Skilgreiningar hannaðar eftir hendinni

  Forseti  lýðveldisins hannar nú nýjar skilgreiningar eftir  hendinni  til að þjóna hentisemi  sinni og persónulegum  metnaði.   Þjóðin er löggjafinn,  er alveg  ný skilgreining.  Hún finnst líklega hvergi á  bókum, en  hún hentar núna, þegar  Ólafur Ragnar Grímsson er byrjaður að búa sig undir  framboð til fimmta kjörtímabilsins á Bessastöðum.  Hann er alltaf að  reyna að gera það sem enginn hefur  áður gert, jafnvel þótt með endemum sé.

  Það er annars svolítið hlálegt að  sú staða skuli  nú vera uppi, að Ólafur  Ragnar  skuli   að öllum líkindum ætla sér að sitja  fimmta kjörtímabilið á Bessastöðum  í  skjóli ritstjóra Morgunblaðsins og fyrrverandi  forsætisráðherra  og ýmissa helstu forkólfa gamla  Sjálfstæðisflokksins. Þetta er  ekki síst  hlálegt  í ljósi þess að einu sinni    sagði   forsætisráðherra um Ólaf Ragnar  Grímsson, að hann mundi aldrei, aldrei sitja sem forsætisráðherra í skjóli þess manns.  En nú gæti  farið svo að  Ólafur Ragnar sæti eitt kjörtímabil í  viðbót í skjóli  ritstjóra Morgunblaðsins á Bessastöðum. Undarleg er veröldin  og ólíklegustu menn sænga nú saman  í pólitík. (Politics makes strange bedfellows, er sagt á ensku)

 Á  blaðamannafundinum á Bessastöðum, sagðist  Ólafur    Ragnar  alls ekki vera að breyta  stjórnskipan  landsins. Auðvitað er hann að því. Ísland er lýðveldi með  þingbundinni stjórn. Forsetinn  sniðgengur  fulltrúalýðræðið og   baðar sig  nú í fjölmiðasólinni. Hann gæti þó brennt sig.

Athugasemdir

[Hjálmtýr V Heiðdal, 21.2.2011 kl. 16:41]

Kallinn er líka búinn að svipta Alþingi umboði í þessu máli. Þjóðin er í rússíbanareið sem menn vita ekki hvar endar. Merkilegir tímar og óvissir.

[Björn Ragnar Björnsson, 21.2.2011 kl. 17:17]

Eiður, ég leyfi mér að efast um að þessi frasi um þjóðina sem löggjafa, valdi þér neinum raunverulegum skilningsvandræðum.  Rökstuðningur forsetans er alls ekki háður notkun þessa frasa að einu eða neinu leiti.

[Þorsteinn Siglaugsson, 22.2.2011 kl. 17:28]

Forsetinn sagði að í þessu máli væri þjóðin löggjafinn. Ástæðan er að með ákvörðun hans í fyrra var málinu vísað til þjóðarinnar. Málið er enn í gangi og engin samstaða hefur myndast um að taka ákvörðunarvaldið aftur frá þjóðinni. Því leiðir af sjálfu sér að endurtaka verður þjóðaratkvæðagreiðsluna til að klára það.

Þetta eru einföld, skýr og sterk rök. Þú ert þó ekki sá eini sem skilur þetta ekki. Í gær var í Speglinum stjórnmálafræðingur frá Akureyri að röfla um þetta og alveg augljóst að hann skildi ekki málið neitt frekar en þú.