Moggabloggið kvatt

Með þessum fáu línum, sem skrifaðar eru á síðasta degi ársins 2009 ,lýkur skrifum mínum á Moggabloggi. Jafnframt hef ég sagt upp áskrift að blaðinu frá og með áramótum. Mér finnst ekki heiðarlegt að halda áfram á  skrifa á Moggabloggið eftir að hafa sagt upp áskriftinni.Það má ef til vill segja að ástæðan  að baki þessari ákvörðun sé uppsöfnuð óánægja. Ég nefni þar til  sögu  réttmæta reiði vegna ódrengilegra og óvenju rætinna skrifa  Sverris Stormskers um  veikindi Ingibjargar Sólrúnar  Gísladóttur. Það  hefur enginn maður með snefil af sómatilfinningu alvarleg veikindi fólks í flimtingum. Sami maður skrifaði grein sem Morgunblaðið birti undir  flennifyrirsögn,sem var ekkert annað en klám. Þegar við þetta bætist að pólitísk sjónarmið kvótakónga og andstæðinga Evrópusamvinnu blandast fréttum í æ ríkari mæli þá er nóg komið af svo góðu. Það er grundvallarregla í blaðamennsku að  skilja milli frétta og stjórnmála. Þessi regla hefur verið margbrotin í Mogganum að undanförnu. Þegar pólitíkin ratar inn í texta með fallegri forsíðumynd af vetrarsól tekur það út yfir allan þjófabálk. Ég er enn hissa.

Lýkur nú langri samfylgd , - um sinn að minnsta kosti.  Barn að aldri bar ég og fjölskylda mín út Morgunblaðið í Norðurmýri og upp alla Flókagötu. Það var fyrir meira en sextíu árum. Það drýgði tekjur, þegar ekki veitti af. Svo hef ég verið áskrifandi að blaðinu nær alla mína ævi og hef jafnan haft taugar til Moggans , þótt ég væri ekki alltaf  sammála pólitíkinni. Ég hef átti vini meðal blaðamanna og ritstjóra og vona að svo geti enn orðið. En Mogginn um þessar mundir er ekki minn gamli Moggi.

Ef blaðið breytist, hættir að birta sóðagreinar, hættir að blanda saman pólitík og fréttum í svona ríkum mæli  er aldrei að vita nema áskriftin verði endurnýjuð. Ég þakka öllum þeim sem tekið hafa jákvætt undir athugasemdir mínar um málfar í fjölmiðlum, en þeir pistlar nálgast nú að vera 230 talsins.En mér er ljóst að að það eru tiltölulega fáir sem  lesa Molana um málfar og miðla, því skrifi ég eitthvað um pólitík tífaldast fjöldi athugasemda miðað við málfarsmolana.

Ég mun halda áfram að birta pistla á vefritinu Eyjunni, eyjan.is og á minni eigin vefsíðu ,sem smám saman er að taka á sig mynd, www.eidur.is

Að endingu bið ég alla  lesendur þessara lína vel að lifa og óska þeim árs og friðar með þökkum fyrir samskiptin.

 Eiður Svanberg Guðnason

Molar um málfar og miðla 228

Bjarni Sigtryggsson sendi Molum eftirfarandi:  Í fréttum RÚV  sjónvarps  las   fréttaþulur  (22.12.20009) eins og  rétt mál væri  að bíða milli ótta og vonar. Ekki venjubundið  orðalag.  Við tölum um að bíða milli vonar og ótta.  Þetta var hinsvegar rétt í skjátexta.

Því er svo við að bæta að í fréttum RUV síðustu tvö dægur hefur ítrekað
verið reynt að sprengja flugvél á flugi "í loft upp."

Ben. Ax. sendi eftirfarandi:

Höfundur: Ben.Ax. (Benedikt  Jóhannes Axelsson) (http://benax.blog.is/)

  Oftar en einu sinni hef ég heyrt talað um að eitthvað sé
hægt og sígandi á uppleið. Það held ég að sé ekki hægt. Sagt hefur verið að
eitt og annað sé kýrskýrt. Í mínu ungdæmi þýddi kýrskýr nautheimskur.
Forðum var frá því sagt að lögreglan hefði handtekið mann sem var með
grunsamlega ávísun. Þá var ort:

Mér finnst lögreglan okkar aldrei treg,
ekki vil ég hana á nokkurn hátt lasta.
En úr því að ávísunin var grunsamleg
af hverju tóku þeir hana þá ekki fasta?

 Annar dyggur lesandi   Mola  sendi eftirfarandi :  Á íþróttasíðum Morgunblaðsins í dag  (28.12.2009) eru leikjum í NBA-deildinni í körfubolta gerð skil. Þar er ítrekað talað um að leikmenn hafi gert stig en ekki skorað stig. Í mínum eyrum hljómar þetta álíka ankannalega og að gera mat í staðinn fyrir að elda hann.  - Já líklega er best að gera sér egg með hamborgaranum í kvöld !

Úr mbl.is (29.12.2009)Utanríkisráðuneytið hefur verið í sambandi við og aðstoðað íslenskan karl og konu sem handtekin voru í Madríd á Spáni í gegnum ræðismann Íslands í borginni.  Ekki mjög skýrt orðað. Úr sama miðli sama dag: Hannesi Sigmarssyni hefur verið sagt upp störfum sem yfirlæknir við Heilsugæslu Fjarðabyggðar á Eskifirði. Orðið yfirlæknir  ætti eftir máltilfinningu  Molaskrifara  þarna að vera í  þágufalli. - yfirlækni.

 Í kvöldfréttum  útvarps  ríksins  (29.12.2009)  var    sagt efnislega  ... þegar skattalagabeytingarnar  byrja að bíta eftir áramót      Að nota   sögnina   að  bíta í þessu  sambandi  er gildishlaðið orðalag,sem ekki á heima í fréttum þar sem menn stæra sig af  af fagmennsku.

Glysgirnin í klæðaburði undirstrikar alvöruleysið í Kastljósi  (29.12.2009) sjónvarps ríkisins.

 

GLEÐILEGT OG GÆFURÍKT ár, - kærar þakkir  fyrir  samskiptin á árinu sem er að kveðja.

Molar um málfar og miðla 227

Margt var gott um fyrri hluta heimildamyndarinnar um það þegar þýskur  kafbátur sökkti Goðafossi  út af  Garðskaga   í nóvember 1944. Hún var vel og fagmannlega gerð. Það var hinsvegar  nærri hámarki smekkleysis  hjá sjónvarpi ríksins að sýna  rétt á undan  auglýsingu  frá  Eimskipafélagi  Íslands  þar sem sungið var :  „Þá var hlegið  við störfin um borð.“  Ótrúlegt.

Það sem einkum gaf þessari mynd gildi var ítarleg leit að gömlum kvikmyndum og ljósmyndum sem   færðu hana  nær okkur.Vel unnið verk sem bar góðan árangur. Nokkur  lýti  voru í texta. Tvisvar var talað  um áhafnarmeðlimi,  þegar betur hefði verið talað um skipverja. Einu sinni var talað um áhafnarmenn. Fleira mætti nefna.Verður ekki gert. 

Á forsíðum blaða, sem  brugðið var upp,  Mogga og Þjóðvilja,   sást að  Mogginn hefur  löngum haft eigin ritreglur. Þar var sagt: Þýzkur kafbátur  sökti Goðafoss. Hefði átt að vera sökkti  Goðafossi. Í   fyrirsögn Þjóðviljans var sagt: Þýzkur kafbátur sökkvir  Goðafossi. – Vitnað er í fyrirsagnirnar eftir minni,  en efnisatriðin voru  svona.

Skrítið fannst gömlum Garðbúa að heyra talað um þorpið Garð, en í sjálfu sér ekkert  rangt við það.Þótt nú á dögum heiti þetta Sveitarfélgagið Garður,   en hét áður bara   Garðurinn.

Þessi mynd vakti minningu í huga þess  er þetta ritar frá því  er þessi hörmungaatburður  gerðist. Guðmundur Guðjónsson, bifreiðarstjóri,  móðurbróðir  minn   í Réttarholti í Garði  átti leið til Reykjavíkur rétt eftir þetta. Ég sé hann fyrir mér sitjandi uppi á eldhúsborðinu á  Skeggjagötu  19 í Norðurmýrinni og  lýsa því hvernig þeir nokkrir  félagar horfðu úr nýreistum Garðaskagavita á  Goðafoss  sökkva. Einkennilegast fannst mér, að heyra að skipið  hefði  risið upp á  endann og sokkið  þannig. Það olli  nýlega fimm ára snáða miklum  vangaveltum. Í kynningu á  myndinni sýnist mér að rætt verði  í seinni hlutanum við heiðursmanninn Guðna Ingimundarson  frá Garðsstöðum, sem var örugglega einn þeirra  sem var  uppi í vitanum þennan örlagaríka dag.

Þessi mynd vakti líka aðra minningu frá því fyrr á árinu  1944 ,þegar sá sem þetta ritar var  fjögurra ára. Foreldrar mínir  höfðu farið í leikhús, – eitthvað sem gerðist kannski einu sinni  eða tvisvar á ári. Iðnó var þá eina leikhúsið. Á leiðinni úr Iðnó  á leið í strætó, Njálsgötu – Gunnarsbraut á Lækjartorgi,fundu þau karlmannsúr í Lækjargötunni , armbandsúr eins og þá  var kallað.  Þau vildu koma  úrinu til skila og fylgdust  með Tapað-Fundið í smáauglýsingum Vísis. Þar var  nokkru  síðar auglýst eftir úri  sem hefði tapast í grennd við Iðnó Við höfðum  þá ekki síma. Það gerðist ekki  fyrr en  tíu árum síðar. En  farið var til góðra granna og hringt. Þetta reyndist úrið.  Dætur eiganda komu og sóttu það. Minnist nú ekki fundarlauna eða mikils  þakklætis. Er reyndar næasta viss um það var ekki eigandi  úrrsins  sem  glataði þvi, – heldur miklu yngra  fólk.   Eigandi úrsins var Hafliði Jónsson  fyrsti vélstjóri á  Goðafossi sem fórst svo með skipi sínu í nóvember þetta sama ár.

Snilldarverk  Jökuls Jakobssonar Hart í bak var svo á dagskrá  næst á eftir  myndinni um Goðafoss, en  baksvið og grunnur  þess  verks  eru örlög og harmsagan um okkar fyrsta Goðafoss. Umdeilanleg  efnisröðun á dagskrá að  ekki sé meira sagt. Þar  fór stórleikarinn,   minn góði vinur  Suðurnesjamaðurinn Gunnar Eyjólfsson burðarásinn. Sá hann  reyndar  fyrst á  sviði í Gúttó í Garðinum    sumarið 1948.   svona  er maður orðinn Gamall.. Þá  fór flokkur ungra leikara um landið og sýndi  held ég Candide,  Þau kölluðu sig  Sex í bíl,Gott ef bíllinn varekki hálfkassabíll, amerískur Reo. Líklega gengi það ekki núna að kalla  leikflokk Sex í bil.  1948 voru líklegar næsta  fáir sem vissu að enska orðið sex   er ekki það sama og    sex á íslensku.

Molar um málfar og miðla 226

 Úr fréttum RÚV sjónvarps (22.12.2009) Samkvæmt  yfirvöldum á staðnum. Þetta er ekki boðlegt orðalag. Betra væri: Að sögn yfirvalda á staðnum.  Í sama fréttatíma var   talað um að líta á eitthvað alvarlegum augum. Þarna er  áofaukið. Rétt er að tala um að líta e-ð alvarlegum augum.

Einkennileg þótti  Molaskrifara  bókarauglýsing  sem margsinnis  var  birt   í sjónvarpi fyrir jólin.Þar var sagt  um  bók: Ég gat ekki lagt hana frá mér sársaukalaust.Aldrei  mundi Molaskrifari kaupa bók sem væri sársaukafullt  eða sárt að leggja frá sér.
Þegar við erum með bröns erum við að sjá  fleiri fjölskyldur koma.   Úr fréttum RÚV   22.  12.2009.

Í fréttum Skjás eins og mbl.is  var sagt að  innbrot  og þjófnaðir væru á uppleið !Það  var og.Líklega hefði mátt segja  að innbrotum og þjófnuðum færi  fjölgandi. Eða: Glæpatíðni eykst eins og ágætlega var sagt á mbl.is.

Hermönnum í barnahugleiðingum hótað með herrétt, segir í fyrirsögn á dv.is (22.12.2009). Verið var að tala um konur í Bandaríkjaher,sem verða þungaðar (kann aldrei  við að segja ófrískar vegna þess að ólétta er ekki veiki) meðan þær gegna herskyldu.   Að segja að einhverjum sé hótað meðherrétt ber vott um skort á máltilfinningu. Herrétti  ætti þetta að vera. Svo er  auðvitað  fráleitt aðtala  um að einhver sé í barnahugleiðingum!

Einn ölvaður á Norðurlandi, sagði í fyrirsögn í mbl.is á  aðfangadag. Aldeilis ekki óreglunni fyrir að fara nyrðra. Þetta hlýtur að hafa verið aðkomumaður.

Málvís  Molavinur sendi  eftirfarandi með elskulegri jólakveðju:  
 Má til með að láta eina RÚV-sjónvarpsfrétt fylgja:
„…kannabisplöntur voru teknar af lögreglunni á höfuðborgarsvæðinu.„  Ætli löggan sé farin að rækta til að bæta fjárhaginn?  Þetta mun  hafa birst á Þorláksmessu.

Makalaus þolmyndarást  Moggamanna !

Úr fréttum  Stöðvar tvö á jóladag er fjallað var um Toyota Land Cruiser bíla,sem breyttt hafði verið þannig að þeir hentuðu  betur   til aksturs í  eyðimerkursandi:  Þá var sagt: Eru allir breyttir af starfsmönnum Arctic Ttrucks.   Betra hefði verið að segja að starfsmenn Arctic Trucks hefðu breytt  öllum bílunum.

Einkennileg setning á  mbl.is (27.12.2009):Engin mál stóðu þó úti af borðinu í morgunsárið.

Sjö manns í fangaklefa fyrir ölvun og óspektir,  fyrirsögn í dv.is (27.12.2009) Þar hefur  örugglega verið friður og ró með þeim sjö.

 Ekki kemur það Molaskrifara  á óvart að kröfur í þrotabú  Glitnis skuli hafa lent á Írlandi, en ekki Íslandi.  Fyrir daga tölvupósts, Árið 1983  og þar um kring voru dóttir og tengdasonur Molaskrifara við nám í Bandaríkjunum og þá var eiginlega   regla að bréf frá þeim fóru  fyrst til Írlands og svo til Íslands !  Molaskrifari dró þá ályktun af þessu að þeir sem flokkuðu  póst í Flórida  væri kannski ekki mjög vel læsir

Pólitísk sólarupprás/sólarlag á forsíðu Moggans

 Forsíðumynd  Morgunblaðsins  22. desember var gullfalleg mynd  Kristins ljósmyndara af   sólarlagi eða  sólarlagi tekin á vetrarsólhvörfum. Bílar voru í forgrunni.  Svohljóðandi texti var með myndinni: Glætan Það léttir flestum lundina að vita að sólin er tekin að hækka á lofti. Það skyggir þó á  gleði margra að með hækkandi sól  taka lög um hækkanir skatta og gjalda  gildi. Þau fela  meðal annars í sér að bifreiðagjald hækkar um 10% og aukin gjöld leggjast á eldsneyti.  Í þessu eru ekki staðreyndavillur.

En nú ratar pólitík í allt  á Mogganum , líka í textann  við fallegar stemningsmyndir. Kannski er ég sá  eini sem  finnst þetta vera  svolítið út úr kú !   En hvað um það:  GLEÐILEGA JÓLAHÁTÍÐ !

Molar um málfar og miðla 225

Í Bæjarmálum, málgagni Samfylkingarinnar í Garðabæ er svohljóðandi fyrirsögn á baksíðu (21.12.2009): Tvennir  flokksstjórnarfundir í Garðabæ. Sama orðalag er notað í fréttinni. Hér hefði átt að tala um tvo flokksstjórnarfundi. Ef um tónleika hefði verið að ræða hefði átt að tala um  um tvenna tónleika.  Tveir fundir. Tvennir tónleikar.

Úr dv.is (21.12.2009):Karen Rawlins óttaðist að snjóstormurinn... Snjóstormur er aulaþýðing úr ensku. Á íslensku segjum við stórhríð eða hríðarveður.

Málglöggur lesandi sendi Molum eftirfarandi: Á Pressunni má lesa frétt um fráfall ungrar leikkonu: "Hollywood leikkonan Brittany Murphy hafði verið með flensulík einkenni í nokkra daga áður en hún lést."Einhver hefði látið nægja að kalla þetta flensueinkenni en sá sem sló á lykla hefur líklega ofþýtt "flu-like symptoms".Þetta er hárrétt ábending. Og sá hinn sami bætti við: Fyrst maður er á annað borð byrjaður er eins gott að benda á fleiri dæmi um skrítið orðfæri. Í tengli Eyjunnar um frétt á Mbl.is um ófærð á vegum stendur: „Færð víða léleg.“ Þessu orðalagi á ég ekki að venjast.Molaskrifari á þessu ekki heldur að venjast. Færð getur verið, slæm, vond og það getur verið illfært. Hef aldrei heyrt þannig til orða tekin, að færðin sé léleg.

Í fréttum RÚV (22.12.2009) var talað um róttæka fækkun kjarnorkuvopna. Þessi notkun orðsins róttækur er Molaskrifari áður óþekkt. Venjulega er sá talinn róttækur sem vill breyta einhverju frá rótum, eða er lengst til  vinstri í litrófi stjórnmálanna.  Hér hefur örugglega verið þýtt úr ensku , en á ensku getur orðið radical  þýtt  grundvallar- eða djúptækur. Radical changes væru  því róttækar breytingar. Hæpið er að tala um róttæka fækkun.

 

Eftirfarandi setning er af fréttavefnum mbl.is (21.12.2009):  Bændamarkaður Frú Laugu opnaði í ágúst síðastliðnum við Laugarlæk í Reykjavík. Ekki er farið rétt með nafn götunnar. Hún heitir Laugalækur, ekki Laugarlækur. Þar er Laugalækjarskóli. Smáatriði, segir líklega einhver. En smáatriðin þurfa líka að vera rétt. Það eru raunar fleiri á sama máli og Molaskrifari, því Börkur Hrólfsson skrifaði eftirfarandi athugasemd við síðustu Mola:

„Það er þarft að vera á verði, til verndar íslenskunni. Það er fleira en málfarsvillur, sem þarf að gæta að. Það fer t.d. óskaplega í taugarnar á mér, þegar fólk fer rangt með staðarnöfn.

Í skjáfréttum MBL. er frétt um ,,Frú Laugu" á Laugalæk, en þar kallar fréttakona götuna ,,Laugarlæk" ,,Laugalækur" var það heillin, þ.e. lækurinn úr laugunum.

Að minnsta kosti tvö fyrirtæki við Laugaveg, vita ekki hvað gatan þeirra heitir, og auglýsa sig við ,,Laugarveg". Það eru Kós leðurvöruverslun, og austurlenskur veitingastaður á ,,Laugarvegi" 60.
Laugavegur heitir svo, vegna þess að hann lá í laugarnar (í fleirtölu).
Eins sést æ oftar að Skógafoss er kallaður Skógarfoss, þetta hefur jafnvel verið prentað í ferðabæklinga og handbækur.
Þeir eru fleiri staðirnir, sem svo er farið með. Kannski er þetta bara eðlileg þróun, og ekkert við að gera, en þetta fer samt í taugarnar í mér.
Takk fyrir þetta , Börkur.

Það er auðvelt að blanda saman orðtökum. Prýðilega máli farinn veðurfræðingur í fréttum Skjás eins og mbl.is, sagði (21.12.2009) Þá lyftist á okkur risið. Málvenja er að segja, - það var ekki hátt á honum risið (eftir að hann kolféll á prófinu) , en  hinsvegar er sagt: Þá lyftist á mér brúnin, - þá glaðnaði yfir mér.

Í sjónvarpsfréttum RÚV (21.12.200) var talað um að verja fé til endurbyggingar skólalóða. Molaskrifari játar að hann veit ekki hvernig farið er að því að endurbyggja skólalóðir.

Það var prýðilega að orði komist í íþróttafréttum RÚV sjónvarps (21.1.2009) þegar sagt var frá konu sem hljóp 100 kílómetra á tíu klukkustundum á hlaupabretti og þannig tekið til orða að hún hefði hlaupið 100 kílómetra á einu bretti ! Gott mál.

Stöð tvö slær RÚV við á hverju einasta kveldi, þegar kemur að landsbyggðarfréttum.

Þetta eru síðustu Molarnir fyrir jól. Eftir áramótin verða Molar um málfar og miðla á vefsíðunni www.eidur.is, á fésbók og á vefritinu eyjan.is

Molaskrifari óskar öllum sem þetta lesa gleðilegra jóla og gæfuríks árs , um leið og þakkaðar eru góðar undirtektir við það sem sagt hefur verið í þessum pistlum á árinu sem senn er liðið.

 

Molar um málfar og miðla 224

    Molaskrifari gerir lítið af því að taka texta af fésbókinni og viðra hér. Þessa setningu stóðst hann ekki: Með miklu áti er undirbúið sig fyrir heljarinnar snjóstorm sem er á leiðinni í borgina. Ótrúlega eru þeir margir, sem halda að orðið snjóstormur sé íslenska. Svo er ekki. Þetta er aulaþýðing úr ensku , snowstorm. Á íslensku heitir þetta stórhríð. Aðrar ambögur í þessari setningu eru augljósar.

Hvað finnst þér mest skemmtilegast í skákinni? Svona spurði fréttamaður í fréttatíma Stöðvar tvö (19.12.2009) Dugað hefði að segja: Hvað finnst þér skemmtilegast í skákinni. Aldrei skal nota hæstastig tveggja lýsingarorða í sömu setningunni.

Svolítið er það þreytandi að heyra fréttamenn ítrekað kalla Saab-borgina Trollhättan í Svíþjóð Trollhattan. Bókstafurinn ä er borinn fram eins og e.

 Alltaf finnst Molaskrifara það jafn andkannalegt, eða ankannalegt, þegar orðatiltækið að vinna hörðum höndum er notað um næstum hvað sem er. Í fréttatíma  Stöðvar tvo (19.12.2009) var talað um að vinna hörðum höndum að því að fá aðild að félagasamtökum.

 Hér er verið að skattleggja endanotandann, sagði alþingismaður í ræðustóli Alþingis. Endanotandi ? Er það sá sem notar endann? Auðvitað ekki. Þetta er enn ein aulaþýðingin úr ensku þar sem talað er um end user. Í þessu tilviki átti að skattleggja notendur þeirrar þjónustu ,sem um var verið að ræða.

Sir Alex Ferguson, stjóri United, leist ekki á blikuna, sagði  íþróttafréttamaður  Sjónvarps ríkisins ( 19.12.2009) seint læra menn beygingareglur móðurmálsins á þeim bæ. Orðið stjóri á ekki að vera í nefnifalli, heldur  þágufalli. Honunm leist ekki á blikuna.

 Eftirfarandi er úr dv.is ... hefði greitt atkvæði í ölvunarástandi. Einfaldara og betra hefði verið að segja hefði greitt atkvæði ölvaður, eða hefði verið ölvaður er hann greiddi atkvæði.

 

Molar um málfar og miðla 223

  Úr kvöldfréttum RÚV sjónvarps (18.12.2009) : Þá er bent á að leiðbeinendur námskeiðsins... Það er sem sé verið að leiðbeina námskeiðinu!  Eðlilegra hefði verið að segja: Leiðbeinendur sem kenna á námskeiðinu...

 Garðapósturinn flytur okkur Garðbæingum margvíslegan fróðleik. En menn þurfa á þeim bæ að vanda málfarið svo við hnjótum ekki um setningar eins og þessa (18.12.2009): ...segir Faraj Shwaiki, sem rekur staðinn ásamt bróðir sínum.

 Sá sem skrifaði þetta í vefmiðilinn visir.is (18.12.2009) skilur ekki muninn á því að kjósa og greiða atkvæði.: .. var undir áhrifum áfengis þegar hann kaus á Alþingi í gær .. Umræddur þingmaður var ekki að kjósa , heldur greiða atkvæði.
Ekki batnar fréttin þegar fram í sækir: Ekki kom fram hvaða mál hann var að kjósa um. Það hefur örugglega gerst nokkur þúsund sinnum sinnum á Alþingi að þingmenn hafa tekið þátt í atkvæðagreiðslu eftir að hafa dreypt á dýrum veigum. Sannarlega er það ekki til fyrirmyndar, en fjölmiðlar þurfa ekki að láta eins og þetta sé eitthvað sem aldrei hafi gerst áður. Blaðamenn vita betur. Molaskrifari skilur Ögmund að  biðjast undan viðtali eftir að hafa dreypt á víni með mat. Það er hinsvegar fráleitt  sem Sigmar Guðmundsson gerði í Kastljós, er hann las okkur pistil um „ölvun"  Ögmundar. Olli Ögmundur hneykslan á þingi? Varð hann sér til skammar ? Nei. Hann hélt fast við reglu ,sem fleiri þingmenn ættu kannski að tileinka sér. Þarna sökk Kastljósið í hyldýpi sorans. Fréttamenn eiga líka að vera manneskjur.

Bjarni Sigtryggsson sendi Molum eftirfarandi pistil: "Skemmtiþátturinn USA Today mælir með Íslandi sem helsta ferðamannastaðnum fyrir næsta ár. Ísland er á lista ásamt fimm öðrum löndum á vefsíðu USA Today." Svo segir á skemmtiþættinum visir.is - eða er það kannski vefsíða. USA Today er nefnilega eitt útbreiddasta dagblað Bandaríkjanna, en ekki skemmtiþáttur.  Takk fyrir þetta, Bjarni. Það er ekki mikilli þekkingu á fjölmiðlaheiminum fyrir að fara hjá þeim,sem þetta skrifar.

Þetta með forsetningarnar af og að er ekki einfalt mál. Í vefmiðlinum visir. is segir í dag (19.12.2009)... Varð uppvís af því í lok ágúst síðastliðinn og baðst afsökunar á því..,. eftir málkennd Molaskrifara verða menn uppvísir að einhverju, ekki af. Menn finna lykt af einhverju, en bragð að einhverju. Svo á auðvitað heldur ekki að  segja: ...í lok ágúst síðastliðinn...

 Gleði hjá ring í allan dag, auglýsir Síminn. Síminn er eitt þeirra fyrirtækja,sem kunna ekki að skammast sín fyrir atlögur gegn íslenskri tungu í auglýsingum.

 Gildismat Morgunblaðsins kemur einkar vel fram í laugardagsblaðinu (19.12.2009). Efst á forsíðu er fjögurra dálka fyrirsögn: Hlutabréf í 365 einskis virði samkvæmt verðmati.Vísað er á frétt á bls. 22 , þriggja dálka frétt þar sem sagt er nákvæmlega það sama og í forsíðufréttinni. Á besta greinastað í blaðinu, leiðaraopnunni, er löng grein eftir Baldur Guðlaugsson fyrrverandi ráðuneytisstjóra, sem  borið er á brýn að hafa nýtt sér innherjaupplýsingar til að hagnast um nær tvö hundruð milljónir á sölu hlutabréfa í Landsbankanum rétt fyrir hrun. Ekki skal fleira um þetta sagt.

Líklega verður um sinn  lítið eitt lengra milli Mola  en verið hefur að jafnaði.

 

 

 

RÚV biðjist afsökunar

Páll Magnússon útvarpsstjóri,, Þórhallur ritstjóri  Kastljóss og þeir sem að málinu komu hljóta að biðja Ögmund Jónasson afsökunar á  því sem sagt ar í Kastljósi kvöldsins((18.2.2009).

Hvílíkt endemis rugl um Ögmund Jónasson!

 

Sá sem skrifaði  eftirfarandi í vefmiðilinn visir.is  (18.12.2009)  skilur ekki muninn á því að  kjósa og greiða atkvæði.: .. var undir áhrifum áfengis þegar hann kaus á Alþingi í gær .. Umræddur þingmaður  var ekki að kjósa ,  hann var að greiða  atkvæði.

Ekki batnar fréttin þegar  fram í sækir:  Ekki kom fram hvaða mál hann var að kjósa um.

Það  hefur örugglega gerst nokkur þúsund sinnum  sinnum á Alþingi  að  þingmenn hafi tekið þátt í atkvæðagreiðslu eftir að hafa dreypt á dýrum veigum.  Það er ekki ekki til fyrirmyndar, en fjölmiðlar þurfa ekki að láta  eins og þetta sé eitthvað ,sem aldrei hafi gerst áður. Blaðamenn vita  betur.

 Ef menn mega aka  eftir að hafa drukkið eitt glas af rauðvíni, mega menn þá ekki greiða atkvæð'i eftir glas af víni?

Molaskrifari skilur Ögmund  vel,  að   vilja ekki í viðtal eftir að hafa  dreypt á víni með mat. Það er hinsvegar fráleitt hvernig Kastljósið sagði frá þessu máli.  Olli Ögmundur hneykslan á þingi? Varð hann sér til skammar ? Nei og aftur nei.    Það er þannig með suma að þ,sem Molaskrifari veit  úr ranni eigin reynslu að  það heyrist á mæli þeirra, hafi þeir drukkið eitt glas af léttu víni. Í gamla daga var  það þannig að ef Molaskrifari hafði verið í nánd við menn  sem  voru að gutla , þá heyrði betri helmingurinn það í símanum!

Ögmundur hélt fast  við reglu ,sem  fleiri  þingmenn ættu kannski að  tileinka sér.

Þetta var  Sjónvarpi ríkisins til skammar.

12 2009

by Eiður
posted in Uncategorized Edit
No Comments