Molar um málfar og miðla 269

 Bjartsýnn var Molaskrifari á að  fréttamönnum tækist að tala rétt um  það hvenær kjörstaðir væru opnar og hvenær þeim  væri lokað í þjóðaratkvæðagreiðslunni  a laugardaginn var. Bjartsýnn þar til hann hann heyrði þrautreyndan fréttamann á Stöð tvö segja (06.03.2010): Kjörstöðum lokar klukkan tíu í kvöld.   Kjörstöðum lokar ekki,   kjörstöðum var lokað klukka  tíu um kvöldið.

Útsvarsstjarna sigrar prófkjör,segir í fyrirsögn á pressan.is  (06.032.10). Menn sigra ekki prófkjör, menn  sigra í prófkjöri. Menn sigra ekki keppni. Menn sigra í leik.  Sá sem þetta hefur  skrifað, er ekki slyngur í réttri notkun móðurmálsins.

Í fréttum Stöðvar tvö var nýlega   talað um að bera hitann og þungann í málinu. Þetta er ekki rétt notkun þessa orðtaks. Talað er um að einhver beri hitann og þungann af einhverju, þegar  sá sem um  er rætt, er sá sem mest mæðir á.

Jónas Kristjánsson, jonas.is ,  tvískrifar  orðið  þátttaka með  t- um í bloggi sínu (06.03.2010). Pennaglöp. Jónas veit auðvitað betur.

 Í RÚV (06.03.2010) ,líklega í Gettu betur, var talað um útgerðarbónda.  Betra or  væri , -  útvegsbóndi. Gamalt og  gott orð. Guðmundur Jónsson á Rafnkelsstöðum í Garði minn fyrsti vinnuveitandi, er ég var sjö ára, var útvegsbóndi. Hafði kýr í fjósi , báta á sjó og saltfisk á stakkstæði, eða reit.  

  Við erum með verulegan sneisafullan pakka í dag, sagði íþróttafréttamaður RÚV (06.03.2010) Þetta er á margan hátt óæskilegt orðalag.  „Pakkinn", sem hann talar um er líklega íþróttafréttatíminn. hann getur auðvitað verið sneisafullur, en aldrei   verulega sneisafulllur !

 Í spurningaþætti RÚV sjónvarps (06.03.2010) var  birt mynd af höggmynd Einars  Jónssonar og sagt að hún héti Útlagar. Molaskrifari hefur alltaf staðið í þeirri trú, að myndin héti Útlaginn. En rétt er það hjá RÚV að myndin heitir Útlagar. Eins gott  að vera ekki of fljótur á sér.

Þegar  brotsjóir  riðu yfir farþegaskip á  Miðjarðarhafi  og tveir farþegar biðu bana var sagt á í einhverjum miðlinum, að  manntjón hefði orðið í öldugangi ! Klaufalega orðað.

Athugasemdir

[AuðurA (IP-tala skráð) 11.3.2010 kl. 18:50]

Skemmtilegar og góðar ábendingar hjá þér.

En ég taldi fljótlega þessar villur í textanum:

"hvenær kjörstaðir væru opnar"
"þar til hann hann heyrði"
"var lokað klukka  tíu"
"sneisafulllur"
"Betra or  væri "

 Það er hægt að nota villupúka til að koma í veg fyrir margar svona ásláttarvillur.

 Kv.

[Eiður Svanberg Guðnason, 11.3.2010 kl. 22:48]

 Takk fyrir þessar ábendingar, Auður.. Allt  eru þetta  stafavillur, innsláttarvillur og mér til lítils sóma. Það  skal  fúslega  viðurkenna. Hvenær kjörstaðir væru opnir, að sjálfsögðu. Eitt orð er tvítekið , einn staf  vantar í  tvö orð. Samkvæmt stafsetningarorðaókinni á  að skrifa  sneisafullur, en það var eina athugasemdin  sem villu púkinn gerði við textann! Því fletti ég orðinu upp. Púkinn gefurþví falskt öryggi. Þarna  treysti ég á hann um of. Og flýtti mér of mikið. Flas ekki til fagnaðar, Þakka þér skrifið.