Þriggja landa lambakjötsbók !

Var að fá í hendur   bók, sem ég  pantaði  frá Amazon:  Sixteen Months of MUTTON, Meat-Eating Journeys through Kazakhstan, Kyrgzstan and Mongolia. Höfundurinn heitir  Stu Lamb, -  enn betra hefði verið ef hann hefði heitið Lamb Stu !  Skírnarnafn hans er reyndar  Stewart. Þetta  minnti mig svolítið á  Loga Eldon  arinhleðlsumann og  Sigurjón Bláfeld  loðdýraræktarráðunaut að ekki sé nú nefndur margfrægur Jökull Bergmann  annáluð fjallageit og  leiðsögumaður.  Fleiri dæmi, einhver ?

Upplögð  bók fyrir Íslendinga - 244  blaðsíður um lambakjöt! Miðasíulöndin sem  höfundur  hefur etið sig í gegn um  eru  einhver áhugaverðustu landsvæði veraldar og á það  eftir að koma betur í ljós í framtíðinni.  Eini gallinn er sá, að lambakjöt er orðinn dýr lúxusmatur á Íslandi  þar sem kjúklingar og svín er kjöt  hinna fátæku, en samt  margfalt dýrara en í útlöndum vegna fákeppni okurs.

Lagast þegar við göngum í ESB og  fáum matvæli á sanngjörnu verði.

Hlakka til að  glugga í bókina.

Loksins !

Það var lagið. Þó fyrr hefði verið !

Þingfundur þar til mælendaskrá er tæmd

Áhyggjur norrænna blaðamanna !

 Ekki gefur undirritaður mikið  fyrir   pantaða yfirlýsingu frá norrænum blaðamönnum um íslenska fjölmiðla. Ekki sendu þeir  frá sér áhyggjuyfirlýsingu, þegar stjórnvöld í löndum sumra þeirra neituðu að greiða út lán  til okkar, sem lofað hafði  verið. Neituðu að greiða  lánið, nema  viss  skilyrði væru uppfyllt. Ekki höfðu norrænir blaðamenn  minnstu  áhyggjur af því.

 Hitt er svo annað mál  að nú er  Mogginn orðinn  svo  ómerkileg flokkspúta, að hann er varla lesandi lengur. Fréttamatið rammpólitískt. Mogginn er  hrunblað  aðalhrunflokksins. Við sem höfum keypt  Moggann lengi eigum betra skilið. Á mínu heimili verður áskriftinni  sagt upp í  lok þessa árs, -ef ekkert breytist.

PS Dæmi  um hið pólitíska fréttamat er á bls. 2 (02.12.2009). Fréttin um að   Sjálfstæðisflokkurinn beri allra flokka  mesta  ábyrgð á hruninu er  pínulítill eindálkur  neðst í hægra horni, með fyrirsögninni: Bankarnir bera mesta ábyrgð.  Nokkuð til í því  vegna  þess að  Sjálfstæðisflokkurinn og Framsóknarflokkurinn veittu  bankavinum sínum  umboð til að gera það það sem þeir gerðu.

Áhyggjur af fjölmiðlum hérlendis

Molar um málfar og miðla 212

   Eftirfarandi línur eru frá Bjarna Sigtryggssyni, fyrrum fréttamanni og áhugamanni um  fjölmiðlun og íslenska tungu :  „Þar sem margt fjölmiðlafólk fylgist vonandi með pistlum þínum langar mig að biðja þig að vekja athygli á því að framundan er í Kaupmannahöfn Aðildarríkjaþing Loftslagssamnings Sameinuðu þjóðanna, en ekki loftslagsráðstefna, eins og nær allir fjölmiðlar hafa haldið fram að undanförnu. Munurinn er augljós; á aðildarríkjaþingi eru gerðir bindandi alþjóðasamningar eða breytingar á þeim. Ráðstefnur eru málþing þar sem sjónarmið eru kynnt og rædd. Jafnhliða aðildarríkjaþinginu eru haldnar margar samkomur, svo sem leiðtogafundur undir lokin. 

Mig grunar reyndar að þú þekkir þetta mál flestum öðrum betur."

 

 

 Allt er þetta rétt sem Bjarni segir. Molaskrifari er þessum fundum, (sem á  ensku eru kallaðir Conference of the Parties, COP) ekki alveg ókunnugur Sat a.m.k. tvo slíka ásamt fleirum fyrir hönd Íslands í Buenos Aires og í Bonn. Kaupmannahafnarfundurinn er líklega sá  fimmtándi í röðinni.

 Forseti Íslands ,sem staddur er á landinu um þessar mundir, kallaði Kaupmannahafnarfundinn líka Loftslagsráðstefnu er rætt var við hann á fullveldisdaginn á Rás 2 í RÚV. Það er sem sé röng nafngift. 

Einkennilegt var að heyra umsjónarmann Morgunvaktar  spyrja forsetann efnislega á þessa leið: Ef við sækjum um aðild að ESB glötum við þá ekki fullveldinu? Það hefur farið framhjá umsjónarmanni, að við erum búin að sækja um aðild, en aðildarumsóknin hefur ekki verið afgreidd.

 

  Svohljóðandi fyrirsögn er á vefmiðlinum visir.is (29.11.2009): Fjórir lögreglumenn myrtir í launsátri. Launsátur er fyrirsát (gerð með leynd) eins og orðabókin segir. Molaskrifari er á því að hér hefði átt að standa: .. myrtir úr launsátri. Hinsvegar er ekkert í fréttinni sem bendir til að um launsátur hafi verið að ræða. Heldur hafi morðinginn komið inn á kaffihús og skotið lögreglumennina. Seinna í fréttinni stendur: Í fyrstu var talið að tveir byssumenn hefðu verið að verki en Ed Troyer, talsmaður lögreglu á svæðinu, segir að einn maður hafi verið að ræða. Maðurinn rændi ekki kaffihúsið og fullyrðir Troyer að um launsátur hafi verið að ræða. Byssumaðurinn hafi greinlega komið á kaffihúsið í þeim erindagjörðum til að myrða lögreglumennina. Þarna hefði átt að segja: Að um einn mann hafi verið að ræða. Fréttin er annars hálfgert rugl eins og þetta ber með sér. 

 

Stundum hefur verið vikið að því hér að blaðamenn taki leikskólamálið með sér í vinnuna, samanber  þegar talað er um að klessa á , þegar bílum er ekið á eitthvað, t.d. vegg eða staur. Ný útgáfa af barnamáli er í Fréttablaðinu í dag (01.12.2009) en þar segir í fyrirsögn: Stímdi á slökkvistöð og lögreglu. Það er auðvitað hægt að keyra á slökkvistöð, en að keyra á lögreglu???

Molaskrifara brá svolítið í morgunsárið  er hann heyrði skólastjóra,sem var tala um fjölda umferðarslysa á tilteknu tímabili segja: Það var  tuttugu og  fjórir of mikið.   Molaskrifari sér að athugasemdir um málfar eins og hér eru birtar fara í taugarnar á Bergsteini Sigurðssyni blaðamanni á Fréttablaðinu,sem helgar slíkum skrifum Bakþankadálkinn  í blaði sínu fyrir nokkrum dögum. Honum verður ekki að ósk sinni að þessu verði hætt. Öll þau jákvæðu viðbrögð sem Molaskrifari hefur fengið eru hvatning til þess að halda þessum skrifum áfram.

 Það verður líklega bið á því að Fréttablaðið birti  greinarstúf  um allt annað efni, sem Molaskrifari sendi á ritstjórnina fyrir viku eða tíu dögum. Það verður þá bara að hafa það.