Molar um málfar og miðla 2055

Í TILEFNI DAGSINS

Sveinn skrifaði Molum (17.11.2016): ,, Sæll Eiður,
á fréttamiðlinum Vísi var flennistór fyrirsögn, Rooney segir sorrí, og það á degi íslenskrar tungu.

http://www.visir.is/rooney-segir-sorri/article/2016161119004
Nær væri að Vísir bæðist afsökunar.

Áður hefur vakið athygli og meðal annars fjallað um það á þessum vef  hversu augljóslega brotin eru lög á matarvef Netmogga með áfengisauglýsingum. Þar er ekkert lát á og í gær (15.11) birtist þar auglýsing á Thule bjór. Eða dæmi nú hver fyrir sig:“

http://www.mbl.is/matur/frettir/2016/11/15/jolabjordagatal_i_takmorkudu_upplagi/

 

Molaskrifari þakkar Sveini bréfið og þarfar ábendingar. Ítrekuð er gagnrýni á Ríkissjónvarpið fyrir síendurteknar áfengisauglýsingar. Þar er ekkert lát á lögbrotum þótt látið sé sem verið sé að auglýsa einhverskonar léttöl.  

 

STÓR TRUFLUN!

Á mbl. Is er (15.11.2016) talað um  stóra truflun,en þar segir: Stór trufl­un varð í flutn­ings­kerfi Landsnets í dag klukk­an 14:26 þegar eld­ingu sló niður í Búr­fells­línu 3.

Molaskrifari minnist þess ekki að hafa heyrt  talað um  stóra truflun.  Varð ekki rafmagnslaust? Varð ekki dreifikerfið óvirkt um hríð?

http://www.mbl.is/frettir/innlent/2016/11/15/stor_truflun_i_flutningskerfi_landsnets/

 

 

MERKING ORÐANNA

Í Fréttablaðinu (15.11.2016)  er klausa á bls. 14 þar sem  sagt er að Birgitta Jónsdóttir, Pírati  eða sjóræningi sé í því að loka hurðum, útiloka samstarf við aðra flokka.  Ummæli hennar hafi hleypt illu blóði í  í fólk innan Bjartrar framtíðar. Síðan segir  ,,Það er einkennilegt af stjórnmálamanni  í forsvari fyrir tíu manna þingflokk að tala  svo fjálglega á óvissutímum.Stjórnmál eru list hins mögulega, ekki lokunar. ‘‘

  Eitthvað vefst merking þess að tala fjálglega fyrir þeim sem þetta hefur skrifað. Að tala fjálglega merkir að vera háfleygur eða tala af mikilli andakt. Það má líka nota um mælgi, innihaldslítinn orðaflaum.

 

ALLT ER STAÐSETT

Oft hefur verið vikið að því í Molum hve mikið dálæti fréttamenn og fréttaskrifarar hafa á sögninni að staðsetja. Allt er staðsett. Í fréttum Stöðvar tvö (16.11.2016) sagði fréttamaður okkur: ,, Við erum hérna á bráðamóttökunni þar sem neyðarmóttakan staðsett“.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Athugasemdir

[Ómar Ragnarsson, 18.11.2016 kl. 15:18]

"Séð og heyrt" birtir á forsíðu nýjasta eintaks tímaritsins mynd af Kristni Hrafnssyni með fyrirsögninni: "Sorrý, Kristinn. Þú ert ekki einn." 

Ja, hérna. Fyrir ókunnugan, sem aðeins sér þessa fyrirsögn tilsýndar í búð, virkar það framandi að verið sé að samhryggjast manni vegna þess að hann sé í sambúð. 

En skýringin er sú, samt afar vandræðaleg, að sama tímarit birti mynd á sama stað í næsta tölublaði á undan með fyrirsögn um það að Kristinn væri skilinn og því orðinn einn. 

Þetta var kolrangt og því er það leiðrétt á áberandi hátt í næsta tölublaði. 

Góð nýting þetta, forsíðufyrirsagnir í tveimur tölublöðum í röð um mál sem var bull og vitleysa frá upphafi!  

En stað þess að segja þá einfaldlegal í síðara skiptið: "Afsakaðu Kristinn" á íslensku, er sagt "Sorrý, Kristinn" þar sem móðurmálið er ekki aðeins lítilsvirt, vegna þess að notað sé erlent orð, heldur veldur notkun erlenda orðsins misskilningi hjá meirihluta þeirra, sem sjá blaðið aðeins tilsýndar en kaupa það ekki. 

[Eiður Svanberg Guðnason, 18.11.2016 kl. 17:13]

Endemis rit, Ómar. Því bregður fyrir á biðstofum. K kv   esg