlilegt að segja, - nokkrum sjómílum síðar. Betra hefði verið ,  nokkrum sjómílum utar. Rangt er að tala um skipalengdir, ætti að  vera  skipslengdir. Svo er  ekkert til  sem  heitir hafsögumaður, rétta orðið er auðvitað hafnsögumaður. Öll er fréttin svolítið í aulastíl.

Meira af mbl.is (22.02.2011). Í frétt af  jarðskjálftunum á Nýja Sjálandi segir: Björgunarsveitir vinna nú í gegnum nóttina í Christchurch í Nýja-Sjálandi til að bjarga fólki ... Hér skín enskan  hrá í  gegn, -   work through the night  Sá sem hefur þýtt þessa frétt úr ensku er ekki góður í íslensku.

  Málsmetandi  stjórnmálamenn eiga að sneiða hjá Útvarpi Sögu og þeim sora  sem þar  er oft að finna. Allra síst eiga þeir að ræða  við Arnþrúði Karlsdóttur, Pétur  Gunnlaugsson og Guðmund Franklín Jónsson.  Í endurteknum þætti (að morgni 22.02.2011)   fullyrti  símavinur  við Arnþrúði Karlsdóttur að Bjarni Benediktsson formaður Sjálfstæðisflokksins hefði samþykkt  Icesave vegna þess að það hefði verið skilyrði  fyrir því að hann fengi  20 milljarða lán hjá  Deutsche Bank.  Hefurðu  sannanir fyrir  því , spurði útvarpsstjórinn.  Svona smá,  svaraði símavinur  útvarpsstjórans og hún hélt samtalinu áfram  athugasemdalaust. Eftir stóð  alvarleg ásökun, rógur og  lygi. Ekkert var dregið í efa. Þetta eru  svo vond  vinnubrögð að engu tali tekur.

   Í sporum Bjarna Benediktssonar mundi  ég  aldrei koma  nálægt  þessari stöð. Það er fyrir neðan  virðingu hans. Langt fyrir neðan. Það er fyrir neðan  virðingu  þingmanna að koma þarna til að ræða stjórnmál, nema kannski þess eina  sem  þar virðist kominn í fast starf. Alvöru stjórnmálamenn  ættu ekki að virða þessa útvarpsstöð viðlits.

   Það er ótrúlegt, að sómakær  fyrirtæki, að maður skyldi ætla,  skuli  auglýsa í Útvarpi  Sögu  Molaskrifari er að koma sér upp lista yfir  fyrirtæki sem  auglýsa í  Útvarpi  Sögu svo hann geti  sneitt hjá þeim og beint viðskiptum sínum annað. 

Tvískinnungur og rökleysur á Bessastöðum

   Orðréttar  tilvitnanir í ummæli Ólafs Ragnars Grímssonar  á blaðamannafundinum   sl. sunnudag sýna hvernig  tvískinnungur  og rökleysur ráða nú ríkjum á Bessastöðum.  Forsetinn heldur    líklega að  upp til hópa séum við kjánar og þess vegna sé í lagi  að tala  til okkar í ósamrýmanlegum þversögnum. Það gerði hann á sunnudaginn var.

 Á blaðamannafundinum sl. sunnudag  sagði Ólafur Ragnar Grímsson orðrétt: „Auðvitað er það ekki forsetaembættisins að vera einhverskonar matsstofnun á áreiðanleika slíkra undirskriftasöfnuna (svo!) eða vera einhverskonar fræðastofnun, sem metur það."   Skýrt. Forsetaembættið er engin eftirlits- eða matsstofnun.  En, -  svo   bætti forseti lýðveldisins við: „En við gerðum hinsvegar  ákveðna  svona könnun". Allt í einu er forseta embættið  orðið það sem var  ekki fyrir sekúndum síðan , matsstofnun . Forsetinn hélt áfram: „ Við ákváðum að hringja í fleiri  sem höfðu skráð sig  heldur en aðstandendur könnunarinnar gerðu. Ég ætla ekki  að fara að nefna  tölur í því, en það voru sem sagt fleiri en þeir hringdu í sjálfir.og ef ég  færi að nefna tölur , þá  væri eins og við  værum einhver  fræðileg  stofnun til að meta  þetta, en ég get hinsvegar  sagt það hér og  við náðum í svona þorrann af þeim, sem  við reyndum að hringja í og 99% af þeim sem við náðum í, játuðu því að þeir hefðu sett nöfn sína á þessa lista. Það er satt að segja  hærra hlutfall, sem  kom fram í okkar  athugun ( Innskot mitt: En við erum auðvitað ekki neinn athugunaraðili !)   heldur en þeirri athugun ,sem  aðstandendur könnunarinnar framkvæmdu.  Við hringdum bæði í fleiri og jásvara hlutfallið var hærra. Þeir voru með  93% og við vorum með  um það  bil 99%. Ef ég  færi að gera það (Innskot mitt: Nefna tölur. Segja frá því í hve marga var hringt) Nei, ef ég gerði það  þá væri eins og við værum einhver  formlegur eftirlitsaðili. (Innskot mitt Halló!  Tölurnar skipta ekki máli. Það sem skiptir  máli er að það var hringt og þar með var  forsetaembættið  búið að  taka að sér  eftirlitshlutverk.)

   Forsetinn hélt svo áfram:„ Mér finnst hinsvegar rétt vegna þess að ég vil bara segja frá  málinu að við vildum svona í ljósi umræðunnar er hafði farið fram, við höfum ekki gert það áður, - í ljósi umræðunnar kanna  það vegna þess líka að þeir hringdu ekki í mjög marga, eða þeir hringdu í eitt hundrað eða svo. Við  tókum sem sagt slembiúrtak  (Innskot mitt:  Við sem  vorum hvorki eftirlits mné  matsaðili !)

   Forsetinn neitar að gefa upp í hve marga var hringt. Hann neitar líka að gefa upp hverjir   framkvæmdu þessa könnun   fyrir  forsetaembættið. Morgunblaðið sagði (21.02.2011)  að könnum  hefði verið framkvæmd af  „starfsmönnum  skrifstofunnar og aðilum þeim tengdum". Voru  fjölskyldur  starfsmanna notaðar til verksins?  Hverskonar  rugl er þetta ? Hvervsgena þessa leynd.  Af hverju má þjóðin ekki vita í hve marga var hringt?  Hversvegna þennan leyndarhjúp? Er þarna eitthvað, sem ekki þolir  dagsbirtu og verður því að leyna ?  Þeir sem  voru  samferða   Ólafi Ragnari á Alþingi  eru ýmsu vanir  af hans hálfu.  En það er ótrúlegt að  forseti landsins  skuli  bjóða íslenskri  þjóð upp á  svona  rakalaust  bull. Það  gæti líklega hvergi gerst nema  á  Íslandi og   líklega mundi enginn þjóðhöfðingi annar  í lýðræðisríki en Ólafur Ragnar Grímsson  leggjast  svona   lágt. Og þetta sitjum við uppi með.

Skilgreiningar hannaðar eftir hendinni

  Forseti  lýðveldisins hannar nú nýjar skilgreiningar eftir  hendinni  til að þjóna hentisemi  sinni og persónulegum  metnaði.   Þjóðin er löggjafinn,  er alveg  ný skilgreining.  Hún finnst líklega hvergi á  bókum, en  hún hentar núna, þegar  Ólafur Ragnar Grímsson er byrjaður að búa sig undir  framboð til fimmta kjörtímabilsins á Bessastöðum.  Hann er alltaf að  reyna að gera það sem enginn hefur  áður gert, jafnvel þótt með endemum sé.

  Það er annars svolítið hlálegt að  sú staða skuli  nú vera uppi, að Ólafur  Ragnar  skuli   að öllum líkindum ætla sér að sitja  fimmta kjörtímabilið á Bessastöðum  í  skjóli ritstjóra Morgunblaðsins og fyrrverandi  forsætisráðherra  og ýmissa helstu forkólfa gamla  Sjálfstæðisflokksins. Þetta er  ekki síst  hlálegt  í ljósi þess að einu sinni    sagði   forsætisráðherra um Ólaf Ragnar  Grímsson, að hann mundi aldrei, aldrei sitja sem forsætisráðherra í skjóli þess manns.  En nú gæti  farið svo að  Ólafur Ragnar sæti eitt kjörtímabil í  viðbót í skjóli  ritstjóra Morgunblaðsins á Bessastöðum. Undarleg er veröldin  og ólíklegustu menn sænga nú saman  í pólitík. (Politics makes strange bedfellows, er sagt á ensku)

 Á  blaðamannafundinum á Bessastöðum, sagðist  Ólafur    Ragnar  alls ekki vera að breyta  stjórnskipan  landsins. Auðvitað er hann að því. Ísland er lýðveldi með  þingbundinni stjórn. Forsetinn  sniðgengur  fulltrúalýðræðið og   baðar sig  nú í fjölmiðasólinni. Hann gæti þó brennt sig.

Molar um málfar og miðla 537

   Fínt orð fréttaskýring.  Óþarfi að tala um fréttaútskýringu eins og gert var í morgunútvarpi Rásar tvö (21.02.2011)

   Undarlegt fréttamat Ríkissjónvarpsins (20.02.2011) að  tala  við  tvo  mótmælendur  við Bessastaði, sem höfðu ekkert fram að færa. Í beinu útsendingunni frá Bessastöðum sagði fréttamaður  Ríkissjónvarpsins að 40 þúsund undirskriftir og   56 þúsund undirskriftir  væru mjög  svipaðar  tölur. Meira að segja máladeildarstúdent  veit  að 40 og  56  eru ekki    svipaðar tölur.  Góð frammistaða Boga Ágústssonar í beinni útsendingu    Ríkissjónvarpsins á sunnudag.

 Þótt Molaskrifari sæi ekki nema lítið eitt af  dagskrá   sunnudagskvöldsins í Ríkissjónvarpinu,   fer ekki milli mála,  að ár og  dagur er síðan  sjónvarpið hefur  boðið  okkur jafn góða  dagskrá, - og  meira að segja  sígilda,  fína  bíómynd með úrvalsleikurum. Guð láti  gott á vita, eins og þar stendur.

  Molaskrifari hefur alltaf svolítið  gaman   af því, þegar ábendingar hans    eru teknar upp í    Daglegu máli í morgunútvarpi Rásar eitt. Eins og þegar  rætt var um  hörmungina, sem í auglýsingu  var kölluð  anti wrinkle  augn roller (21.02.2011) og  skiptir þá engu hvar fyrst var vakin athygli á málinu. Í þessum sama  þætti  var talað um árangurslaust lögtak. Molaskrifari  er ekki  lögfróður, en minnist þess ekki að hafa  heyrt  talað um  árangurslaust  lögtak. Oft er hinsvegar   talað um árangurslaust fjárnám, þegar eignir eru ekki til staðar til greiðslu skuldar.  Hvað segja  lögfróðir um þetta?

Úr  dv.is (20.02.2011)  1200 milljón króna lán Landsbankans til Fjárfestingarfélagsins Ness sem er í eigu Jóhannesar Ólafssonar svipar mjög til annarra lána sem veitt voru á síðustu mánuðunum fyrir efnahagshrunið.   1200 milljón króna lán svipar ekki  til, - 1200 milljóna króna láni svipar til...

 Ákveðið hefur verið að  friða  Langasjó. Það er góð ákvörðun. Eitthvað er  eignarfall orðsins á reiki. Menn segja  og skrifa ýmist  Langasjós,  eða  Langasjóar. Líka mætti segja Langasjávar.  Fróðlegt  væri að vita hver málvenja er í Skaftafellssýslum í þessu efni.

  Í fréttum Stöðvar tvö (20.02.2011) var talað um  mál  væri á  bið og  að stöðva olíuleka frá Goðafoss. Hvorugt  getur  talist til fyrirmyndar.

 

 

Molar um málfar og miðla 536

   Óljóst er hvenær Goðafoss verður fluttur af strandstað í Noregi, segir á fréttavef  Ríkisútvarpsins (19.02.2011). Nákvæmlega sama orðalag var reyndar notað í hádegisfréttum.  Það er ekki í samræmi við málvenju að tala um að flytja  skip af strandstað.  Skip  eru ekki flutt af strandstað. Vonandi  verður Goðafoss fljótlega dreginn á  flot af skerinu.

 Undarlegt er  að tala  um Halldór Laxness og Ólínu Andrésdóttur sem „textahöfunda" eins og gert var í  Útsvari   (18.02.2011).  Bæði voru þau  skáld og ortu ljóð.  Og ekki hækkaði  risið á þessari þjóðarstofnun , þegar útvarpsstjórinn  gerði lítið úr  Bandalagi íslenskra listamanna í hádegisfréttum daginn eftir (19.02.2011).  Bandalagið hafi gerst svo  djarft að  gagnrýna íþróttadekrið  í  Efstaleiti.  Það er engu líkara en listamenn eigi ekki upp á pallborðið hjá stjórnendum Ríkisútvarpsins.  

Af mbl.is (19.02.2011): Skíðasvæðið í Bláfjöllum verður lokað í dag vegna mikils vinds.  Betra hefði verið að segja  að lokað væri vegna hvassviðris. Kannski er þetta bara  sérviska Molaskrifara.

 Í sunnudagsblaði  Moggans  (20.02.2011) er talað um áætlunarskipið Titanic.Áætlunarskip ?  Eðlilegast hefði verið  að  tala um farþegaskipið  Titanic.

  Þeir sem stjórna auglýsingadeild Ríkisútvarpsins eru ekki starfi sínu vaxnir.   Auglýsingadeildin í Efstaleiti  tekur við öllu  sem að henni er rétt athugasemdalaust. Á föstudagskvöld i (18.02.2011) var sagt í auglýsingu, að tiltekin fyrirtæki felldu niður virðisaukaskatt af vörum um helgina.   Þetta eru ósannindi. Fyrirtæki geta ekki fellt niður virðisaukaskatt. Fyrirtæki geta veitt afslátt, sem  nemur virðisaukaskattsprósentunni.   Þetta er því miður  bara enn eitt  dæmið um óvönduð  vinnubrögð í Efstaleitinu.