Molar um málfar II

  Á Morgunvakt   Rásar 1 á RÚV í morgun var  talað um “þrjú verðlaun”. Orðið verðlaun er  fleirtöluorð. Þessvegna  hefði verið rétt að tala um þrenn verðlaun. Þetta er algeng  villa.  Rataði meira  að segja inn í áramótaávarp  forseta  Íslands fyrir  fáeinum árum. Í Morgunblaðinu  var  svo  tekið  til orða í dag að ekki  hefði verið “gengið á eftir málinu”.  Það er  hægt að ganga eftir  svari, krefjast  svars. Ekki er  hægt að   ganga á  eftir  svari eða ganga á  eftir máli. Það  sem  blaðamaður   Morgunblaðsins líklega átti  við  var að  þessu tiltekna  máli hefði  ekki verið  fylgt  eftir. 

Í fréttum  RÚV  kl. 1800 var  sagt að væntanlegur  frambjóðandi  væri  fæddur  á Neskaupstað. Þetta er andstætt  málvenju. Það  er aldrei  talað um  að fara á  kaupstað  eða  að eitthvað  gerist á  kaupstað.

Á mínu bernskuheimili var   raunar aldrei  talað um Neskaupstað heldur ævinlega Norðfjörð þar sem  við áttum  og eigum frændgarð.

Athugasemdir

[ÞJÓÐARSÁLIN, 20.2.2009 kl. 09:35]

Sæll Eiður!

Þú hefur örugglega heyrt hversu margir segja nú tvemur: Ég henti tvemur steinum í sjóinn. Þetta orðalag heyri ég mjög oft. Nýverið talaði kona í útvapinu um að EXA við bókstaf í kosningum. Ég heyri þetta reyndar oft hjá ungum krökkum, sem nota það yfir að hætta í forriti.

[Dunni, 20.2.2009 kl. 12:27]

Fyrir austan var nú reyndar alltaf talað um að fara á Norðfjörð eða fara á Neskaupsstað ef menn vildu vera virðulegir í máli.

Þannig að ég held að það fari svolítið eftir málvenjum á hverjum stað hvort talað er um á Neskaupstað eða í Neskaupstað.  Hugsa að ég myndi telja að ég ætti heima á Eskifirði en þeir sem búa á sveitabænum fyrir innan kaupstaðinn eiga heima í Eskifirði.

Sumir eiga heima í Borgarfirði, fyrir sunnan, en þeir sem eiga heima á Borgarfirði eru að austan.  Svo geta menn deilt um hvað er rétt og hvað er rangt.  Eitt er víst. Að dauðhreinsað tungumál er leiðinlegt tungumál og sennilega líka ljótt.

[Ben.Ax. (Benedikt Jóhannes Axelsson), 20.2.2009 kl. 16:43]

Ég er sammála þér, Eiður. Ég er svo sem enginn sérstakur hreintungustefnumaður en rétt skal vera rétt. Hvað varðar á og í er, eins og komið hefur fram, háð málvenju oft og tíðum. Ég fæddist t.d. á Húsavík en álverið í Straumsvík.