Molr um málfar og miðla 1595

   Ebólan er að sigra kapphlaupið, sagði í fyrirsögn á mbl.is (15.01.2014) http://www.mbl.is/frettir/erlent/2014/10/15/ebolan_er_ad_sigra_kapphlaupid/

Það sigrar enginn kapphlaup. Það sigrar enginn keppni. Þetta ættu  þeir sem skrifa  fréttir að hafa á hreinu, hafa rétt.

 

Í Morgunblaðinu á miðvikudag  (15.10.2014) sagði í frétt á bls. 4: Þau Svandís, Unnur Brá, Ragnheiður og Vigdís sitja allsherjarþing Sameinuðu þjóðanna.

 Ætti að  vera: Þær Svandís, Unnur Brá, Ragnheiður og Vigdís sitja allsherjarþing Sameinuðu þjóðanna.

Á bls. 13 í sama blaði segir: Fjögur ummæli voru dæmd dauð og ómerk, .. Hefði átt að vera: Fern ummæli voru dæmd dauð og ómerk,.. ...  Önnur  svolítið samkynja fyrirsögn á mbl.is sama dag:  Bryndísi sárnar ummæli Brynjars. http://www.mbl.is/frettir/innlent/2014/10/15/bryndisi_sarnar_ummaeli_brynjars/  Bryndísi  sárna  ummæli Brynjars, ætti þetta að vera.

 

 Sjónvarpsmaður sendi mér þessa  athugasemd á fésbók (15.10.2014). ,,Verð  að játa að málfarið vefst svolítið fyrir mér. En sennilega er þetta ekki hrós: ,,Helgi Seljan Alþýðlegt fyrir Eiði, er að sitja af sér nokkur ár þingi; hvert hann flaut á bökum verkafólks.” Miklar kröfur eru gerðar til móðurmálskunnáttu hjá Ríksútvarpinu nú um stundir.,,Alþýðlegt  fyrir Eiði”??? ,,Sitja af sér nokkur ár á þingi ”.???. Bara skemmtilegt,segir Molaskrifari.

 

Af baksíðu Morgunblaðsins 16.10.2014:,, .. en Alexandra mun einmitt dvelja í 17 daga  í Kína.” Molaskrifari  lærði það nokkuð snemma í blaðamennsku að  sögnin að dvelja þýðir að tefja, hindra eða  draga á langinn.   Hvað dvelur  Orminn langa?     Hér hefði að mati Molaskrifara farið betur á því að tala um  að dveljast,  - að  vera staddur eða hafast við einhversstaðar.

 

Næstu Molar á mánudag.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1594

  Molalesandi skrifaði (14.10.2014) ,,Á ruv.is stendur mánudaginn 13. október:

"Fjárhagsnefnd Eyþings lagði fram ályktun á fundinum, þar sem fram kom að áframhaldandi hallarekstur á verkefninu sé óviðunandi.
Nú séu hins vegar blikur á lofti og forsendur skapist til að halda rekstrinum áfram, að því er segir í ályktuninni."
Þarna kemur fram nýr skilingur á orðtakinu "blikur á lofti" - það er talið boða eitthvað jákvætt í stað hins neikvæða sem felst í orðinu blika felst: óveður, illviðri.
Af fréttinni má ráða að tillögusmiðir Eyþings hafi notað orðtakið á þennan ranga hátt, óþarfi er hins vegar að endurtaka villuna í fréttum.

Þennan sama mánudag var í hádegisfréttum Bylgjunnar talað um að "tækla" e-bólu faraldur í Afríku. Er þetta ekki knattspyrnumál?

 

Molaskrifari þakkar bréfið. Þetta er annað dæmið á fáeinum dögum sem nefnt hefur verið um ranga notkun orðtaksins um að blikur séu á lofti. Virðist smitandi. Þegar blikur eru á lofti eru ótíðindi eða óveður í vændum, það er hárrétt. Málfar íþróttafréttamanna smitar líka út frá sér. Þeir nota oft sögnina að tækla, um að ná boltanum frá mótherja. Molaskrifara finnst þetta heldur ljótt orð og ætti að leyfa íþróttafréttamönnum að hafa það fyrir sig. Í almennum fréttum ætti að forðast að nota það.

Veturliði Þór Stefánsson, skrifaði (14.10.2014): ,,Sæll Eiður, 
Vek athygli molaskrifara á þessari óvönduðu fyrirsögn DV (og rökleysu) í viðkvæmu máli:
„Ákærð fyrir manndráp af gáleysi: Ákæruvaldið fellur frá kröfu um missi framfæranda“ http://www.dv.is/frettir/2014/10/13/akaerd-fyrir-manndrap-af-galeysi-akaeruvaldid-fellur-fra-krofu-um-missir-framfaeranda/
Hér bar að skrifa „Ákæruvaldið fellur frá bótakröfu vegna missis framfæranda“. Kærar þakkir, fyrir réttmæta ábendingu.

Rafn skrifaði (14.10.2014) og vitnaði í frétt þar sem fyrirsögnin er: Boðað til íbúðafundar vegna slæmrar stöðu bæjarsjóðs. Hann segir: ,,Hvar skyldi vera fundaaðstaða fyrir íbúðirnar?? Meginmálið talar að vísu um íbúafund, sem er öllu viðráðanlegri hlutur en íbúðafundur.

Þetta er af vef Eyjunnar.” Molaskrifari þakkar Rafni bréfið.

 

Nýr veitingastaður auglýsti í tölvupósti (14.10.2014): ,,Einnig erum við með gott úrval af bjór og Ale. 
Tólf tegundir á krana. 
Happy Hour alla daga milli 16 og 19.” Enskuskotið. Óvandað.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1593

 K.Þ. Skrifaði (14.10.2014) og benti á þessa frétt: http://eyjan.pressan.is/frettir/2014/10/13/thingmadur-ohress-med-lokun-is-sidu-fullkomlega-oabyrg-nalgun/

Hann segir:

Það færist í vöxt að orðmyndin "tengdum" sé notuð án umhugsunar ... 

"Helgi Hrafn Gunnarsson, þingmaður Pírata, segir almenning verða að hafa rétt til þess að kynna sér það sem IS-samstökin hafa fram að færa og því sé lokun heimasíðu tengdum samtökunum óábyrg."

Sami bréfritari bendir einnig á þetta: http://www.visir.is/ekki-nota-dropbox,-facebook-eda-google/article/2014141019643

"Síðan bjóði því enga vernd fyrir persónulegum gögnum fólks sem það hleður inn." Hann spyr: ,,Þurfum við vörn fyrir persónulegum gögnum? “

Molaskrifari þakkar ábendingarnar.

 

Stundum er kerfið sem borgararnir verða að beygja sig undir svo yfirgengilega vitlaust að engu tali tekur. Nýleg dæmi:

1. Molaskrifari nefndi á netinu að hjá sýslumannsembættinu í Hafnarfirði er ekki hægt að greiða 1650 kr. með kreditkorti fyrir bráðabirgðaökuskírteini ( staðlað A4 blað sem tekur örfáarsekúndur að prenta). Svar: ,,Við erum innheimtustofnun og það er ekki hægt að greiða skuldir með kreditkorti”. Greiðsla fyrir bráðabirgðaökuskírteini er ekki skuldargreiðsla. Greiðslan er þjónustugjald.

2. Ökuskírteini með mynd er ekki gilt persónuskilríki til skönnunar í banka , ef gildistími þess rann úr fyrir tveimur dögum. Svar: Tölvan neitar að taka þetta gilt. Einhver snillingur í kerfinu hefur skipað tölvunni að gera þetta.

3. Fáránlegasta dæmið er að finna í fínni grein Orra Páls Ormarssonar sunnudagsmogga (12.10.2014) um afhendingu vegabréfa sem eru tilbúin til afhendingar hjá þjóðskrá. Skrifstofa þjóðskrár má ekki afhenda tilbúið vegabréf (nema gegn tíu þúsund króna aukagreiðslu) . Vegabréfið verður að senda í pósti til sýslumanns í því umdæmi þar sem vegabréfsviðtakandinn býr. Enginn virðist vita hver samdi reglurnar og enginn virðist vita hversvegna þetta er svona. ,,Tölvan segir nei”. Þetta er eiginlega svona ,,af því bara”. Málinu lokið. Er ekki tími til kominn að svolítil heilbrigð skynsemi fái að komast að, þegar tölvum er sagt fyrir verkum ?  

 

Í prýðilegum Vesturfaraþætti sl. sunnudag (12.10.2014) voru okkur tvívegis sýndir spænir, matskeiðar úr horni eða beini. Spænirnir voru kallaðir skeiðar, sem auðvitað er ekki rangt. Kannski deyr orðið spónn í þessari gömlu merkingu og enginn veit lengur hvað spónamatur er eða hvað það er að missa spón úr aski sínum. Um svipaða þróun eru mýmörg dæmi. Málið okkar verður alltaf ögn fátækara, þegar gömul orð og orðtök hverfa í botnlausa glatkistu tímans.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1592

   Fréttasíðu Íslamska ríkisins lokað af Advania, sagði í fyrirsögn á visir.is (10.10.2014) http://www.visir.is/sidu-is-lokad-af-advania/article/2014141019804

Betra hefði verið: Advania lokaði fréttasíðu Íslamska ríkisins. Germynd er alltaf betri.

 

Allskonar lífsreynslusögur fræga fólksins eru að verða meginuppistaðan í helgarblöðum Fréttablaðsins, DV og Fréttatímans, - sem kemur reyndar aðeins út einu sinni í viku. Molaskrifari játar algjört áhugaleysi á því hvar borgarfulltrúi Framsóknarflokksins fann ástina sína. Það var uppslátturinn á forsíðu DV fyrir helgina. En sjálfsagt lesa ýmsir svona skrif.

 

Úr DV (10.10.2014): Tugir manns voru handteknir í hrauninu ... Betra hefði veriðað mati Molaskrifara: Tugir manna voru handteknir í hrauninu...

 

Hafdís bendir á frétt á fréttavef Morgunblaðsins , mbl.is (13.10.2014). Þar segir: Kalka í Helgu­vík flyt­ur ösku til urðunar í Nor­egi.
"Ýmsum spilli­efn­um og sótt­menguðum úr­gangi er einnig brennt í stöðinni og ..."
Er ekki réttast að segja Ýmis spilli efni og sóttmengaður úrgangur eru brennd í stöðinni?” Molaskrifari er á því hvort tveggja sé ágætt orðalag, og þakkar Hafdísi bréfið.

 

Af vef Ríkisútvarpsins (10.10.2014) ,,Ráðuneytið virðist hafa tekið algjöra stefnubreytingu varðandi vistun ungra fanga í Háholti.” Hér hefði kannski farið betur á að segja, til dæmis: Ráðuneytið virðist hafa tekið upp gjörbreytta stefnu varðandi ... , eða: Ráðuneytið hefur gjörbreytt um stefnu varðandi ... Athyglisvert yfirlit yfir hringlandann í þessu máli var í fréttum Ríkissjónvarps (10.10.2014).

 

 Svo handfrjáls farsímabúnaður í bíl Molaskrifara gegni sínu hlutverki þarf að vera kveikt á útvarpinu. Þessvegna er oftast opið fyrir Rondó Ríkisútvarpsins. Þar er fín og oft skemmtilega blönduð, tónlist af ýmsum toga. Ekkert áreiti Sjálfsagt er það tölva sem raðar þessu saman. Þjóðsöngurinn ,,Ó, guð vors lands” á hinsvegar ekki erindi í þessa blöndu. Hann var leikinn síðdegis á laugardaginn (11.10.2014). Þjóðsönginn á að leika við sérstök tækifæri. Það hlýtur að vera hægt að taka hann út úr þessu safni.

 

Enn einu sinni setti yfirgangur íþróttadeildar dagskrá Ríkissjónvarpsins úr skorðum í gærkveldi. Hér er ekki verið að amast við sýningu landsleiksins. Endalaust og innihaldslítið fjas að leik loknum seinkaði seinni fréttum um meira en tíu mínútur. Hversvegna mátti ekki færa fjasið á íþróttarásina og hafa t.d. Kastljós í dagskránni? Engin tilkynning í skjátexta. Engin þulartilkynning.  Við upphaf tíu frétta var heldur ekki beðist afsökunar á seinkun fréttatímans. En okkur var sagt að hann yrði í lengri kantinum í kvöld vegna landsleiks Íslands og Hollands! Ríkisútvarpið ber ekki mikla virðingu fyrir viðskiptavinum sínum. Stofnunin er staurblönk, en kurteisi kostar ekki neitt.

Hve miklu fé skyldi okkar bláfátæka Ríkisútvarp verja til að kaupa og leigja sérstök tæki til knattspyrnuútsendinga til að mæta kröfum Knattspyrnusambands Evrópu? Um það fá eigendur Ríkisútvarpsins ekkert að vita.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1591

  Úr auglýsingu á fésbók (07.10.2014): Mary verður einnig með lykilræðuna á ráðstefnudeginum sjálfum, 5. nóvember. Orðið lykilræða sést og heyrist stundum. Hráþýðing úr ensku. Keynote speech . Umrædd Mary verður aðalræðumaður á ráðstefnunni, sem verið er að auglýsa.

 

Fyrir nokkru var það ámálgað við Morgunblaðið, að birt yrði með öðrum minningargreinum örstutt grein á ensku eftir tvo enskumælandi sendiherra á Íslandi, sem höfði verið góðir vinir hins látna. Því var hafnað og sagt að blaðið birti ekki minningargreinar á ensku. Ekkert við því að segja. Á föstudag (10.09.2014) birtist nokkuð löng dánarfregn í Morgunblaðinu, sem öll var á ensku. Hefur þarna orðið stefnubreyting hjá Mogga? Ekki ber á öðru.

 

Mikið er gott að umsjónarmenn Morgunútgáfunnar í Ríkisútvarpinu skuli nú tala um lag dagsins, - gamla dægurlagið, sem er leikið rétt fyrir  fréttir klukkan sjö. Það fer vel á því. Kærar þakkir fyrir það.

 

Rafn bendir á þessa frétt á mbl.is (10.10.2014) http://www.mbl.is/frettir/erlent/2014/10/09/vard_fyrir_byflugnaaras_og_lest/

Hann spyr: ,,Er fréttin um býflugur (samkvæmt texta) ellegar geitunga (samkvæmt mynd)??”  Í fréttinni segir meðal annars: ,,Á háa­lofti húss­ins fannst gríðarlega stórt bý­flugna­bú. Búið var 1,2 metra breitt og 1,8 m hátt. Talið er að það sé tíu ára gam­alt og að í því hafi um 800 þúsund bý­flug­ur haldið til.” Er þetta bara ekki enn eitt dæmið um slök vinnubrögð við mynda með fréttum á netinu? Sennilega.

 

Á föstudagskvöld (10.10.2014) var fréttum Ríkissjónvarpsins enn einu sinni hent út vegna fótbolta. Fótbolti frá kl. 18 25 til 20 50 , næstum tveir og hálfur tími. Aftur voru 25 mínútur um fótbolta seinna um kvöldið. Fyrr um daginn var fótbolti í tvo tíma. Sem sagt næstum fimm klukkustundabolti sama daginn! Fyrr má nú rota en dauðrota. Samt var ekki hægt að standa við auglýsta dagskrá. Hún fór úr skorðum. Hversvegna var þetta efni ekki á íþróttarásinni?   Í íslenska Ríkissjónvarpinu voru engar fréttir frá klukkan 1800 á föstudagskvöldi til klukkan 1900 á laugardagskvöldi. Evrópumet, ef ekki meira. Ekki eftirsóknarvert met.

 

- Meðan knattspyrnan réði ríkjum í Ríkissjónvarpinu þetta kvöld hringdi áhorfandi til Molaskrifara og sagðist fá hlustarverk í hvert einasta skipti, sem leiklýsendur töluðu um að spila hátt eða lágt, þegar leikurinn færi fram á láréttum velli. Þessu er hér með komið á framfæri.

 

- Margskonar góðgæti var í boði í Sjónvarpi Símans meðan fótboltafárið reið yfir  var margt gott efni í boði í Sjónvarpi Símans. Til dæmis tvær kvikmyndir með Marlon Brando í aðalhlutverki, gerðar með 18 ára millibili , On the Waterfront 1954 ( Á eyrinni, Storbyhamna á norsku) og Last Tango in Paris frá 1972. Heitið Á eyrinni situr alltaf í Molaskrifara sem frábært nafn á kvikmynd, góð þýðing. Engin reisn hefði verið yfir því að kalla myndina Stórborgarhöfn á íslensku.

 

Aftur verða sjónvarpsfréttir hornreka í kvöld (13.10.2014). Hálftíma fjas í kjölfar leiksins ætti  hinsvegar að vera á íþróttarásinni.  Til hvers er hún?

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1590

  Vélarrúmið fór að fyllast af vatni sagði í fyrirsögn á mbl.is (10.10.2014). http://www.mbl.is/frettir/innlent/2014/10/10/velarrumid_for_ad_fyllast_af_vatni/

Fréttin er um það, að leki kom að báti sem var að veiðum út af Melrakkasléttu, langt úti á sjó. Sjór byrjaði að streyma inn í vélarrúmið. Allt fór þetta vel og báturinn var dreginn til hafnar. Engum sögum fer af því hvaðan vatnið kom sem um er rætt í fréttinni. Þarna var nefnilega ekkert vatn.

 

 Í Garðapóstinum , ,,óháðu” bæjarblaði í Garðabæ (09.10.2014), segir í fyrirsögn þar sem vitnað er í ummæli bæjarstjórans: Ákveðinn vinningskultúr. Ekki kann Molaskrifari að meta orðið vinningskultúr. En gleðjast ber með sigursælu íþróttafólki í Garðabæ, sem hefur átt mikilli velgengni að fagna að undanförnu. Það er bæjarbúum gleðiefni, - jafnvel þeim sem lítinn sem engan áhuga hafa á boltaleikjum.- Fjórir snáðar knúðu dyra hjá mér í Garðabænum í gærkvöldi (10.10.2014)og voru að selja armbönd til að safna fyrir takkaskóm. Upprennandi stjörnur. Nú er ég vel birgur af armböndum.

 

Viðtal við Magnús Geir Þórðarson , útvarpsstjóra á Stöð tvö (08.10.2014) var áfellisdómur yfir þeim sem sátu við stjórnvölinn á undan honum. Fram kom, að fjölmennar uppsagnir og aðhaldsaðgerðir hefðu ekki skilað árangri. Í viðtali í Morgunblaðinu daginn eftir kom fram að þetta hefði ekki skilað árangri vegna þess að þáttum hefði verið hent út úr dagskránni, fólk rekið og ekki gert ráð fyrir að neitt kæmi í staðinn. Slíkt ber ekki vott um mikla stjórnvisku í rekstri. Nú bíða velunnarar Ríkisútvarpsins (geta lítið annað gert) eftir því hvort það er ætlun valdhafa að valda óbætanlegum skemmdum á þessari (fram til þessa ) menningarstofnun þjóðarinnar eða limlesta hana þannig að hún verði aldrei söm. Nái ekki vopnum sínum. Vonandi sjá þeir að sér.

 

Í Spegli Ríkisútvarpsins (09.10.2014) var enn einu sinni talað um að kjósa með ályktun og kjósa gegn ályktun. Molaskrifari heldur því  fram , - eins og oft hefur raunar komið fram í Molum, - að hér hefði heldur átt að tala um að greiða atkvæði gegn ályktun og greiða atkvæði með ályktun. Því miður virðist sumum fréttamönnum um megn að hafa þetta eins og málvenja býður, - og ekki virðist málfarsráðunautur hafa skoðun á málinu. Hér lætur Ríkisútvarpið reka á reiðanum, sem er ekki gott í þessum efnum.

 

Hvað þýðir það sem sífellt er klifað á í Ríkissjónvarpinu um þessar mundir að ,,fréttastofa Hraðfrétta hafi nú öðlast sjálfstæði”? Það er tönnlast á þessu á hverju kvöldi. Heyrði fíflagangurinn áður undir fréttastofuna? Í hverju er þetta sjálfstæði fólgið? Hefur verið settur nýr fréttastjóri? Var staðan auglýst?  Mikið endemis bull er þetta.

 

 Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1589

T.H. benti (08.10.2014) á þessa frétt á mbl.is.

http://www.mbl.is/frettir/innlent/2014/10/07/frosti_fannst_eftir_3_ar/

"Starfs­mönn­um Villikatta grunaði að um týnd­an heim­il­iskött væri að ræða."
 Hann segir og spyr: Ekki grunaði mér það? En þér? Svarið er: Reyndar ekki, en hvar er gæðaeftirlitið hjá mbl.is ?

T.H. benti einnig á þetta á mbl.is sama dag: http://www.mbl.is/frettir/innlent/2014/10/07/hljomsveitin_er_heit_fyrir_thessu/

"Jök­ul­bút­ur úr Jök­uls­ár­lóni mun gegna mik­il­vægu hlut­verki á tón­leik­um bresku hljóm­sveit­ar­inn­ar Madness í kvöld. Hef­ur bút­ur­inn verið flutt­ur frá Jök­uls­ár­lóni til London og verður hann á sviði með sveit­inni."
,,Jökulbútur? - Piece of glacier ?
Er þetta þá ekki ísjaki?” - Það verður að teljast fremur sennilegt, - klakastykki.

 

Í Morgunútgáfunni í Ríkisútvarpinu í morgun (10.09.2014) var rætt við tvo blaðamenn um fréttir vikunnar. Annar var frá Fréttatímanum  hinn frá Morgunblaðinu. Blaðamanni Fréttatímans fannst réttilega fréttnæmt að aðstoðarmaður innanríkisráðherra hefði krafist fangelsisdóms yfir tveimur blaðamönnum sem gerðu mistök, en báðust strax afsökunar og birtu leiðréttingu. Vissulega stórfrétt. Blaðamanni Morgunblaðsins fannst það greinilega ekki, - hann nefndi málið ekki og var ekki um það spurður. Hvorugur blaðamannanna nefndi að daginn áður höfðu níu friðsamir mótmælendur fengið þunga sektardóma fyrir að mótmæla náttúruspjöllum við vegagerð í Gálgahrauni/Garðahrauni. Enginn hinna dæmdu veitti harðneskju fjölmenns lögregluliðs minnstu mótspyrnu. Blaðamaður Morgunblaðsins  sagði að dómari í íþróttakappleik hér á Íslandi hefði verið geymdur í protective custody vegna ótta um að honum yrði unnið mein eftir leikinn. Farinn að ryðga í móðurmálinu? Hann hefði til dæmis getað sagt að dómarinn hefði verið í öruggu skjóli nokkra stund eftir leikinn. – Kannski var fólk  bara ekki almennilega vaknað.

,,Ef við lítum á spánna” var sagt í Virkum morgnum Ríkisútvarpsins ((07.10.2014). Þetta virðist vera orðinn viðtekinn framburður nokkuð víða . Hvað segir málfarsráðunautur? – Og : Erum við komin þangað að manni langar í barómet og klukku? Einnig kom við sögu maður ,sem var staddur á Neskaupstað. Hvað segir málfarsráðunautur?

Molaskrifari hlustar örsjaldan á þennan þátt. Smáskammtur dugði þennan þriðjudagsmorgun.

Framburðurinn spánna barst í tal í hópi gamalla skólasystkina í vikunni. Skólasystir, ágæt og vel að sér um íslenskt mál, benti á að kannski ættu umsjónarmenn að hlusta á dægurlagatextann frá okkar yngri árum, sem Númi Þorbergsson samdi, - Nú liggur vel á mér. En þar segir meðal annars:

 

Svo sá hún Stjána, það vakti þrána,
hann kom á Grána út yfir ána.

 

Lagið er íslenskt en höfundur þess er Óðinn G. Þórarinsson.

Þeir voru oft góðir dægurlagatextarnir í gamla daga, og sitja í manni enn. Kunnir og skemmtilegir textahöfundar voru auk Núma m.a. Skafti Sigþórsson sem kallaði sig Náttfara og Loftur Guðmundsson rithöfundur svo aðeins fáir séu til sögunnar nefndir.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1588

  Kastljósið var svo sannarlega í essinu sínu í gærkvöldi. Frábær þáttur. Hrikalegir viðskiptahættir. Ótrúlegt að þetta skuli hafi verið látið viðgangast. Spillt kerfi. Hvað á að kalla svona fyrirtæki? Hvað að kalla svona kerfi ? Manni rann eiginlega kalt vatn milli skinns og hörunds, þegar hagsmunatengslin í kerfinu voru rakin. Einn allra besti Kastljóss þátturinn, sem mig rekur minni til að hafa horft á.

 

Gáfu ráðuneytinu forlátaborð að gjöf, sagði í fyrirsögn á visir.is (04.10.2014). Gáfu ráðuneytinu forláta borð, - hefði alveg dugað. Sjá: http://www.visir.is/gafu-raduneytinu-forlata-bord-ad-gjof/article/2014710049939

 

T.H. skrifaði (03.10.2014) og benti á þessa frétt á visir.is: http://www.visir.is/nagrannaerjur-i-vogum-medvitundarlaus-i-halftima-og-bar-svo-ut-frettabladid/article/2014141009581

"Þetta voru ummerki sem voru þess eðlis að það leit út fyrir að einhver hefði verið dreginn meðfram jörðinni. ... Fram kom ... að sérstök lögregluskýrsla hafi ekki verið skiluð inn að fullu ..." . Molaskrifari þakkar sendinguna. Þetta er óttaleg hörmung. TH bendir líka (04.10.2014) á frétt á mbl.is: http://www.mbl.is/frettir/innlent/2014/10/03/fyrsti_snjorinn_i_hofudborginni/

Hann segir: "snjór­inn hef­ur alltaf komið á þess­um tíma ann­ars lagið"
Einkennilegt að blaðamaður skuli ekki kunna móðurmálið betur. Hér á auðvitað að standa "annað slagið" - Kærar þakkir, T.H.

 

Þrjár sparnaðartillögur til Ríkisútvarpsins, sjónvarps:

1.    Hætta við Evróviosjón söngvarkeppnina.

2.    Leggja niður seinni fréttir sjónvarpsins, sem eru aðeins fjögur kvöld í viku, og bæta yfirleitt ekki miklu við f fyrri fréttatíma, nema kannski tilvitnunum í Kastljós

3.    Hætta við svokallaðar Hraðfréttir.

Þannig mætti spara mikið fé.

 

Halda ráðamenn Lottósins í alvöru, að það auki sölu lottómiða að láta garga á hlustendur, sem bíða þess að fréttir hefjist í Ríkisútvarpinu? Molaskrifari leyfir sér að efast um að þessar hálfruddalegu auglýsingar auki sölu lottómiða.

 

 Næstu Molar sennilega á  föstudag.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1587

  Molavin vakti athygli á þessari fyrirsögn á fréttavef Ríkisútvarpsins Kjósa um verkfall í tónlistarskólum. Hann spyr: ,, Eru kosningar í skólum - eða eru kennarar að greiða atkvæði um hvort boða skuli verkfall? Fyrirsögn RÚV í dag (5.10.14) segir eitt, fréttin annað.”

http://www.ruv.is/frett/kjosa-um-verkfall-i-tonlistarskolum

Molaskrifari þakkar ábendinguna og bætir við:

 Í hádegisfréttum Ríkissútvarps á föstudag (03.10.2014) var í frétt frá Svíþjóð hvað eftir annað talað um að kjósa með fjárlögum. Atkvæði eru greidd um lagafrumvörp. Um þau er ekki kosið. Eins eru greidd atkvæði í stéttarfélögum um hvort boða skuli til verkfalls. Getur málfarsráðunautur ekki skýrt þetta fyrir þeim fréttamönnum, sem hér eiga hlut að máli? Þetta er í rauninni ekkert flókið. -  Í Morgunblaðinu Í dag (06.10.2014) er svohljóðandi fyrirsögn á bls. 2 : Tónlistarkennarar kjósa um verkfall!  Það er víðar pottur brotinn en í Efstaleitinu!

 

Okkur viðskiptavinum Ríkisútvarpsins finnst það mörgum dálítið sérstakt að á sama tíma og Ríkisútvarpið getur ekki greitt skuldir sínar, - verður að biðja lánardrottna um gjaldfrest, er ómældum fjármunum sturtað í vitleysu sem kölluð er Hraðfréttir og gengur mest út á fíflagang.

Sagt er í dagskrárkynningum Ríkissjónvarps : ,,Fréttastofa Hraðfrétta hefur öðlast sjálfstæði ...” Hefur sem sagt verið stofnuð ný fréttastofa í Efstaleiti? Þegar annarstaðar er rekið, þá er ráðið nýtt fólk til starfa við hina nýju fréttastofu! Það er ekki nokkur leið að hafa samúð með Ríkisútvarpinu vegna fjárhagshremminga meðan fé er sólundað með svo opinskáum hætti.

 

Í símsvara DV var þeim sem hringdu á föstudag (03.10.2014) tilkynnt að vegna tækniörðugleika mundi blaðið ekki berast út fyrr en á laugardag. Átt var við að blaðið kæmi ekki út fyrr en á laugardag. Bærist ekki áskrifendum fyrr en á laugardag.

 

Nú er ekki lengur aðeins talað um saksónara (saksóknara) á Stöð tvö (03.10.2014). Nú er líka talað um saksnara. Þarna gæti talþjálfun komið að góðu gagni.

 

 Molaskrifari gerir ráð fyrir að ýmsum hafi þótt næsta furðulegt að heyra fréttamann Stöðvar tvö yfirheyra nýsettan ríkissaksóknara í málinu varðandi hugsanlega endurupptöku Guðmundar og Geirfinnsmála, um kunnáttu hans í lögfræði, einkum þó í refsirétti (03.10.2014).

 

 Hversvegna þótti  ástæða til að lítilsvirða bandaríska þjóðsönginn í svonefndum Hraðfréttum Ríkissjónvarpsins á föstudagskvöld (03.10.2014)? Molaskrifara finnst óskiljanlegt að stjórnmálamenn, núverandi og fyrrverandi skuli láta hafa sig í það að taka þátt í þessum fíflagangi. Þorir fólk ekki að segja nei takk, ef því er boðið að birtast á skjánum?

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1586

  Fyrrverandi starfsbróðir bendir á frétt á vef Ríkisútvarpsins á fimmtudag (02.10.2014). Hann segir: ,,Blessaður, félagi. Þetta er af vef Ríkisútvarpsins í morgun. Gafst upp við að telja villurnar. Raunar ætti að vera saknæmt að skrifa þvílíkan texta til opinberrar notkunar. Hversu lengi getur vont versnað ?”

Þegar Molaskrifari skoðaði fréttina á vef Ríkisútvarpsins var búið að stytta hana nokkuð og lagfæra en í upphaflegu fréttinni stóð meðal annars: Fry segist sjálfur ekki óttast að vera sakaður um kynferðisbrot, honum reki ekki minni til þess að hafa þuklað á nokkurri manneskju í óþökk viðkomandi. Og: ,, Margir hafi beðið álitshnekk fyrir að láta hann komast upp með brot sín áratugum saman...” Molaskrifari þakkar ábendinguna. Hér skortir ritstjórn, verkstjórn, eðlilegt eftirlit með því, sem kemur fyrir almenningsaugu. Það á að gera kröfur til fjölmennustu fréttastofu landsins. Miklar kröfur.

 

Í keppninni um verst skrifuðu frétt ársins kemur þessi frétt af visir.is (01.10.2014) vel til greina: http://www.visir.is/35-thusund-rostungar-strandadir-i-alaska/article/2014141009928

Sýnishorn: Ólíkt selum geta rostungar ekki synt til sjós án reglulegrar hvíldar og til þess þarf hafís. 

 

Veturliði Þór Stefánsson skrifaði (02.10.2014): ,,Komdu sæll Eiður, 
Vildi bara benda molaskrifara á þessu kauðslegu frétt ríkisútvarpsins: 
http://www.ruv.is/frett/mannrettindi-brotin-a-gedsjukum-fongum

Hér er talað um "skýrslu umboðsmanns frá í fyrra" og "Í skýrslu umboðsmanns Alþingis frá 2013". 
Hið rétta er að um að ræða skýrslu umboðsmann fyrir árið 2013 sem kom út 16. september sl. eins og kemur skýrt fram á heimasíðu umboðsmanns.” Molaskrifari þakkar bréfið.

Vegna spurningar Molaskrifara um útskúfuð börn (Molar 1583) svaraði gamall skólabróðir, Sigurður Oddgeirsson nú búsettur í Danaveldi: ,,Mér finnst samhengi skipta hér mestu máli. Ekki gott að dæma um þetta svona samhengislaust. Þess vegna tel ég að það sé allt í lagi að tala um útskúfuð börn, en stundum er það samhengið sem getur gert greinarmuninn. Börn eru lifandi verur og þess vegna verður það kannski tilfinningamál. Manni finnst að athyglin eigi að vera á börnunum. Aftur á móti yrði kannski ekki það sama uppi á teningnum, ef um dauða hluti væri að ræða. Tökum dæmi:.Hvítskúruð gólf finnst mér fallegra mál en gólf, sem hafa verið hvítskúruð. Og sama gildir um kalkaðar grafir. Meiri reisn yfir því en grafir, sem hafa verið kalkaðar.” Molaskrifari þakkar Sigurði kærlega fyrir svarið.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG