Molar um málfar og miðla CLXXVII

 

Nýr fréttatími Morgunblaðsins og Skjás eins sá  dagsins ljós í kvöld (15.10.2009), ef þannig má að orðið komast. Um fréttatímann er svo sem lítið að segja. Engin straumhvörf. Molaskrifara fannst hinsvegar sviðsmynd og umhverfi fréttaþularins,sem skilaði sínu ágætlega, einstaklega lítið spennandi.

 

  Ekki heyrði Molaskrifari betur í fréttum Stöðvar tvö (14.10.2009), en fréttamaður talaði um að: ... málið verði áfrýjað. Þetta var í frétt um kröfur í þrotabú gamla Landsbankans. Hafi Molaskrifara misheyrst , er beðist afsökunar á að nefna þetta, en hafi hann heyrt rétt, er þetta afleit ambaga. Hvað segja aðrir sem hlýddu á fréttir Stöðvar tvö á miðvikudagskvöldið? Í sömu frétt var líka talað um að þjónusta kröfuhafa. Ekki er Molaskrifari sáttur við það orðalag, en það er  orðið býsna algengt.

  Yfirleitt er fólki boðið að koma í viðtöl í ljósvakamiðlum til að greina frá skoðunum sínum , segja álit sitt  á einhverju. Það var einkennilegt að hlusta á viðtal við forseta ASÍ á Rás tvö í Ríkisútvarpinu á Morgunvaktinni (14.10.2009). Annar spyrjenda greip í sífellu í fram í fyrir þeim sem sat fyrir svörum og virtist eiga erfitt með að leyfa viðmælenda að tala út. Þetta gerist líka stundum í Kastljósi. Þegar RÚV ræður  nýtt fólk til starfa í þáttum sem mikið er hlustað á og í ljós kemur að viðkomandi veldur ekki verkefninu á að bregðast við. Það er nóg af ágætu fólki innan RÚV. Þetta viðtal við forseta ASÍ var ógott. 

   Margir hafa stundað lýðskrum um tíðina, en Sjálfstæðisflokkurinn slær öll sín fyrri met. Þetta skrifar Jónas Kristjánsson á bloggi sínu. Hann hefði mátt geta þess, gamli Framsóknarmaðurinn, að í lýðskruminu stendur Framsóknarforystan jafnfætis Sjálfstæðisflokknum, ef ekki feti framar. Og fjölmiðlar halda áfram að bíta á úldið agnið.  

 

Kiljan er með allra áhugaverðasta efni RÚV sjónvarps. Föstu liðirnir þykja Molaskrifara bestir. Þau Kolbrún og Páll Baldvin og  Bragi Kristjónsson í sínu Rykkorni, eða ari. Maður verður alltaf svolítið ríkari eftir að hafa hlýtt á fjölfróðan Braga miðla menningarmolum,sem mikils virði er að halda til haga. Gott var (14.10.2009) að heyra hann segja í Siglufirði.

 Útvarp Saga kallar sig þjóðarútvarp!! Verstu útvarpsþættir ljósvakans eru þegar útvarpsstjóri Sögu og sá sem stjórnar þætti ,sem kallaður er Rödd alþýðunnar, eru á dagskrá og taka við símtölum frá hlustendum. Það er engu líkara en þröngur hópur kverúlanta sé áskrifandi að aðgangi að þessum símaþáttum. Yfirleitt fá þeir einir að tala út sem eru sammála skoðunum þeirra sem stjórna þáttunum. Er fram líða stundir hljóta þessir þættir að verða notaðir í kennslu í fjölmiðlafræði um það hvernig EKKI á að gera útvarpsþætti. Ég opna fyrir Útvarp Sögu í von um að heyra í Sigurði G. Tómassyni og sé Guðmundur Ólafsson með honum er það eins og að fá konfekt með kaffinu eftir góða máltíð.  

 

Svo sanngirni sé gætt þá hefur Molaskrifari stöku sinnum heyrt ágæta þætti í umsjón annarra aðila í Útvarpi Sögu, og svo eru auglýsingarnar stundum skemmtilegar,  ekki síst þær sem fjalla um um allskyns Kínalífselixíra sem  eiga að lækna  allt milli himins og jarðar. Og svo þessi um apótekið í Laugarneshverfinu ,sem er bara fyrir konur. Eitthvað mundi Jafnréttisráð líklega segja ef auglýst væri  apótek fyrir karla !

Molar um málfar og miðla CLXXVI

  Prestar fylkjast um séra Gunnar, segir í fyrirsögn á Vefdv (14.10.2009). Sögnin að fylkjast er ekki til í íslensku. Hér hefði fyrirsagnarhöfundur átt að skrifa: Prestar fylkja sér um séra Gunnar. Það er góð og gild íslenska.

 Það var einkennilegt orðalag í fréttum Stöðvar tvö (14.10.2009) , þegar sagt var að tiltekinn rafmagnsbíll hefði farið eins og eldur sinu um bílasýningar í Evrópu. Sá sem skrifaði kann ekki að nota þetta gamla íslenska orðtak.

Úr Vefmogga  (I4.10.2009): ..   og skoðuðu þar fiskverkanir og vísindasetur. Fiskverkanir er fáránlegt orð sem er Mogunblaðinu ekki til sóma.

 

Tveir fyrrum fréttamenn, sem láta sér ekki standa á sama um málfar í fjölmiðlum, hafa sent Molahöfundi línur.  Vilhelm G. Kristinsson segir:

Beini til þín tvennu, sem fer mjög svo í taugarnar á mér um þessar mundir.

1. Nú er í tísku að segja líkt, í staðinn fyrir eins og.
Líkt og fram kom í blaðinu í gær, segja menn, í staðinn fyrir eins og fram kom í blaðinu í gær. Ég veit ekki hvaðan þetta kemur, ef til vill áhrif frá ensku.

2. Nú til dags vígja menn hitt og þetta. Séra Emil og frú Margrét Indriðadóttir brýndu fyrir okkur að það væru einungis vígðir menn sem vígðu. Aðrir tækju í notkun, opnuðu, eða renndu sér fyrstu ferðina í nýju skíðabrautinni.

 

Réttmætar ábendingar.

 Molaskrifari hefur gert fjölmiðlavígslurnar eilífu að umtalsefni. Torfi Erlendsson sýslumaður á Stafnesi á að hafa sagt þegar  Brynjólfur biskup vígði Hallgrím Pétursson: Allan andskotann vígja þeir. Réttara er að nota þetta um fjölmiðla samtímans,  því allan andskotann vígja þeir.  

 

Bjarni Sigtryggsson bendir á frétt á Vefdv (13.10.2009),en þar segir:

"Eiganda einbýlishúss sem stendur autt í Cypress skammt utan Houston í Bandaríkjunum grunaði að ekki væri allt með felldu í húsinu þegar hann sá ummerki innbrots þar á sunnudaginn. Hann heyrði raddir í húsinu og þegar lögregluna bar að garði fundust tveir menn inni í skáp. Einn þeirra var sofandi en hinn svaf svefninum langa."

Hér er þrennt að athuga, en það er ekki fátítt þegar DV-skrifarar eiga í hlut:

1. Bandaríkin eru 50 talsins. Fleiri en ein borg, bæir eða borgarhlutar bera nafnið Houston. Þetta er svona svipað og að segja "skammt frá borginni Stadt" í Evrópu.
2. Mennirnir voru tveir og þar af leiðandi hefur annar (tveggja) verið sofandi.
3. Í ljósi þess að einungis fundust tveir menn og annar þeirra látinn, þá hafa varla heyrzt "raddir" í húsinu.

Í fréttinni er ekkert að orðalagi, engar málfarsreglur brotnar og engin ritvilla. En fréttaskrifin engu að síður dæmi um fljótfærni og hugsunarleysi.

 

Allt er þetta rétt, Bjarni.

Molaskrifari þakkar sendingarnar.

 

 

Molar um málfar og miðla CLXXV

Í fyrirsögn í Vefmogga (14.10.2009) segir: Prentsmiðja lokar og vikublað hættir útgáfu. Ekki er mikilli móðurmálskunnáttu fyrir að fara hjá höfundi þessarar fyrirsagnar. Hverju lokaði prentsmiðjan?  Hvaða útgáfu hætti vikublaðið?   Réttara hefði verið:  Prentsmiðju lokað  og útgáfu vikublaðs hætt.Litlar kröfur um fagmennsku hjá Mogga þessa dagan.

Auglýsingar sækja að okkur úr öllum áttum. Allsstaðar. Molaskrifari fór að sjá kikmyndina um

Stúlkuna sem lék sér að eldinum. Frábær spennumynd og vel gerð.Bókina gat maður varla lagt frá sér á sínum tíma  fyrr en lestri var lokið. Það eina sem spillti ánægjunni voru tíu mínútna auglýsingar, tíu mínútna sýnishorn úr ósýndum kvikmyndum og tíu mínútna hlé. Í einni auglýsingunni var sagt: Breytti slys þínum aðstæðum? Þetta er ekki eðlileg orðaröð á íslensku. Eðlilegra væri að segja: Breytti slys aðstæðum þínum? Í annarri auglýsingu var sagt: Frír forréttur með aðalrétt af matseðli. Þetta er rangt. Orðið aðalréttur ætti að vera í þágufalli: .. með aðalrétti.

 Vefdv segir (12.10.2009) frá skæðri flensu sem herjar á nemendur grunnskólans á Fáskrúðsfirði og vitnar í aðstoðarskólastjóra: Hún segir flensuna hafa breiðst mjög hratt yfir nemendur skólans. Frekar þykir Molaskrifara ólíklegt að aðstoðarskólastjóri hafi notað þetta orðalag. Hefur sennilega sagt:..breiðst mjög hratt út meðal nemenda skólans.

Í þessari sömu frétt Vefdv segir einnig: Um helmingur barna í Grunnskóla Fáskrúðsfirði liggur nú í flensu .... Grunur liggur á að um svínaflensu sé að ræða... Ekki  er talað um að  grunur liggi á  einhverju,  heldur er sagt að  grunur leiki á  einhverju. Sá sem  skrifaði þetta liggur  hinsvegar undir grun um að vera ekki vel að sér um málnotkun.

 Meira úr Vefdv (13.10.2009) : Sex þúsund Bandaríkjamenn deyja ár hvert af því að þeir senda SMS bak við stýri. Orðalagið bak við stýri hefur Molaskrifari aldrei heyrt. Það er hinsvegar aulaþýðing úr ensku: Behind the wheel. Á íslensku segjum við undir stýri, svo einkennilegt sem það nú er. 

Áhugamaður um málfar og miðla benti Molaskrifara á að þegar sýnt var frá landsleik Íslands og Suður Afríku (13.10.2009) skammstafaði RÚV nöfn landanna við markatölurnar ÍSL – RSA. Það síðarnefnda er ensk skammstöfun á  heiti  Suður Afríku , Republic of South Africa. Óþörf enskunotkun enn einn ganginn.

 

Úr Vefmogga (12.10.2009): Skv. upplýsingum frá íslenska utanríkisráðuneytinu hafa íslensk yfirvöld ekki fundið fyrir þrýstingi frá kínverskum stjórnvöldum vegna heimsóknar Dalai Lama, trúarleiðtoga Tíbeta, til Íslands í sumar. Tilefni fréttarinnar var að kastast hefur í kekki milli Dana og Kínverja vegna þess að forsætisráðherra Dana átti fund með Dalai Lama í sumar .

Einhverjir minnast þess að Fréttastofa RÚV sagði þá að sendiherra Kína hefði gengið á fund forseta Íslands og verið kallaður heim til Kína. Látið var í það skína, ef ekki sagt berum orðum, að það væri vegna heimsóknar Dalai Lama. Allt var þetta tóm tjara.

 

  Það var fyrrverandi sendiherra Kína á Íslandi sem var í einkaheimsókn á Íslandi og  fór í kurteisisheimsókn á Bessastaði. Þáverandi sendiherra Kína á Íslandi er er tiltölulega nýfarinn  héðan til trúnaðarstarfa fyrir land sitt  annarsstaðar og brottför hans héðan stóð ekki í neinu sambandi við heimsókn Dalai Lama. Þetta voru ekki traustvekjandi vinnubrögð hjá fréttastofu þjóðarútvarpsins.

Einkennileg gagnrýni og vanheilagt bandalag

 

  Undanfarið hefur  ekki linnt  gagnrýni á íslensku utanríkisþjónustuna. Margir hafa sagt að nýta bera nútímasamskiptatækni betur og megi að skaðlausu leggja  niður mörg, ef ekki öll, sendiráð lýðveldisins. Svo bregður svo við þegar forsætisráðherra okkar sendir  forsætisráðherra Noregs  tölvupóst, þar sem sá síðarnefndi er í miðjum  stjórnarmyndunarviðræðum, til að spyrja  einfaldra  spurninga um ómerkilegt áróðursupphlaup íslenskra  Framsóknarmanna  og norskra  kollega þeirra að allt ætlar af göflum að ganga hjá Framsókn og íhaldi. Yfir því að notuð er  nútímasamskiptatækni. Fjölmiðlamenn fara silkihönskum um formann Framsóknarflokksins ,sem uppvís er að því að fara með ósannindi. Enginn spyr um eða kannar  þá miklu umfjöllun sem hann segir  ferð þeirra  félaga með  vinnumönnum útrásarvíkinga hafa fengið í Noregi. Enda  yrði fátt um svör ef grannt væri skoðað. Eitt af  fáu sem sést hefur  er röng  tilvísun ABC nyheter í fréttavef Norska  ríkisútvarpsins.

   Morgunblaðið skrifar heilan leiðara um  tölvupóst,sem  útgefandi blaðsins er ekki alveg ókunnur. Framsóknarmenn ryðjast ærðir fram á fjölmiðlavöllinn yfir  því að forsætisráðherra skuli nota  nútíma  tækni í samskiptum við norskan kollega sinn. Hvað í ósköpunum er það því ?  Það er ekki samtímis hægt að gagnrýna  fólk  fyrir að  nýta sér  ekki tæknina og  úthúða því svo þegar tæknin er nýtt. Hvað átti forsætisráðherra okkar að gera? Senda flöskuskeyti? Það  væri líklega í takti við  forneskjulegan  þankaganginn á ritstjórn Mogga og í Framsókn. Kannski  vantar eitthvað upp á  tölvulæsið í yfirstjórn blaðsins?    Líkast til er þetta þó  gert til að beina athyglinni frá óhróðri og ósannindum í frásögnum  Framsóknarmanna  af Noregsferðinni?  En eitt er víst. Nú hefur  myndast  vanheilagt bandalag milli Moggans og  forystu Framsóknar. Ekki reyndar í fyrsta skipti.

Molar um málfar og miðla CLXXIV

  Vinsamleg ábending til fréttastofu RÚV: Togbátur er ekki dráttarbátur eins og sagt var í hádegisfréttum (12.10.2009). Togbátur er fiskiskip,sem veiðir með botnvörpu, sem skipið dregur eða togar á eftir sér. Togbátur, eða trollbátur eins og áður var sagt ,er minni en togari.. Dráttarbátur er skip sem er hannað til þess að draga önnur skip eða pramma. Dráttarbátur getur tekið skip í tog, en við það verður hann ekki togbátur. Skipið eða báturinn var sagt í eigu Polar Seafood, sem ekki er líklegt að geri út dráttarbáta , eftir nafni fyrirtækisins að dæma. Fréttaskrifari sem  heldur að togbátur sé dráttarbátur ætti að einbeita sér að skrifum um efni sem ekki snerta skip og sjómennsku. Fréttastofa RÚV hefur ekki efni á því að verða að athlægi.

                                                                                                                    

Amböguflóran í fréttum Stöðvar tvö var óvenju auðug á sunnudagskvöldið (11.010.2009). Nokkur dæmi (ambögurnar voru fleiri): .. geti átt von á málsókn vegna setningu neyðarlaga. Ætti að vera vegna setningar neyðarlaga. ... sprengjuvesti,sem minnstu munaði að hann náði að sprengja. Ætti að vera næði að sprengja. Tveir hópar lentu saman. Ætti að vera: Tveimur hópum lenti saman. Voru viðvaningar á vaktinni sem ekki voru þeim vanda vaxnir að semja óbrenglaða texta ?

 

Í fasteignaauglýsingum Fréttablaðsins er heldur aulaleg auglýsing: Heimili fasteignasala hefur í einkasölu  rúmlega 200 fermetra sérhæð... Þetta hljómar eins og heimili fasteignasala  sé að selja sérhæð. Eðlilegra orðalag væri: Fasteignasalan Heimili er með 200 fermetra sérhæð í einkasölu..

 

Nú er Morgunblaðið farið að blanda saman pólitík og fréttum í þeim mæli sem ekki hefur sést síðan gamli Þjóðviljinn, málgagn íslenskra kommúnista var á dögum. Kannski er Morgunblaðið að breytast í einhverskonar blöndu af bandarísku sjónvarpsstöðinni FOX og gamla Þjóðviljanum, blöndu  sem er krydduð með keimi af AMX og ÍNN. Það er heldur bragðvond blanda.

  

Einföld leit á norskum vefmiðlum leiðir í ljós að lítið sem ekkert  hefur verið fjallað um fýluferð Framsóknarmanna til Noregs. Formaður Framsóknar skrökvaði því blákalt að hlustendum í hádegisdfréttum RÚV (12.10.2009) að ítarlega hefði verið fjallað um bréfaskipti forsætisráðherranna í norskum fjölmiðlum. Það er ósatt og ekki það eina sem var ósatt í því sem Sigmundur Davíð Gunnlaugsson sagði.

Norski fréttavefurinn ABC nyheter virðist ekki vera vandari að virðinginu sinni en Framsóknarferðamennirnir. Á vefnum er (12.10.2009) snúið út úr bréfaskiptum forsætisráðherra Íslands og Noregs. Svo segir þar að Íslendingar vilji lán frá Noregi og er vísað á fréttaavef norska  ríkisútvarpsins NRK og sagt : De fleste islendingene ønsker lån fra Norge, melder NRK.no  en sé farið á fréttavef NRK sést að verið er að vitna í skoðanakönnum þar sem í ljós kemur  að margir Íslendingar vilja að Norðmenn fjárfesti á Íslandi. Þar er ekkert talað um lán. Á vef norska Ríkisútvarpsins segir: I den sammenheng viser undersøkelsen at det er et tydelig ønske med investorer fra Norge. Blant islendinger flest topper et ønske om investorer fra Skandinavia, og i tillegg til at et ønske om investorerer fra Skandinavia innebærer investorer fra Norge, er det mange som spesifikt trekker fram Norge.

Mye av den samme holdningen finner vi blant næringslivsledere på Island.

På et eget spørsmål om islendingene er for eller mot norske investeringer på Island, svarer 50% av isledninger flest at de er sterkt for mens 58% av næringslivsledere har denne meningen.

Þetta er undarleg fréttamennska að ekki sé fastar að orðið kveðið. Þetta er eiginlega fréttafölsun. En í rauninni er hún á sama stigi og frásögn Framsóknarmannanna af Noregsferðinni sem nú er að endemum fræg..

  

Molar um málfar og miðla CLXXIII

Það var gaman að sjá og heyra Karlakór Reykjavíkur syngja í Alþingishúsinu í lok RÚV sjónvarpsfrétta (10.10.2009).Flottur endir á fréttatíma á laugardagskvöldi. En það var subbulegt í meira lagi að klippa á söng kórsins í miðri tónhendingu og skella auglýsingastefinu inn á fullum hljóðstyrk. Annaðhvort hefði átt að deyfa sönginn niður eða klippa á hljóðið milli tónhendinga.. Að hlusta á svona er eins að fá spark í hausinn frá sjónvarpstækinu. Reyndar ekki í fyrsta skipti,sem  svona  er farið að í Efstaleitinu.

 Úr Vefdv (10.10.2009): ...þegar ritstjórnarstefna Séð & Heyrt bar á góma. Hér ætti að standa:.. þegar ritstjórnarstefnu Séð & Heyrt bar á góma. Meira úr sama miðli. Fyrirsögnin: Orkuveitan ósátt með Svandísi. Ósátt við Svandísi væri eðlilegra orðalag. 

 Í sjónvarpsfréttum RÚV (10.10.2009) var talað um þakplötur sem tóku á loft. Betra hefði verið að segja að þakplöturnar hefðu fokið eða tekist á loft.  Í tíu fréttum RÚV á laugardagskvöld (10.10.2009) gat Molaskrifari ekki heyrt að væri ein einasta ný frétt. Frábær þjónusta þjóðarútvarpsins við eigendur sína. Kannski var þó eitthvað nýtt í íþróttafréttum. 

Eins og nefnt var í síðustu Molum sagði RÚV í fréttum, oftar en einu sinni, að norski Framsóknarþingmaðurinn Per Olaf Lundteigen væri forseti norska Stórþingsins. Það er auðvitað kolrangt. Hann er ekki einu sinni einn af fimm varaforsetum Stórþingsins. Molaskrifari er löngu hættur að senda fréttastofu RÚV það sem hann kallaði í tölvubréfum vinsamlegar ábendingar um það sem er missagt var eða ambögur í fréttum. Slíku var nær aldrei svarað og Molaskrifari fékk á  tilfinninguna, að í Efstaleiti þætti þetta  nöldur og afskiptasemi.

Molaskrifari hefur áður vikið að því öðrum vettvangi að  Gróa á Leiti  virðist vera farin að hafa áhrif á fréttaskrif Morgunblaðsins.  Það sést á því að fréttir hefjast á orðunum: Heyrst hefur.... Ólyginn sagði mér, gæti allt eins staðið þar.

 Í Staksteinum Morgunblaðsins (11.10.200)) er eftirfarandi klausa: Ótrúlegustu menn eru sjálfskipaðir siðvæðingarmenn fagiðnaðarins. Jafnvel menn sem voru aldir upp í aftursætinu á ráðherrabílum og nutu síðar óverðskuldaðra launalegra fríðinda af þeim sökum og fella síðar meir dóma á báðar hendur undir þeim formerkjum.    

Þetta er í fyrsta lagi  klúðurslega skrifað. Í öðru lagi er þetta dylgjublaðamennska og í þriðja lagi er hér í skjóli nafnleysis og hugleysis vegið úrlaunsátri að einhverjum einstaklingi, sem Molaskrifari hefur reyndar ekki hugmynd um hver er. Þegar sem mest gekk á í borgarstjórn Reykjavíkur dundu svívirðingar Staksteina á andstæðingum Sjálfstæðisflokksins, en þeir voru þó nafngreindir. Hér er  dylgjað í skjóli nafnleysis. Svona skrif er ekki hægt að skilgreina öðruvísi en sóðaskap. Ritsóðaskap. Er Morgunblaðið að breytast í götublað meðan DV er á uppleið?   

 

 

Aðeins um annað. Varð hugsað til þess að oftast er talað um fjarstýringar þegar rætt er um þráðlaus stjórntæki fyrir raftæki.. Á mínu heimili er fjarstýringin aldrei kölluð annað breytingin!

Molar um málfar og miðla CLXXII

Það hefur verið mikið um óveðursfréttir í öllum miðlum undanfarinn sólarhring. Það er mikill vindhraði hér núna ,sagði fréttamaður RÚV (09.10.2009) sem staddur var á Kjalarnesi. Betur hefði Molaskrifari kunnað að meta ef fréttamaður hefði til dæmis talað um mikið hvassviðri eða ofsarok. Í Vefmogga (09.10.2009) var sagt að vindmælir undir Hafnarfjalli væri bilaður og vegfarendum bent á mæli Veðurstofunnar við Hafnamela. Hafnarmela hefði átt að segja. Síðan segir: Einnig er veðurstöð við Hvamm undir Eyjafjöllum bilaður. Veðurstöð er kvenkynsorð og þess vegna er hún biluð, ekki bilaður. En svo kemur rúsínan í pylsuendanum Líklegt er talið að veðurofsinn valdi því að veðurstöðvarnar biluðu. Skarpur maður sem þetta skrifar og hefur greinilega ekki mikla trú á lesendum.

Í Garðapóstinum,sem Molaskrifara barst í dag (09.10.2009), er viðtal við formann Sjálfstæðisfélags Garðabæjar og allt gott um það. Fimm dálka fyrirsögn er á viðtalinu: Áræðni og sköpunarkraftur þarf að ganga í eina sæng með áreiðanleika og raunsæi. Ekki eins gott. Þarna ætti að standa: Áræðni og sköpunarkraftur þurfa að ganga í eina sæng með...

 

.Í fréttum Stöðvar tvö (09.10.2009) var fjallað um friðarsúlu í Viðey og talað um að tendra á súlunni.Má vera að þetta sé ekki rangt, en eðlilegra hefði Molaskrifara fundist að tala um að tendra ljósið sem myndar friðarsúluna.

 

Fréttaflutningur Sjónvarps RÚV (09.10.2009) af greinargerðinni sem forsætisráðherra óskaði eftir frá Seðlabanka og Efnahags-og viðskiptaráðuneyti var furðulegur og er Molaskrifari líklega ekki einn um þá skoðun. Hversvegna var til dæmis formaður Sjálfstæðisflokksins ekki spurður hvernig hann vildi bregðast við Icesave? Formaður Framsóknar talaði um hótunarbréf, en svo segja menn í hinu orðinu að það hafi alls ekkert nýtt komið fram í þessum greinargerðum.

 

Molaskrifara þótti ekki þungt pundið í Kastljósi föstudagskvöldsins. 

Endemis villa var  í miðnæturfréttum RÚV á  föstudagskvöld  þegar sagt var að  hinn frægi norski Framsóknarmaður Per Olaf Lundteigen væri forseti   norska Stórþingsins. Hann er ekki einu sinni einn af fimm varaforsetum þingsins !  Forseti norska Stórþingsins er Dag Terje Andersen, þingmaður Verkamannaflokksins. Hvernig í ósköpunum  komast  svona  villur  í fréttir?

 Af heimasíðu Stórþingsins:

Stortingets presidentskap ble valgt på konstituerende møte i Stortinget 8. oktober

 Den nye stortingspresidenten er Dag Terje Andersen (A). I tråd med nye bestemmelser i Stortingets forretningsorden, ble det valgt fem visepresidenter. Første visepresident: Øyvind Korsberg (FrP).Andre visepresident: Per-Kristian Foss (H).Tredje visepresident: Marit Nybakk (A).Fjerde visepresident: Akhtar Chaudhry (SV).Femte visepresident: Line Henriette Hjemdal (KrF). Videre ble Tor-Arne Strøm (A) valgt som sekretær og Karin S. Woldseth (FrP) som visesekretær.

Sama vitleysan var svo endurtekin í fréttum klukkan 06 00 (10.10.2009). Ekki heyrði Molaskrifari að hlustendur  væru beðnir afsökunar á þessari  rangfærslu. Það er heldur ekki til siðs í Eftsaleitinu að  viðurkenna mistök ,nema í algjörum undantekningartilvikum. 

Þetta eru ekki  þau vönduðu vinnubrögð sem  eigendur  RÚV  krefjast af stofnun sinni.   

    

Molar um matreiðsluþátt

  Matreiðsluþáttur Jóhönnu Vigdísar í kvöld (08.10.2009) var ágæt tilbreyting. í dagskránni,- yfirlætislaus og einfaldur að allri gerð. Dæmi um gott og ódýrt dagskrárefni. Jóhanna Vigdís skilaði sínu prýðilega.

 

Sem áhugamaður um eldamennsku vill Molaskrifari þó gera nokkrar athugasemdir,- vel meintar.

 

Hversvegna nota ýsu ? Ýsan er alls ekki besti matfiskurinn. Í gamla daga var það þó þannig í Reykjavík ef ekki var til ýsa í fiskbúðinni (þá voru nefnilega sérstakar fiskbúðir), sögðu reykvíkskar húsmæður: Hvað er þetta, er ekki til neinn fiskur ? Jóhanna Vigdís  sagði, að jafnvel mætti nota þorsk. Þorskur er besti matfiskur sem völ er á. Það er fátt sem jafnast á við rétt eldað þykkt hnakkastykki úr þorski.Nógu lítið eldað til að vera ekki hrátt en samt ekki fulleldað fyrr en á diskinum. Ýsan er hrææta. Þorskurinn étur rækjur,loðnu og seiði.Lifir á lostæti. Ég tek þorsk, steinbít, löngu, blálöngu, keilu og karfa , rauðsprettu og smálúðu fram yfir ýsuna. Hún kemur síðust í röðinni. Enda losnaði hún öll í sundur á pönnunni, þegar Jóhanna Vigdís var að elda hana. Annars efast ég ekki um að þetta hafi allt bragðast vel. Besta leiðin til að borða ýsu hefur mér eiginlega fundist að skera hana í þunnar sneiðar og  láta hana liggja hráa í hreinum sítrónusafa í ísskáp í sólarhring eða tvo.

 

 Gömul saga, sem  kona úr Garðinum sagði mér. Hún var sem krakki send niður í Rafnkelsstaðavör, Kópu, innstu vör í Garðinum,  til að kaupa í soðið, þegar afi minn, Guðjón Björnsson í Réttarholti ,var að koma að. Þetta hefur líklega verið á árunum 1945 til 1950. Afi minn spurði: Vill hún mamma þín ýsu eða vill hún fisk ? Með fiski átti hann auðvitað við þorsk. Þetta þótti mér skemmtileg saga.

 

 Annað nefni ég. Aldrei nota ég tómatsósu í marineringu eða til matargerðar. Til þess er hún allt of sæt og skemmir bragð. Nota ósætt tómatþykkni.  Bestu marineringarnar verða ævinlega til úr því sem af tilviljun er til í ísskápnum í þeim hlutföllum sem ímyndunaraflið blæs manni í brjóst. Undirstöðuefni hjá mér eru  góð ólífuolía og hlynsíróp.

 

Svo tek ég undir með Jóhönnu Vigdísi, - aldrei að henda afgöngum. Það lærði ég í æsku og það iðka ég enn. Ef hugmyndaflugið er virkt,  gefa afgangar óteljandi möguleika. Gott mál á krepputímum. Hlakka til að sjá næsta þátt. Legg til að Jóhanna sýni okkur hvernig hún eldar hrefnukjöt.

 

PS   Á upphafsárum sjónvarpsins gerði Molaskrifari þátt um sláturgerð. Hann er líklega týndur og verður því ekki (tröllum) sýndur. Hann var tekinn upp í skóla,sem mig minnir að þá hafi heitið Húsmæðrakennaraskóli Íslands og það var Margrét Kristinsdóttir skólastjóri,sem stjórnaði sláturgerðinni. Seinna gerðum við Margrét nokkra matreiðsluþætti þar sem hún eldaði í sjónvarpssal, Molaskrifari stjórnaði upptöku og snæddi  svo gómsætan afraksturinn með samstarfsmönnum að upptöku lokinni.Þá var veisla.  En þessir þættir eru líklega allir á öskuhaugum sjónvarpsins.  Það væri reyndar gaman að sjá þætti um gamlan „mömmumat" , ódýra , einfalda  og holla rétti.  Að safna slíkum uppskriftum væri verðugt  innlegg í menningarsöguna.

  

Molar um málfar og miðla CLXXI

Skemmtileg frétt hjá RÚV (08.10.2009) um sykurskreytingar rússnesk/íslenskrar konu sem voru sannkölluð listaverk. :Það bætti hinsvegar ekki fréttina að fréttamaður skyldi tala um tvö verðlaun. Þeir sem segja fréttir í þjóðarsjónvarpinu verða að kunna grundvallarreglur tungunnar. Verðlaun er fleirtöluorð. Þess vegna átti að segja: Tvenn verðlaun. (forseti lýðveldisins hefur reyndar flaskað á þessu sama) Verslanakeðjan Krónan auglýsir hinsvegar góð verð, þótt orðið verð sé ekki til í fleirtölu. Málvilltir menn  semja auglýsingar fyrir Krónuna.

 

Moggabloggari skrifari (08.10.2009): EES samningurinn er í engri hættu. Betra væri að dómi Molaskrifara að segja: EES samingurinn er ekki í hættu , eða EES samningurinn er ekki í neinni hættu. Smekksatriði? Líklega.

 

Það er heldur óviðkunnanlegt að hlusta á alþingismann segja (08.10.2009): Alþjóða gjaldeyrissjóðurinn er ekki að henta okkur núna. Betra hefði verið: Okkur hentar ekki atbeini,eða aðstoð, Alþjóða gjaldeyrissjóðsins núna. Í íþróttafrétt á Vefdv segir (08.10.2009): Við erum ekki að spila vel í vörninni og ég er ekki að spila vel persónulega.Smitandi veiki þessi talsháttur.

 

Fréttablaðið birtir æ fleiri áhugaverðari greinar. Molaskrifari vitnar hér til tveggja greina úr Fréttablaðinu (08.10.2009). Þorvaldur Gylfason ,prófessor skrifar: Þjóðminjasafnið þyrfti að láta semja og senda út slíka spurningalista um gömlu spillinguna:forréttindi, frænddrægni,fyrirgreiðslu,klíkuskap, mútur, nápot og annað hefðhelgað svindl sem fólk ýmist þekkir sjálft af eigin raun eða man eftir öðrum leiðum. Vel sagt og snjöll hugmynd. Þarna eru orð sem vert er að vekja athygli á, - frænddrægni ( ekki frændrækni !) nápot og hefðhelgað svindl.

 

Hin tilvitnunin er úr grein eftir Njörð P. Njarðvík, rithöfund og prófessor emeritus. Njörður lýkur grein sinni með þessum orðum: Þjóðin stendur nú uppi skuldum vafin sakir afglapa fjárglæframanna og vanhæfni stjórnmálamanna. Árgalli hefur komið í siðu þeirra og manvit og meðferðir er gæta skulu stjórnar landsins - og óáran hefur orðið á fólkinu - eins og segir í Konungsskuggsjá. Þessi alvarlegi árgalli verður ekki leystur með lánum frá öðrum þjóðum. Þjóðin skuldar sjálfri sér endurskoðun á tilveru sinni og tilgangi. Sú skuld verður ekki greidd nema með endurheimtri siðferðisvitund. – Vel sagt og orð að sönnu.

 

Minningargreinarnar halda Molaskrifara enn við áskrift að Mogga.

 

Merkilegt má það heita að í norskum fjölmiðlum er betliferðar íslenskra Framsóknarmanna til Noregs hvergi getið, að því Molaskrifari best fær séð. Hennar er ekki einu sinni getið á heimasíðu norska Framsóknarflokksins og er þar þó viðtal við draumaprins Framsóknarmanna Per Olaf Lundteigen. Í hádegisfréttum RÚV (08.10. 2009) kom fram að íslensku Framsóknarmennirnir séu aðeins að kynna Norðmönnum efnahagsástandið á Íslandi, en alls ekki að biðja um lán eins og var yfirlýstur tilgangur ferðarinnar!  Svo kom reyndar fram í Spegli RÚV (08.10.2009) að Per Olaf Lundteigen hafði bara nefnt  2000 milljón króna lán , sem dæmi !  Hann meinti í rauninni ekkert með þessu. Framsóknarmenn misskildu þetta allt  frá upphafi og  flugu tvisvar til Noregs  fyrir tóman misskilning!  Málið allt er makalaust rugl.  Þetta er mikil frægðarför og  Framsókn til framdráttar!

Molar um málfar og miðla CLXX

 

Fleiri fréttir frá Færeyjum ! Gaman var að sjá myndir úr leitum og smölun í Færeyjum í fréttum RÚV (07.10.2009). Við þurfum að frétta fleira frá Færeyjum. Líklega hafa tugir þúsunda Íslendinga einhverskonar tengsl við Færeyjar. Vinur minn færeyskur sendi mér tölvupóst fyrir nokkrum dögum og þar sagði hann: Eg fór suður til Sumbiar at fletta veðrar og lomb hósdagin í síðstu viku. Tann besti veðrurin vá 70 pund. Skurðurin var betri enn meðal. Hetta var bara heimaseyðurin, men nú standa fjøllini fyri.

 

Í frétt á vef Ferðamálastofu (07.10.2009) segir: Þrátt fyrir 3,3% fækkun erlendra gesta nú, er þetta engu að síður annar stærsti septembermánuður frá upphafi talninga. September í fyrra var raunar óvenju fjölmennur en þá fjölgaði gestum um 12% á milli ára. Fyrstu 9 mánuði ársins er fjölgun upp á 0,5%..

 Annar stærsti septembermánuður og að september í fyrra hafi verið óvenju fjölmennur eru ambögur ,sem opinber stofnun á ekki að láta frá sér fara.

 

Upp úr þessari frétt Ferðamálastofu var unnin frétt ,sem birtist sama dag í Netmogga. Í henni voru enn fleiri ambögur, en  það má Netmoggi eiga að fréttin var lagfærð og verstu villurnar leiðréttar. Þar var þó enn að finna eftirfarandi:

Á hinn bóginn fækkaði brottförum Íslendinga um 35,4% í september frá sama mánuði fyrir ári, og er það í líkum takti og verið hefur á árinu. Samtals voru brottfarir Íslendinga tæplega 22 þúsund í september en voru um 24 þúsund á árinu 2008. Frá áramótum hefur brottförum Íslendinga fækkað um 43,8%, eða sem nemur um 151 þúsund á milli ára.Molaskrifari er ósátttur við þessa fleirtölunotkun orðsins brottför.  Úr Vefvísi (06.10.2009) : Annarsvegar var rúða brotinn í húsi Lífeyrissjóðs Vestmannaeyja. Í hinu tilvikinu var rúða brotinn í heimahúsi. Sá sem þetta skrifar heldur greinilega að orðið rúða sé karlkynsorð ! Eftirfarandi er úr sömu frétt: Þrjú umferðarlagabrot komu upp í vikunni vegna hraðaksturs, aksturs á(n) ökuréttinda og svo var bifreið ólöglega lagt. Umferðarlagabrot komu upp? Þau hljóta þá að hafa verið niðri og komið þaðan upp, - eða hvað? Svo eru greinilega fátt um fína drætti á fréttamiðum,  þegar það þykir fréttnæmt að bifreið sé lagt ólöglega ! Það er líka flest orðið hey í harðindum þegar DV skýrir frá því að íslensk fyrirsæta hafi fengið lánaðan jeppling í útlöndum. Engu er líkara en stúlkutetrið, sem DV verður svo  tíðrætt um, oftast af engu tilefni, sé með launaðan umboðsmann á ritstjórn DV.DV segir frá því (07.10.2009) að formaður Framsóknarflokksins sé farinn til Noregs við annan (þing) mann til að ræða um lánveitingu til Íslands. Í umboði hvers, leyfir Molaskrifari sér að spyrja? Líklega munu Norðmenn brosa út í annað, ef ekki hlæja, enda er viðmælandi þeirra Per Olaf Lundteigen af mörgum talinn skrítnasta skrúfan í norskri pólitík og lítið mark á honum tekið. Íslenskir Framsóknarmenn eru líklega þeir einu sem taka manninn alvarlega.