Molar um málfar og miðla 512

   Úr mbl.is (24.01.2011):  Þurrkurinn fer illa með uppskerur, s.s. hveitiuppskeruna, ....Þrátt fyrir mikinn þurrk þá er einnig mjög kalt í landinu. Við austurströnd landsins hefur ís truflað skipasamgöngur. Stærri skip hafa neyðst til þess að hægja á sér og þau minni komast ekki af stað. Ekki  er eðlilegt að tala um uppskerur í  fleirtölu í þessu sambandi. Samhengi milli þurrka og kulda  er  ekki  rökrétt. Í heild er þetta heldur klaufalega orðað.

 Í  „Landanum"   í Ríkissjónvarpinu á sunnudagskvöld    var kvenskörungurinn Halldóra  Bjarnadóttir kölluð skólastýra til margra ára.  Molaskrifari man  ekki betur  en Halldóra  hafi kallað sig  skólastjóra og   til margra ára er ekki  til fyrirmyndar. Betra er að segja í mörg ár.  Þetta sama  kvöld  var í fréttum talað um að hafa gaman saman,  skemmta sér  saman. Molaskrifara hugnast ekki þetta orðalag. Kannski er það bara sérviska. Í þeim sama  fréttatíma  Ríkissjónvarps var fróðlegur og vel unninn pistill um Túnis. Fréttastofan  mætti gera meira af slíku.

 Í íþróttafréttum  heyrði Molaskrifari nýlega talað um ungkarlamet.  Molaskrifari er ekki sérfræðingur í íþróttamáli, en orðið ungkarl finnur hann ekki   í  Íslenskri orðabók. Ungkarl  (ungkar á norsku) er hinsvegar   til í dönsku og þýðir piparsveinn, ókvæntur karl.

  Tónlistarval í morgunútvarpi Rásar  eitt, Vítt og  breitt,  fellur yfirleitt prýðisvel að smekk Molaskrifara. Þar léku Dave  Brubeck og félagar  lagið Theme from Elementals (24.01.2011). Umsjónarmaður þýddi heiti lagsins og  tengdi það frumefnum. Víst er að orðið  enska orðið  element er  notað um frumefni og  höfuðskepnunar  fjórar. En Molaskrifari hefur  nokkrar  efasemdir um að  orðið  elementals í þessu  tilviki  tengist frumefnunum. Er þó ekki viss, svo óyggjandi sé.

Molar um málfar og miðla 510

 „Væntanlega liggur útskýringin í sögunni," segir Stefán Jóhann Stefánsson, ritstjóri Seðlabankans,(visir.is 21.01.2011). Ritstjóri  Seðlabankans  er  líklega  ný staða í bankanum. Var hún kannski sett á laggirnar eftir að    fyrrum seðlabankastjóri gerðist ritstjóri Morgunblaðsins ?  

 Góður pistill um Sjóvárránið í fréttum Ríkissjónvarpsins (21.01.2011). Það er með  ólíkindum að þjófarnir skuli enn  ganga  lausir.  Ríkissjónvarpið gerði stofnfjáreigendadómum líka betri skil en  Stöð  tvö.

  Það er oft  gott að geta horft á  seinkaða dagskrá  Ríkissjónvarpsins, en  Molaskrifari veltir því fyrir sér hvort  ekki  væri rétt  að nýta þessa  rás undir  íþróttaefni. Þá  geta þeir sem  það vilja sjá horft eins og þá lystir  og   íþróttadeildin  gæti hætt að ráðskast með dagskrána  í Ríkissjónvarpinu. Þetta væri til mikilla bóta.

  Dekur Ríkissjónvarpsins   við poppmenninguna  kristallast í þeirri gífurlegu umfjöllun sem  stuttri dagskrá. Önnur  menningarsvið eru  vanrækt. Lítið áhugaverð að mati þeirra,sem stjórna dagskránni í Efstaleiti.

 ...  eftir þennan digra íþróttapakka,  sagði  fréttaþulur Ríkissjónvarps (22.01.2011) Íþróttapakki ?Digur pakki?   

    Kastljósið í Ríkissjónvarpinu er þreytt. Það þarf hvíld til að ganga í endurnýjun lífdaganna. Umræðan (21.01.2011) um fréttir liðinnar viku var svo dauf,  að það lá við að maður dottaði. Annar þeirra tveggja, sem þar fenginn til að svæfa hlustendur,  kom svo  rúmlega tólf  tímum seinna sem álitsgjafi um fréttir  vikunnar í  Vikulokunum á Rás eitt.  Hugmyndauðgin    lætur ekki að sér hæða ! Í fyrri viku mun í tveimur   þáttum hafa verið rætt tvisvar við sama  ráðherra um sama efni  sama daginn.

   Molaskrifari bendir  Kastljósfólki góðfúslega  á að kynna sér beygingu karlmannsnafnsins  Ingimar.  Það beygist Ingimar, Ingimar, Ingimar, Ingimars. Kappátið sem sett var á svið  í Kastljósinu var ógeðfellt og óviðeigandi. Hvað er er best af sviðinu ? Þannig spurði  umsjónarmaður Kastljóss.  Má  bjóða þér soðið svið ? Leiksvið eða sögusvið? Orðið svið í merkingunni sviðinn haus  eða leggir sauðkindar eða nautgrips  er ekki til í eintölu. Í þessum þætti  fylgdi svo undarlegt viðtal  við bandaríska bílaleigukonu, sem átti ekkert erindi á  skjáinn. Þættinum lauk með kynningu á dansskóla í Borgarnesi, sem kannski var  skásta efnið í Kastljósi  þetta föstudagskvöld. Það var eiginlega eins og þessi þáttur væri ruslakista vikunnar. Útsvarið stendur hinsvegar  fyrir  sínu og hefur  um langt skeið  ásamt Kiljunni verið næstum eina efnið í sjónvarpi ríkisins , sem Molaskrifari   reynir að missa alls ekki af.  Jafnvel þótt dómaranum verði  stöku sinnum á mistök eins og gerðist 21.01.2011. 

Molar um málfar og miðla 509

  visir.is  segir í fyrirsögn ( og  texta 21.012011): Heildarverðmæti skulda og hlutafjárs í samkomulagi Landsbankans og ..  Orðið fé beygist: fé, fé, fé, fjár. Ekki eru allar ferðir til fjár, þótt farnar séu, segir gamalt máltæki.

 Þegar Ríkissjónvarpið (20.01.2011) sagði frá   geitabúskap í Mývatnssveit heyrði Molaskrifari ekki  betur  en  fréttamaður   segði, að  geitastofninn hefði  á sínum tíma verið skorinn niður vegna mæðuveiki. Hann átti við  mæðiveiki, sem er  gagnsætt og skiljanlegt  orð. Kannski var þetta misheyrn. 

   Molalesandi sendi  eftirfarandi: „Þó ég sé aðeins með BS próf í vélaverkfræði skil ég  stundum ekki orðanotkun í hagvísum og viðskiptum.   Eins og í þessari frétt, það voru mér fréttir að hægt væri að innleysa tap.

"...Miðað við að félagið seljist á 9,4 milljarða innleysir ríkissjóður meira en tveggja milljarða tap vegna björgunarinnar. " "      Molaskrifari tekur undir þetta. Einkennileg orðanotkun að tala um að innleysa  tap.

 Bíleigendur,sem lenda í vandræðum með farkosti sína  leita gjarnan á náðir  Leós M. Jónssonar , véltæknifræðings,sem er með fastan  dálk í Morgunblaðinu.  Leó er hreint ótrúlegur. Hann  veit  bókstaflega  allt um  bíla og  svör  hans  eru skýr og skilmerkileg. Þetta er fín þjónusta við lesendur Morgunblaðsins.

 Úr Sarpnum:  Hefðarfólk frá Bessastöðum verður líklega seint  alþýðulegt eins og  skrifað var visir.is (02.01.2011): ...að forsetahjónin hafi verið mjög alþýðuleg í heimsókninni og sett mikinn svip á kvöldið.  Það getur hinsvegar reynt að  gera sig alþýðlegt innan um almúgann. Og er það auðvitað góðra gjalda vert. Verið var að segja frá heimsókn  hjónanna  til Hjálpræðishersins á  aðfangadagskvöld.

Hér er loks tengill  þar sem kemur fram  afar  athyglisverð afstaða  starfsmanna Ríkissjónvarpsins til réttarhaldanna yfir   fólkinu sem  réðist inn á þingpalla.
www.andriki.is/default.asp?art=19012011

Molar um málfar og miðla 508

 Ósköp er það hallærislegt, þegar  Stöð tvö sýnir hálfan handboltaleik (20.001.2011) í opinni  útsendingu, en svo kemur lok, lok og læs í hálfleik. Miklu skárra  að  loka á allan leikinn. Sýna hann allan læstan eins og  Stöð tvö hefur   fullan  rétt til.   En þegar maður les það sem Anna Kristine Magnúsdóttir skrifar um framkomu  Stöðvar tvö gagnvart  viðskipavini sínum í aldarfjórðung , þá setur mann hljóðan.

 En allt er þetta er álíka hallærislegt og þegar Ríkissjónvarpið tönnlast á því, að handboltaleikjunum sé lýst í beinni útsendingu á Rás  tvö. Það er svona til að undirstrika  að Ríkisútvarpið klúðraði málinu. Og þurfa svo að fara á bjórbúllu til að  ræða við menn, sem horfðu þar á leikinn ! Það var nú eiginlega botninn.

 Lesandi sendi Molum eftirfarandi: „Ég hrekk við þegar ég heyri að kvikmynd um fésbók hafi fengið þrjú verðlaun kenndi við gullknött. Þar fékk Colin Firth líka verðlaun, hann hefur þá væntanlega fengið eitt! [Rás 2]
Eða þegar frétt um eitthvað sem tengdist dönsku kóngafólki fylgdu þær upplýsingar að tilkynning hefði borist frá danska hofinu! [Bylgjan - fréttir]
Svo heyrði ég fyrir alllöngu auglýsingu frá fatabúð sem auglýsti buxur - "tvær fyrir eina"! " 

 Molaskrifari kanna lesanda þakkir fyrir sendinguna. Því miður  heyrast svona  ambögur of oft. Það er  eins og metnað  til að gera  vel  vanti víða í íslenskum fjölmiðlum.

Það eru lítil takmörk  fyrir ruglinu,sem hlustendum  morgunútvarps Rásar tvö er  boðið upp á. Í morgun (20.01.2010) var  sagt við hlustendur:  Það  á engin pólitísk hugmyndafræði að vera í stjórnarskránni!  Molaskrifari  hélt reyndar að  stjórnarskráin snerist um pólitíska hugmyndafræði. Þar segir í  1. gr. Ísland er lýðveldi með þingbundinni stjórn.  Er það ekki pólitísk hugmyndafræði ?  Heldur betur.  

 Alþingismaður gerir sig að hálfgerðu fífli með því að bera fram fyrirspurnir á Alþingi um hluti, sem öllum eru aðgengilegir ( Hvað eru Íslendingar margir ? Hvað hefur Ísland sendiráð í mörgum löndum? Hvað hefur Ísland stjórnmálasamband við mörg lönd ?) Þessar upplýsingar eru  öllum aðgengilegar ýmist með því að hringja í Hagstofuna  eða skoða heimasíðu utanríkisráðuneytisins. Það er   fáránlegt, að ætlast til þess að  starfsmenn  stjórnarráðsins sinni svona  rugli. Tölvudeild  Alþingis ætti að kenna  þessum þingmanni að nota Google-leitarvélina. Þar nægir að slá inn:  Stjórnmálasamband Íslands. Þá kemur á skjáinn listi yfir öll þau lönd,sem Ísland hefur stjórnmálsamband við. Þetta er með ólíkindum.  Hvaða erindi á fólk á á Alþingi,sem þarf að  spyrja um það á Alþingi hvað Ísland sé með sendiráð í mörgum löndum? 

Molaskrifari man reyndar þá tíð á Alþingi, fyrir  svona  20-30 árum, að   einn og sami þingmaðurinn  dengdi  inn  fyrirspurnum í tugatali. Flestar voru þær um tilgangslausa tölfræði, sem ekki nýttist til eins eða neins. Það kostaði hinsvegar mikla   vinnu og mikið fé í  stjórnkerfinu að   elta uppi svör við ánalegum spurningum , -  -- svör sem aldrei var gert neitt með.

Molar um málfar og miðla 507

  

Auglýsingabæklingur frá nýrri verslun,sem  kallar sig DOMTI (líklega  útibú frá erlendri verslanakeðju)  kom  með dagblöðunum  til  Molaskrifara í morgun (19.01.2011). Þar  stendur   á  forsíðu:  Þín innkaup á einstöku verði.  Það er eins og  maður, sem ekki er mæltur á íslensku, hafi samið þetta. En því miður er svona eða svipað orðalag  ekkert einsdæmi.

 

Brengluð orðaröð er að vera  býsna algengt  fyrirbæri.Fyrir  nokkru sendi  athugull lesandi  Molum eftirfarandi ábendingu: „Gagnstætt venju í mörgum granntungum okkar er það meginregla í íslensku að eignarfall (og eignarfornafn) standi á eftir því orði sem stjórnar fallinu". 

Hér fara eftir  nokkur  dæmi, einkanlega úr  auglýsingum ,um brenglaða orðaröð: Okkar framtíð,  auglýsing frá   banka. Þinn hraði  áletrun á   tæki, sem mælir hraða  bifreiða á Álftanesi. Fólk afli sér upplýsinga um sín réttindi (úr fréttum Stöðvar tvö). Viltu hámarksraka fyrir þína húð ? Þinn hagur í bílavarahlutum.

Auglýsingahöfundar   eru hér ekki til  fyrirmyndar um notkun móðurmálsins.

  Skrifað var á pressan.is (19.01.2011): Arion banki hefur selt tryggingafélagið Sjóvá.  Kaupandinn er fjárfestingafélagið Stefnir. Starfsfólki Sjóvár var kynnt málið á fundi sem var að ljúka.  Þetta er  vægast  sagt ekki nákvæmt.  Hið rétta er  að  fagfjárfestafélag, sem tengist   Arion banka, keypti rúmlega  52% hlut í Sjóvá. Seljandi var Seðlabanki Íslands, íslenska ríkið.  Þessi fréttamiðill, sem Vátryggingafélag Íslands á með  nokkrum  Framsóknarmönnum, er greinilega ekki mjög  áreiðanleg heimild. (Hvað er tryggingafélagið mitt annars að vasast í svona rugli ?)   Svo var  reynt að leiðrétta  ruglið á pressan. is og þá   tók  ekki betra við, því þá var sagt: Íslandsbanki hefur selt tryggingafélagið Sjóvá.  Kaupandinn er Stefnir, sem er í dótturfélag í eigu Arion banka. Starfsfólki Sjóvár var kynnt málið á fundi sem var að ljúka.     Sá sem skrifaði heldur greinilega að Seðlabanki Íslands og Íslandsbanki séu eitt og  sama  fyrirtækið !  

Og vefmiðillinn  visir.is sagði: Íslandsbanki seldi í dag tryggingafélagið Sjóvá,át   vitleysuna um Íslandsbanka upp úr  pressunni.  Ótrúlegt. Opinberar léleg vinnubrögð. Mbl.is  hafði þetta rétt frá upphafi. Hrós fyrir það.

  Úr mbl. is (19.01.2011): Leikarateymi og aðrir starfsmenn nýju Twilight-myndanna urðu strandaglópar á brasilískri eyju á dögunum vegna mikillar rigningar sem aftraði þeim að snúa aftur á hótel sitt.  Það sem átt er við er að fólkið varð veðurteppt. Það varð ekki  strandaglópar og  svolítið einkennilegt er að tala um að  rigning  hafi aftrað þeim að komast á hótelið sitt. 

 Það er skrítið hvernig  samkynja  ambögur  vaða upp í  fjölmiðlum. Fréttamaður,sem  annars virðist  prýðilega máli farinn, sagði í hádegisfréttum  Ríkisútvarpsins (19.01.2011): ... og hafa  sérfræðingar í öryggismálum grunað, að það tengdist tölvuárásum erlendra ríkja.  Hér  hefði   átt að segja: ... og hefur  sérfræðinga í öryggismálum grunað.... 

 

Molar um málfar og miðla 506

  Úr  mbl.is  (18.01.2011) ... í máli ákæruvaldsins á hendur níu einstaklingum sem m.a. gefið að sök árás á Alþingi 8. desember 2008.  Ekki er þetta nú  alveg í  lagi. Betra  hefði  verið að segja að þessum  einstaklingum væri gefið að  sök að hafa ráðist að,  eða á, Alþingi.

Meira úr  mbl.is (18.01.2011): Ökumaður missti stjórn á bíl sínum í hálku við Brúará í Biskupstungum um klukkan hálf þrjú í dag með þeim afleiðingum að hann valt á aðra hliðina. Eins  gott að bíllinn valt ekki á hina hliðina. Eða báðar hliðarnar.

 Þegar Ríkissjónvarpið ekki telur  ástæðu til að kynna fyrirfram við hvern  er rætt í þættinum Í návígi, þá nennir  Molaskrifari  sjaldnast  að voma yfir því að sjá  hver  birtist  á skjánum hjá Þórhalli.  Einkennilegt vinnulag.

  Hversvegna  hafnar Ríkissjónvarpið ekki sjónvarpsauglýsingum þar sem eru  enskuslettur? Þannig auglýsingar ganga þvert á svokallaða málstefnu Ríkisútvarpsins?  Líklega er það vegna þess að  enginn  virðist bera ábyrgð á því að málfar í auglýsingum sé  boðlegt. Stjórn þessa mikilvæga fyrirtækis þjóðarinnar er í molum.

 Í  sjónvarpsfréttum Ríkisútvarpsins (18.01.2011) las  fréttaþulur: Rannsókn bendir til þess að helmingur barna og unglinga skorti D-vítamín.  Helmingur barna  skortir ekki, heldur skortir  helming barna  D-vítamín. Undarlegt að reyndur fréttalesari  skuli   ekki heyra,  þegar hann les  þennan vonda texta.Í seinni fréttum sjónvarps var sagt frá  sjósundi eða  sjóbaði  fólks úr  rússnesku rétttrúnaðarkirkjunni á  Íslandi í Nauthólsvík.  Fréttin átti þó varla erindi í sjónvarp, því engin fylgdi myndin. Mbl.is birti mynd úr Nauthólsvik, þar sem var ekki beinlínis baðveður.

 Molaskrifari festist óvart við athyglisverðan pistil Ingva Hrafns um landbúnaðarmál á ÍNN. Sauðfjárbændum virðist vegna  vel um þessar mundir og  er gaman  að heyra  jákvæðar fréttir  úr landbúnaði. Molaskrifari hefur  reyndar áður heyrt  áhugaverðar fréttir úr landbúnaði á ÍNN, fréttir sem hann hefur ekki séð að  stóru  fréttastofurnar hafi gefið gaum. Ekki verður annað sagt en rjóður og sællegur  sjónvarpsstjórinn sé sundurgerðarmaður í klæðaburði ,grænn jakki, bleikt bindi,  og blá skyrta með hvítum flibba!

   

Molar um málfar og miðla 505

   300 tonna byggðakvóti fýsir, segir í  fyrirsögn á mbl.is (18.01.2011). Molaskrifari þykist  vita, að átt sé við, að 300 tonna byggðakvóti   freisti eða sé freistandi, en aldrei  hefur hann   heyrt eða séð  sögnina að fýsa  notaða með þessum hætti. Algengast er: Mig  fýsir, - mig  langar.

  Orðið tafarlaust kom  fyrir í  frétt í Ríkissjónvarpinu (17.01.2011) Fjallað var um þá sem  brjóta af sér  í umferðinni vegna elliglapa eða öldrunarsjúkdóma. Lögreglu skorti  heimild til að svipa  slíka  ökumenn ökuskírteini tafarlaust. Ekki er  Molaskrifari alveg sáttur  við  þessa notkun orðsins tafarlaust. Betra  hefði verið að segja   umsvifalaust , eða  að svipta  viðkomandi  ökuskírteininu á staðnum.  Í sama fréttatíma var einnig  talað um að lögreglan hefði þurft að skarast í leikinn. Átti auðvitað að vera  skerast í leikinn.

 Í fréttum Stöðvar tvö (17.01.2011) var talað um að senda  köld skilaboð.  Málvenja er að  tala um að senda einhverjum kaldar kveðjur, vondar fréttir eða  sýna  e-m   ókurteisi. Í sama  fréttatíma  var  sagt að á einhverju  hefðu orðið  verulegir brestir.  Brestir geta  komið í samstarf , ef það  breytist  til verri vegar. Misbrestur  getur  verið á  einhverju, skortur er á  einhverju  eða eitthvað er  gallað.

  Málfari i morgunútvarp Rásar tvö fer  lítið fram.   Í gær  (17.01.2011) var þar sagt , að Berlusconi væri undir rannsókn! Þann  sama dag var  flutt menningarframlag Ríkisútvarps, leikaraslúður  vestan frá Kyrrahafsströnd Bandaríkjanna . Enskuslettur  voru  nánast í hverri setningu. Ambögurnar skorti ekki heldur:  Margar tískur í gangi. Það þorir varla enginn.  Nýtt innslag  af sama tagi var  boðað  næsta  föstudag. Líklega á þetta verða  einskonar  Daglegt mál á Rás  tvö. Rúsínan í pylsuendanum var  þegar sagt var  frá    bestu erlendu kvikmyndinni á Golden Globehátíðinni:  ... eða  Heven  eins og hún heitir á dönsku!  Myndin heitir  Hævnen, hefndin. Ekki hvarflaði að umsjónarmönnum að lelðrétta  ruglið.  Í inngangi var fluttur langur pistill á  ensku. Það er þvert á málstefnu Ríkisútvarpsins.  Rétt er líka að gefnu tilefni að árétta að Golden  Globe  verðlaunin  eru ekki kennd  við  gullinn knött, heldur gullinn hnött.  Því eru lítil takmörk sett  hvað  Ríkisútvarpið telur  okkur hlustendum boðlegt.  Svo  er líka til bóta (18.01.2011) að fara rétt með nöfn þeirra, sem  fram koma í morgunþættinum.

 Hér  hefur  nokkrum sinnum verið  vikið að óþolandi   óstundvísi í dagskrá  Ríkissjónvarpsins. Haldið verður áfram að nefna þetta þangað til  stjórnendur dagskrár  í Ríkisútvarpinu eru búnir að læra á klukku. Þeir gætu farið í skóla á  Rás  eitt. Alvöru sjónvarpsstöðvar leggja metnað í að halda sig  við auglýsta  dagskrártíma.    Ágætur þáttur um  Þóru Einarsdóttur  söngkonu hófst til dæmis ekki á réttum tíma á  sunnudagskvöld  (16.01.2011). Einkum vegna   auglýsinga frá  Ríkissjónvarpinu. Það eru aumir  stjórnendur ,sem ekki geta lagfært þetta. Óstundvísi af þessu tagi er óvirðing við hlustendur.

Molar um málfar og miðla 504

   Enginn má  við mörgum, heitir þáttur sem Ríkisútvarpið sýndi  á laugardagskvöldið var                   (15.01.2011).  Orðtakið  er: Enginn má  við margnum  og  Ríkisútvarpið á ekkert með að  breyta því.

 Úr fréttum Ríkisútvarps (15.01.2011  )....   tíu mínútum síðar barst  tilkynning um annað slys, ótengdu hinu fyrra.  Ekki var þetta vel að orði komist.

 Úr mbl.is (15.01.2011): Raunar eru sumir vegir ekki í þjónustu nema fáa daga í viku. Það er ekki fyrir hvern sem er að skilja þetta. Átt er við að  vegir  séu ekki  ruddir  eða salti dreift á   hálkubletti nema  nokkrum sinnum í viku.

 Molaskrifari les Árna Matt   Frá  bankahruni til byltingar, bók þeirra  Árna Mathiesens og Þórhalls Jósepssonar. Bókin er ágæt upprifjun og  veitir    nýja sýn á ýmislegt. Molaskrifari var  við störf í Færeyjum, þegar  þessi ósköp dundu yfir og  fylgdist ekki eins vel með eins  þeir sem hér heima voru.  Bókin er  lipurlega skrifuð, enda  var  höfundurinn rekinn af fréttastofu Ríkisútvarpsins, sem  Morgunblaðið kallar nú Óðinsvé.

 Úr mbl.is (15.01.2011): Sonurinn, sem heitir Ron Reagan, segir í bók sinni „100 ára ártíð föður míns“ að hann hefði tekið eftir Alzheimereinkennum hjá föður sínum þegar hann hafði gegnt embættinu í þrjú ár.Ártíð er dánarafmæli. Ronald Reagan lést árið 2004. Árið  2104 er því hundraðasta ártíð hans. Morgunblaðið ruglar hér saman  aldarafmæli og   ártíð.  Í ljósi þess að bókin heitir á ensku My Father at 100, er þýðingin á bókartitlinum enn furðulegri. Það hefur raunar aldrei legið vel fyrir Morgunblaðinu að þýða úr ensku.

Molar um málfar og miðla 503

  Yfirdrifið af snjó í Hlíðarfjalli, segir í  fjögurra dálka fyrirsögn á  baksíðu Morgunblaðsins                      (14.011.2011)  Molaskrifari er á því að betri fyrirsögn hefði verið: Nægur snjór í Hlíðarfjalli.

... voru síðan dæmdir í gæsluvarðhald til 25. og 21. janúar næst komandi... Af pressan.is (14.01.2011).  Það er ekki svo, að menn séu dæmdir í gæsluvarðhald. Kveðinn er upp gæsluvarðhaldsúrskurður. Þetta eiga þeir sem  skrifa fréttir  að hafa á hreinu.

 Blæða ekki hjörtu landsmanna? Spyr bloggari  (14.01.2011) . Sögnin að blæða er hér ópersónuleg, - einhverjum blæðir,   blóð rennur  úr einhverjum. Þessvegna ætti að standa hér: Hjörtum landsmanna blæðir.  Ég  skal blæða. Er hinsvegar slangur , eða óformlegt mál. Ég skal borga. Ég blæði.

  Stjarna er fædd, sagði kynnir í Kastljósi  Ríkissjónvarpsins (14.01.2011).  Enskusletta þýdd á íslensku. Geturðu sett  fingurinn á það?   Sagði sami  sjónvarpsmaður.  Líklega liggur enska  betur  fyrir  þessum sjónvarpsmanni en íslenska.

 Vissulega starfa íþróttafréttamenn  hjá Ríkisútvarpinu, sem eru ágætlega máli farnir  en það  gildir  ekki um þá  alla. Ekki þann sem sagði í sexfréttum   Ríkisútvarpsins (14.01.2011):  Aðgangseyrir  fyrir almenning  á upphafshátíðina er ókeypis.  Aðgangseyrir er ekki ókeypis. Aðgangur er ókeypis. Þetta er ekkert mjög flókið.

  Molaskrifari heyrði aðeins í Útvarpi  Sögu á laugardagsmorgni (15.01.2011). Það staðfesti ,að enn er þar verið að ljúga að þjóðinni. Þar var á ferðinni verðbréfasalinn frá New York sem  fullyrti enn einn ganginn að 98% þjóðarinnar hefðu verið á móti Icesave samningnum,sem fór í þjóðaratkvæðagreiðslu. Það voru 98% þeirra sem greiddu atkvæði. Allt annar handleggur. Kannski kann maðurinn ekki á prósentur. Það eru þjóðhættulegir miðlar, sem ljúga að hlustendum.

Molar um málfar og miðla 502

    Jafnmikið regnvatn féll til jarðar... var sagt í kvöldfréttum Ríkisútvarpsins (13.01.2011). Betra hefði verið að segja: Jafnmikið rigndi.. eða, úrkoma var jafnmikil og ...  Þetta með regnvatnið var svo endurtekið í  sjöfréttum Ríkissjónvarpsins, enda  er um að gera gjörnýta góðar setningar. „Regnið þungt   til foldar fellur, fyrir utan  gluggann minn", segir í alkunnum fyrriparti.

  Fréttamaður   Stöðvar  tvö (13.01.2011) talaði ítrekað um  fræðamenn, þegar átt  var  við fræðimenn, eins og þulur réttilega sagði í inngangi fréttar.

  Molavin spyr: „Er nafnorðið *húsleit* til í fleirtölu? Svo virðist mega ætla, því allir fjölmiðlar landsins hafa í dag fjallað um "húsleitir" vegna meintra brota yfirmanna í Landsbankanum, þeim gamla. Ég hef vanizt því að nota orðið í eintölu, og þá um húsleit á fleiri stöðum en einum ef svo bar undir. Síðustu daga hefur verið gerð leit að týndum manni - á mörgum stöðum, ekki leitir. Vonandi kemur hann þó í leitirnar."  Molaskrifari telur Molavin hafa rétt fyrir sér um þetta sem og margt annað.

...og súrmaturinn hefur verið að lagast  í tvo til þrjá mánuði, sagði fréttamaður Ríkissjónvarps (13.01.2011).  Hann átti við að súrmaturinn hefði verið að verkast, taka í sig súrinn úr  sýrunni eða mysunni,sem hann er  látinn liggja í. En auðvitað má  segja sem svo að innmatur lagist við að verða settur í súr.

  Það er einstaklega hallærislegt að láta fréttamann norpa í kuldagalla  fyrir utan húsakynni Sérstaks  saksóknara  við Skúlagötu  og segja þaðan stuttar fréttir, eins og gert var í báðum fréttatímum Ríkissjónvarpsins (13.01.2011).  Þetta undirstrikar að í þessu tilviki  var meiri áhersla lögð á umbúðir  en innihald.

   Það vefst  dálítið  fyrir ráðamönnum að skýra  hversvegna þarf að leggja  á sérstaka vegatolla í viðbót  við vegaskatta sem við greiðum í  bensín- og olíuverði. Vegaskattana á bensín á að nota  til að kosta  vegaframkvæmdir. Það er ekki gert nema að litlu leyti,. Þeir renna beint í ríkishítina.  Hina almennu tekjuhít. Enda sagði  innanríkisráðherra, að þetta væru sértækar aðgerðir  vegna  sérstakra aðstæðna. Og   svo er ætlast til að við skiljum  þetta.  Ráðherrar eiga að tala mannamál.

    Fram kom í fréttum  Ríkissjónvarps (13.01.2011)að það sem einu sinni hét landlega   er nú kallað brælustopp. Landlega er reyndar  langtum fallegra orð.