Á villigötum?

Það  flögrar að að manni hvort umræðan  sé  komin á villigötur , þegar  fram koma þingmál um  fatalit  ungbarna á   fæðingardeild Landsspítalans.  Einhvernveginn finnst mér það. Það er komið   einhverskonar kapphlaup í  þessa svokölluðu jafnfréttisumræðu.   Þar vill hver  gera öðrum meira þannig að úr  verður  hrein vitleysa. Konur mega helst ekki lengur  heita  ráðherrar og þá sjálfsagt ekki sendiherrar heldur. Herra minn trúr, -  eða þannig !
Kemur kannski að því að   bannað verður að auglýsa  bækur fyrir  stráka og  bækur  fyrir stelpur ?  Það er aldrei að vita.
Minnist þess að  á æskuárunum   gleypti ég í mig     stelpubækur ekki síður en   strákabækur.Fékk þær  lánaðar hjá  stelpunum  jafnöldrum mínum  í Norðurmýri  bernskunnar Las Bennabækur og Beverly Grey,  Sögur  af Öddu  og   Jóa leynilögreglumanni.  Bláu bækurnar og   Dóru bækurnar hennar Ragnheiðar  Jónsdóttur.  Þetta var    fín blanda.

 

Fánýtt hjal

Lifandis ósköp er það fánýtt hjal að  starfsheitið  ráðherra snerti jafnréttismál með  einhverju móti. Við tölum um móðurmál  og  föðurland.

Konur  geta verið  drengir  góðir , eins og  frægt er um Bergþóru Skarphéðinsdóttur.

Drengskapur er ekki kynbundinn.

Verður næst lagt til atlögu gegn þessu ?

Samkvæmt íslenskri málvenju  fornri og nýrri eru konur menn.

Mælst er  til  þess að þingmenn  látið móðurmálið sem mest í friði.

Málfari verður  seint  ráðið með lögum.

En hvað hefði Þuríður formaður sagt?

Gagnrýni fjarlægð !!

Athugasemd  hér fyrir  stundu um þýðingarfjólu hjá Mogga varð  ekki  langlíf á  forsíðu  bloggsins.Moggi þýddi "tage afstand fra udtalelse" :" að fjarlægja sig  frá  gagnrýni" ,sem  er málleysa.

En Moggi var fljótur  að fjarlægja  gagnrýnina.

Hann fjarlægði hana sem  sagt frá sér ,  eða þannig !

Enn á hálu svelli !

Það er umhugsunarefni hve lítil rækt  virðist lögð  við málvöndun  og  prófarkalestur hjá  fjölmiðlum, sem  á stundum þykjast vandir að  virðingu sinni.Í þessum pistlum hefur  oft   verið bent á  aulaþýðingar og ambögur,sem víða vaða uppi.Í  dag er fjallaði Morgunblaðið  um flugöryggismál hjá SAS Þar segir:Í viðtali við Jyllandsposten segir John Dueholm yfirmaður SAS samsteypunnar að félagið fjarlægi sig frá þessari gagnrýni. „Við höfum orð yfirvalda fyrir því að flugöryggi SAS sé í lagi,” sagði hann.   En hvernig  var fréttin í Jyllandsposten? Hún var svona: »Vi tager stærk afstand fra Klevans udtalelser om, at der er et generelt sikkerhedsproblem i SAS. Vi har myndighedernes ord for, at flyvesikkerheden i SAS er i orden,« siger han. “Tager stærk  avstand fra Klevans udtalelser”, verður  hjá Morgunblaðinu:“..að  félagið fjarlægi sig  frá þessari gagnrýni..” Það er ekkert  til á íslensku sem heitir  “  að  fjarlægja sig  frá  gagnrýni”. Slíkt orðalag er  rugl og  fyrir  neðan virðingu  Morgunblaðsins.Þarna hefði  átt að standa að  félagið hafnaði þessari gagnrýni alfarið  eða  vísaði henni  algjörlega á  bug. En málleysur  eru  víða á  ferð.  Heyrði útundan mér að þingmaður  í  ræðustól talaði um “bullandi hæfar konur”. Slíkt  tal  eru auðvitað bara bull.Það er  nóg að  segja hæfar konur. Bullandi er  svo sannarlega ekki til bóta.

Hið hála svell

Mörgum verður hált á því svelli sem þýðingar úr einu máli  á annað eru. Blaðamaður  Mogga þýddi á sínum tíma  myndasögu um James Bond   með eftirminnilegum hætti. Í enska  textanum stóð:" The fake policeman went  to the Bulgarian´s  hideout". Í þýðingu Mogga varð þetta   einhvern veginn svona:" Lögreglumaðurinn Fake  fór  til Búlgarans Hideout".

Svipað henti blaðamanna Fréttablaðsins í morgun. Sá  var að  ræða um  hve  auðvelt  væri að  snúa heitum kvikmynda á íslensku. Hann nefndi  sem   dæmi ,að ekki væri mikið mál að þýða Mr. Woodchuck, sem  Hr. Woodchuck og   Rogue Assassin sem  Rogue  leigumorðingi.   Nú er það reyndar svo að assassin er ekki endilega leigumorðingi heldur sá  sem  ræðst á annan , oft úr launsátri,  í þeim tilgangi að meiða  eða  drepa. Oft er þetta notað um þá sem myrða vegna   trúarofstækis. Rogue  er ekki mannsnafn, heldur  þýðir það , skúrkur, prakkari,  svindlari  svo nokkuð sé  nefnt. Á upphafsárum  sjónvarpsins var sýnd þáttaröð ´,bresk minnir mig, sem  hét "The Rogues". ´Hún var í sjónvarpinu nefnd "Bragðarefirnir" og var það réttnefni.

Það er sem sé  betra að fara varlega.

"..með óbundnu slitlagi.."

Farþegar þurfa sem sagt  eftir sem áður að   drösla  pjönkum sínum eða  draga  þær  í gegnum  drullupolla á malarplani. Glæsilegt !

Hversvegna ekki að hafa  almennileg  bílastæði og láta  greiða  sanngjarna þóknun  fyrir að  geyma  bíla þar ?

Bílastæðum við Reykjavíkurflugvöll fjölgað um helming

Gráir fyrir járnum?

 Ég hjó eftir því í fréttum útvarps  og sjónvarps (RÚV) í kvöld  að sagt var að lögreglumenn "gráir fyrir járnum" hefðu beðið  svokallaðra  "vítisengla" í Flugstöð Leifs Eiríkssonar. Að vera  grár fyrir járnum þýðir samkvæmt minni orðabók að vera með alvæpni. Eftir myndum að dæma  voru lögreglumennirnar  ekki með alvæpni.

Það er gott að grípa til orðatiltækja, en menn verða þá að kunna að nota þau.   Hafi  lögreglumennirnir  verið með  alvæpni ,þá hafa  þeir   vissulega  verið  gráir fyrir járnum ,og þá  dreg ég þessa  athugsasemd  auðvitað til baka.