Molar um málfar og miðla 1815

 

RÚMA – RÝMA

Glöggur lesandi benti Molaskrifara á eftirfarandi á mbl.is (14.10.2015): ,, Tjöld sem Sam­einuðu þjóðirn­ar hafa reist rýma aðeins lít­ill hluta af flótta­fólk­inu og gista því marg­ir und­ir ber­um himni. Blaðamaður mbl.is náði tali af Ástu í morg­un þegar þær Dí­ana voru á ferð um Les­bos.”

Blaðamaðurinn sem fréttina skrifaði ruglar saman sögnunum að rúma og að rýma. Þarna hefði átt að nota sögnina að rúma, en sögnin að rýma þýðir að ryðja frá, gera rýmra. Hún hefur lík mjög verið notuð seinni árin, þegar fólki er gert að yfirgefa hús sín, t.d. vegna snjóflóðhættu. Hús við Heiðarveg hafa verið rýmd. Önnur villa er í setningunni: Þarna hefði átt að standa:,, .. rúma aðeins lítinn hluta af flóttafólkinu ....” Molaskrifari þakkar ábendinguna.

http://www.mbl.is/frettir/innlent/2015/10/14/tok_a_moti_barni_a_strondinni/

 

EKKI AÐ ...

Vinur og fyrrum samstarfsmaður leitaði álits Molaskrifara á þessari fyrirsögn á mbl.is (15.10.2015): Peningastefnan ekki að skila áhrifum. Svarið er einfalt. Þetta er ekki góð fyrirsögn. http://www.mbl.is/vidskipti/frettir/2015/10/15/peningastefnan_ekki_ad_skila_ahrifum/

Þakka ábendinguna.

 

FJÖLÞREIFINN STJÖRNUFRÆÐINGUR

Það er alltaf gaman að sjá orð í fyrirsögnum eða fréttum, sem ekki eru algeng í daglegu máli. Þannig er til dæmis um orðið fjölþreifinn, í fyrirsögn á mbl.is sem þýðir ágengur, óvandaður, kvenhollur í þeim skilningi að angra konur með káfi, til dæmis. Netmoggi fær prik fyrir þetta. Sjá mbl.is (14.10.2015)

http://www.mbl.is/frettir/erlent/2015/10/14/vilja_fjolthreifinn_stjornufraeding_burt/

,,,Vilja fjölþreifinn stjörnufræðing burt”, segir í fyrirsögninni. Stjörnufræðingurinn var sakaður um að áreita konur kynferðislega.

 

 

 

VERSLA MATVÖRU

,,Hjá N1 getur þú verslað matvöru ...” auglýsir fyrirtækið N1 í útvarpsauglýsingu. Fyrirtækið ætti að sjá sóma sinn í að breyta þessu orðalagi í ,,... getur þú keypt matvöru ...”. Molaskrifari nefnir þetta hér - enn einu sinni.

 

STOLINN SIGUR?

Tyrklandi tókst að stela sigrinum, sagði íþróttafréttamaður Stöðvar tvö (14.10.2015). Íþróttafréttamönnum þykir þetta sumum ákaflega snjallt orðalag. Annars mundu þeir ekki éta það hver eftir öðrum. Tyrkir sigruðu Íslendinga í knattspyrnuleik. Stolinn sigur? Var eitthvað óheiðarlegt við sigur Tyrkjanna? Stálu þeir einhverju frá okkur, sem við áttum? Frá hverjum var sigrinum stolið?

 

LJÓSVAKI

Blaðamenn Morgunblaðsins skiptast á um að skrifa ,,Ljósvaka”, stutta pistla, sem birtir eru með dagskrá ljósvakamiðlanna í blaðinu. Í pistli miðvikudagsins (14.10.2015) hnaut Molaskrifari um eftirfarandi:,,Eins og margir aðrir sjálfstæðir foreldrar tengja við eru þær helgar...” Áttaði mig á því, að það ,,að tengja við” er víst að skilja. Og: ,, ... var þar af leiðandi heima í kósí með sjónvarpinu,..” Vera í kósí með? Hafa það notalegt með,- sennilega. Svo var talað um að ,,horfa á aðra hafa gaman”. Á ensku er talað um to have fun, að skemmta sér. En þetta orðalag að hafa gaman er mjög að troða sér inn í málið, - afsakið orðalagið. En ekki var hátt á þessu risið.

 

GOTT VIÐTAL

Viðtal Sigmars Guðmundssonar við Kára Stefánsson í morgunútvarpi Rásar tvö (15.10.2015) var fróðlegt. Vonandi hafa ,,búðabrennivínsmennirnir”á Alþingi hlustað. Í hverra þágu eru þeir að störfum? Málið var enn og aftur á dagskrá þingsins síðdegis á fimmtudag og rætt fram, á kvöd.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

               

 

 

 

Molar um málfar og miðla 1814

VARLA BOÐLEGT

Varla boðlegt, skrifaði Sigurður Sigurðarson (14.10.2015). Hann segir:,, Mér finnst þessi fyrirsögn í íþróttakálfi Morgunblaðsins í dag varla boðleg: „Gátum labbað stoltir af vellinum“.

Í blaðamennskunni í gamla daga var manni kennt að lagfæra orðalag viðmælenda sinna, leiðrétta málvillur, lagfæra setningaskipan og annað smálegt. Þó Aron Einar Gunnarsson, fyrirliði íslenska fótboltalandsliðsins, hafi sagt að eftir leikinn í Tyrklandi hafi þeir getað „labbað stoltir af vellinum“ hefðu betri blaðmenn lagfært orðalagið.

„Gátum gengið stoltir af velli“ er miklu betra.

Sögnin að labba á við rölt eða gang smábarna. Orðið á jafnvel við kæruleysislegt eða stefnulaust rölt. Nú bregður svo við að illa skrifandi fjölmiðlamenn og fleiri segja frá fólki sem labbar á Everest, labbar á skíðum. Hvorki er það kæruleysislegt né stefnulaust að labba á Suðurskautið eða labba Laugaveginn. Óskandi væri að sögnin að ganga væri frekar notuð enda mun meiri gangur í því orði.” Kærar þakkir, Sigurður. Hjartanlega sammála. Þörf áminning.

BÚIÐ AÐ LÆGJA

Í veðurfréttum sjónvarps er stundum sagt: ,,Á föstudag verður (eða er) búið að lægja”. Molaskrifari játar að hann er ekki hrifinn af þessu orðalagi. Á föstudag hefur lægt, á föstudag hefur vindur gengið niður, á föstudag verður lygnara.

 

AÐ SKIPTA UM HENDUR

Molaskrifari, svo sérvitur sem hann er, hefur aldrei getað sætt sig við notkun orðtaksins að skipta um hendur, þegar eigendaskipti verða að fé eða fasteignum. Í Morgunblaðinu (12.10.2015) skrifar lögfræðingur stutta grein eða athugasemd undir fyrirsögninni: Engir peningar skiptu um hendur. Engar greiðslur áttu sér stað. Ekkert fé var greitt. Kannski er þetta sjónarmið Molaskrifara gamaldags.

 

ÚTSEND DAGSKRÁ RÍKISSJÓNVARPSINS

Hin auglýsta , útsenda dagskrá Ríkissjónvarpsins skiptir nú orðið æ minna máli. Óteljandi sjónvarpsáhorfendur eru orðnir eigin dagskrárstjórar og láta oft hina auglýstu dagskrá (línulegu dagskrá,segja sumir) lönd og leið. Molaskrifari hefur til dæmis ekki minnsta áhuga á vampýru- og draugamyndum, sem til skamms tíma voru eftirlætisefni í Efstaleitinu og veit allt sem hann langar að vita um löggur , slökkviliðsmenn og bráðaliða í Chicago,en þættir af því tagi hafa verið Ríkissjónvarpinu óþrjótandi efnisuppspretta.

Tæknin við að vera sinn eigin efnisstjóri er margvísleg og kann skrifari ekki full skil á henni, þekkir Netflix og Apple TV aðeins af afspurn. Spotify veit hann varla hvað er.  Hann á hinsvegar margra stöðva val í Sjónvarpi Símans, nýtir sér Tímaflakkið óspart og notar Sarpinn á heimasíðu Ríkisútvarpsins. Þar að auki hefur hann svo eitthvað sem heitir Chromecast, en þar um er hægt að færa efni af YouTube beint á sjónvarpsskjáinn. Mesta þarfaþing. Dagskrárstjórar skipta máli, en vægi þeirra minnkar, breytist. Á þjóðarstöðvum breytir það hinsvegar ekki því, að þeir eiga að fara vel með það almannafé,sem þeim er fengið til ráðstöfunar.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] .Eða einkaskilaboð á fésbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

               

 

 

 

Molar um málfar og miðla 1813

HUGSUNARLEYSI ?

Rafn skrifaði (13.10.2015): ,,Á vefsíðu Vísis má í tilefni af stjórnarskiptum í trúfélagi lesa:

 „Ekki hefur enn náðst í Salmann Tamimi til að inna hann eftir afstöðu Sverris og þá nýjum áherslum félagsins, þrátt fyrir ítrekaðar tilraunir.“
Þótt litið sé fram hjá misritun í báðum nöfnum Salmans Tamini, sem ekki náðist í, þá vekur það furðu, að leitað sé til sigurvegara kosninga til að afla upplýsinga um afstöðu þess, sem varð undir. Skyldi með sama hætti hafa verið reynt að ná til Sverris Agnarssonar til að afla upplýsinga um afstöðu Salmans Tamini?

Væri með sama hætti eðlilegt að spyrja Bjarna Benediktsson um afstöðu Steingríms J. Sigfússonar til landsmála? Eða öfugt, að spyrja Steingrím um afstöðu Bjarna?

 Annað mál: Það veldur undrun minni, þegar rektor Háskóla Íslands segir sjálfur í sjónvarpsviðtali, að Hæstiréttur hafi fellt dóm um, að verkfallsréttur umsjónarmanna fasteigna nái ekki til þess að banna rektor að opna og loka dyrum háskólahúsnæðisins, en heldur síðan áfram og segir, að hann muni virða þennan verkfallsrétt og ekki opna dyr eða loka þeim meðan verkfall standi.” – Molaskrifari þakkar bréfið. Það er einhver undarleg hugsunarvill, eða hugsunarleysi í huga þess,sem skrifaði fréttina á vefsíðu Vísis. Rétt er það svo , að háskólarektor hefði mátt orða ummæli sín um verkfallsmálin á annan veg og skýrari.

 

ÞÁGUFALL Í SÓKN

Þágufallið er greinilega í sókn. Í fréttum Bylgjunnar að morgni mánudags sagði fréttamaður:,Stjórnvöldum grunar, að ...” Þá heyrist æ oftar , til dæmis í umræðuþáttum og viðtölum, - jafnvel á hinu háa Alþingi: Mér langar .... Sennilega heldur þessi þróun áfram. Í áratugi hefur þetta verið kallað þágufallssýki. Málfarsráðunautur Ríkisútvarps vill  kalla þetta þágufallshneigð. Þetta er greinilega að breytast mun örar en áður.

Verður sjálfsagt talið gott og gilt áður en langt um líður og móðurmálskennarar hætta að munda rauða penna. Séu slíkir pennar ennþá til!

 

 

AFLAGA

Í fréttum Ríkissjónvarps á sunnudagskvöld (11.10.2015) var talað um að eiga fé til aflögu. Betra hefði verið að mati Molaskrifara að tala um að eiga fé aflögu, eiga fyrir einhverju, vera aflögufær, geta innt greiðslu af hendi. Aflaga getur þýtt afgangur, segir orðabókin. Eiga eitthvað aflögu, eiga umfram þarfir.

 

NÝYRÐI

S skrifaði frá Danmörku (12.10.2015): ,,Ég fékk nýjan ÍSLYKIL frá IE eins og fyrirskrifað er.

Þetta voru þrjú orð. "freigáta.lagagildi" voru tvö fyrstu oröin, en það

þriðja var "nýrðu". Mér finnst endilega að þetta hljóti að vera boðháttur (eða bein spurning?) af

sögninni "að nýrða"(?) Hvað merkir hún? Er þetta nýyrði?

1. Íslykillinn er breyttur!!!!!!!!!!!; Ekki getur Molaskrifari svarað þessu!

 

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] .Eða einkaskilaboð á fésbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

               

 

 

Molar um málfar og miðla 1812

DÝRBÍTAR

N.N. sendi molum eftirfarandi vegna fréttar á dv.is (9.10.2015):

Fréttin:

http://www.dv.is/frettir/2015/10/9/fjarhundaflokkur-drap-hatt-i-hundrad-lomb

Hann segir:,,Seint munu bændur kalla þessi dýr "fjárhunda"! Dýrbítar er íslenzka orðið yfir svona skemmd grey. Fjárhundur getur glefsað til að smala, eins og hann er þjálfaður til. Bítur ekki að öllu jöfnu.”. Molaskrifari þakkar bréfið. Dýrbítar eru refir eða hundar, sem leggjast á fé, bíta sauðfé,segir orðabókin.

 

... EN Á ÞESSU ÁRI

Í yfirliti á undan og eftir fréttum Ríkissjónvarps á föstudagskvöld (09.10.2015) var sagt: Landspítalanum hafa aldrei borist jafn stórar gjafir frá fyrirtækjum en á þessu ári. Hefði átt að vera: ... sem á þessu ári eða og á þessu ári. Einkennilegt að enginn skuli hafa hlustað og leiðrétt. Gæðaeftirlitinu enn ábótavant.

 

ÚR EINU Í .....

Vikan með Gísla Marteini á föstudagskvöld (09.10.2015) var ágæt dægrastytting, ristir ekki djúpt, enda  sjálfsagt ekki tilgangurinn. Molaskrifari játar hinsvegar ,að þáttinn Frímínútur,sem kom í kjölfarið skildi hann ekki. Kannski á þetta að vera skemmtiefni. Kannski finnst einhverjum þetta fyndið, en það fór alveg framhjá skrifara. Ýmsir telja hann líka gjörsamlega lausan við kímnigáfu! Á eftir kom svo hefðbundið Kastljós, - ágætlega spennandi. Þar sem höfuðborgin hafði nauman sigur gegn Fljótsdalshéraði. Skrifara þóttu reyndar gildrurnar í orðaröðuninni hjá Héraðsbúum talsvert fleiri og snúnari, en þær sem Reykvíkingar glímdu við..

 Það er varla, að það taki því að eyða orðum að subbuþættinum Hraðfréttum (10.10.2015) , sem er á dagskrá á laugardagskvöldum í Ríkissjónvarpinu. Hvers vegna lætur fólk eins og Kolbrún Bergþórsdóttir, ritstjóri, hafa sig í að taka þátt í svona fíflagangi? Hún þarf ekki að auglýsa sig eins og stjórnmálamennirnir sem láta plata sig út í allskonar vitleysu í þessum þáttum. Samkvæmt dagskrá eru 27 þættir ósýndir. Fjársvelt ( að eigin sögn) Ríkisútvarp hellir tugum milljóna í þessa vitleysu. Makalaust.

 

ÓSNERTUR – ÓSNORTINN

Þessu er sífellt ruglað saman. Síðast í Ríkissjónvarpinu á föstudagskvöld (09.10.2105) Í þætti Gísla Marteins sagði stjórnandi, að enginn Íslendingur hefði verið ósnertur. Hefði átt að vera ósnortinn. Annað er líkamlegt, snerting. Hitt huglægt. – Afmæliskakan var ósnert, þegar gestirnir komu. Ræðan var svo góð, að enginn áheyrenda var ósnortinn.

Annað sem stundum skolast til heyrðist í fréttum Ríkissjónvarps á laugardagskvöld (10.10.2015) Þá var sagt frá hátíðahöldum í tilefni 70 ára afmælis hins svokallaða verkamannaflokks Norður Kóreu. Sagt var að þar hefði engu verið til sparað. Málvenja er að segja engu til kostað, ekkert til sparað.

 

GÓÐ ÚTTEKT

Góð umfjöllun og úttekt í Kastljósi í gærkveldi (12.10.2015) á erfiðu vandamáli á Akranesi, á Neðri Skaganum. Eftir situr, að hausaþurrkun á ekki heima í íbúðahverfi. Það er ekkert flókið. Menningarpistillinn, kvikmynda- og leikhúsgagnrýni þeirra Brynju og Hlínar var fróðlegur, - vakti forvitni og eftirvæntingu, - tilhlökkun.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] .Eða einkaskilaboð á fésbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

               

 

Molar um málfar og miðla 1811

 

KISTUBERI?

Í frétt á mbl.is (10.10.2015) er sagt frá útför leikkonunnar Catrhriona White. Sagt var í fyrirsögn, að kærasti hennar, Jim Carrey, hefði verið kistuberi. Jim Carrey var kistuberi. Molaskrifari kannast ekki við orðið kistuberi. Aldrei heyrt það. Sá sem samdi fyrirsögnin hefur sennilega ekki þekkt orðið líkmaður, - maður sem ber kistu við jarðarför. Eða fundist orðið óviðurkvæmilegt.  

 http://www.mbl.is/folk/frettir/2015/10/10/jim_carrey_var_kistuberi/

 

ÓVIÐUNANDI

Það er óviðuandi í nútímaþjóðfélagi, þegar ráðherra ítrekað neitar að svara spurningum fjölmiðla um óþægileg mál, sem honum tengjast. Ekki batnar það, þegar hann mismunar fjölmiðlum. Velur sér einn fjölmiðil til að svara þeim spurningum, sem honum hentar að svara. Og svo koma allskonar furðulegar eftiráskýringar!

Vafasamt er að ráðherrar í grannlöndum okkar kæmust upp með slíka framkomu. Hversvegna hélt ráðherra ekki blaðamannafund þar sem allir fjölmiðlar sátu við sama borð?

Sennilega væri ráðherra í sömu stöðu og menntamálaráðherra okkar nú er löngu horfinn úr embætti í grannlöndum okkar. En er ekki sagt að sinn sé siður í landi hverju?  

 

TIL BÓTA

Breytingarnar á morgunþáttum Ríkisútvarpsins á báðum rásum frá klukkan sjö fram til níu eru til mikilla bóta. Ekki er lakara að fá meiri tónlist. Báðir þættirnir áhugaverðir og ýmislegt hnýsilegt á boðstólum. Það var skynsamlegt að viðurkenna í verki að tilraunin með sama þáttinn á báðum rásum, Morgunútgáfuna, mistókst.

 

ENGIN STAFSETNINGARORÐABÓK?

Stafsetningarkunnátta og stafsetningarorðabók voru greinilega ekki til staðar þegar þessi frétt var skrifuð og fyrirsögn samin á visir.is (09.10.2015)

Borgarísjakar í minni Önundarfjarðar. Enginn yfirlestur, ekki frekar en fyrri daginn.

Eitt er minni. Hann hefur gott minni. Er minnugur. Annað er mynni. Fjarðarmynni. Þar sem fjörðurinn opnast mót hafi.

http://www.visir.is/borgarisjakar-i-minni-onundarfjardar/article/2015151008701

 

DÁLÍTIÐ SKRÍTIÐ

Á föstudag (09.10.2015) tilkynntu margir lögreglumenn víðsvegar á landinu að þeir væru veikir og gætu ekki mætt til vinnu. Lögreglumenn eiga í harðri kjarabaráttu við ríkið , hafa ekki verkfallsrétt en hafa gripið til ýmiskonar mótmælaaðgerða. Þegar rætt var við formann Landssambands lögreglumanna í morgun fréttum kom hann af fjöllum og kvaðst ekkert hafa heyrt af þessum aðgerðum félaga sinna. Sjálfsagt hafa ýmsir dregið þá ályktun að formaðurinn sé ekki í mjög góðu sambandi við félagsmenn sambandsins.

 Þetta rifjaði upp í huga Molaskrifara kjarabaráttu starfsmanna Ríkissjónvarps (sem höfðu ekki verkfallsrétt) og fóru í nokkurra daga ,,veikindaverkfall” á fyrstu árum sjónvarpsins. Það snerist ekki um prósentuhækkanir heldur ýmis mál, sem kalla mætti innanhússmál. Hann kom nokkuð við sögu þá sem formaður starfsmannafélagsins á þeim tíma. Var  þokkalega upplýstur um heilsufar félagsmanna! Við vorum með bréfi beðin um að skila læknisvottorðum. Ég sagði: Við biðjum ekki lækna að ljúga fyrir okkur. Enginn skilaði læknisvottorði. Svo vorum við auðvitað hýrudregin um næstu mánaðamót.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

               

 

 

 

ÓRG Á SPRENGISANDI

Næstum hálfs annars klukkutíma viðtal Sigurjóns M. Egilssonar við ÓRG í Sprengisandi  á Bylgjunni á sunnudag (11.10. 2015) var um margt athyglisvert.

 Frammistaða spyrils var ágæt. Viðtalið var líka athyglisvert,  vegna þess sem ekki var sagt, sem ekki var spurt um. Dæmi:

- Hver/hverjir fjármagna Arctic Circle ráðstefnuna?

Hvað kostar hún? Eru reikningsskil fyrri funda opin og aðgengileg? Greiðir íslenska ríkið hluta af kostnaðinum?

Eða er þetta einkamál? Þetta hefur kannski verið birt, en farið fram hjá mér

Forsetinn nefndi  meðal annars risahöfn sem ,,stórt fyrirtæki í Þýskalandi ætlar að gera í samvinnu við Íslendinga” í Finnafirði norður. Hver er aðkoma forsetans að því máli? Er hann sannfærður um að þar séu Þjóðverjar (sem ekki eru mikil siglingaþjóð, svo vitað sé) í aðalhlutverki?

Forsetinn talaði um sögufölsun og  góða samvinnu við Bandaríkin. Norðurslóðir væru burðarás í þeirri samvinnu.

Hann nefndi réttilega hlut Bjarna Benediktssonar í inngöngunni í Nató. Nefndi hinsvegar ekki að forystumenn Alþýðuflokks og Framsóknarflokks höfðu þar líka í forystu. Miklu skiptu tengsl Alþýðuflokksins við forystumenn jafnaðarmanna í Noregi og Danmörku á þeim árum. Norðmenn, norskir kratar, sem þá réðu ríkjum í Noregi, lögðu ofuráherslu á að Ísland yrði stofnaðili að Nató. Íslensk aðild væri hluti þess að tryggja varnir Noregs.

Þess er sjaldan getið að Halldór Ásgrímsson varð  einna fyrstur, ef ekki fyrstur íslenskra stjórnmálamanna til að tala um mikilvægi Norðurskautsráðs, Arctic Council, að ég best veit. Nefndi það oft í umræðum hérlendis og  erlendis. Ekki minnist ég þess, að ÓRG hafi lagt þeim málstað lið á sínum tíma, enda hvorki búinn að finna norðurpólinn né finna upp heitaveituna þá.

Þögnin getur líka falið í sér sögufölsun.

 Hversvegna var ÓRG ekki spurður um hversvegna hann vildi, þegar hann var í pólitík, leggja niður beint flug milli Íslands og Bandaríkjanna? Steingrímur Hermannsson átti mikinn þátt í að koma í veg fyrir þau áform hans. ÓRG vildi líka minnka flugstöðina í Keflavík. Hann fékk því framgengt að hluta. Kallaði hana ,,hernaðarmannvirki”, muni ég rétt. Hann var þá almennt á móti Bandaríkjunum. Þetta eru sögulegar staðreyndir.

Svo á forseti Íslands  ekki að tjá sig um það opinberlega í hverjum greinum hann er sammála eða ósammála stefnu sitjandi ríkisstjórnar eins og hann gerði í viðtalinu.

Forsetinn talaði um hve Singapúr og Suður Kórea væru mikilvæg ríki. Í norðurslóða samstarfi? Eða var það til að réttlæta fyrirhugaðar opinberar heimsóknir til þessara tveggja ríkja á næstunni eins og fram hefur komið opinberlega?

 Það var rangt hjá ÓRG og spyrill andmælti ekki að Icesave málinu hefði lokið með dómi EFTA dómstólsins. Icesave er nú lokið. Því lauk fyrir fáeinum vikum með samkomulagi um milljarða greiðslur Íslendinga til Breta og Hollendinga. Þeir fengu ekki eins mikið og þeir vildu. En við borguðum. Gengum á gjaldeyrisvarasjóðinn. Þetta er ferskt í hugum flestra. Sögunni verður ekki breytt með svona yfirlýsingum í útvarpsviðtali.

Undarleg voru sum ummæli ÓRG um nýja stjórnarskrá og margt sem því tengist. Væntanlega munu margir gera athugasemdir það sem hann sagði um þau efni. Sérstaklega var  athyglisvert að heyra hann tala um ,,pólitíska refskák og hrossakaup.” Meðan ég starfaði í pólitík 1978 til 1993 þekkti ég engan mann sem var jafnmikill sérfræðingur og jafn útsmoginn í hrossakaupum og pólitískri refskák og einmitt hver ????

Gat eiginlega ekki orða bundist.

 

 

 

 

 

Molar um málfar og miðla 1810

 

 

ÁBENDINGAR HUNDSAÐAR

Arnar Kári skrifaði (07.10.2015): Sæll Eiður,
fyrst vil ég þakka þína þrotlausu vinnu.
Ég rak annars augun í frétt Vísis, http://www.visir.is/marple-malid--krofu-hreidars-um-ad-domarinn-viki-hafnad/article/2015151009032,

og hef í sjálfu sér ekkert slæmt um hana að segja.
Það er samt tvennt í fréttinni sem ég ákvað að gera athugasemdir við, sendi bæði á blaðamanninn og einnig á ritstjórn Vísis.
Annars vegar benti ég á að úrskurðum héraðsdóms er ekki áfrýjað heldur eru þeir kærðir til Hæstaréttar.
Hins vegar benti ég viðkomandi á að bæði er skrifað meðdómari og meðdómandi í greininni.
Þremur klukkustundum eftir að ég sendi þessar vinsamlegu ábendingar hefur fréttin ekki verið leiðrétt.
Þetta eru ekki alvarlegar villur en ég hefði talið að fjölmiðill leiðrétti villur sínar þegar á þær er bent. – Kærar þakkir Arnar Kári. - Hef tekið eftir því að sömu villurnar standa oft lengi óleiðréttar.

 

ÓSKILJANLEGT

T.H. skrifaði (07.10.2015) og benti á þessa frétt á mbl.is:

http://www.mbl.is/frettir/erlent/2015/10/07/verda_allir_ad_koma_aftur/

"Eig­end­ur skips­ins hafa greint frá því að knún­ingsafl skips­ins hafi gefið sig og því hafi ekki verið hægt að forðast óveðrið."
Ég er því miður svo illa að mér að þetta skil ég bara ekki. – Molaskrifari bætir við, - og ert væntanlega ekki einn um það. Þakka bréfið.

 

ÁÆTLUNARFLUG FRÁ EGILSSTÖÐUM

Í fréttum á miðvikudag (07.10.D015) var greint frá því að bresk ferðaskrifstofa ætlaði að hefja beint áætlunarflug frá Egilsstöðum til Lundúna með viðkomu í Keflavík. Þetta var fréttefni  síðast í  morgun (09.10.2015). Samkvæmt þeirri landafræði sem Molaskrifari lærði væri eðlilegra að tala áætlunarflug til Keflavíkur með viðkomu eða millilendingu á Egilsstaðaflugvelli. En fróðlegt verður að sjá hvernig þessi tilraun tekst.

 

KILJAN

Kiljan var góð á miðvikudagskvöldið (07.10.2015). Lofar góðu um framhaldið í vetur. Fjölbreytt efni, góð efnistök og tæknilega vel úr garði gerður þáttur. Með því áhugaverðasta í dagskrá Ríkissjónvarpsins frá sjónarhóli Molaskrifara. Eins og raunar undanfarin ár.

 

AULAHROLLUR

Molaskrifari á erfitt með að verjast því að um hann fari einskonar aulahrollur, þegar fjölmiðlar kalla alla fræga útlendinga  sem heimsækja Ísland,,Íslandsvini”. Kastljós í gærkveldi (08.10.2015). Og ekki batnaði það, þegar farið var ræða við Dani á ensku.

Takk fyrir viðtalið við Helgu Þórarinsdóttur víóluleikara. Þar fer hugrökk kona.  Það minnir okkur á hvernig lífið getur umhverfst á einu augnabliki.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] .Eða einkaskilaboð á fésbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

               

 

 

Molar um málfar og miðla 1809

 

HÁTT VATN OG FLEIRA

T.H. skrifaði (02.10.2015) og benti á þessa frétt á mbl.is:

http://www.mbl.is/frettir/innlent/2015/10/02/gridarlegt_tjon_a_landi/

Þar segir: "Vatns­hæðin er rúm­ir átta metr­ar."
T.H. spyr:,,Það er svakalegt, en hver er dýptin?” –

Meira frá T.H.: http://www.mbl.is/frettir/innlent/2015/10/02/vard_kjaftstopp_og_hissa/ "máls­hraði hefði verið óhóf­lega lang­ur"
- Er þetta nú hægt, Eiður? Eiður svarar: Nei, eiginlega ekki.

T.H. bendir einnig á á þetta á visir.is: http://www.visir.is/sjadu-myndir-af-sogulegu-skaftarhlaupi/article/2015151009701

"Mikið mæðir á stöplum brúnnar yfir Eldvatn"
Og segir: ,,Ekki lagast það!” - Nei, það lagast ekki. Skaftárhlaupið náði hámarki og fór síðan að sjatna. Amböguflóðið hefur enn ekki náð hámarki. Svo mikið er víst.

 Þakka ábendingarnar, T.H.

 

FRÉTTIR OG FLÓÐ

Fréttaflutningur ljósvakamiðlanna af Skaftárhlaupi var með ágætum , - á Bylgjunni var dramatíkin kannski mest (02.10.2015)! Þetta voru sannkallaðar náttúruhamfarir.

Í kvöldfréttum Ríkisútvarps á föstudag sagði fréttamaður reyndar, - ,,..mun áhrifum flóðsins gæta fram í næstu viku”. Hann hefði betur sagt:,, .. mun áhrifa flóðsins gæta ..”.

Ekki þótti Ríkissjónvarpi samt ástæða til að vera með seinni fréttir á föstudagskvöldi, þrátt fyrir náttúruhamfarir. Til hvers eru seinni fréttir? Úrslit í boltaleik hefðu kannski orðið tilefni seinni frétta þetta kvöld. Ekki náttúruhamfarir í íslenskri sveit.  

 

MOLUM FÆKKAR

Molum fækkar nú um sinn.

 

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] .Eða einkaskilaboð á fésbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

               

 

Molar um málfar og miðla 1808

ÞREKIN KVÍGA!

T.H. benti á þessa frétt á visir.is (01.10.2015): http://www.visir.is/veiddu-kvigu-ur-haughusi--thakka-fyrir-ad-norska-kynid-er-ekki-komid-hingad-/article/2015151009789

"Kvígan var nokkuð þrekin er hún kom upp úr mykjunni enda hafði hún þurft að troða marvaðann til að koma í veg fyrir að hún færi á kaf."
T.H. segir: ,,Líklega eru norsku kvígurnar enn þreknari, en kannski á greinarhöfundur við að kvígan hafi verið ÞREKUÐ, en kann bara ekki tungumálið, sem hann skrifar á?” – Molaskrifari þakkar ábendinguna.

ÓVANDVIRKNI

Úr frétt á mbl.is (01.10.2015): ,, Skóla­stjóri Há­teigs­skóla, Ásgeir Bein­teins­son, biður for­eldra og nem­end­ur skól­ans af­sök­un­ar á því að kenn­ar­ar eða starfs­menn skól­ans hafi kunnað að særa eitt­hvað barn í skól­an­um með at­huga­semd­um um klæðaburð þeirra í frétta­bréfi sem sent var til for­eldra barna í Há­teigs­skóla í dag”.

Þetta er ekki rétt. Í næstu málsgrein er vitnað orðrétt í fréttabréfið en þar segir: ,, „Hafi kenn­ari eða starfsmaður sært eitt­hvert barn í skól­an­um með at­huga­semd­um sín­um um klæðnað þykir okk­ur það afar miður og biðjumst af­sök­un­ar á því,“ skrif­ar Ásgeir”. Í fyrri málsgreininni eru skólastjóra lagðar ambögur í munn. Kannski ætti mbl.is að biðja skólastjórann afsökunar. Þetta eru óvönduð vinnubrögð.

http://www.mbl.is/frettir/innlent/2015/10/01/bidst_afsokunar_a_athugasemdunum/

 

THE VOICE ÍSLAND

Ekki verður sagt, að sumar sjónvarpsstöðvar geri sér far um að vanda málfar. Margir muna sjálfsagt þætti Stöðvar tvö, sem báru óbermisnafnið Ísland got talent. Hrært saman ensku og íslensku. Nú leggur Skjár eitt sitt af mörkum The Voice Ísland. Hafði reyndar áður lagt sitt af mörkum með þáttunum The Biggest Loser Ísland.  Þetta er ekki til fyrirmyndar. Langur vegur frá.

 

 

ENN OG AFTUR

Það hlýtur að vera veigamikill þáttur í verkahring málfarsráðunautar Ríkisútvarpsins að brýna fyrir þáttastjórnendum að vanda málfar sitt. Hefur stundum verið nefnt hér áður! Í morgunþætti Rásar tvö (02.10.2015) talaði umsjónarmaður tvisvar sinnum um allskonar tipps og trix ! Molaskrifari hefur reyndar tekið eftir því áður að þessum umsjónarmanni hættir nokkuð til að kasta á okkur slettum. Það er til dæmis á mörkunum að boðlegt sé að við hæfi sé að umsjónarmaður tali um að redda þessu eða hinu Sú sletta  er löngu orðin  gott og gilt talmálm, óformlegt eins og orðabókin segr.

Það var til fyrirmyndar hjá Sigmari Guðmundssyni í þessum sama þætti, þegar kona sem rætt var við, notaði orðið ergonomics, þá bað Sigmar hana að skýra fyrir hlustendum hvað orðið þýddi. Hvað hún og gerði. – Það er sú fræðigrein sem fæst við rannsóknir á því hvernig best sé að hanna vinnustaði, vinnuaðstöðu, tól og tæki til að hámarka öryggi, þægindi, hagkvæmni og framleiðni, - segir orðabókin. Fréttamenn mættu oftar gera etta.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] .Eða einkaskilaboð á fésbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

               

 

  

+

Molar um málfar og miðla 1807

NÝJUNG TIL BÓTA

Fréttaborði Vísis, sem nú rennur yfir skjáinn í fréttatímum Stöðvar tvö er ágæt nýjung og bætir fréttatímana. Veðurfréttir á Stöð tvö eru skýrar og góðar svo langt sem þær ná, sem er reyndar ekki mjög langt, eða tvo daga fram í tímann.

Molaskrifari er áhugamaður um veðurfréttir og furðar sig enn á því hversvegna Ríkissjónvarpið setur ekki staðanöfn á veðurkortin eins og velflestar eða nær allar sjónvarpsstöðvar gera. Okkur hefur einu sinni eða tvisvar verið sýnt að tæknilega er hægt að gera þetta. Hversvegna er það ekki gert?

Veðurfréttirnar í sjónvarpinu eru yfirleitt með miklum ágætum og skýrt fram settar (þótt spáin sé ekki ævinlega eins og maður helst kysi!). Stundum er eins og handahóf ráði því til dæmis hvort við fáum að sjá veðrið í vesturheimi. Það ætti að vera fastur liður.

 

AÐ ÞRUMA

,,Þrumaði knöttinn”, sagði íþróttafréttamaður Ríkisútvarps í seinni fréttum sjónvarps (29.09.2015). Þrumaði knettinum, hefði hann betur sagt. Skaut fast.

 

 NÚ ER HÓTAÐ

Næstum daglega hótar Ríkissjónvarpið okkur nú með því að byrja að nýju að sýna svokallaðar Hraðfréttir. Það er engin leið hafa samúð með slæmri fjárhagsstöðu Ríkissjónvarpsins meðan fé er á glæ kastað með framleiðslu á efni eins og þessu, - verði það eitthvað í líkingu við það sem við höfum séð til þessa.

 

SORI

Molaskrifari hefur nefnt að hann hefur ekki þolinmæði til að hlusta á símabullið í Útvarpi Sögu nema í örfáar mínútur í senn. Hlustaði skamma stund á fimmtudagsmorgni (01.10.2015) Þá var símavinur að ræða við Pétur Gunnlaugsson, stjórnarformann Útvarps Sögu. Sá sem hringdi kallaði Angelu Merkel kanslara Þýskalands að minnsta kosti í tvígang einn mesta fjöldamorðingja síðari ára. Ekki heyrði Molaskrifari stjórnarformanninn hreyfa andmælum, - kom að vísu inn inn í samtalið í miðju kafi. Hreint með ólíkindum, en soralegt orðbragð og svívirðingar finna sér oftast einhvern farveg.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] .Eða einkaskilaboð á fésbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG