Molar um málfar og miðla 1401

 Úr frétt á mbl.is (30.01.2014) um að mæðgin sitji bæjarstjórnarfund í Þórshöfn í Færeyjum. Í fréttinni segir ... : Halla Samuelsen, bæjarfulltrúi, mun forfallast á fundinn í kvöld, ... Þetta er klúðurslegt orðalag að ekki sé nú meira sagt. Gott hefði verið að segja til dæmis: Halla Samuelsen getur ekki sótt fundinn í kvöld. http://www.mbl.is/frettir/erlent/2014/01/30/maedgin_i_baejarstjorn_thorshafnar/

 

Af vef mbl.is (30.01.2014): Bókmenntaverðlaun Íslands fyrir árið 2013, sem afhent voru á Bessastöðum í dag,... Verðlaunin heita Íslensku bókmenntaverðlaunin , að því Molaskrifari best veit. Hér er fréttin: http://www.mbl.is/frettir/innlent/2014/01/30/hlutu_bokmenntaverdlaun_slands/

 

Á fimmtudagskvöldið sýndi færeyska sjónvarpið (Kringvarp (Føroya) þátt í þáttaröðinni Spískamarið. Þátturinn var frá Mykinesi. Ríkissjónvarpið okkar mætti gjarnan fá þessa ágætu þætti um færeyska matargerð , - meðal annars, - til að bregða á skjáinn hjá okkur, í stað þess að mata þjóðina á síbylju boltaleikja og amerísku  annars og þriðja flokks afþreyingarefni. Í Mykinesi er náttúrufegurð mikil. Þangað er ævintýri að koma á fallegum sumardegi.

 

Á vef Ríkisútvarpsins (30.01.2014) var sagt að dýraeftirlitsmaður hefði verið vikið frá störfum. Þetta var leiðrétt síðar. Dýraeftirlitsmanni var vikið frá störfum. Gott er þegar menn sjá villur í fréttum og leiðrétta. Það er reyndar of sjaldgæft.

 

Í hádegisfréttum Ríkisútvarps (30.01.2014) var sagt að ekki hefði tekist að ná tökum á eldunum á norsku eyjunni Frøya. Rúmlega hálfri stundu áður horfði Molaskrifari á fréttir norska sjónvarpsins (NRK 1) þar sem fram komið að búið væri að hemja eldana. Rætt var við settan bæjarstjóra,sem var glaður í bragði, enda ástæða til.

 

Morgunspjall  Boga gott að  vanda á  Rás tvö á fimmtudagsmorgni (30.01.2014). Ekki gat hann séð fyrir frekar en aðrir að SF  (sem hann kallaði ,,gólandi komma”, -  svona í hálfkæringi eða gríni)  mundi hlaupa úr stjórninni hálftíma seinna! 

 

Tvær amerískar þáttaraðir í beit í Ríkissjónvarpinu í gærkveldi, á fimmtudagskvöld (30.01.2014), Frankie og Criminal Minds (enn einu sinni). Það eru slakir dagskrárstjórar sem ekki geta boðið þjóðinni upp á neitt betra en þetta.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1400

   

Í fréttum Stöðvar tvö (28.01.2014) var talað um þrjú gatnamót við Miklubraut. Fleiri tóku eftir þessu. Gunnar skrifaði (28.01.2014): ,,Í fréttum Stöðvar 2, 28. janúar sl. talaði Þorbjörn Þórðarson um „þrjú gatnamót“, en það er ambaga. Gatnamótin eru „þrenn“. Orðið „gatnamót“ er ekki til í eintölu, aðeins í fleirtölu.

Í sama fréttatíma talaði fréttamaðurinn Jón Júlíus Karlsson um bílslys við „Kúagarð“, en rétta heitið er „Kúagerði“. Molaskrifari þakkar Gunnari bréfið. Illu heilli eyðilagði Vegagerð ríkisins Kúagerði á sínum tíma við lagningu Reykjanesbrautar. Það var óþarfi.

 

Í DV (28.-30.2014) er haft eftir ,,baráttukonunni” Hildi Lilliendahl:,,Það eru Gevalia-auglýsingar í sjónvarpinu,kona og karl að smalltalka”. ,,Baráttukonan” sem svo er kölluð er greinilega frekar illa að sér í móðurmálinu. Að smalltalka, - er ljót enskusletta.

 

Af mbl.is (28.04.2014): ,,Anders Anundsen, dómsmálaráðherra Noregs, er nú staddur í Flatanger. Hann lýsir ástandinu sem „sorglegu“. „Ég er kominn hingað til að fylgjast með því hvernig unnið er úr málum, en það sem skiptir mestu máli er að sýna þeim, sem þetta snertir mest, samlíðan,“ sagði Anundsen ... “ Sá sem þetta skrifaði þekkir ekki hið fallega íslenska orð samúð. http://www.mbl.is/frettir/erlent/2014/01/28/faerri_hus_brunnu_en_talid_var/ Medfølelse var orðið sem norski ráðherrann notaði.

 

Góð fréttaskýring hjá Arnari Páli um makríldeiluna í Speglinum (29.01.2014). Norðmenn eru ekki og hafa aldrei verið neinir frændur eða vinir okkar þegar að fiskveiðum kemur. Þá eru þeir okkur erfiðastir allra.

 

Í Kiljunni (29.01.2014) var ágæt umfjöllun um listakonuna Karólínu Lársdóttur hjá Agli og dr. Aðalsteini Ingólfssyni. Verk Karólínu hafa alla tíð verið eftirsótt á Íslandi. Fólk hefur svo sannarlega kunnað að meta þau. Myndir hennar seljast dýrum dómum í Bretlandi. Þeir sem báru ábyrgð á á sögu íslenskrar myndlistar sem kom út í fimm bindum fyrir fáeinum árum þekktu ekki til Karólínu. Hennar var þar að engu getið. Öndvegisdæmi um þröngsýni og kannski klíkuskap. Aðstandendum listasögunnar til skammar. Og ekki brást Bragi í Kiljunni frekar en fyrri daginn. Og svona í lokin, - takk fyrir frábæra tónleika Vínarfílharmóníunnar í Peking sem voru á dagskrá Ríkissjónvarps í gærkveldi.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1399

 Viðtal Egils Helgasonar við Guðrúnu Johnsen, lektor í Ríkissjónvarpinu á mánudagskvöld (27.01.2014) er að líkindum áhugaverðasta og fróðlegasta viðtalið sem birst hefur um eðli og orsakir hrunsins. Af því sem Molaskrifari hefur og séð að minnsta kosti. Þar var fjallað um bók hennar: „Bringing down the banking system – lessons from Iceland,“ . Þessi bók ætti að koma út á íslensku sem fyrst. í viðtalinu var rætt um hrunvaldana og hrunið á mannamáli, engar vífilengjur.- Ætti að vera skylduáhorf. Kærar þakkir.

 

Gunnar skrifaði (27.01.2014): „Bragi Kárason er Bæjarlistamaður“ stendur í fyrirsögn á baksíðu Morgunblaðsins mánudaginn 27. janúar. Þetta er ekki rétt. Bragi er bæjarlistamaður. Titillinn á að sjálfsögðu að vera með litlum staf.

Ég sá kynningu um þátt með íslensku hæfileikafólki, sem er víst á Stöð 2. Þar sagði einn dómarinn: „Ég vill að þú sleppir svona soldið ljónynjunni út …“ Það vakti ekki áhuga á að sjá meira af þættinum. Lágmark að fólk beygi einföldustu orðin rétt. Ég vil … Molaskrifari þakkar Gunnari bréfið…

 

Úr frétt á mbl.is (27.01.2014): Talið er að fleiri en sex hundruð farþegar skemmtiferðaskipsins Explorer of the Seas veiktust þegar hugsanleg nóróveirusýking kom upp. Og: Farþegar og áhöfn skipsins hefur kastað upp og er með niðurgang. Heldur er þetta nú óhönduglega skrifað! Hvar er gæðaeftirlitið, prófarkalesturinn mbl.is? http://www.mbl.is/frettir/erlent/2014/01/27/600_veikir_a_skemmtiferdaskipi/ Eitthvað var þetta lagfært síðar meir.

 

Nú er búið að sýna okkur að það er hægt að setja borganöfn á veðurkortin í Ríkissjónvarpinu eins og gert er hjá öðrum sjónvarpsstöðum. Hversvegna er það ekki gert?

 

Í fésbókarfærslu (27.01.2014) segir nemandi frá því að hann hafi fengið inngöngu í meistaranám í London School of Economics og tekur þannig til orða: Stundum uppskerir maður eins og maður sáir. Molaskrifari vonar að nemandinn sé betri í ensku en íslensku.

 

Hrafnkell sendi eftirfarandi (27.01.2014):

http://www.visir.is/fotobombadur-a-grammy-hatidinni/article/2014140129006
Textinn í þessari ,,frétt" er ekki langur. En ég get með hreinni samvisku sagt að hann er sá versti sem ég hef séð lengi.
Fyrirsögn: 
Fótóbombaður á Grammy-hátíðinni
Meginmál:
“How I Met Your Mother-stjarnan Neil Patrick Harris fer ekki varhluta af fótóbombbylgjunni sem tröllríður nú fræga fólkinu.
Hann ákvað að fótóbomba stjörnuparið John Legend og Chrissy Teigen á Grammy-verðlaunahátíðinni í nótt er þau tóku af sér sjálfsmynd.
Stjörnurnar hafa verið duglegar að fótóbomba á verðlaunahátíðum uppá síðkastið.” - Molaskrifari þakkar sendinguna.

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1398

  Skúli sendi  úrklippu úr Monitor, fylgiriti Morgunblaðsins (24.01.2014): ,,Sæll Eiður. Ég sendi þér hér úrklippu af mbl.is í dag. ,,Samt sem áður langar honum til þess……."  Ég get skilið að það læðist inn villur í texta á netmiðlana, en mér finnst ótrúlegt að þágufallsveikin geti ekki a.m.k. verið undanskilin.” Molaskrifari þakkar Skúla bréfið. Skrifin má sjá hér: http://www.mbl.is/monitor/frettir/2014/01/24/jafnrettis_heilkennid/

 

Í fréttum Ríkissjónvarps (25.01.2014) var talað um feitan íþróttapakka. Hvað er feitur íþróttapakki? Í sama fréttatíma var sagt frá listviðburðum í Garðinum. Þar var talað um að listamenn héldu vinnustofur. Ekki áttar Molaskrifari sig á því orðalagi.

 

Í hádegisfréttum Ríkisútvarps (26.01.2014) talaði fréttamaður um hærri verð fyrir tapaða orku. Viðmælandi hans talaði um magn tapanna. Þetta þykir sjálfsagt gott og eðlilegt málfar. Molaskrifari kann þó ekki meta að svona sé tekið til orða.

 

Hversvegna tala íþróttamenn um að opna markareikninginn?

 

Orðið viðhlítandi var tvívegis rangt skrifað í skjátexta í fréttum Ríkissjónvarps á sunnudagskvöld (26.01.2014). Var enginn á vaktinni sem vissi betur?

 

Ljót og óþörf þolmyndarnotkun hjá fréttamanni Stöðvar tvö í upphafi frétta á sunnudagskvöld (26.01.2014). Fréttamaður sagði: Telpan var flutt hingað til lands seinnihluta árs 2012 af móðurafa sínum. Betra hefði verið: Móðurafi telpunnar kom með hana hingað til lands á seinni hluta ársins 2012. Germynd er alltaf betri. Ekki mikil máltilfinning til staðar þarna. Þessi þolmyndarnotkun var endurtekin í frétt um sama efni  í gærkveldi (27.01.2014)

 

Hversvegna var lýsi stundum  kallað fiskiolía í fréttum Ríkisvarps (26.01.2014)? Var annars ekki verið að tala um það sama?

 

Handboltaveislunni er lokið , sagði íþróttafréttamaður Ríkissjónvarps (26.01.2014). Molaskrifara fannst þetta nú á stundum fremur plága en veisla. Sök sér að sýna leiki íslenska liðsins og útslitaleikinn,ekkert að því,  en ótækt að láta íþróttastjóra komast upp með að riðla dagskránni kvöld eftir kvöld. Þessi skoðun Molaskrifara kallar sjálfsagt á mótmæli! Treysti nýjum útvarpsstjóra til að stöðva yfirgang íþróttastjóra og íþróttadeildar í dagskrá Ríkissjónvarpsins.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1397

  Molavin skrifaði: ,,Einn af hátt settustu...(valdamönnum í Kína)" sagði fréttamaður Stöðvar 2 í kvöld 24.01. Ef til vill er þetta hugsunarleysi, ef til vill þekkingarleysi. Lýsingarorðið ,,hár" stigbeygist og gæti því orðið ,,hátt settur" - ,hærra settur" eða ,,hæst settur." En ekki , ,settastur." En eftir situr að enginn ritstýrir, leiðréttir eða gerir athugasemd.

 

Félag íslenskra bókaútgefenda auglýsir væntanlegan bókamarkað í næsta mánuði í blöðum þessa dagana og þar segir, orðrétt: ,,Útgefendur sem vilja bjóða bækur sínar á markaðinum er bent á að hafa samband...." Hér er sitthvað athugavert en einkum er átakanlegt er menn ráða ekki við aukasetningar, né afmarka þær með kommum. Oft má sleppa þeim alveg og það hefði til dæmis dugað að segja: ,,Útgefendum er bent á að hafa samband...” -- Molaskrifari þakkar bréfið.

 

Það sýnist vel ráðið að stjórn Ríkisútvarpsins skuli hafa valið Magnús Geir Þórðarson í starf útvarpsstjóra. Honum er árnað allra heilla í erfiðu starfi. Í Efstaleiti þarf að taka til hendinni eftir langa óstjórn. Margir hæfir sóttu um starfið og ekki efast Molaskrifari um að til dæmis Salvör Nordal eða Stefán Jón Hafstein hefðu bæði getað gegnt þessu mikilvæga starfi með sóma.

 

Í fréttum Ríkissjónvarps (24.01.2014) talaði Sigmundur Davíð Gunnlaugsson forsætisráðherra um að gera ætti öllum kleift að eignast heimili. Hann ruglaði hér greinilega saman húsnæði og heimili sem er sitthvað.

 

Í sama fréttatíma Ríkissjónvarps kom rangt nafn á skjáinn þegar rætt var við Björgólf Jóhannsson, formann Samtaka atvinnulífsins. Engin afsökun. Engin skýring. Stundum er eins og enginn horfi á fréttirnar í útvarpshöllinni við Efstaleiti, eða það að rangt sé farið með nafn þess sem við er rætt skipti bara engu máli. Það er fúsk.

 

Gamall þáttur Jökuls Jakobssonar sem endurfluttur var á laugardagsmorgni (25.01.2014) um Áfanga Jóns Helgasonar var sannkölluð útvarpsperla. Ætti að nýtast sem ítarefni, þegar fjallað er um Áfanga í bókmenntakennslu í íslenskum skólum. Vonandi er staldrað við þetta einstaka ljóð í bókmenntakennslu einhversstaðar á leiðinni til stúdentsprófs. Eitt af öndvegisljóðum íslenskra bókmennta. Molalesari kynntist Áföngum í öðrum bekk í gagnfræðaskóla, þá  14 eða 15 ára.

 

Í veðurfréttum Ríkissjónvarps (25.01.2014) voru nokkur borganöfn komin á Norður Ameríkukortið. Takk fyrir það. Vonandi fer þeim fjölgandi, - einnig á Evrópukortinu. Hvaða regla  gildir annars um veðurkort  frá öðrum svæðum heims en Evrópu? Ræður hver veðurfræðingur því hvaða kort hann sýnir okkur?

 

Stundum er gaman að fréttamatinu. Á miðnætti á föstudagskvöld (24.01.2014) var fyrsta frétt í Ríkisútvarpinu um eld í bíl undir Hafnarfjalli. Eldurinn lognaðist útaf af sjálfu sér. Næsta frétt var um eld í potti á veitingastað í Reykjavík. Svo leyfir Ríkisútvarpið sér að flytja engar fréttir fyrr en sjö klukkutímum síðar, - klukkan sjö næsta morgun. Lélegt hjá þjónustustofnun í eigu þjóðarinnar sem jafnframt á að sinna öryggishlutverki. Með þessum hætti er því alls ekki sinnt svo sem skyldi.

 

Þeir voru prýðilegir Bogi Ágústsson og Þórður Snær Júlíusson í Sunnudagsmorgni Gísla Marteins (26.01.2014). Elín Hirst einbeitti sér að því auglýsa Sjálfstæðisflokkinn. Það er sjálfsagt skylda þingmanna Sjálfstæðisflokksins þegar Gísli Marteinn, fyrrum borgarfulltrúi flokksins, boðar þá á sinn fund.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1396

  Í sjónvarpinu auglýsir Ríkisútvarpið ( t.d. 22.01.2014) frumflutning þriggja nýrra íslenskra útvarpsleikrita. Heiti leikritanna eru öll höfð í nefnifalli enda þótt þau ættu að fallbeygjast samkvæmt reglum og eðli máls. Hvað yrði sagt ef Þjóðleikhúsið auglýsti: Frumsýnum Íslandsklukkan eftir Halldór Laxness á þriðjudagskvöld. Þetta er alveg hliðstætt. Hvað er málfarsráðunauturinn að sýsla? Kannski var hann rekinn í hreinsunum miklu ?

 

Í hádegisfréttum Ríkisútvarps (23.1.2014) var í þingfréttum talað um skattaívilnanir fyrir hátekjuhópum. Hefði átt að vera: Skattaívilnanir fyrir hátekjuhópa.

 

Fréttabarn á vaktinni á mbl.is (23.01.2014): En fólk sem tók lestina sem sýnd er í þessu myndskeiði var ekki skemmt þegar inn var komið því snjórinn hafði blásið inn í einhverja vagna með tilheyrandi kulda. Fólk var ekki skemmt! Alveg óskemmt. Snjórinn hafði blásið inn í einhverja vagna ! Þetta er með ólíkindum. Enginn les yfir. Enginn metnaður til þess að gera vel. http://www.mbl.is/frettir/erlent/2014/01/23/thvilikur_kuldi_i_lestinni/

Meira af mbl.is sama dag: Samkvæmt upplýsingum frá slökkviliðinu er ökumaðurinn komin út úr bílnum og er lítið slösuð. Ekki batnar það!

 

Gunnar nefnir þetta einnig í tölvubréfi (24.01.2014): „Kanínukjöt á boðstólnum á Íslandi fyrir næstu jól“ er fyrirsögn á vefsíðunni visir.is. Boðstóll er ekki til í eintölu. Fleirtöluorðið er „boðstólar“ svo kjötið verður á boðstólum.

Og á mbl.is er hin kostulega setning: „Samkvæmt upplýsingum frá slökkviliðinu er ökumaðurinn komin út úr bílnum og er lítið slösuð.“ Í tvígang er „ökumaður“ fólksbíls nefndur til sögunnar. Hvernig getur ökumaður verið „komin“ úr bílnum og verið „lítið slösuð“? Ökumaðurinn er kominn úr bílnum og er lítið slasaður, hvort sem hann er karlmaður eða kvenmaður. (Hann kvenmaðurinn) - Molaskrifari þakkar bréfið.

 

Enn er spurt, því aldrei hefur verið svarað: Hversvegna eru ekki birt bæja- og borganöfn á veðurkortunum í Ríkissjónvarpinu? Á veðurkortum færeyska sjónvarpsins eru birt borganöfn. Hvað veldur þessu?

 

Sá ágæti fréttanmaður Stöðvar tvö, Þorbjörn Þórðarson, má til með að læra að bera fram orðið saksóknari. Hætta að segja sífellt saksónari. Þetta var einkar áberandi í fréttum á föstudagskvöld (24.01.2014).

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1395

  Gunnar skrifaði (22.01.2014): ,,Á visir.is skrifar Ellý Ármanns frétt um pilt sem slasaðist í Bláfjöllum. Hann er í tvígang kallaður „Máni Örn Arnarson“ en í sömu frétt er viðtal við föður hans, sem sagt er að heiti „Arnar Már Þórisson“. Sé það rétt er drengurinn Arnarsson. Annars héti faðir hans Örn. Lágmark að fara rétt með nöfn.” Molaskrifari þakkar bréfið.

„Bæði félögin skrifuðu ekki undir samningana,“ var sagt í hádegisfréttum Bylgjunnar 22. janúar. Eðlilegra hefði verið að segja að hvorugt félagið hafi skrifað undir.”

 

Örn skrifaði Molum eftirfarandi um nafnháttarnotkun (22.012014): ,,Vísir skrifar í dag: http://visir.is/vodafone-harmar-vistun-gagnanna--gognin-attu-ekki-ad-vera-geymd-/article/2014140129695.

 Það er árátta að nota nafnhátt hjá yngra fólki:,,að vera geymd" í stað þess að segja,,að geymast" Sama á við um frásagnir af liðnum atburðum, þær eru flestar sagðar í nútíð, þótt nokkuð sé um liðið frá atburði.” Þakka bréfið.

 

 

Fyrsta frétt í átta fréttum Ríkisútvarps á miðvikudag (22.01.2014) var ofurlöng frásögn af kerfishremmingum konu með geðræn vandamál. Hremmingarnar tengdust nauðungarvistun. Fréttin var endurtekið efni úr morgunútvarpinu. Megintilgangur fréttarinnar virtist vera að vekja athygli á fyrirhugaðri ráðstefnu. Leikurinn var endurtekinn daginn eftir. Viðtal í morgunútvarpi og endurtekið efni aftur fyrsta frétt, nú klukkan níu, muni Molaskrifari rétt. Þetta voru hreinar auglýsingar og fólk að vinna sér hlutina létt.

 

Á fullu gazi - Saga Garðars klessir á, (22.01.2014). Fyrirsögn á visir.is. Fréttabarn hefur fengið að semja fyrirsögn.

 

Það var skemmtileg tilbreyting að fá fína óperettutónleika í Ríkissjónvarpið á miðvikudagskvöld (22.1.2014). Takk fyrir það. Skiptir engu þótt upptakan hafi verið frá 2007. Þetta efni eldist ekki svo glatt. Skyldi Ríkissjónvarpið manna sig upp í að sýna okkur eins og einn þátt með Wynton Marsalis áður en höfðinginn heimsækir Ísland með fríðu föruneyti í sumar?

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1394

 Úr frétt um flugvélakaup á mbl.is (21.01.2014): ... til að mæta aukinni eftirspurn eftir sparsömum flugvélum, ... Hér hefur eitthvað skolast til. Flugvélar eru ekki sparsamar. Átt er við sparneytnar flugvélar, vélar sem nota lítið eldsneyti.

 

Þorvaldur G. skrifaði eftirfarandi við Molana á blog.is (21.04.2014): ,,Sæll Eiður og þakkir fyrir gullmolana
Í gær var minnst á fyrirbærið Justin Bieber hér á vefsíu Mogga. Þar stóð: Hann innbirgði (tiltekið magn) af hóstasaft. Gott væri ef skrifarar kynntu sér stafsetningu.” Rétt er það, Þorvaldur. Kærarþakkir.

 

Það verður engu til sparað var sagt í fréttum Ríkissjónvarpsins (21.01.2014) um kostnað við vetrarólympíuleikana í Rússlandi. Endalaust rugla menn saman: Ekkert til sparað og engu til kostað. Einfalt mál, - ef menn kunna það.

 

Árangur íslenskra nemenda fari hrakandi var sagt í fréttum Stöðvar tvö (21.01.2014). Árangri íslenskra fari hrakanandi hefði verið betra. Einhverju fer hrakandi.

 

Rafn skrifaði (21.10.2014): ,,Sæll Eiður

Bæði í þínum pistlum og víðar hefir verið fjallað um heimskuleg og óheppileg ummæli forstöðumanns EM-stofu ríkissjónvarpsins. Hins vegar hafa litlar athugasemdir komið fram um til hvers hann var að vísa. Eftir því, sem ég tel mig hafa lesið, því þetta gerðist áður en ég fæddist, þá var innlimun Austurríkis í Stórþýzka ríkið, „der Anscluß“, án blóðsúthellinga eða slátrunar. Innlimunin var gerð samkvæmt austurrískum lögum (þó settum af stjórninni án aðkomu þingsins) um „endursameiningu Austurríkis við Hið þýzka ríki“.

Þótt líklegt sé, að einhverjir hafi verið teknir af lífi eftir „endursameininguna“, þá var aðgerðin sjálf án „slátrunar“ og afar hæpið að nota það orðalag um aðgerðina.” Þakka bréfið, Rafn.

 

Alls 31 fyrrverandi yfirmenn í Bandaríska hernum hafa skorað á Barack Obama ... Þannig hófst frétt í morgun fréttum Ríkisútvarps (22.01.2014- tekið af vef Ríkisútvarpsins) . Molaskrifari hefði byrjað fréttina svona: Alls hefur þrjátíu og einn yfirmaður í bandaríska hernum...  Lítið b  er í bandarískur.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1393

  Gunnar skrifaði (20.01.2014): ,,Á vefsíðunni visir.is stendur nú: „Þorteinn Hjaltested krafðist þess að Kópavogsbær greiddi honum tæpa 7 króna milljarða króna fyrir vanefndir í Vatnsendamálinu.“

Þarna hefur einhver flýtt sér of mikið.” Molaskrifari þakkar Gunnari bréfið.

 

Úr frétt Ríkisútvarpsins (20.01.2014) um nasistamálið: ,,Einar segir að þeir hjá HSÍ vilji heyra hvernig Austurríkismönnum líði með þetta og það verði síðan séð til eftir fundinn hvernig þetta mál verði matreitt.” Nýr matreiðsluþáttur í uppsiglingu í sjónvarpinu? Ja, hérna, - hvílík snilld.  . http://www.ruv.is/frett/atlar-ad-hitta-austurrikismenn-i-dag

 

Enskuslettur útvarpsmannsins Andra Freys Viðarssonar í Virkum morgnum á Rás tvö í Ríkisútvarpinu eru ef til vill til marks um það að hann er ekki nægilega vel að sér í íslensku. Eða vilji sanna fyrir hlustendum að hann kunni hrafl í ensku. Enskuslettur eiga ekki heima í töluðu máli í Ríkisútvarpinu.

 

Gunnar skrifaði (20.01.2014): „… að greina hvert og eitt skilaboð …“ var sagt í hádegisfréttum Ríkisútvarpsins 17. janúar sl. Skilaboð er fleirtöluorð og því ekki hægt að segja svona.

Á dv.is er frétt um tvo menn sem fóru í kappakstur, en þar segir: „Þeim er einnig gert að greiða allan málskostnað, hver um sig 627 þúsund krónur.“ En þar sem þeir voru tveir, ætti að standa „hvor um sig“. – Molaskrifari þakkar Gunnari bréfið.

 

Fréttamönnum ljósvakamiðlanna virðist fyrirmunað að bera rétt fram heiti norska smábæjarins Lærdal, þar sem eldsvoðinn mikli varð. Undarlegt að reyna ekki einu sinni að hafa þetta rétt.

 

Í tíufréttum Ríkissjónvarps (20.01.2014) var sagt frá verðlaunum sem sænsk kvikmynd hefur hlotið. Fréttaþulur sagði að myndin hefði verið tilnefnd til ellefu verðlauna en hlotið fjögur. Myndin hlaut fern verðlaun, ekki fjögur verðlaun. Svo því sé til haga haldið, þá var þetta leiðrétt í hádegisfréttum og talað um fern verðlaun. Gott.

 

Í frétt um megrunartískubólur á Stöð tvö (20.01.2014) talaði Þórhildur Þorkelsdóttir fréttamaður um megrunartrend. Það er ekki íslenska.

 

Það er mikið tilhlökkunarefni að fá trompetleikarann Wynton Marsalis í Hörpu í sumar. Hann hefur gert marga góða sjónvarpsþætti. Hvað skyldi Ríkissjónvarpið okkar hafa sýnt marga af þáttunum hans?  

 

Nýr veðurfræðingur var á skjá Ríkissjónvarpsins í kvöld (21.01.2014), Guðrún Nína Petersen. Hún  var eins og hún hefði aldrei gert annað en segja okkur veðurfréttir.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1392

  Molalesandi skrifaði (20.01.2014): ,,Þú skrifar um málfar fjölmiðla - hvað teljist vera góð íslenska og hvað miður góð. Þar hefur þú m.a. barist við að reyna að leiðrétta það orðalag íþróttafréttamanna að segja ,,að sigra keppni" í stað þess að segja "að sigra í keppni". Hingað til hefur þú ekki þurft að berjast við það geðslag íþróttafréttamanna að líkja sigri íslenska landsliðsins á því austurríska við þegar þýskir nasistar stráfelldu forfeður austurríska landsliðsins. Þegar nasistar murkuðu lífið úr öfum og langöfum handboltamannanna, sem mættu ,,strákunum okkar" í kappleik.

Svo heillum horfin virðist íslenska þjóðin vera - og stjórnendur Ríkisútvarpsins - að það þyki barasta allt í lagi að opinber starfsmaður láti slík orð falla í ríkisútvarpi Nóg sé að segja:,, Fyrirgefðu, góurinn, þetta var bara sagt í hita leiksins".

Hvers er þá að vænta, ef svo skyldi fara að íslenska landsliðið bæri sigurorð af því spænska? Mun þá starfsmaður Ríkisútvarpsins líkja því afreki við þegar Íslendingar undir forystu Ara frá Ögri slátruðu óvopnuðum og hröktum spænskum fiskiönnunum í fjörðum vestur? Gera hvorki umræddur fréttamaður, stjórnendur Ríkisútvarpsins né þorri íslensku þjóðarinnar sér grein fyrir því, að þessi ,,uppákoma" var og er þjóð okkar til háborinnar skammar og enn fremur til skammar að sami einstaklingur skuli halda áfram þáttastjórnun sinni á sama vettvangi. Það hlýtur að þýða að ef þessi opinberi starfsmaður hefði látið sér það um munn fara áður en hann var ráðinn til starfa að íslenska landsliðið myndi slátra því austurríska líkt og nasistar slátruðu Austurríkismönnum þá hefði hann engu að síður verið ráðinn til starfsins? Ummælin eru ekki talin valda því að honum sé ekki lengur sætt í starfi. Þá hefðu þau ekki heldur valdið því að honum hefði ekki verið treyst til starfsins af ráðamönnum Ríkisútvarpsins ef hann hefði látið sér þau um munn fara áður en hann var ráðinn til starfans.

Gerir fólk sér virkilega ekki grein fyrir þeim skammarbletti, sem þessi ummæli hafa sett á íslensku þjóðina, íslenska ríkisútvarpið - og íslenska íþróttafréttamenn?  Að ,,sigra keppni" er hjóm eitt samanborið við það að sigra í keppni - svona.”  Molaskrifari þakkar bréfið.

 

Úr frétt Ríkisútvarpsins (19.01.2014) um eldsvoðann í Lærdal í Noregi: ... því hvort tveggja hiti og rafmagn eru úti vegna eldsvoðans. Ekki verður sagt að þetta sé vel orðað. Þarna var sem sagt rafmagnslaust og enginn hiti í húsum.

http://www.ruv.is/frett/snua-heim-i-kold-hus-og-rafmagnslaus

 

Í fréttum Ríkisútvarps og í fleiri fjölmiðlum, reyndar (20.01.2014) var sagt frá innbroti. Tekið var þannig til orða að þjófurinn hefði farið í gegnum svalahurð. Af mbl.is (20.01.2014) : Þá var farið inn um svalahurð í öðru íbúðarhúsnæði og þaðan stolið Dell fartölvu og síma. Hann hefur væntanlega verið illa útleikinn eftir að hafa farið í gegnum hurðina, eða inn um hurðina! Hurð er nefnilega flekinn sem lokar dyraopi. Þjófurinn fór inn um svaladyr. Þetta hefur verið nefnt í Molum áður. Orðalagið er sennilega ættað úr dagbók lögreglunnar og svo étur hver fjölmiðillinn á fætur öðrum það upp, - athugasemdalaust.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG