Molar um málfar og miðla 1541

   Fyrrum fréttamaður skrifaði (10.08.2014):

,,Fréttastofa Ríkisútvarpsins er stöðugt að læra góð vinnubrögð. Nú hefur hún tekið orðskrípið „íþróttapakki“ upp eftir Stöð 2. „Þéttur íþróttapakki í kvöld, farið ekki langt“, segja þeir á Stöð 2. Þetta ásamt öðru veldur ákveðnu hugarástandi hjá mér. Þetta hefðum við á mínum unglingsárum kallað „plebbahátt“, Já, það er einmitt plebbaskapurinn á Stöð 2, sem hefur haldið mig frá þeirri stöð. En nú hefur Ríkisútvarpið sem sagt bæst í plebbahópinn og lapið ósómann upp eftir keppinautnum í þéttum íþróttapökkum.” Molaskrifari tekur undir með  fyrrum fréttamanni. Þetta íþróttapakkatal er  óttalega hallærislegt,  að ekki sé  sterkar að orðið kveðið.  Þessi ágæti bréfritari og fyrrum kollega segir líka: ,, Svo langar mig einnig  að benda á algenga meinloku í fréttaskrifum, sem oft ber á, jafnvel hjá vönduðum fréttamönnum eins og Veru Illugadóttur. Sagt er: ,,x hefur veitt fjármunum til verkefnisins. Á að vera veitt fjármuni til verkefnisins. Fjármunir eru ekki vatn. Menn veita vatni á akra, en veita peninga til verka”.  Molaskrifari þakkar þarfar ábendingar.

 

Molavin skrifaði (12.08.2014): ,,Fréttakona Stöðvar 2 sagði í kvöldfréttum  áðan að læknir, sem smitast hafði af ebólu, hefði verið fluttur til Spánar með mikilli viðhöfn. Rétt er að það var mikill viðbúnaður vegna smithættu en það er ekki sama viðhöfn og viðbúnaður. 

Sem fyrr les enginn fullorðinn yfir fréttatextann áður en hann er fluttur.” Gæðaeftirlit ekki til staðar, frekar en fyrri daginn. Þakka bréfið.

 

Í fréttum Ríkissjónvarps (10.08.2014) var sagt: Í  gær opnuðu  sýningar. Sýningarnar  voru opnaðar. Þær opnuðu ekki neitt. Sennilega  er það tapað stríð að tala gegn þessari notkun sagnarinnar að opna. Þetta heyrist  og sést í fjölmiðlum næstum á hverjum degi.

 

Óþörf þolmyndarnotkun á mbl.is (11.08.2014): Tvær bif­reiðar voru stöðvaðar af lög­reglu á höfuðborg­ar­svæðinu í nótt,  ...Betra hefði verið: Lögreglan  stöðvaði tvær bifreiðar á höfuðborgarsvæðinu í nótt.  Germynd alltaf betri.

 

Gisti ekki í Landmannalaugum , er óræð fyrirsögn á mbl.is (11.08.2014). Það  fyrsta sem lesanda  dettur  líklega í hug er, að verið sé að segja frá ferðamanni,sem ekki hafi gist í Landmannalaugum , heldur annarsstaðar.  Svo er ekki. http://www.mbl.is/frettir/innlent/2014/08/11/gisti_ekki_i_landmannalaugum/

Efni fréttarinnar er að breyta eigi skipulagi svæðisins þannig  ,  að ekki megi tjalda eða  gista við laugarnar heldur  verði fólk að tjalda nokkurn spöl frá  laugunum. Efni fréttar á að vera hægt að ráða af fyrirsögn. Það er ekki hægt í  þessu tilviki.

 

Í undirfyrirsögn á bls. 4 í Morgunblaðinu (11.08.2014) segir:  Leki kom upp í bát við Hólahóla í gær. Ekki er venja að tala um að leki komi upp. Hér hefði verið  eðlilegt að segja: Leki kom að bát/báti  undan Hólahólum.  Báturinn var ekki við Hólahóla. Hann var undan Hólahólum eða utan við Hólahóla eins og sagt er í  fréttinni. Í annarri undirfyrirsögn í sama blaði sama dag (bls. 4)  segir:  Alvarleg líkamsárás varð í miðbænum á laugardagskvöld.  Æ algengara að  sjá þessa meinloku eins og t.d.  bílvelta varð. Líkamsárásin varð ekki.

Ráðist var á mann. Ómar Ragnarsson hefur oft bent á þetta í sínum ágætu bloggskrifum.

 

Er enginn á Morgunblaðinu, sem hefur það hlutverk að  lesa yfir  fyrirsagnir, - að ekki sé nú talað um fréttir, svona almennt?

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1540

  Björn Jón Bragason skrifaði ((09.08.2014:

Sæll, Eiður. Mig langar að koma ábendingu á framfæri við þáttinn þinn um miðla og málfar, þar sem ég veit að þátturinn er mikið lesinn. Þannig er mál með vexti að ég, rétt eins og fleiri, notast við talhólf hjá Símanum hf. Þegar þangað er hringt er rödd sem les upp hversu mörg skilaboð sé að finna í talhólfinu hverju sinni. Röddin þylur upp: „Þú átt ein talskilaboð, tvenn talskilaboð, þrenn, fern o.s.frv.“ Á dögunum varð breyting á þessari tilteknu þjónustu Símans og um leið hefur textanum verið breytt og þess í stað er lesið: „Þú átt ein skilaboð, ,,tvö skilaboð”, ,,þrjú skilaboð”, ,,fjögur ....”  o.s.frv.“ Mér þykir þessi breyting með hreinum ólíkindum. Hjá fyrirtækinu virðast menn hafa skilið áður að orðið skilaboð er fleirtöluorð og ekki hægt að tala um ,,eitt skilaboð”, svo dæmi sé tekið, en einhverra hluta vegna ákveðið að breyta þessu. Þessi rangi texti sker í mín eyru og ég er sjálfsagt ekki einn um það. Með bestu kveðjum, Björn Jón.  Kærar þakkir, Björn Jón, -  vonandi sér Síminn sóma sinn í að breyta þessu til fyrra horfs, -  leiðrétta  mistökin.

 

 Á fréttastofu Stöðvar tvö halda menn áfram að kalla flugskeyti loftskeyti. Þar á bæ hafa menn  sennilega aldrei heyrt talað um loftskeytastöðina í Reykjavík, - hún var á Melunum. Loftskeyrastöðin var alls endis óvopnuð. í sömu frétt  á  Stöð tvö var leiðinda þolmynd.  Sagt var: Egyptalandsforseta er ekki treyst  af Hamas. Miklu betra hefði verið: Hamas treystir ekki Egyptalandsforseta.  Í fréttinni var sagt:  Vopnahléið varð ekki framlengt.  Vopnahléið var ekki framlengt.

 

Það var  ágætt, en kannski  dálítið óvenjulegt , orðalag í skjátexta í fréttum Ríkissjónvarps (09.08.2014) þegar sagt var:  Mikill  flaumur í gleðigöngunni.  Flaumur  er  hópur á hreyfingu, segir orðabókin. Fólksflaumur.

 

Í miðnæturfréttum Ríkisútvarps á laugardagskvöld (10.08.2014) var okkur sagt að ÍR hefði sigrað bikarkeppni. Það er erfitt að ná þessu. Undarlegt hvað menn eiga erfitt með að ná því að enginn sigrar keppni.

 

Það var ágætt hjá fréttastofu Ríkisíútvarpsins í hádeginu á mánudag (11.08.2014) að  tala um  framkvæmdastjóra Jafnréttisstofu.  Framkvæmdastýra, sem stundum hefur heyrst ,er  ámóta hallærislegt og  orðið  alþingiskona. Jafnréttisbarátta á villigötum. 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1539

 Molavin skrifaði (08.08.2014): "..sem lagst hafa á flótta" sagði í kvöldfréttum Sjónvarps (8.8.14) þar sem rétt hefði verið að segja "...sem lagt hafa á flótta." Það heitir að leggja á flótta, ekki að leggjast á flótta. – Satt og rétt, - Molavin þakkar bréfið.

 

Aftur og aftur sér maður, að fólk ruglar saman , eða skilur ekki muninn á sögnunum að kaupa og að versla. Í DV (8.-11.8.2014) er rætt við konu að nafni Tobba Marinós, en hún segir: ,,Það fer svolítið eftir því hvað þú ert að versla”. Hvað þú ert að kaupa. Ég fer út að versla. Ég ætla að kaupa í matinn. Í myndatexta með þessu auglýsingaviðtali í DV segir : ,,Rétt hjá er Magnolia bakaríið sem þær stöllur í þáttunum stunduðu stíft. Red Velvet bollakökurnar þar er ,,life-changing” ´´ Þetta er tilvitnun í ofangreinda konu. Hún slettir á okkur ensku að óþörfu og afbakar móðurmálið í leiðinni. Kökurnar er ekki ... Kökurnar eru ....

 

 Ekki heyrði Molaskrifari betur en að í tíu fréttum Ríkisútvarps á föstudagskvöld (08.08.2014) væri sagt að slys hefði orðið í Kaldadal. Það er löngu fast í málinu að segja á Kaldadal, ekki í Kaldadal. Sá sem segir í Kaldadal hefur sennilega aldrei farið þar um. Á wikipedia segir: ,,Kaldidalur er fjallvegur sem liggur frá Reyðarvatni innan Lundarreykjadals, milli Langjökuls og Oks til efstu bæja í Hálsasveit, innan við Húsafell, og síðan má halda áfram um Stórasand til Norðurlands.” Þar segir einnig:,, Á Kaldadal er Skúlaskeið, grýttur og erfiður kafli og er um hann sú þjóðsaga að maður sem Skúli hét hafi verið dæmdur til dauða á Alþingi fyrir einhverjar sakir en sloppið á hesti sínum, Sörla, og tekist að sleppa undan þeim sem hann eltu þegar hann reið þarna yfir. Um þetta orti Grímur Thomsen kvæðið Skúlaskeið.”

 

,, ... eftir mánuð af örvæntingarfullri leit,” var sagt í fréttum Ríkisútvarps klukkan 1800 á föstudagskvöld (08.08.2014. Ekki mjög vel orðað. Eftir örvæntingarfulla leit í mánuð, hefði verið betra.

 

Það ber ekki vott um mikla hugmyndauðgi í dagskrárgerð að endurflytja dægurmálaþætti á sama sólarhringnum eins og nú er gert á Rás eitt í Ríkisútvarpinu.

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1538

  Molavin skrifaði (07.08.2014): "Svakalegar markvörslur Hannesar í Noregi" segir í fyrirsögn á visir.is (7.8.14). Höfundur fréttarinnar er nafngreindur og þar með upplýst um vanþekkingu hans á meðferð eintöluorða.

Í ljósi þess að í liði fréttamanna hjá 365 eru ágætlega ritfærir fréttamenn er það leitt að vanþekking annarra á móðurmálinu skuli vera svo áberandi að það rýri tiltrú almennings á fréttastofunni. Ábyrgðin liggur hjá yfirmönnum. – Molaskrifari þakkar bréfið.

 

KÞ sendi Molum línu (07.08.2014). Hann benti á þessa frétt á mbl.is :

http://www.mbl.is/frettir/erlent/2014/08/07/neydarfundur_vegna_astands_i_irak/

 Hann segir: ,,Ég man ekki eftir því að hafa lesið frétt í íslenskum miðli sem er eins fjarri því og þessi að geta talist skrifuð á íslensku”. Molaskrifari bætir við: - Stór orð, en þetta er vissulega hörmung.

 

Af Smartlandi svokölluðu á mbl.is (07.08.2014):   Við skötu­hjú­in erum því orðin kinda­bænd­ur og erum við með 300 kindur.

Í fyrirsögn er réttilega talað um fjárbændur.

 

Hundurinn beit bréfbera síðasta sumar, hádegisfréttir Ríkisútvarps (07.08.2014). Orðalagið í fyrra sumar virðist ekki lengur til í orðaforða fréttamanna af yngri kynslóðinni.  Ævinlega er talað um síðasta sumar, e. last summer.

 

Marg umræddur ársgrundvöllur kom við sögu í fréttum Stöðvar tvö á fimmtudagskvöld (07.08.2014). Molaskrifara var snemma í sinni blaðamennskutíð kennt að forðast þetta orð í fréttaskrifum. Nú er það næsta daglegt brauð að heyra tala um ársgrundvöll, þegar miðað við  eitt ár.

 

Af fréttavef Ríkisútvarpsins (07.08.2014): Átta bátum var keyrt á flutningabílum til Hólmavíkur frá Ólafsvík í morgun og fleiri eru á leiðinni.  Átta bátum var keyrt!   Les enginn yfir?  http://www.ruv.is/frett/makrilbatum-ekid-a-bilum-til-holmavikur

 

Mazda slær við eigin markmiðum í Evrópu, er svolítið kjánaleg fyrirsögn á visir.is (07.08.2014). Sjá http://www.visir.is/mazda-slaer-vid-eigin-markmidum-i-evropu/article/2014140809468 Fréttin er heldur ekki mjög vel skrifuð. Annað dæmi um miður vel skrifaða frétt í sama miðli: Aukin eftirspurn eftir fílabeinum í Kína hefur valdið aukningu í veiðiþjófnaði og náttúruverndarsamtök óttast að það muni leiða til útdauða fíla. Hér hefði í samræmi við málvenju átt að tala um aukna eftirspurn, eða spurn, eftir fílabeini, -  ekki fílabeinum. Sjá: http://www.visir.is/kinverskir-verkamenn-sagdi-ogna-filum-i-keniu/article/2014140809395

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1537

 Málblómin dafna vel á þeim mikla fjóluakri mbl.is sem kallaður er Smartland Mörtu Maríu. Þetta er frá (06.08.2014): For­bes list­inn yfir hæst launuðustu leik­ara Hollywood vakti at­hygli þess að kon­ur fá enn lægri laun en karl­ar ... Í texta sem er samtals sjö línur eru orðin hæstlaunuðustu notuð í fimm línum! - Hæst launuðu væri alveg nóg. Fyrir nú utan að tala um að vekja athygli þess, - vekja athygli á því .

Sá sem svona skrifar ætti ekki að fá að ganga laus innan um tölvur og lyklaborð þar sem skrifað er efni er til birtingar á netinu.

Sjá: http://www.mbl.is/smartland/stars/2014/08/06/haest_launudu_leikkonur_hollywood/

 

Í frásögn af efni Spegilsins í Ríkisútvarpinu (06.08.2014) var sagt, að sú ákvörðun norsku konungshjónanna að senda dóttur sína í einkaskóla hefði hneykslað norsku þjóðina. Þokkalega upplýstir fréttamenn ættu að vita, að norsku konungshjónin eiga ekki börn á skólaaldri. Hér var átt við krónprinsinn og konu hans.

 

T.H. benti á þessa frétt á mbl.is (05.08.2014) : http://www.mbl.is/frettir/innlent/2014/08/05/afall_ad_upplifa_sig_bjargarlausan_4/

Í fréttinni er þetta að finna: "Þú finn­ur hvað fólk horf­ir á þig al­var­leg­um aug­um og veist að það er eitt­hvað mikið að. En ég var flog­inn í bæ­inn og það náðist að gera við mig." -  Fleira mætti þarna benda á. Í millifyrirsögn segir: Fór betur en á horfði. Hefði auðvitað átt að vera: Fór betur en á horfðist.

 

Úr dagskrárkynningu á fésbók frá sjónvarpsstöðinni Skjá einum (06.08.2014): Tveir láta lífið í bílasprengju og grunar leynilögreglunni að kólumbískur vandræðagemsi sé á bak við verknaðinn.

 Leynilögreglunni grunar! Það var og. Snillingar á Skjá einum.

 

Mikil fjölgun starfa í sjávarútveg, segir í fyrirsögn á fréttavef Ríkisútvarpsins (07.08.2014) Hvar er gæðaeftirlitið, fréttastjóri?

Mikilfjölgun starfa í sjávarútvegi.

 

Sýnishorn  af skrifum á Smartlandi mbl.is (05.08.2014) : Tobba seg­ist vera búin að mastera kerfið í dag og geri þetta mjög skipu­lega. „Kort af outlett­inu, mappa með af­slátt­ar­miðum ,,,   Morgunblaðið alltaf til  fyrirmyndar um vandað málfar, eða hvað? Sjá: http://www.mbl.is/smartland/tiska/2014/08/05/kann_ad_gera_supergod_kaup_i_new_york/

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1536

 Það var ágætt að fá nýja heimildamynd um   hið dularfulla hvarf  þotu Malaysian Airlines, flugs MH370, í Ríkissjónvarpinu á mánudagskvöld (04.08.2014). Sárasjaldan sjást þar  heimildamyndir um nýlega atburði. Á undan myndinni var sýnd dýralífsmynd frá BBC.   Myndin um hvarf B-777 vélarinnar var einnig frá BBC. Einhver ætti að gauka því að innkaupastjórum í Efstaleiti, að fleiri framleiða góðar heimildamyndir en BBC.

 

Í texta með heimildamyndinni sem nefnd er hér að ofan var talað um að mappa flug. Var ekki átt við að kortleggja flugleið? Sögnin að mappa er ekki til í íslensku.

 

18 ölvunarakstrar í ár – 4 í fyrra , sagði á forsíðu mbl.is (04.08.2014). Orðið akstur er eintöluorð. Ekki til í fleirtölu.

 

Molalesandi skrifar og vitnar í Bílablað Morgunblaðsins (05.08.2014): ,,Ekki er öllum gefið að segja vel frá og oft klúðra blaðamenn góðum sögum. Þó þetta sé ekki alveg reyndin með áhugaverða grein um akstur á hringveginum á einum tanki í bílablaði Morgunblaðsins hefði mátt gera betur. Höfundur skrifar textann án skipulagningar og virðist ekki þjáður af sjálfsgagnrýni. Sagan er illa fram sett, málfarið er slakt og villurnar margar. Hér er dæmi:

 

„Ekkert slíkt var gert heldur var ekið rólega af stað og ekið hvorki of hægt né of hratt sem leið lá norður
á Akureyri.
Veðrið á þessum kafla var vægast sagt ömurlegt í svona sparakstur.“

Og ...
„Ég var síður en svo sátt við eyðslutölurnar á fyrsta leggnum. Auðvitað hafði óhagstæður vindblástur haft eitthvað að segja en svo gat líka vel verið að bílstjórinn hefði hreinlega ekki tamið sér almennilegan sparakstursstíl.“

 

Hvað finnst þér um ofangreint?” - Molaskrifari ætlar að vera spar á orðin, en honum finnst ekki mikið til um þessi skrif. Hefur þó séð það svartara!

 

Á mbl.is (04.08.2014) var stutt frétt með fyrirsögninni: Viðbúnaður vegna flapsavanda. Molaskrifari er næsta viss um að fjölmargir lesendur skildu hvorki fyrirsögnina né fréttina. Þannig á ekki að skrifa fréttir. http://www.mbl.is/frettir/innlent/2014/08/04/vidbunadur_vegna_flapsavanda/

Molaskrifara minnir að hann hafi heyrt það sem hér er kallað flapsar kallað vængbörð, en það er sá hluti vængs á flugvél sem hægt er að hallastilla og breyta þannig loftstreymi um vænginn við   flugtak og lendingu þannig að unnt er að nota styttri braut en ella væri og hafa stjórn á vélinni á minni hraða í aðflugi og lendingu. Þetta er ófullkomin skýring, enda Molaskrifari ekki mjög flugfróður.

Sjá hér skýringu á wikipedia. http://en.wikipedia.org/wiki/Flap_(aeronautics)

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1535

  KÞ benti á eftirfarandi á bleikt.is á pressan.is (04.08.2014) og segir: ,, Óttalega er þetta hringlóttur texti”: http://bleikt.pressan.is/lesa/hefur-thu-verid-ad-opna-appelsinu-vitlaust-allt-thitt-lif/

,,Hvernig opnar þú appelsínu? Þetta er nú jafnvel ekkert stórmál en ef þú gætir einfaldað þér klístraðar hendur og appelsínusafann á bolnum þínum þá væri lífið örlítið einfaldara ekki satt? Hér er frábær leið til að opna appelsínu á einfaldan hátt og til að toppa það þá græðir þú fallegt appelsínugult hringlótt kerti úr börkinum! Sniðugt ekki satt?” Molaskrifari þakkar sendinguna. Það er ekki öll vitleysan eins! Hér er það ekki eitt. Heldur næstum allt.

 

Fimmta ferð Herjólfs er að skríða hérna upp að Landeyjahöfn, sagði fréttamaður í hádegisfréttum Ríkisútvarps (04.08.2014). Ekki mjög vandað málfar.

 

Guðmundur sendi Molum línu (04.08.2014) og segir: ,, Ég held að þú hefðir áhuga á að lesa þetta:
"... háttvirtur formaðurinn telur ekkert liggja á. Ég er hjartanlega ósammála því, það bráðliggur á því,“ skrifar Helgi Hrafn Gunnarsson, þingmaður Pírata, á Facebook. - Svo ákveðinn er þingmaðurinn í að beygja sig ekki í málinu að hann flaskar alveg á að fallbeygja "háttvirtur formaðurinn", Tímanna tákn? En þetta er auðvitað hans eigin fésbókarsíða.”. Molaskrifari þakkar sendinguna, en áttar sig ekki alveg á athugasemdinni. Formaðurinn telur að ekkert liggi á ???

Sjá: http://www.visir.is/article/20140803/FRETTIR01/140809812

 

Fólki er ráðlagt frá því að fara ... var sagt í hádegisfréttum Bylgjunnar (04.08.2014). Ekki rangt. En hefði hekki farið betur á því að segja , til dæmis: Fólki er ráðlagt að fara ekki , - eða fólki er ráðið frá því að fara ? Sama orðalag var notað í fréttum Stöðvar tvö um kvöldið. Fréttin sjálfsagt notuð óbreytt frá því fyrr um daginn.

 

Hversvegna er ekki hægt að hafa notalega tónlist á dagskrá á Rás eitt milli klukkan ellefu og tólf á kvöldin å virkum dögum ? Í staðinn fyrir endurfluttan dægurmálaþátt frá því fyrr um daginn. Ekki tekur betra við eftir miðnættið. Þá er endurfluttur Spegillinn frá því fyrr sama kvöld. Þetta er ekki mjög góð dagskrárgerð að mati Molaskrifara. Hvað segja hlustendakannanir? Hve margir og hvaða aldurshópar eru að hlusta á Rás eitt milli ellefu og miðnættis? Fróðlegt væri að fá að heyra það, en sennilega er það leyndarmál gagnvart okkur hlustendum eins og svo margt í rekstri þessarar stofnunar, sem á að heita í eigu þjóðarinnar.

 

Það var rangt, sem sagt var í fréttum Stöðvar tvö á mánudagskvöld, (04.08.2014) að fyrri heimsstyrjöldinni hefði lokið 11. desember 1918. Fyrri heimsstyrjöldinni lauk ellefta nóvember 1918. 11.11. 1918 Reyndar mun vopnahléssamningur hafa verið undirritaður klukkan 11 00 þann dag. Það á að hafa söguna rétta.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1534

  Alvarleg líkamsárás kom inn á borð lögreglunnar í nótt, var sagt í hádegisfréttum Bylgjunnar (02.08.2014). Molaskrifara finnst þetta heldur klaufalega orðað. Nema slegist hafi verið á borði lögreglunnar. Annarsstaðar var að sagt að fimmtíu mál hefðu komið inn á borð lögreglunnar. Hlýtur að vera nokkuð stórt borð. Málin komu til kasta lögreglunnar, hefði til dæmis mátt segja.

 

Engar seinni fréttir í Ríkissjónvarpi á mánudagskvöld (04.08.2014). Alltaf verið að bæta þjónustuna.

 

Í skrifum um lekamálið í innanríkisráðuneytinu er aftur og aftur talað um ráðherra eigi að stíga til hliðar. Molaskrifara finnst þetta dálítið enskulegt orðalag. Hversvegna er ekki sagt að ráðherra eigi að segja ef sér eða biðjast lausnar. Það er það sem átt er við.

 

Flugfélagið, sem kennir sig við Ísland, Flugfélag Íslands heldur áfram að birta auglýsinguna: Fljúgðu á Festival. Þessi auglýsing er félaginu ekki til sóma eins og hér hefur áður verið nefnt. Hún er hrærigrautur úr íslensku og ensku. Orðið festival er ekki íslenska.

 

Minnast aldarafmæli stríðsins sagði í fyrirsögn á mbl.is (03.08.2014). Þetta átti auðvitað að vera: Minnast aldarafmælis stríðsins. Í sama miðli, sama dag var sagt frá manni, sem sofnaði undir stýri, og ók á vegrið. Í fréttinni var sagt að þetta hefði gerst klukkan hálf sjö í nótt. Samkvæmt íslenskri málvenju hefði auðvitað átt að segja: Klukkan hálf sjö í morgun. Sjá: http://www.mbl.is/frettir/innlent/2014/08/03/sofnadi_vid_akstur_og_keyrdi_a_vegrid/

 

Hann er lífsseigur ársgrundvöllurinn ,sem stundum hefur verið nefndur hér í Molum. Þeir sem eru í ferðaþjónustu á ársgrundvelli, sagði fréttamaður í hádegisfréttum Ríkisútvarps á sunnudegi (03.08.2014). Þeir sem sinna ferðaþjónustu, starfa við ferðaþjónustu, allt árið hefði verið bæði einfaldara og betra.

 

Orðalagið í fyrra sumar, í fyrra vetur virðist á miklu undanhaldi og er sennilega að hverfa. Það virðist yngra fólki ekki tamt. Þess í stað er sagt, eins og í sunnudags mogga (03.08.2014): ,, ... var veitt pólitískt hæli í Rússlandi síðasta sumar og .... “ . Þetta gætu verið áhrif úr ensku. En Molaskrifari saknar þess svolítið að varla skuli lengur heyrast sagt í fyrra sumar eða í fyrra vetur. Svona er hann nú mikið málfars íhald.

 

Vanir fréttamenn/fréttaþulir eiga ekki að tala um LandeyjaRhöfn, eins og gert var í fréttum Stöðvar tvö á mánudagskvöld (04.08.2014). Molaskrifari veit ekki betur en höfnin heiti Landeyjahöfn.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1533

  Í kvöldfréttum og Spegli Ríkisútvarps (31.07.2014) var margsinnis talað um gjaldfall Argentínu. Molaskrifari er sammála málglöggum hlustanda, sem vakti athygli hans á þessu. Hann sagði: Skuldir geta gjaldfallið,en skuldarar gjaldfalla ekki. Greiðslufall verður, ef skuld er ekki greidd á réttum tíma. Skuldir sem komast í vanskil, eru gjaldfallnar. Skuldarar gjaldfalla ekki. – Allt var þetta miklu betur orðað í frétt Ríkissjónvarpsins sama kvöld um sama efni. Óaðfinnanlegt.

 

Sami hlustandi vakti athygli á því að í íþróttafréttum sjónvarps nýlega hefði verið sagt að knattspyrnuliðið Arsenal hefði verið kennt við eða orðað við tiltekinn leikmann. Hann sagðist hafa haldið að þetta ætti að vera á hinn veginn; - tiltekinn leikmaður hefði verið orðaður við knattspyrnulið. Rætt hefði verið um að hann gengi til liðs við félag eða lið. – Rétt

 

Honum vantaði góða nálgun, sagði ungur maður á Stöð tvö (30.07.2014). Hann var að kynna þætti sem hann ætlaði að gera um þjóðhátíð í Eyjum. Ekki hlusta menn grannt á þeim bæ á efni, sem ætlað er að vekja athygli á dagskránni. Þetta vekur vissulega athygli á dagskránni, en kannski ekki jákvæða athygli hjá öllum.

 

Ísland er inni, sagði ferðamálastjóri í viðtali í Ríkissjónvarpinu (31.07.2014). Hún átti við að Ísland væri vinsæll áfangastaður ferðamanna. Að segja að Ísland sé inni er hráþýdd enskusletta. Ég er ekki viss um að allir hafi skilið hvað konan var að segja.

 

Af dv.is (31.07.2014): Þeir sem vilja styðja fjölskylduna er bent á eftirfarandi reikningsnúmer: Enn eitt dæmið um að fréttaskrifari man ekki, eða veit ekki, hvaðan hann fór, þegar hann lýkur setningunni. Merkir sér fréttina reyndar með fullu nafni! ,,Þeim sem vilja styðja fjölskylduna er bent á eftirfarandi reikningsnúmer:’’

 

Í kvöldfréttum Stöðvar tvö á föstudagskvöld (01.08.2014) var sagt að tjaldstæðin á Akureyri væru vel mönnuð. Ekki efast Molaskrifari um það þar hafi verið hið mesta mannval, - enda þótt um utanbæjarmenn væri að ræða. (Í gamla daga var það alltaf tekið fram í fréttum um innbrot á Akureyri, að þar hefði utanbæjarmenn verið að verki.) En sennilega var ekki verið að tala um ágæti þess fólks sem var á tjaldstæðunum, heldur verið að reyna að segja okkur að þar væri margt um manninn um þessa miklu ferðahelgi.

 

Næstu Molar á þriðjudag.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1532

  Tafir hafa nú þegar ollið alvarlegum truflunum, var sagt í hádegisfréttum Ríkisútvarps á miðvikudag (30.07.2014). Sögnin að valda veldur sumum fréttaskrifurum erfiðleikum. Málfarsráðunautur Ríkisútvarpsins ræður greinilega illa við að kenna mönnum rétta notkun sagnarinnar. Tafir hafa nú þegar valdið alvarlegum truflunum. Sögnin að olla er ekki til í íslensku.

 

Sölvi fréttaþulur Stöðvar tvö (30.07.2014) fær plús fyrir að tala um síðasta eftirlifandi flugliðann úr áhöfn Enola Gay, B-26 flugvélarinnar sem notuð var við að varpa kjarnorkusprengju á Hiroshima. Fær plúsinn fyrir að tala ekki um áhafnarmeðlim.

 

Halla Oddný Magnúsdóttir fréttamaður á fréttastofu Ríkisútvarps er fínn fréttaþulur. Stundum heyrist hinsvegar í nýliða á fréttastofu Ríkisútvarps sem hefur þannig rödd að Molaskrifari hrekkur í kút í hvert skipti sem röddin berst honum að eyrum á bylgjum ljósvakans ( eins og einu sinni var alltaf sagt).

 

K.Þ. benti (30.07.2014) á þessa frétt á mbl. is http://www.mbl.is/frettir/innlent/2014/07/30/dron_a_flugi_yfir_thjodhofdingjum/

Hann spyr: Hvar í Þingvöllum ætli þjóðgarðurinn sé? Í Þingvöllum. Það var og. Von er að spurt sé.

 

Trausti vísar til fréttar (30.07.2014) á svokölluðu Smartlandi, hinum sífrjóa málfjóluakri mbl.is : http://www.mbl.is/smartland/heilsa/2014/07/30/lifid_tok_u_beygju_eftir_ars_sykurleysi/

 Hann segir: ,,Í þessari grein er ýmislegt illa þýtt, en þetta held ég að sé þó toppurinn:
"Syk­ur­inn er bætt­ur í vör­urn­ar". Molaskrifari þakkar sendinguna. Ekki er þetta gæfulegt frekar en svo margt annað sem mbl.is otar að lesendum sínum undir fyrirsögninni Smartland og umsjónarmenn virðast ekkert sjá athugavert við.

 

Ríkissjónvarpið hefur forskot á Stöð tvö í læknasápusamkeppninni. Á miðvikudagskvöldið (30.07.2014) byrjaði Ríkissjónvarpið að sýna læknasápuþáttaröð klukkan 20 00. Samskonar sápa hófst á Stöð tvö klukkan 2020. Stöð tvö sýnist Molaskrifara vera með vikulegan vampíruþátt. Ríkissjónvarpið mun sennilega svara því með álíka vampíruþáttum á svipuðum tíma. Þar á bæ hafa menn langalengi haft sérstakt dálæti á vampírukvikmyndum eins og stundum hefur verið vikið að hér í Molum.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG