Molar um málfar og miðla 474

 Í  fréttum  Ríkissjónvarpsins á kjördag (27.11.2010) var rætt við  formann landskjörstjórnar, sem fréttamaður kallaði yfirmann landskjörstjórnar.  Hvernig  hefur þetta verið  svona  heilt yfir  spurði   fréttamaður  formanninn. Heilt yfir? Það var líka einkar ófaglegt að ætlast  til þess að formaður landskjörstjórnar lýsti  vonbrigðum með  dræma kosningaþátttöku. Fréttamaður  sem segir:  Dáldil traffík og misjafnt er hvenær kjörstöðum lokar , þarf  meiri þjálfun áður hann er settur á skjáinn og   sendur inn í stofu til okkar. 

 Þeir sem ætla að hlusta á fréttir í Ríkisútvarpinu klukkan 17 00 á laugardögum   grípa  í tómt.  Fréttastofu  ríkisins  þóknast ekki að hafa  fréttir þá  eins og  virka daga. Þá  er  bara að hlusta á  Bylgjuna. Þar eru fimmfréttir á laugardögum.

Samkvæmt fjárlagafrumvarpinu á að fækka um 96 starfsmenn sem nemur 69 starfsmönnum á  St. Jósefsspítala. Skilur einhver þetta?  Tilvitnunin  er úr grein eftir  þingmann Framsóknarflokksins í Fréttablaðinu  27. 11.2010. Hér er  svo setning úr  dv.is (27.11.2010): „Kristkirkja á Íslandi ætlar ekki lengur að koma illa fram við hvort annað,“ sagði Símon Geir Geirsson, úr Fíladelfíukirkjunni... Aftur er spurt: Skilur einhver þetta?

 Heimildamyndin Aldrei aftur, sem  Ríkissjónvarpið sýndi á sunnudagskvöld  (28.11.2010) var of löng. Þar var illa farið með áhugavert  hráefni. Samhengi var stundum ábótavant, en ágætum tilþrifum brá  fyrir,  til dæmis viðtölum  við gömlu konurnar á Guernsey, öllu heldur frásögnum þeirra. Það var áhrifamikið. Myndina hefði mátt stytta um allt að því helming eða gera   tvær  styttri myndir með betri klippingu og leikstjórn. Lokaatriðið á Þingvöllum  hefur ekki verið ódýrt í uppsetningu  og var meira en   hallærislegt.

Molar um málfar og miðla 473

  Auglýsingastofur, stórfyrirtæki og nokkur veitingahús hafa að undanförnu lagst á  eitt  að troða  slettum inn í málið. Þessar slettur  eru  tax-free dagar (Þegar veittur er afsláttur ,sem nemur virðisaukaskattsprósentunni), outlet (einskonar verksmiðjuútsala) og  bruns eða bröns(veglegur  hádegisverður, oftast á laugardegi eða  sunnudegi, blanda úr ensku orðunum breakfast og lunch). Þessir aðilar eru að vinna  óþurftarverk með skipulagðri málmengun.

 Mjög góður Tungutakspistill Baldurs Sigurðssonar, Orðfæðarstefnan, í Sunnudagsmogga.

  Að lausn væri að vænta, - sagði fréttamaður  Ríkisútvarpsins í sexfréttum (26.11.2010). Hefði átt að segja að lausnar væri að vænta. Sami fréttamaður sagði:  .. til handa  skuldavanda heimilanna. Ekki  gott orðalag.

 Úr mbl.is (27.11.2010): Ríkasti maður Indlands, milljarðamæringurinn Mukesh Ambani, hélt nýverið innflutningsveislu á nýbyggðu heimili sínu, sem er talið vera það stærsta - og dýrasta - í heimi.  Það er ekki íslensk málvenja að tala um að byggja heimili. Fólk  byggir hús, en stofnar heimili. Innflutningsveisla. Það var og.

  Nokkrum þraut þolinmæði,sagði  fréttamaður Ríkissjónvarps (26.11.2010). Molaskrifari er á því að betra hefði verið: Nokkra þraut þolinmæði...  verið var að  segja  frá biðröðum við utankjörfundaratkvæðagreiðslu í Reykjavík.

Morgunblaðið er nú í brúarvinnu. Það er að byggja  brýr  til VG.  Blaðið kemur Jóni Bjarnasyni ráðherra hraustlega til varnar í leiðara vegna ómaklegra   persónulegra árása. Þingmaður VG  Atli Gíslason fær  svo  drottningarplássið í leiðaraopnunni, - miðjuna úr hægri síðunni. Undir hvað?  Undir  grein  sem  harkaleg árás á  ESB. Ja, hérna. 

Skondin er auglýsing  veitingastaðarins Thai A á Akranesi í  Útvarpi Sögu um taílenskt  jólaborð!. 0.7% íbúa Thailands  eru kristinnar trúar og halda væntanlega heilög jól .  Rúmlega 94% eru Búddistar og  5% Múslímar. Þeir vita varla hvað jól eru. Þetta minnir á þegar veitingastaður auglýsti kínverskt  jólaborð !  Þeir sem þekktu kokkinn höfðu vit á að borða heldur heima.

  Ríkisútvarpið þrjóskast við að kalla Hringekjuna á laugardagskvöldum  skemmtiþátt.  Það er hún ekki.

  Eftir fréttum að dæma er meginhlutverk sumra upplýsingafulltrúa í stjórnarráðinu að láta fjölmiðla alls ekki ná til sín. Það eru auðvitað upplýsingar líka.

Molar um málfar og miðla 472

 Eftirfarandi setningarbrot úr dv.is (26.11.2010) er lýsandi dæmi um skort á máltilfinningu: Kostnaðurinn nemur um tvær milljónir króna ...  Hér  ætti að standa: Kostnaðurinn nemur um tveimur milljónum króna. 

 Annað dæmi um skort  á máltilfinningu úr hádegisfréttum Ríkisútvarpsins (26.11.2010): Sameiginlegt mat á umhverfisáhrifum vegna  álvers við Bakka á  Húsavík var skilað í gær....  Mat var ekki skilað, heldur var mati skilað.  Er það  í rauninni svo að það les enginn yfir  það sem álfarnir  skrifa áður en því   er hellt yfir okkur hlustendur ?

 Það ætti að vera vinnuregla í Ríkisútvarpinu  að  segja þannig  frá ártölum, að  allt ártalið sé  nefnt , ekki bara tveir síðustu tölustafirnir.  Í útvarpsþætti (26.11.2010) var talað um  smáskífu, sem komið hefði út árið  sjötíu og  sex ! Glöggir  hlustendur hafa þó  líklega áttað sig á því ,að hljómplötuútgáfa var  ekki hafin árið  sjötíu og sex og  ekki einu sinni átjánhundruð sjötíu og  sex. Ríkisútvarpið á að forðast svona latmæli.

  Lýsingarorðið vinsæll stigbreytist,  vinsæll, vinsælli, vinsælastur. Miðstigið er ekki vinsælari eins og þáttastjórnandi í   Útvarpi Sögu sagði (26.11.2010)

Það er bara  það sem þeir kalla  discrimination, sagði  stjórnarformaður Útvarps Sögu (26.11.2010). Er það ekki  rétt munað að útvarpsstjóri   þessarar stöðvar hellti sér yfir konu,sem vildi  fá að tala  ensku, er hún hringdi til stöðvarinnar ?  Orðið  discrimination er nefnilega enska. Útvarpsstjórinn ætti  að byrja  á því að tala  við stjórnarformann sinn. Hæg eru heimatökin. Það er góð regla að  byrja  tiltektina heima hjá sér.

Molar um málfar og miðla 471

   Kjörstaðir opna klukkan tíu, sagði fréttamaður Ríkisútvarpsins í hádegisfréttum (26.11.2010). Er mönnum alveg  fyrirmunað að nota  sögnina að opna rétt ?  Kjörstaðir opna  hvorki eitt  né neitt. Kjörstaðir verða  opnaðir  klukkan tíu. Ótrúlegt. Hvað segir málfarsráðunautur? Er hann ekki örugglega enn við  störf?

  Var leitað til íslenskra dómara með aðstoð, sagði íþróttafréttamaður Ríkisútvarpsins í sexfréttum (25.11.2010) Hér hefði  fréttamaður átt að  segja að leitað  hefði  verið til íslenskra dómara um aðstoð.

 Líklega  var Molaskrifari ekki einn um að verða hissa á að heyra ráðherra  lýsa vonbrigðum með „að Hæstiréttur  skuli hafa metið meira  bókstafsskilning  á eignarréttarvernd kröfuhafa  heldur en vernd einkalífs og heimilis  eignalauss  fólks". Á ekki Hæstiréttur að  dæma  eftir  bókstaf laganna ? Ef bókstafur laganna  er  rangur  að mati ráðherra og þingmanna eiga þeir að breyta lögunum ,en ekki skamma Hæstarétt.

   Einfaldar lausnir við erfiðum vandamálum var sagt í sjónvarpsauglýsingu (25.11.2010) í Ríkissjónvarpinu. Molaskrifari hallast að því að  rétt sé að tala um lausnir  á  vandamálum, ekki við vandamálum.

  Af mbl.is (266.11.2010): Lögregla á eftirliti veitti ferðum þeirra athygli ...  Hér hefði verið betra að segja: Lögreglumenn í eftirlitsferð veittu ferðum þeirra athygli, -  verið var að segja frá innbrotum í sumarhús í Grímsnesi.

 Það var hárrétt, sem Eiríkur Tómasson prófessor  sagði í Ríkissjónvarpinu í k völd: Íslensk  stjórnmál eru frumstæð.  Við sáum þetta rækilega í fréttatímum beggja sjónvarpsstöðvanna í kvöld (18.11.2010)

  Merkilegt fréttamat hjá  Ríkissjónvarpinu okkar, að  frétt um að  Svarthöfðabúningur úr kvikmynd hafi ekki  selst á uppboði í Lundúnum, skuli hafa ratað inn í aðalfréttatíma  kvöldsins. Þetta var einhver mesta „ekki frétt", sem Molaskrifari hefur lengi séð. Ekki margt fagmannlegt við svona fréttamat. Þá má  auðvitað líka  um það deila  hvaða  erindi  óléttufréttir eiga í fréttatíma Ríkisútvarpsins. Katrínu Jakobsdóttur  er  hinsvegar óskað til hamingju með að eiga  von á sínu þriðja barni.

 Glöggur lesandi sendi eftirfarandi athugasemd (25.11.2010):  „Verð að vekja athygli á þessari setningu úr bloggi Þorbjargar Marínósdóttur (Tobbu) á DV.is:„Þessir ungu strákar uldu miklum usla á Akureyri á síðasta ári með skemmdaverkum sinum.“Oft hefur maður séð sögnina að valda vefjast fyrir fólki, en þetta held ég að toppi allt saman." Þetta er eiginlega  alveg sérstakt  afrek !

Molar um málfar og miðla 470

  Í frétt Morgunblaðsins (24.11.2010) um  framkvæmdir  í grennd  við náttúruperlu í Noregi segir: „Ferðamenn leggi bílum sínum við veitingastaðinn, borgi sem svarar  1200 kr fyrir bílastæðið og  og þaðan liggi  gönguleiðir um fjallið og næsta nágrenni". Svo ætla talsmenn ferðaþjónustunnar á Íslandi að ganga af  göflunum ef  rætt er um  smávægilega  gjaldtöku   við íslenskar náttúruperlur, sem   nú eru margar hverjar í eyðileggingarhættu  vegna mikillar umferðar og áníðslu.  Við getum margt lært af Norðmönnum um ferðamennsku.

   Talsmanni  Arion banka tókst að  segja að minnsta kosti þrisvar sinnum: Við erum að sjá ,  við erum ekki að sjá,þegar rætt  var um verðbólguhorfur í hádegisfréttum Ríkisútvarpsins ((25.11.2010)

  Gaman er að geta fylgst með fréttum  japanska NHK World News   og  hins  kínverska CCTV 9  af  atburðum á Kóreuskaga. Kínverjar taka ekki mikið upp í sig  og  stíga varlega til jarðar. Hafa til dæmis ekkert sagt um hvor   hleypti  af fyrsta skotinu. Japanir ganga aðeins lengra. Þeir  segja framferðir Norður Kóreru  hættulegt  óafsakanlegt. 

  Nýlega var þeirri spurningu varpað fram í Útvarpi Sögu hvort íslenskir  fjölmiðlar  almennt  væru frjálsir, - þ.e. lausir  við áhrif eigenda sinna. Þetta  kalla  stjórnendur  stöðvarinnar  skoðanakönnun, sem það auðvitað er ekki, - langur vegur frá.   453 svöruðu á vefsíðu stöðvarinnar. 80.09% töldu að fjölmiðlar  væru ekki frjálsir. 18.36%  töldu  fjölmiðla frjálsa,  1.55% voru hlutlausir.  Ef kalla á  Útvarp Sögu  fjölmiðil, þá  er líklega  leit að miðli , sem  bergmálar skoðanir   eigenda og stjórnenda sinna jafn purkunarlaust og gert er í Útvarpi Sögu.  Það var  hinsvegar meiriháttar skemmtiatriði að  hlusta á  stjórnarformann Útvarps  Sögu  skýra  frá úrslitum þessa samkvæmisleiks stöðvarinnar. Molaskrifari þorir ekki  freista þess að búa til tengil á  dáraskapinn, enda yrði hann líklega umsvifalaust  kærður  fyrir  óheimila notkun á útvarpsefni úr Útvarpi Sögu. Þeir sem hafa  áhuga á  geta sjálfsagt fundið  þetta á netinu   en þetta var óborganlegt í alla staði !

Molar um málfar og miðla 469

    Í sexfréttum  Ríkisútvarpsins (23.11.2010)  sagði talsmaður  Íslandspósts, ekki einu sinni heldur tvisvar:  Ef fólki vantar.... Þegar fyrirtæki senda  fólk í  fjölmiðla á að velja   fólk,sem  er sæmilega talandi.

   Molaskrifari hnaut um eftirfarandi fyrirsögn í Morgunblaðinu (23.11.2010): Hagsmunir sjóðsins  rekast á. Þetta hljómar ekki rétt í   eyrum Molaskrifara. Því ekki er sagt  á hvað hagsmunirnir  rekast.Í fréttinni segir: „ Þannig gætu hagsmunir sjóðsins, t.d. af  háu íbúðaverði og góðri stöðu lántakenda rekist á  tækifæri hans til að kaupa  húsnæði inn í leigustarfsemina".  Að  tala um að kaupa  húsnæði inn í leigustarfsemina er ekki gott  orðalag í  umsögn Seðlabanka Íslands um  lagafrumvarp.  En hvað segja  lesendur um fyrirsögnina?

 Kastljós  kvöldsins var athyglisvert.  Einkum  vegna  greiningar Helga Seljans á  ótrúlegu  braski og  hlutverki bankanna í þeim leik. Maður varð eiginlega kjaftstopp. Kvótakerfið  elur af sér  alls kyns  spillingu út um allar trissur. Ef hlutirnir eru í lagi og allt  heiðarlegt hversvegna þarf þá að  stofna óteljandi fyrirtæki? Eitthvað er verið að fela. Slóðir og fé?  Athyglisvert  var líka viðtalið  við  Geir Sigurðsson forstöðumann  Asíuseturs Háskóla Íslands um ástandið á Kóreuskaga. Geir nam í Kína og  er fróður um þennan heimshluta.  Molaskrifari hefur tvisvar heimsótt höfuðborg Norður Kóreu, Pyongyang. Ömurlegur og ógleymanlegur  staður. Einnig  var fróðlegt að heimsækja Panmunjon   á norðurmörkum Suður Kóreu og  kínversku borgina Dandong við  Yalufljót, sem  skilur að Norður Kóreu og Kína. Árlega koma út á  ensku  fjölmargar bækur um þetta einkennilega ríki. Þær  einkennast  fyrst og fremst af því að þar eru menn að geta í eyðurnar.

  Það fer ekki hjá því  þegar maður hefur  aðgang að beinum útsendingum  frá  Alþíngi og úr  neðri málstofu breskas  þingsins að maður  beri  þessar  tvær  stofnanir saman. Sá samanburður er Alþíngi Íslendinga ekki í hag. Það sem  sýnt var í sjónvarpsfréttum (23.11.2010) minnti   fremur  á köll  götustráka  en  virðulega  löggjafarstofnum. Of   margar   ræður  úr  ræðustóli Alþingis  eru gaspur og gaul . Milli kosninga keppa þingmenn um hylli fjölmiðlanna.

  Merkilegt að það skyldi teljast fréttnæmt (23.11.2010) að  dómsmálaráðherra ætlaði ekki að hafa afskipti  af máli sem nú er   til  meðferðar hjá  dómstólum. Það hefði verið  frétt og  ekki lítil ef  ráðherra  hefði farið að  ráðskast með  störf  dómstóla í einstökum málum. Samþykkt  flokksráðsfundar VG var þessvegna ótrúlega vitlaus. 

  Hvað í ósköpunum er forseti Íslands að þvælast  til Abu Dhabi, þótt verið sé að taka  nýtt stórhýsi í notkun þar ? ( Það er örggulega ekki verið að vígja húsið eins og  sagt  er í fréttum). Ef  íslenska  ríkið  borgar  þessa ferð, er það  rangt. Ef  forseti er að þíggja  boð auðmanna úr   hópi  vina sinna , er það líka rangt.  Þjóðhöfðingi Íslands hefur þarna ekkert að gera. Hefur hann  ekkert  lært af reynslunni við að nudda sér utan í auðmenn af ýmsu þjóðerni ?  Greinilega ekki. Kannski er hann þó betur kominn þarna en á leynifundum á   Bessastöðum um myndun  svokallaðrarar neyðarstjórnar. Og  svo líður  honum  náttúrulega  betur innan um  ríka  fólkið en hjá kreppukotungum Íslands.

Molar um málfar og miðla 468

   Það er ofur eðlilegt að  þeir sem lesa  fréttir eða segja   mismæli sig. Þá er  bara að leiðrétta mismælið og halda ótrauður áfram.  Ef mismælið er  ekki leiðrétt eru  líklega  fyrir því  tvær  ástæður.   Sá sem  mismælir sig veit ekki betur og  heldur að hann   sé  að lesa það sem rétt er. Hin ástæðan er sú að hann viti betur en hlusti ekki á eigin lestur og heyri því ekki mismælið.  Eitt   það fyrsta sem  fréttamenn ,sem  flytja  talað  mál  þurfa að tileinka sér,  er að hlusta  á það sem þeir  lesa.

   Í miðnæturfréttum Ríkisútvarps ( 22.10.2010) var sagt:  Mikil ísing er nú á vegnum. Átti að  vera  á vegum. Í morgunþætti  Rásar  tvö, þar sem málfar er oft ekki  upp á marga fiska , var  talað um  fólk sem horfið hefði sporslaust. ( Leiðrétt síðar)  Sami umsjónarmaður  talaði um fullt  tungl  og  sagði að  fjöllin á tunglinu hefðu sést bersýnilega. Hann átti við að greinilega hefði mátt sjá  fjöllin á tunglinu, líklega með  berum augum.  Það eru ekki alltaf gerðar miklar kröfur um íslenskukunnáttu til þeirra sem  sjá um fasta þætti  í Ríkisútvarpinu. Með því að ráða  þáttagerðarfólk sem  talar óvandað mál  spillir  Ríkisútvarpið tungunni.

   Í ágætu spjalli um  daglegt  mál á Rás eitt (22.10.2010)  var rætt um  orðið  svefnpurka og bæjarnafnið  Purkugerði, sem   er til  bæði á Íslandi og í Færeyjum.  Bæta má  við að í Færeyjum er líka til ættarnafnið Purkhús.

  Mörg fyrirtæki er  með svokölluð  símaver í stað þess sem einu sinni var  kallað skiptiborð. Í símaverum eru  oft þjónustufulltrúar sem    svara spurningum  viðskiptavina.  Miklu skiptir  að þetta fólki kunni að  svara í  síma. Molaskrifari er  til dæmis aldrei sáttur  við að heyra: Hinkraðu  aðeins fyrir mig !  Eða: Hinkraðu á línunni ! Þegar  Molaskrifari  þakkar veitt  svör eða þjónustu kemur fyrir að  sagt   er:  Gjörðu svo vel ! Slíkt  svar er  auðvitað út í  hött.

Molar um málfar og miðla 467

   Réðust á par af tilefnislausu , segir í fyrirsögn á dv.is (21.11.2010). Hér  hefði átt að standa: Réðust  á par að tilefnislausu.

  Úr mbl.is  (22.11.2010): Júlíana Grétarsdóttir hafnaði í 19. sæti og Heiðbjört Arney Höskuldsdóttir í 26. sæti af 38 keppendum í novice-flokki á Opna Varsjármótinu í listhlaupi á skautum um helgina.  Orðið  novice er  enska og þýðir  nýliði. Þessvegna  hefði átt að segja, að stúlkurnar hefðu keppt í nýliðaflokki

  Glöggur lesandi  benti Molaskrifara á  frétt í Fréttatímanum (19.-21.11.2010), en þar stendur: Verslunin hyggst  bjóða bókina á hálfvirði frá og með  deginum í dag og  með skilarétti þar til birgðir endast. Eitthvað er athugavert við hugsunina í þessu.  Hér  hefði  setningunni  annaðhvort átt að ljúka á orðunum  meðan   birgðir endast,  eða þar til birgðir þrýtur.

   Á fundi VG  var  hart deilt um tvær  tillögur um sama mál (20.11.2010). Sú tillaga vann,  sagði fréttamaður  Ríkissjónvarpsins um þá tillögu er hlaut  meiri stuðning.  Molaskrifari   er ekki  sáttur  við að  nota  sögnina  að vinna  um  tillögu. betra  hefði verið: Sú tillaga var samþykkt.

   Það þurfti að sparka nokkuð oft og  fast í okkar  gamla   Ríkisútvarp  svo  ráðamenn þar áttuðu sig á því að þeir  gátu ekki vikist undan því að kynna  frambjóðendur,  sem eru í kjöri  til  Stjórnlagaþings.

 Úr visir .is  (21.11.2010): Hann vafði plastpoka um fætur sínar og límdi þá fasta til að skilja ekki eftir skóför. Hann setti á sig latexhanska og lambhúshettu og klæddi sig í stóra úlpu og gekk svo síðustu metrana að húsi Hannesar með hnífi í hendi.  Hugmyndina að því að undirbúa sig á þennan hátt segist Gunnar hafa fengið úr bíómyndum og sjónvarpsþáttum á borð við CSI. Í blaðagreinum kallaði Helgi Hálfdanarson  Sjónvarpið oft   Afbrotaskóla ríkisins.

   Merkilegt er hve  þáttastjórnendur í fjölmiðlum eru  glúrnir að hafa uppi  allskonar sérfræðingum sem spá því með  alvörusvip og miklum þunga, að allt  sé á heljarþröm. Lífeyrissjóðakerfið sé að hrynja , ef  ekki hrunið,  heilbrigðiskerfið sé að  hrynja,eða hrunið   og  svo framvegis. Sem  betur  fer hafa allir  heimsendaspámenn fram til þessa haft á  röngu að  standa. En  fjölmiðlamenn hafa of  ríka tilheigingu  til að kokgleypa  svona  stóryrði gagnrýnilaust. Um það eru alltof mörg  dæmi að undanförnu.

Molar um málfar og miðla 466

  Ferðaskrifstofan  Iceland Express hvetur Íslendinga til að  sniðganga verslanir á Íslandi og gera jólainnkaupin í New York.  Ferðaskrifstofan auglýsir í Ríkisútvarpinu (19.11.2010): Hvernig væri að versla  jólagjafirnar í Bloomingdale... (Bloomingdale  er  þekkt  stórverslun í New York). Það kemur ekki á óvart, að frá þessari ferðaskrifstofu komi auglýsingar á  vondu máli , en  svolítið kemur á óvart að ekki virðist  lengur   fólk  við störf í auglýsingadeild  Ríkisútvarpsins sem kann íslensku.  Við verslum  ekki jólagjafir. Við kaupum jólagjafir. Við getum verslað í New York. en það er afleit ambaga og Ríkisútvarpinu ósæmandi að tala um að versla jólagjafir.  

  Ólafur Þór Hauksson segir rannsóknina miða vel, sagði fréttamaður Ríkisútvarpsins í  kvöldfréttum (19.11.2010). Sami fréttamaður sagði:  Tugir fyrrverandi starfsmenn Glitnis....  Fréttamenn, sem heyra ekki svona  villur í máli sínu eiga  ekki að segja okkur fréttir. Á hvað skyldi rannsóknin hafa verið að miða ? Óboðlegt málfar.

 Þegar þessu verkefni  lýkur , vantar föngunum meira að gera , sagði fréttamaður Ríkissjónvarpsins á Suðurlandi  í kvöldfréttum (19.11.2010).  Þágufallssýki er læknanlegur sjúkdómur. Kannski ætti málfarsnautur að bregða sér í læknishlutverk, nema hið alræmda umburðarlyndi banni. 

    Birgitta Haukdal var  fín og falleg í Hringekju Ríkissjónvarpsins (20.11.2010). Hún var líka næstum það eina sem var gott við þáttinn. Það er reyndar  fyndið að þetta skuli heita skemmtiþáttur.  Ég tek læk á þetta,  sagði svo umsjónarmaðurinn.  

 Af þremur kvikmyndum laugardagskvöldsins í Ríkissjónvarpinu eru tvær  endursýndar, sé gluggað í  prentaða dagskrá í blöðunum. Makalaust og fyrir  neðan allar hellur.

  Og svo í lokin  svolítið  um Útvarp Sögu aldrei þessu  vant! Molaskrifari ætlaði  að hlusta á  Sigurð Þ. Ragnarsson í Leið og beið. Enginn Sigurður. Bara  auglýsing þar sem ungt  barn (Hvernig má nota börn í auglýsingum?)  er látið segja: Velkomin á  fætur með Útvarpi Sögu. En það virtist enginn kominn á fætur þar á bæ. Það var ekki fyrr  klukkuna vantaði  tuttugu mínútur í átta  að hlustendur  heyrðu  ómþýða og geðþekka morgunrödd útvarpsstjórans. Kannski svolítið svefndrukkna.  Útvarpsstöðvar eiga að standa við auglýsta dagskrá og  biðja hlustendur afsökunar, ef  dagskrá  raskast.

Molar um málfar og miðla 465

   

 Það er mikil nýbreytni í íslenskri pólitík, að  nú skuli ekki ganga  hnífurinn  á milli þeirra sem áður  voru traustustu stuðningsmenn  vestrænnar samvinnu (Styrmis, Björns og  Davíðs) og  sumra helstu kommaleiðtoga Alþýðubandalagsins,   Ragnars Arnalds, Hjörleifs og Ragnars jarðskjálftafræðings og félaga. Bandaríkjamenn hafa löngum sagt að undarlegasta fólk sængi saman í pólitík ( e. politics makes strange bedfellows). Það á einkar vel við hjér hjá okkur líka.

Hvort þetta einkennilega bandalag   er landi og þjóð til heilla  er svo allt önnur  saga.  

Skrifað er á pressan.is (18.11.2010): Húsið var þá í niðurníslu og lögðust þau í miklar endurbætur á heimilinu.  Hér er átt við að gerðar hafi verið  endurbætur  á húsinu. Svo er það  dálítið  andkannalegt  að tala um að leggjast í endurbætur. Þar að auki leggjast menn ekki í endurbætur á heimili.   Hús er ekki heimili.  Stundum er hinsvegar talað um að leggjast í leti og ómennsku.   Sæmilegt  hefði verið að segja: Lögðu þau í miklar endurbætur.  Svo er það að láta eitthvað drabbast niður  að  láta það fara í niðurníðslu, ekki  niðurníslu.

   Hundasnyrtir á heimsmælikvarða var eitt af viðfangsefnum  föstudagskastljóss Ríkissjónvarpsins.  Þátturinn sannaði það, sem hér hefur verið sagt, að Kastljós er ekki lengur  fréttaskýringaþáttur, heldur langur  auglýsingaþáttur, þótt  athyglisvert efni slæðist með á stundum.

   Gaman var  að hlusta á Robert Christie, sagnfræðing, blaðamann og geðhjúkrunarfræðing í morgunútvarpi Útvarps Sögu (18.11.2010). Þar var á  ferðinni Skoti, búsettur í Írlandi,sem  talaði óaðfinnanlega  íslensku. Betur  máli  farinn en   sumir sem hafa  útvarpsmennsku að atvinnu. Ótrúlegur. Lýsing  hans á   fjármálahremmingum  Íra var  skýr og vel fram sett.

  Útvarp  Saga  er iðið við að halda  rangfærslum að  hlustendum.  Sagt var  (18.11.2010 og líklega daginn áður líka) að 98% þjóðarinnar hefðu hafnað  Icesave  í þjóðaratkvæðagreiðslu. Það  var þjóðaratkvæðagreiðslan arfavitlausa,sem Ólafur  Ragnar efndi til þar sem  greidd  voru atkvæði um samning ,sem ekki var lengur til umræðu. Annar  samningur lá fyrir í hans  stað.

   Á kjörskrá á Íslandi voru 229.977 í þjóðaratkvæðagreiðslunni 6. mars 2010. Kjörsókn var  rúmlega 62%  eða 144.231. Þar af vildu  134.397 hafna   því sem  verið var að greiða atkvæði um  eða  58.4 %. Hvermig  geta  58%  kjósenda  verið  98% þjóðarinnar  eins og  sagt var í  Útvarpi Sögu? Þetta er  auðvitað rangfærsla, hrein ósannindi, svo talað sé skýrt.  Við sem  sátum heima  vegna þess að atkvæðagreiðslan var  rugl frá upphafi til enda,  tilheyrum sem sagt ekki þjóðinni.  Það hvarflaði ekki að m,ér að til væru menn með lagapróf úr  Háskóla Íslands sem gætu reiknað  svona  vitlaust eða  héldu slíkri að þjóðinni.

Ósannindin um 98% þjóðarinnar voru enn endurtekin í Útvarpi Sögu 19.11.2010. Það gerði frambjóðandi stöðvarinnar til stjórnlagaþings, Pétur Gunnlaugsson lögfræðingur.  Á fólk að treysta þeim,sem umgangast sannleikann með þessum hætti?  Útvarp Saga  hælir vissum  frambjóðendum til  stjórnlagaþings, en níðir aðra daginn út og daginn inn.

   Önnur ósannindi,sem haldið var að hlustendum (18.11.2010) Útvarps Sögu var, að ekkert aðgengi væri  fyrir fatlaða við inngang  húss  TR á horni Laugavegar og  Snorrabrautar. Sannleikurinn er sá  að þar eru tvö   bílastæði sérmerkt  fötluðum við  dyrnar og  þar er skábraut  fyrir hjólastóla. Þannig hefur þetta verið í mörg ár. Það er erfitt að ljúga meiru. Þá er því ítrekað haldið að hlustendum að  snittumóttaka  fyrir  fulltrúa  á Norðurlandaráðsþingi hafi  kostað  50 milljónir. Það er  er auðvitað ósatt. En  stjórnendum  finnst það líklega hljóma vel.

   Stendur ekki í góðri bók: Sannleikurinn mun gera yður frjálsa.